أسعدك الله أستاذ عادل،
أستاذي الكريم، نحن نسمع في أحيان كثيرة السيدة أم كلثوم وغيرها من الأصوات النسائية الأكثر حدة، تغني الكرد والحجاز من درجة الراست، والصوت النسائي كما هو معلوم طبقته حادة، والمنطقي أن الصوت الحاد يناسبه الطبقة الحادة. ولم أفهم لماذا تغني السيدة أم كلثوم من الراست بدلا من الري أو طبقة أخرى أحد؟ ربما ليس هنا هنا محل السؤال فأرجو المعذرة سلفا
اخى العزيز
هو احنا عاملين اقسام للأسئلة لكن برضو الكل بيرجع هنا على اساس ان فيه اعضاء كتير جدا جدا تحس انهم ساكنين هنا او ده اصبح بيتهم , وعلى اساس انى بدخل الصفحة دى بالذات كل يوم اكتر من 7 او 8 مرات وسؤالك ممكن يوصلنى بعد اقل من ساعة لكن هناك انا بدخل كل كذا يوم وردودى بتتاخر عليهم شوية لكن الرد هنا بيبقى مش للسائل فقط ولكن لآلاف اخرين بيدخلوا هذه الصفحة حتى من غير ما يكونوا من المعرفين لدينا اقصد اللى مش بيعملوا ردود لكن اهلا بالجميع
سؤالك ان ممكن اسأله بطريقة تانية ... يعنى ايه مطرب قدرير اوى اوى ومطرب متوسط ومطرب اقل ومش مطرب اصلا بمعنى اختلاف الدرجات من واحد % الى 100% ... كان زمان اقل مطرب اذا حسبت ام كلثوم 100% بلامنازع ولا شك .. اقل مطرب كان بيبقى مش اقل من 80% ودلوقتى بيتحسب علينا مطربين ونجوم وهم اقل من 7% وبياخدوا فى الحفلة نصف مليون جنيه من ان اعلى اجر ام كلثوم كانت بتقبضوا خمسة آلاف جنيه
المطرب ياعزيزى اول حاجة ان مساحتو الصوتية الفعالة لازم تكون اكتر من اوكتافين وشوية واقصد بالفعالة يعنى اعلى نغمة اكتر نغمة مخفضة بيقولها وهو مستريح وبنفس القوة .. يعنى مثلا نغمة دول اللى على المسافة الثالثة لما يغنى منها ويوصل لنغمة صول بيبقى صوته بنفس القوة مش بيتخنق .. ونغمة دو الوسطى اللى فى المسافة الاولى تحت المدرج بيغنيها وينزل منها لنغمة صول واحيانا فا بنفس القوة يعنى تحس انو ممكن يقول كمان فوق العالية وتحت المنخفضة .. والملحن لما بيعمل لحن لمطرب ما اول حاجة لازم بيكون عارف مساحته الصوتية جدا بحيث يعمل لواللحن فى حدود المساحة الصوتية دى ولعلمك ام كلثوم كانت بتغنى من سى بيمول مش من الراست لن كانت الفرقة بتضبط الوتريات طبقة صغيرة يعنى بتنزل تون كامل ... وشوف مثلا فى اغنية الف ليلة وليلة كانت بتوصل لنغمة ايه وهى كان ساعتها عمرها كام سنة .. ده العادى يعنى دلوقتى اى واحد بيغنى تعالى حلل وشرح بيقول ايه تلاقيه حدوده اربع نغمات وحتى بيطلع منهم حاجات نشاز لذلك تلاقى الملحن بيعمل لو اللحن تلاقيه فى حدود من مى الى لا ولو خرج منهم وعمل سى ممكن اللى بيغنى تطلع منو خاسة او زايدة لأنو بيرمى صوته وخلاص .. عندك مثلا فريد الاطرش كان بيوصل لنغمة فا الخط الخامس وينزل لصول تحت المدرج .. فيه حاجة كمان خطيرة جدا .. فى الموسيقى الاوبرالية او الكلاسيكية الغربية النساء لهم طبقتين الحادة اسمها سوبرانو والتوسطة اسمها الطو يعنى المغنية لما بتدرس الغناء بتحدد حسب طبقتها ومش بتخرج عنها ليه ؟؟؟؟ لنهم بيدرسوا يغنوا بصوت مستاعر مش صوت الغناء الطبيعى والمستعار محدود يعنى اوكتاف من لا الوسطى مثلا لحد لا اللى فوق المدرج والالطلو اوكتاف بيبتدى من دو المسافة الثالثة .. يعنى لما بيغنوا اوبرا بيتحدد مين تقول الجملة دى ومين تقول الجملة دى ومقيدين جدا بقوالب ولوائح .. لكن فى موسيقانا الشرقية اهم حاجة وقيمة المطرب انو بيغنى بصوته الطبيعى وانت لما تغنى بصوتك الطبيعى بيبقى انت وزى ما ربنا وهبك يعنى وهبك 15 نغمة او 20 نغمة وهكذا ... كمان المطرب القدير كان زمان بيذاكر ... يعنى كلهمكانوا بيعزوفا عود ام كلثوم وفايزة ومعظمهم كانت عارفة انها بتوصل لنغمة كذا تقعد تتمرن ازاى تزودهم نغمتين مثلا ... حتى لو مش حاتستعملهم بس بيدوها لياقة لما نغنى نغمات العلى او منخفضة ... عاملة زى ايطال رفع الاثقال فيه بطل بيشيل 300 كيلو .. ده مش آخره .. لأن اهم حاجة انو يشيل 300 كيلو ويقعد واقف نصف دقيقة .. لذلك هو متمرن يشيل اكتر شوية لن لو آخرو 300 كيلو فقط ممكن يحصل لو تمزق عضلى او ما يقدرش يقف ثانية بالوزن ده يعنى يقع على طول ... وبعدين اهم شىء فى الطرب ايه ؟ ان المطرب لما يغنى دو وينزل لسى ثم لا ثم صول تحس انو مستريح ده بيديك احساس بالراحة لكن لما يوصل لنغمة تحس انو حاينفجر ده بيديك احساس بالقلق .. وليه الموسيقى بتهدى الاعصاب ؟ الارتياح ده وآسف للإطالة وان شاء الله تكون الرسالة وصلت
مع اطيب تحياتى عادل صموئيل
رد: طلبات نوتة أ / عادل صموئيل الجزء الثانى
العرض العادي
