الأدباتى

[حمدى شبانة]

شخصيات الأدباتى
ــــــــــــــــــــــــــ

قيس بن الملوَّح

شخصية الليلة جميلة
ف العشق لُه قِصَّة طويلة
حبيبتُه ( ليلى ) دى جميلة
ومنوَّرة زى القمرة
الله الله يابدوى جاب اليسرا

شاعر وغَزَلُه كان موزون
عاشق وقالو عليه ( مجنون )
هايم على وجهُه ف الكون
دى حكايته فى العِشق نادرة
الله الله يابدوى جاب اليسرا

[حمدى شبانة]

شخصيات الأدباتى
ــــــــــــــــــــــــــ

أبو بكر الصدِّيق

شخصية نادرة صاحب جاه
صرَف ف مالُه واللى معاه
من أجل إظهار دين الله
أعماله خير واضحة وظاهرة
الله الله يابدوى جاب اليسرا

كان للرسول ( صاحب ) وصديق
لم يترُكُه أبداً ف الضيق
والشهرة كانت ( الصدِّيق )
وأوِّل ( خليفة ) على فكرة
الله الله يابدوى جاب اليسرا

[حمدى شبانة]

شخصيات الأدباتى
ــــــــــــــــــــــــــ

عثمان بن عفان

( خليفة م الخُلفا الراشدين )
ولقبُه هوَّة ( ذو النورين )
( كريم ) ... وأنفق كل ثمين
ف غزوة ( تبوك ) لجيش ( العُسرة )
الله الله يابدوى جاب اليسرا

وكان بيقرَب لـ ( أبو سفيان )
وقام بـ ( تجميع القرآن )
فتَح ( أرمينيا وخراسان )
و ( قميصُه ) لُه قِصَّة كُبرى
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــ

على بن أبى طالب

( فارس ) شجاع كمان عالم
( إمام ) وعُمْرُه ماكان ظالم
( حـكيم ) ... وأقوالُه معالِم
( نهج البلاغة ) فيها عِبرة
الله الله يابدوى جاب اليسرا

حبيبى يا ( أبو الحسنين )
يا ( زوج بنت نبينا ) الزين
يا ( باب العِلْم ) دنيا ودين
ف قلبِنا مكانتك .... كُبرى
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــــــــ

جمال عبد الناصر

أدباتى إقرا كلامى يا خال
ف كُل عصر نلاقى رجال
والليلة شخصيتنا يا خال
راجل من الطينة الـسـمـرا
الله الله يابدوى جاب اليسـرا

قال القـناه راح تِتأمِّم
ليه للأجانب تِتسلِّم ؟
خيرنا لغيرنا يامعلِّم
بلدنا طول عُمرها صابرة
الله الله يابدوى جاب اليسرا

كان حِلمُه توحيد الأُمَّـة
يِبعِد عن العَرَب الغُمَّـة
إتجمَّعوا علينا ( الرِمَّـة )
ودبَّروا لمصر مـؤامـرة
الله الله يابدوى جاب اليسرا

ف بورسعيد كان العِدوان
بريطانيا ومعاها أعـوان
تابعوا معايا يا ( إخوان )
القِصَّة لِسَّة فيها عِـبرة
الله الله يابدوى جاب اليسرا

من بورسعيد إنسحبوا بْجَـد
بعديها فكَّـر نبنى السـد
كل الدوَّل ف ساعة الجـد
عن مصـر بِعدِت مِتَّاخـرة
الله الله يابدوى جاب اليسرا

المصرى عَزمُـه عُمرُه ما لان
وبعـد بُنـا سـد أسـوان
مصانِعـنا دايرة ف كل مكان
بنهضـة صناعيَّة كُـبـرى
الله الله يابدوى جاب اليسرا

وبرضُه فكَّـر فى الفلاَّح
عَمَل عشانُه قانون إصلاح
يزرع ف أرضـه ببال مرتاح
( خلاص مضى عهد السُخرة )
الله الله يابدوى جاب اليسرا

جايز يكون كان لُه أخطاء
وعليه بتِخـتِـلِـف الآراء
ماهو إبن آدم كدا ( خطَّاء )
يرحمنا ربنا فى الآخرة
الله الله يابدوى جاب اليسرا

[حمدى شبانة]

( القهاوى )
ـــــــــــــــــــــــــــ
يادى المصيبة .. والبلوة
تحت العمارة عندنا قهوة
أبو دومة قاعد مع علوة
للفجر ناصبين السهرة
الله الله يابدوى جاب اليسرا


ولعب طاولة ... وكوتشينة
والشيشة أحوالها مشينة
دخانها .. طالع ... يعمينا
عيونى منها بقت حمرا
الله الله يابدوى جاب اليسرا


من الزعيق أنا مَبانَمْشى
وجتتى .. هجرت فرشى
نويت من الشارع أمشى
آخد العيال واطلع برَّة
الله الله يابدوى جاب اليسرا
ــــــــــــــــــــــــــــــــــــ
( حـمـدى شـبـانـة )

[حمدى شبانة]

الإزعاج
ــــــــــــــــ


سلبية تانية ... ياجماعة
بتاع عصير طول الساعة
فاتح الكاسيت والسمَّاعة
إذاعة من عشرة لعشرة
الله الله يابدوى جاب اليسرا


وتلاقى كُشك إنَّما فُلَّة
مشغَّل أغانى ( شعبولاَّ )
زمن الطرب منهُم ( ولَّى )
الصبر .... من رب القدرة
الله الله يابدوى جاب اليسرا


ف كل شارع نلقا حاجات
من بياعين بالميكرفونات
خيار وقوطة .. بلح أمهات
منهم حياتنا بقت مُرَّة
الله الله يابدوى جاب اليسرا
ــــــــــــــــــــــــــــــــــــ
( حـمـدى شـبـانـة )

[فاعل خير]

ان شاء الله موفق ياعم حمدى

فانت تشرف اى مكان والله

جايلك قريب

ان شاء الله

أحمد ابراهيم

[حمدى شبانة]

أنا الأديب إقرا كلامى
ميهمِّنيش أى أسامى
لو شوفت أعوَر قُـدَّامى
أقوللو يابو عين مِنكِسرة
الله الله يابدوى جاب اليسرا

عشان دماغى تريَّحنى
أكتِب كلامى من لحنى
وراسى مبيبقاش مَحنى
لأى بنى آدم مرَّة
الله الله يابدوى جاب اليسرا

أديب وأدباتى مدردَح
مبحبِّش اللى يستنصح
مع اللئيم لازم اصحصح
وأجعلُه للغير عِبرة
الله الله يابدوى جاب اليسرا
ــــــــــــــــــــــــــــــــــــــــــــــــــ ـــــــ

[حمدى شبانة]

الأدبـاتـى وحوادث الطريق
ـــــــــــــــــــــــــــــــــــــــ

أنا الأديب .. إزاى أنسى
يوماتى أصحى على كارثة
وكل يوم بنشوف حادثـة
كل الطُرُق فيها مخاطرة
الله الله يابدوى جاب اليسرا

الحال ماعادش يسُر القلب
ف كل سكة تلاقى مطَـب
لحد إمتى .. حنطبطـب
على اللى فاحت الحفرة
الله الله يابدوى جاب اليسرا

إهمال ياسيدى وخيانة
كل الطُرُق عاوزة صيانة
والمسئولين مش سمعانا
حنقول لمين ومين يقرا ؟
الله الله يابدوى جاب اليسرا

مرَّة يكون سواق نايم
ومرَّة م الهرويين شامِم
رب العباد هـوَّة العالِم
إيه بس تانى راح يجرا
الله الله يابدوى جاب اليسرا

قانون المرور يتشـدِّد
وأى مُهـمِـل يتـحـدِّد
أرواح يوماتى بتتهـدِّد
والستر من رب القدرة
الله الله يابدوى جاب اليسرا

لو كل مسئول يتحاسب
أكيد حنلقـاه حيحاسـب
أدباتى بيقول ويطـالـب :
الناس دى تتحاكم بُكـرة
الله الله يابدوى جاب اليسرا
ــــــــــــــــــــــــــــــــــــــــــــــــــ ـــــــــــــــــ