شئ من الحب

[Tarek Elemary]

طعم الكلام وياك غريب

بيشدنى لبحره العجيب

بيهزنى ... بيضمنى

و سؤالى ليك .. بتحبنى؟

و مافيش مجيب

***

غيرتنى مابقيتش أنا

دوقتنى طعم الهنا

و رمانى سحرك

فى قلب حضنك

نسيت معاه كلمة أنا

***

يا حلم عمرى ما عشتهوش

يا ضحكة باينة ع الوشوش

يا علتى و إنت الدوا

يا بحر عطشان ما إرتوى

يا جنتى من غير رتوش

***

لو كان دا حلم يا ريت يطوول

كل اللى نفسه ياريت ينوول

نفسى الزمان بينا يقف

أنا وإنت و لايبقى عزوول

***

مابين عنيك بالمح غُنى

يا قمر يغير منه السنى

يا فرحتى بعد العذاب

يا حضن بعد طول غياب

يا حلم عمرى و المنى

***

أنا ليك بإحساسى هاعيش

يا حلم نفسى ما ينتهيش

أنا بيك أنا

نسيت الضنى

فى الدنيا دى غيرك ماليش

[Tarek Elemary]

طعم الكلام

طعم الكلام وياك غريب

بيشِدنى لبحره العجيب

بيهِزنى ... بيضُمنى

و سؤالى ليك .. بتحبنى؟

و مافيش مُجيب

***

غيَّرْتِنى مابقِيتْش أنا

دوَّقتنى طعم الهنا

و رمانى سِحرك

فى قلب حُضنك

نِسيت معاه كلمة أنا

***

يا حلم عمرى ما عِشتهوش

يا ضِحكة باينة عَ الوشوش

يا عِلِّتى و إنت الدوا

يا بحر عطشان ما إرتوى

يا جنِّتى من غير رتوش

***

لو كان دا حلم يا ريت يِطُوول

كل اللى نِفسُه ياريت ينوول

نِفسى الزمان بينَا يُقَفْ

أنا وإنت و لايبقاش عزوول

***

مابين عنيك بالمح غُنى

يا قمر يِغِير منه السَنى

يا فرحتى بعد العذاب

يا حضن بعد طول غياب

يا حلم عمرى و المنى

***

أنا ليك بإحساسى هاعيش

يا حلم نفسى ما ينتهيش

أنا بيك أنا

نسيت الضنى

فى الدنيا دى غيرك ماليش

[Tarek Elemary]

صوتك

صوتك نسيم مليان دفا


صوتك أحن من الوفا


و كأنه نجم فـ ليلى لاح


رمالى نوره و إكتفى


***


و الحب مافيهوش إقتناع


مافيهوش وشوش ورا القناع


مافيهوش حقيقة غير الهوى


مافيهوش مظاهر أو خداع


***


خلَّانى ليه أفرِد شراع


لمركبى و يقول وداع


أنا قلبى مرسى


و هوه ينسى


أنا إشتريته


و هوه باع


***


عيِّشنى فى الحلم الكبير


و كلام كأنه خيوط حرير


و بقيت مصدق دنيتى


إنتى الأميرة و أنا الأمير


***


يا قلب بيدق بهوى


يا فرحتى أما نكون سوى


يا عمر عطشان من سنين


و كأنه عمره ما إرتوى

[علاء طه ياسين]

الأخ الأكبر / طارق العمري
انا طبعا بدون تعليق .. لأنك حين تكتب أنا أقرأ .. وأتذوق .. وأشعر .. وأحس .. كأنك تكتب عني .. وعما بداخلي .. غنوتين ولا أروع .. قصيدتين ولا أجمل .. ترتقي باحساسك فتلامس السماء ..
اسمح لي بمشاركة بسيطة ...........
يا حبيبتي ألـف واحد
عند بابك مشغولين
اللي زاد الشـوق ف قلبه
واللي زاد فيه الحنين
وإنتي مشـغولة بمين
شايلة مين
جوة عينيكي الطيبـين
علاء

[abuzahda]

صوتك نسيم مليان دفا


صوتك أحن من الوفا


و كأنه نجم فـ ليلى لاح


رمالى نوره و إكتفى

هذا ، ما قد حدث
فِعلاً

[Tarek Elemary]

المشاركة الأصلية كتبت بواسطة abuzahda

هذا ، ما قد حدث

فِعلاً

أو تدرى بما جرى؟
أحمد الله أنك شعرت بما
هو كامنٌ فى نفسى

[Tarek Elemary]

المشاركة الأصلية كتبت بواسطة علاء طه ياسين

يا حبيبتي ألـف واحد
عند بابك مشغولين
اللي زاد الشـوق ف قلبه
واللي زاد فيه الحنين
وإنتي مشـغولة بمين
شايلة مين
جوة عينيكي الطيبـين

حبيبى علاء يس
و الله لو ينفع استلفهم بس لو خدتهم مش هاردهم
من جمالهم و رقتهم

إنت فعلا نبتة من طين البلد
شرقانة للنور و الأمل
و بكرة ليك
و الحلم بِيِنَا بيِتْوَلَد

[علاء قدرى]

صديقى العزيز طارق
اولا اشتقت اليك كثيرا
ثانيا: (طعم الكلام) (صوتك) (عنيكى)
كلام جميل مغنى نفسه بنفسه
امال اية اللى بيطاردونا بية اولاد الايه فى التلفاز؛والفضائيات؛وفى كل المناسبات؟؟؟؟؟؟
هو الموضوع ايه بالضبط؟؟؟؟
لماذا اصبح اختيار الكلمات السفيهه ؛و اللحن الالى؛و المطربين المخنثين (هو الطبق المفضل) لتقديمه للمجتمع؟؟
هو العيب فين بالضبط؟؟؟
اعتقد ان المرسل و المستقبل فى حالة ضياع (عن قصد)

[علاء طه ياسين]

بص بقا يا طارق بك ..
كلامك الحلو بيخليني أتمتع .. واكتب حتت صغيرة كده علي استحياء .. وعلي أدي .. وبمناسبة عنيكي .. اقبل مني المشاركة البسيطة دي ..
عنيكي حنينين
وغلابة وطيبين
وباشوفك نجمة عالية
وباشوفني ولد حزين
وعشقتك مرة واحدة
وسكن قلبي الحنين
ممكن لا مؤاخذة يعني
ألقي عيونك تساعني
واسكن لو حتي عين
علاء ياسين

[سعدالشرقاوى]

استاذى/طارق العمرى
يعنى جيت متاخر والنت معاكس
وماخليتوليش حاجه اقولها
بعد خلاصة الجمال والحلاوه
بس لازم اعبّر عن احساسى
فاسمح لى اوسع كم الجلابيه واقول

خليّك دايما باصصلى
بعنيك المليانين
رقه وطيابه يابا
ونهر من الحنين
,,,
السحروالمحبه
جوّه عيونك ساكنين
اصلك قدرى ونصيبى
وحبيب الروح والعين
,,,
عنيك تصنع اغانى
بتعيش طول السنين
الحب اللى انت قلته
قول لى بيروح لمين
,,,
وزّعته بالعداله
للناس المحرومين
ادّينى جرعه منه
انت وعلاء ياسين