الكبار وألاعيبهم الصغيرة!

[رائد عبد السلام]

الأخوة الأحباء..
أبو عزة
غواص النغم
صوت الموسيقي
محمد عبد الله (حارس الفنار)
لولي ......... إنتي في الآخر علشان ده موضوعك...(الضيوف الأول)
استكمالا لما قامت لولي بفتح موضوعه من بعض صغائر أهل الفن ..والتي تزيدنا حبا فيهم وفي أنانيتهم الفنية التي تجعلهم - من وجهة نظرهم - يستمرون في التربع علي عرش فنهم ..
وجدت عندي كتابا قديما لصحفي وسيناريست مصري قديم هو المرحوم جليل البنداري...وكان هذا الكاتب محببا لأهل الفن لما يتميز به من بساطة في التعبير تقترب أحيانا من الصفاقة ..!! حتي أن السيدة أم كلثوم كانت تقول له : إنت مش جليل البنداري..إنت جليل الأدب !!
و ده غلاف الكتاب :

ودي فقرة من الكتاب :

ورمضان كريم
أيها الأحبة

[غواص النغم]

استاذ رائد
مساء الورد عليك
كنت مخبي الكاتاب ده فين بقى؟؟الف شكر لك
لالالا احنا عايزين نشوف الكتاب ده في قسم المكتبة علشان نقرأ الكتاب كله
تحياتي
الكاتب الصحفي والشاعر الكبير جليل البنداري طبعا له حكايات كثيره جدا

[هاله]

المشاركة الأصلية كتبت بواسطة رائد المصري

وجدت عندي كتابا قديما لصحفي وسيناريست مصري قديم هو المرحوم جليل البنداري...وكان هذا الكاتب محببا لأهل الفن لما يتميز به من بساطة في التعبير تقترب أحيانا من الصفاقة ..!! حتي أن السيدة أم كلثوم كانت تقول له : إنت مش جليل البنداري..إنت جليل الأدب !!

جميل يااستاذ رائد ياشاعر يا جميل
انت كنت مخبيه فين الكتاب ده
بجد جميل بس حضرتك خبيت الباقى فين ؟
وبعيدا عن موضوع الكتاب الى حضرتك جبته يااستاذ رائد انا ليا تحفظ صغير جدا وعارفه انه ممكن يفتح عليا ابواب من الهجوم على رايى بس ده انا مقتنعه بيه من زمان بصراحه ومش قادره اسكت اكتر من كده
فى سياق كلام حضرتك ا / رائد اوضحت ان السيده ام كلثوم قالت للكاتب جليل البندارى" إنت مش جليل البنداري..إنت جليل الأدب !! " يعنى المفروض دى خفه دم مثلا ينضحك على الكلام ده؟؟
انا قلت رايى قبل كده فى موضوع طرائف ام كلتوم فى هذا الرابطhttp://www.sama3y.net/forum/showthread.php?t=12017
وانى شايفاها قله ذوق مش خفه دم ابدا لما تهين رجل مهما علا قدره او صغر علشان تضحك حضرتها ويتقال خفه دم

[رائد عبد السلام]

أولا يا ست البنات ..مساء الخيرات -علي رأي الأستاذ يوسف أبو سالم- طبعا يالولي هانم إنتي ست العارفات إن الست أم كلثوم ماكانتش مجرد مطربة ..دي كانت أسطورة ..وملكة متوجة علي عرش أصحاب العروش وعلي رأي العبد لله قلت عنها في بعض أبياتي:
نورك ياست الكل نوّر في الدروب
عن خمر آهاتك أنا ما قدرت أتوب
ويدوب كلامي ..وأغلي منه يدوب
فلاحة مصرية وعصرية
شجرة دهب ومفرّعة مواويل
وسط الهوانم....... قيصرة
وإحنا صفوف ..... بنميل

لو تسمعي بتأمل كلام الناس اللي عاصروها ..تتأكدي إن أي باشا أو رئيس أو ملك ..كان بيخطب ودّها وكان ليها تأثير عجيب علي الناس ...وإحنا في أمثالنا بنقول : حبيبك يبلع لك الزلط ..ودي بقي مش حبيبة وبس..دي كانت سلطانة القلوب .

تحياتي ...

[رائد عبد السلام]

أخويا وحبيب قلبي منعم
رمضان كريم يا باشا ..
وحشتنا ووحشتنا المغارة ..هو علي بابا خدها منك ، ولا راحت في الخصخصة
اشتقنا لتحفك وكنوزك
تحياتي.........

[صوت الموسيقى]

المشاركة الأصلية كتبت بواسطة لولى76

جميل يااستاذ رائد ياشاعر يا جميل

انت كنت مخبيه فين الكتاب ده
بجد جميل بس حضرتك خبيت الباقى فين ؟
وبعيدا عن موضوع الكتاب الى حضرتك جبته يااستاذ رائد انا ليا تحفظ صغير جدا وعارفه انه ممكن يفتح عليا ابواب من الهجوم على رايى بس ده انا مقتنعه بيه من زمان بصراحه ومش قادره اسكت اكتر من كده
فى سياق كلام حضرتك ا / رائد اوضحت ان السيده ام كلثوم قالت للكاتب جليل البندارى" إنت مش جليل البنداري..إنت جليل الأدب !! " يعنى المفروض دى خفه دم مثلا ينضحك على الكلام ده؟؟
انا قلت رايى قبل كده فى موضوع طرائف ام كلتوم فى هذا الرابطhttp://www.sama3y.net/forum/showthread.php?t=12017

وانى شايفاها قله ذوق مش خفه دم ابدا لما تهين رجل مهما علا قدره او صغر علشان تضحك حضرتها ويتقال خفه دم

اتفق معاكى يا لولى فى كل كلمة قلتيها...فيه فرق رهيب بين بلع الزلط لأجل المحبة زى ما بيقول الاستاذ رائد و بين الفرعنة على خلق الله لمجرد ان الواحد مميز فى مجاله فيفتكر انه خلاص محدش يقدر يرفض اى تصرف من تصرفاته...نفس الكلام ينطبق على عبد الوهاب وعلى عبد الحليم اكتر منه

[هاله]

المشاركة الأصلية كتبت بواسطة رائد المصري

لو تسمعي بتأمل كلام الناس اللي عاصروها ..تتأكدي إن أي باشا أو رئيس أو ملك ..كان بيخطب ودّها وكان ليها تأثير عجيب علي الناس ...وإحنا في أمثالنا بنقول : حبيبك يبلع لك الزلط ..ودي بقي مش حبيبة وبس..دي كانت سلطانة القلوب .

تحياتي ...

اخى العزيز ا / رائد
بالاضافه لكلام نور
فمش معنى ان الكل بيخطب ودها او بيحبها انها تجعل منهم ماده للسخريه
والمفروض انهم يقبلوا ويفرحوا بمانالوا من شرف عظيم
هو المفروض ان الناس لو حبت شخص ما يبقى هو يستغل حبهم ويعمل دمه خفيف عليهم

[رائد عبد السلام]

أختي العزيزة ...فراشة المنتدي لولي
يقول ابن حزم في كتابه المشهور :
(طوق الحمامة في الألفة والألّاف)
(إن الحب يصنع المعجزات ..فكم من بخيل ...تكرّم
..وكم من جبان تشجّع .)
ثم يروي قصة ولهه بجارية أندلسية ووصف مشاعره بطريقة مبدعة -علما بأن كتابه كان في العصر الأندلسي .
ورغم تقواه وورعه إلا أن الحب له سلطان علي ذوي النفوس الحسّاسة الشاعرة فقال بأن هذه الجارية قد وقعت في قلبه حتي كان لا يأنس إلا بها ولا يرتاح إلا بمرآها.
مازلت عند رأيي بأن المحبوب له سلطان علي المحبّ بل
يجد المحبّ لذّة في مداعبات محبوبه.. ويقبل منه ما لايقبله من غيره ..
إن سر عدم الارتياح الذي كان بين السيدة أم كلثوم والسيدة جيهان السادات كان نابعا من جرأة أم كلثوم علي مداعبة الرئيس السادات ..بل ..من قبوله لهذه المداعبات وعدم غضبه منها ...وقد كتب الصحفي الكبير محمد وجدي قنديل : أن السيدة ام كلثوم كانت في ضيافة الرئيس في استراحة القناطر الخيرية وكانت تجلس في الحديقة مع السيدة جيهان وإحدي الصديقات ..وخرج إليهم الرئيس يرتدي بذلة غاية في الأناقة كعادته وهي جاكت أسود اللون وبنطلونا أبيض..فضحكت ثومة وقالت له : إنت عارف ياأبو الأنوار إنت عامل زي الشجر اللي علي النيل لما بيدهنوه جير من تحت ....!!
وأغرق الرئيس في الضحك ..بينما قامت السيدة جيهان غاضبة ..وقالت للصديقة المشتركة بلغي أم كلثوم أنه يوجد حدود للكلام مع الرئيس..ثم بدأت تطلق علي نفسها :سيدة مصر الأولي..فقد كان معروفا أن كلمة (السيدة) في مصر ..تعني فقط : أم كلثوم
أخيرا: أتذكر ونحن أطفال أننا كنا نهدي أمهاتنا في عيد الأم تخيلي ...ماذا ؟
كانت الهدية كروت بوستال ملونة تحمل صورة أم كلثوم وهي جالسة بين الأزهار!!
عذرا علي الإطالة..
- تري أين اختفي منعم وصوت الموسيقي؟؟
تحياتي.......

[صوت الموسيقى]

المشاركة الأصلية كتبت بواسطة رائد المصري

أختي العزيزة ...فراشة المنتدي لولي

يقول ابن حزم في كتابه المشهور :
(طوق الحمامة في الألفة والألّاف)
(إن الحب يصنع المعجزات ..فكم من بخيل ...تكرّم
..وكم من جبان تشجّع .)
ثم يروي قصة ولهه بجارية أندلسية ووصف مشاعره بطريقة مبدعة -علما بأن كتابه كان في العصر الأندلسي .
ورغم تقواه وورعه إلا أن الحب له سلطان علي ذوي النفوس الحسّاسة الشاعرة فقال بأن هذه الجارية قد وقعت في قلبه حتي كان لا يأنس إلا بها ولا يرتاح إلا بمرآها.
مازلت عند رأيي بأن المحبوب له سلطان علي المحبّ بل
يجد المحبّ لذّة في مداعبات محبوبه.. ويقبل منه ما لايقبله من غيره ..
إن سر عدم الارتياح الذي كان بين السيدة أم كلثوم والسيدة جيهان السادات كان نابعا من جرأة أم كلثوم علي مداعبة الرئيس السادات ..بل ..من قبوله لهذه المداعبات وعدم غضبه منها ...وقد كتب الصحفي الكبير محمد وجدي قنديل : أن السيدة ام كلثوم كانت في ضيافة الرئيس في استراحة القناطر الخيرية وكانت تجلس في الحديقة مع السيدة جيهان وإحدي الصديقات ..وخرج إليهم الرئيس يرتدي بذلة غاية في الأناقة كعادته وهي جاكت أسود اللون وبنطلونا أبيض..فضحكت ثومة وقالت له : إنت عارف ياأبو الأنوار إنت عامل زي الشجر اللي علي النيل لما بيدهنوه جير من تحت ....!!
وأغرق الرئيس في الضحك ..بينما قامت السيدة جيهان غاضبة ..وقالت للصديقة المشتركة بلغي أم كلثوم أنه يوجد حدود للكلام مع الرئيس..ثم بدأت تطلق علي نفسها :سيدة مصر الأولي..فقد كان معروفا أن كلمة (السيدة) في مصر ..تعني فقط : أم كلثوم
أخيرا: أتذكر ونحن أطفال أننا كنا نهدي أمهاتنا في عيد الأم تخيلي ...ماذا ؟
كانت الهدية كروت بوستال ملونة تحمل صورة أم كلثوم وهي جالسة بين الأزهار!!
عذرا علي الإطالة..
- تري أين اختفي منعم وصوت الموسيقي؟؟

تحياتي.......

أ.رائد

كل اللى حضرتك بتقوله ده كلام عظيم جدا....لكن اسمحلى...انا مقدرش ولا لسانى يطاوعنى اقول للبواب انه عامل زى الشجر المدهون اللى على النيل ...فما بالك برئيس الجمهورية؟؟؟لأ وابو الأنوار دى كمان....ده لو مش رئيس الجمهورية لو سمكرى حتى مفيش ست محترمة فى الدنيا تقبل جوزها يتقاله يابو الأنوار من ست تانية...وقدام الناس...وقدامها هى شخصيا...

اسمحلى حضرتك كده اقنعتنى اكتر برأيى انه فيه فرق رهيييييييييييييييييييييييييب بين الدعابة بعشم او بتلقائية وبين الاستظراف السمج الذى قد يدخل تحت بند-أسف فى اللفظ-:قلة الأدب

[د.حسن]

المشاركة الأصلية كتبت بواسطة صوت الموسيقى

أ.رائد

اسمحلى حضرتك كده اقنعتنى اكتر برأيى انه فيه فرق رهيييييييييييييييييييييييييب بين الدعابة بعشم او بتلقائية وبين الاستظراف السمج الذى قد يدخل تحت بند-أسف فى اللفظ-: قلة الأدب

لا حول ولا قوة إلا بالله العلى القدير
خلاص يااهل الخير
إنتهى جدالكم وحواركم بأن سيدة الغناء العربى
قليلة الأدب ومكتوبة باللون الأحمر
وفين ؟ فى منتدى للطرب العربى الأصيل !!!
موش ح اقول غير كلمة واحدة وافهموها زى ماتفهموها :
ياخسارة
مع تحياتى .. باللون الأسود