طلبات نوتة أ / عادل صموئيل الجزء الثانى - الصفحة 586

**سليم العباس** · #**5851** 15/12/2017, 14h29

كل الشكر أستاذ عادل على تدوين رائعة فيروز ذهب أيلول، التدوين كالعادة جاء ذهبياً و تدوين الموال بمثابة جوهرة أعطت النوتة بريقاً إضافياً.
بالمناسبة هذه الأغنية من كلمات جوزيف حرب و ألحان فيلمون وهبي هذا الملحن العبقري الذي كثيراً ما تنسب ألحانه الفيروزية إلى الرحابنة و من أشهر ألحانه لفيروز و التي تتسم جميعها بطابع شرقي :
يا مرسال المراسيل ـ أنا خوفي من عتم الليل ـ يا دارة دوري ـ فايق ياهوى ـ كرم العلالي ـ من عز النوم ـ طيري ياطيارة - على جسر اللوزية ـ البواب - ورقو الأصفر - لما ع الباب - ياريت - أسوارة العروس - طلعلي البكي - بليل وشتى - يا رايح - سوا ربينا- جايبلي سلام ـ ع الطاحونة

شكراً و دمت بخير

**منصور سعيد بخش** · #**5852** 15/12/2017, 15h54

من اجمل اغاني محمد عبده نتمنه تدوينها

https://youtu.be/4WMTxI5-Tlw

**عادل صموئيل** · #**5853** 15/12/2017, 16h12

بناء على طلب اخوتى الاحباء اقدم اغنية

رجعت لك يا حبيبى

نسخة من درجة لا
نسخة من درجة دو

مع اطيب تحياتى

**عمرو الهنداوي** · #**5854** 15/12/2017, 16h59

أستاذ عادل مساء الخير، في ثلاث أسئلة من فضلك:
- هو ليه في أخر أيام الفرقة الماسية، كان أستاذ احمد فؤاد حسن واقف يقود الفرقة بنفسه بدل ما كان في العادة يقودها ويعزف آلة القانون في نفس الوقت .. ده حتى في أخر الأيام، جاب عازف تأني يعزف مكانه وتفرغ هو بالكامل لقيادة الفرقة على المسرح ..

- العازفين اللي كانوا ما بيقروا نوتة فوري زي مجدي الحسيني، والرائع الحفناوي كنتم بتعملوا أيه معاهم في التسجيلات السريعة؟ وهل حاول حد منهم تعلم النوتة فيما بعد، ولا كانوا شايفين الموضوع بشكل أخر؟

- أحمد فؤاد حسن كان شايف مستقبل الماسية أزي بعده؟ وليه الفرقة ما قدرت تصمد وتشتغل بعد رحيله وازي فرقة أحضنت الزمن الجميل تنتهي بوفاة شخص حتى ولو كان قائدها..

كل الشكر
السؤال الاول : هو حس ان المايسترو الواقف يعنى مركز ادبى اكتر من قائد الفرقة الجالس ف حب يبقى مايسترو مع انها ما فرقتش من وقفته او قعتده لن الفرقة الموسيقية فى الزمن الجميل كانت بتحتاج قائد فرقة بيدخلهم وخلاص لن كلمة مايسترو المفروض اكبر من كده وبتستعمل كده زى ما حد يقول لك ياباشمهندس او يادكتور ... المايسترو الواقف شغلته بيقود اوركسترا بيعزف 12 خط لحنى فوق بعض زى الاوركسترا السيمفونى وفيه آلات بتدخل وآلات بتسكت .. آلات بتدخل بعد255 مازورة مثلا المايسترو هو اللى بيدخلها .. والمايسترو بيقرأ من بارتاتورة ودى بيبقى فيها التوزيع يعنى بيقرا من 12 سطر فوق بعض لكن احمد فؤاد حسن كان بيقررأ من ورقة زى اللى انا بكتبها هنا لذلك لو تلاحظ طول الوقت كان بيشاور وخلاص وحركته مالهاش لازمة لن الفرقة شغالة فعلا يعنى اهميته بس فى اول الدخل او النقلات فى السرعة بس برضه حسن انور بيبقى حافظ السرعة
السؤال التانى ... كان قيمة الحفانوى ان الملحن بيعيه لما يكون فى لحن فيه تقسيمة اساسا ... ولو الملحن حب انه يعزف صولو كانوا بيقعدوا مع بعض فى بيت الملحن ويحفظه الصولو وييجى التسجيل حافظ على طول .. اما مشكلة مجدى الحسينى .. انه كان اول ماظهر على الاورج مع الفرقة الماسية كان منتظم كل يوم ... كان طبعا بيعزف الصولوا بتاع الاورج .. كان المحلن بيقابله برضه قبل التسجيل وبيحفظه الصولو اذا كان صولو او اكتر بس كانت المشكلة الخطيرة انه بيبقى حافظ الصولو لكن مش عارف مكانه فين ... يعنى انت بتعزف اورج اول ماتدخل الاستدوديو بتبص ع النوتة تشوف لك صولو ولا لأ وتبقى متابع مكانه والفرقة بتعزف وتدخل فى مكانك الصح ... زى ما انت عارف زمان كنا بنعزف كلنا مع بعض وكان لو حد غلط لازم نعيد من اول المقدمة كان بيغلط فى الدخول لأن انت حتى لو عرفت املكان بتاع الصولو ومش عاره بالشعرة مكمن تدخل متحفز او متأخر شعرة يعنى خايف تدخل غير لما تكون بتقرا بتبقى واثق من نفسك ... المهم كان بيعطلنا كتير وده اللى خلا هانى مهنا قفز مكانه لأن الفرقة الماسية اهم حاجة البريما فستا .السؤال الثالث ... قبل انتهاء الزمن الجميل بفترة او فى الوقت الاخير كان دخل علينا الطريقة الجديدة بتاعة التراكات يعنى نلبس السماعات وبيشغلوا لنا اللحن بيكون حد مسجله من قبل بكمنجة واحدة مع الايقاع كان وقتها اسمه lay aut او الاساس يعنى ... طبعا كنا بنتضايق لأن لما تكون بقالك من يوم ما اتعلمت بتشتغل بطريقة وتقلب طريقة شغلك .. كنا بعد مانسجل اللحن كله نعيد تانى ونعز على تراك تانى يعنى عشان العشر كمنجات يبقوا عشرين كمنجة ... بعدين نعيد التسجيل مرتين كمان نعزف اللزمات اللى وسط الغناء فقط عشان يبقى اللزمات اعلى من الغناء .. يعنى الناتج يبقى صوتنا خفيف مع المرب ( اللى مش بشوفه اصلا ) وقوى فى اللزم ... وبعدين دخل للإذاعة ديسك جديد اليكترونى ادق فى المونتاج الالييكترونى يعنى ايه .. الاول لما كنا بنسجل كلنا مع بعض كان المنتاج بالمقص .. المونتاج الاليكترونى يعنى المهندس عنده 24 تراك بيحطنا على تراك رقم كذا مثلا لو احنا غلطنا بيوقفنا وبيرجع حتة صغيرة ويقول نعيد من هنا يعنى بيرجعنا قول كذا مازورة ويشغل احنا نسمع اللى عزفناه ويقول ادخلوا من هنا ندخل وهو بيصغط ع الزرار ونكمل العملية بينى وبينك بقت مقرفة .. يعنى فقدنا السلطنة او احساسنا بالجملة الجميلة ... بعدين ابتدت عملية اعدام الفرق الموسيقية ... احنا قلنا المهندس عنده 24 تراك لما كنا العشر كمنجات بنسجل كان بيحطنا على تراك رقم خمسة مثلا وبيعمل باقى التراكات safe يعنى الشريط ماشى وبيمسح ويسجل على التراك اللى احنا عليه فقط .. بعدين بيخلينا نقول اللحن تانى على تراك رقم 6 مثثلا هنا بيبقى كأنك جبت عشرين كمنجة ( واخد بالك ) يعنى لما تقول اللى انت بتقوله بيبقى كأنك زودت العدد ودى بيعملوها دلوقتى المطربين الفشلة تلاقيه بيسجل الاغنية مرة جواب ومرة قرار ويطلعوا مع بعض ... او بيسجل 3 مرات او 4 يطلع كأنه كورال يعنى الالعاب الزبالة اللى بيعملوها دلوقتى وماتحسش بصوت المطرب الاصلى ... ونرجع لعملية اعدام الفرقة ... حب المنتج يوفر اجر ال عشر كمنجات ... كان بيجيب 4 كمنجات فقط ويخليهم يعزفوا اللحن خمس مرات كل مرة على تراك يبقى انت سامع ييجى 15 كمنجة .. ومع تكرار الحركة دى ابتدا الاستغناء عن اعداد كبيرة من العازفين ... وشيئا فشيئا ابتدت الفرقة تتفكك يعنى الفرقة زى ما قلت من قبل يوم ما انا دخلتها كان سنى عشرين سنة كان متوسط اعمارهم خمسين ابتدوا يوصلوا ل 70 ومعظمهم اكتفى بكده وقال يعيش حياته بقا ... والفرق الخطير بين الفرقة الماسية وغيرها ان كان اهم حاجة فيها التجانس بين العازفين اللى مع بعض فترة طويلة مش زى الفرق التانية كان الاساسيين خمسة ولما يكون عندهم حفلة او تسجيل بيعمل فرقة من ع القهوة ... وبعدين كل الخراب جه مع بعضه يعنى رحيل العمالقة وتغير طريقة العزف والملحنين اللى ما رحلش اعتزل لأن ما ينفعش يسجل بالطريقة يعنى العملية كلها باظت فى وقت واحد مع اطيب تحياتى

**altaifi** · #**5855** 16/12/2017, 00h03

شكراً يا ما يسترو عادل على تدوين أغنية فيروز شهر أيلول .. ودام المزاج فيروزي يا ليت يتم وضع هذه الاغنية في الكيو ..
وشكراً جزيلاً ..

https://www.youtube.com/watch?v=iR5SK0O5dOM

**عادل صموئيل** · #**5856** 16/12/2017, 00h27

احبائى

اقدم لكم من اغانى هانى شاكر

على الضحكاية

والسؤال .. ليه انا مقل جدا فى تدوين اغانى هانى شاكر ... الرد ان عبد الحليم يوم ما ابتدا يضع قديمه على سلالم الفن كان اهم حاجة عنه الذكاء .. يعنى عرف ازاى يبقى فى القمة .. قمة القمم وفضل فيها لآخر لحظة .. مع ان للعلم كان فيه اسماء كتير لايقلوا عنه موهبة لكن كانوا اقل ذكاء عشان كده منهم اللى بقى فى المنتصف بين القمة والقاع ومنهم الى اعتزل ..
مشكلة هانى شاكر انه ابتدا بداية كبيرة يعنى اول مرة يغنى كان اكبر ملحنين وعلى الفرقة الماسية يعنى بدء نجم لكن الزمن الجميل لم يستمر وابتدأ الانحدار الموجود ... مشكلة هانى شاكر انه لو تمسك بطريقة غناء الزمن الجميل لكان اصبح شىء تانى .. يعنى الحان زى بتاعة زمان لكنه انجرب ورا الطريقة الحديثة ف مابقاش فيه فرق جذرى بينه وبين محمد منير ولا اللى عاملين نجوم دلوقتى مع انه افضل منهم ملايين المرات .. احنا فى نظامنا بنقيم المطرب بحاجتين ... قيمة موهبته وشطارته كمطرب ودى بنقيم عبد الحليم ب 100 درجة وانا اعطى هانى شاكر مش اقل من 90 درجة ( واعطى محمد منير مش اكتر من خمس درجات ومحمد فؤاد اقل من ال خمس درجات ... وزى ما فى كرة القدم الكورة اجوال عندنا فى الغناء المطرب عدد من الاغانى .. يعنى لما نقول عبد الحليم قد يصل العدد الى ماشاء الله وكلهم اغانى محفوظة ومشهورة لكن بالنسبة لهانى شاكر العدد توقف لما اتجه للطريقة الحديثة للغناء يعنى ماحدش بعد سيبونى احب وكذا اغنية ماحدش يفتكر له حاجة تانى يعنى هنا ... فى هذه الاغنية .. انا بتكلم معاكم بصراحة .. يعنى انا بدون لوجه الله وللمحبة للفن .. مش بعمل نفسى تعبت عشان لو باخد اجر يزودولى الاجر .. هذه الاغنية دونتها فى خمس دقائق .. وماتعبتنيش .. والاهم ما شغلتش مخى عان افك اى شفرة او اى حاجة صعبة او حتى فكرة يعنى لحن بيعتبر بسيط ان مكانش تافه ومش مكانة هانى شاكر ... اما اغنية رجعت لك انا دونتها فى يوم كامل ... كان ممكن فى اسبوع لكن تملكنى شيطان الفن او ملاك الفن ... يعنى انا كنت متحفظ انى ادونها من سنتين .. ولما ابتديت اما اكملها ( ومش حقوم إلا لما اخلصها ) او تقف غى ايدى فى جزء واركنها ( وساعات بيحصل ) فيها جمل عشان افك شفرتها قعدت ساعات وشغلت مخى كتير يعنى عصرت مخى من العبقريات سواء التلحين او الاداء وتذكروا عمار الشريعى فى غواص فى بحر النغم ... هو كان كفيف يعنى ما يقرش يدخل مكتبة الشرائط ويقعد يختار ويفاضل بين شريط وىخر كان اى شريط بيقع فى ايده بيعمل عليه حلقة .. ليه ؟ لأن كل اغنية فيها كمية شغل .. رحم الله الزمن الجميل ومع اطيب تحياتى

**عمرو الهنداوي** · #**5857** 16/12/2017, 01h39

أستاذ عادل شكراً لرد حضرتك على أسالتي حول الأستاذ أحمد فؤاد حسن .. أنا قرأت رد حضرتك في بوست هاني شاكر بس عايز حضرتك تشرح لنا نقطة مهمة حضرتك تكلمت عنها وهي "ذكاء الفنان".. الذكاء في الفن بيكون أزي؟

يعني مثلا يبعد عن السياسة في الفن، أو يبعد عن المشاكل والصراعات، أو يمنع وجود أشخاص منافسين له، أو دائما يطور فنه أو نفسه ويقدم حاجة جديدة؟ الذكاء في الفن بيقي أزي؟ يعني أم كلثوم كانت ذكية وعبد الوهاب كان ذكي .. بس يعني على أرض الواقع، كانوا بيعملوا أيه علشان يبقوا كده..

كل الشكر

**منذر44** · #**5858** 16/12/2017, 01h52

الله الله يا استاذ عادل
يوم حافل بالمعلومات القيمة والذكريات الجميلةوالنوت الرائعة
وكل هذا لوجه الله والفن
لا اظن يوجد ارقى من هذا
مع محبتي

**سليم العباس** · #**5859** 16/12/2017, 11h27

تحية أستاذ عادل و شكراً من القلب لتدوين أغنية عليّ الضحكاية
أتفق مع حضرتك أن مستوى معظم الأغاني قد تناسب عكسياً مع الزمن ، فكلما تقدم تراجعت القيمة الفنية للأغنية، هاني شاكر لم يكن استثناء بل اتبع نهج مطربين آخرين سلكوا الدرب نفسه مثل وردة وميادة ...
هل كان أمام هاني شاكر أو لنظرائه الخيار للاستمرار بأغاني طربية في عصر طغت عليه الأغنية السريعة؟ باعتقادي أنه اضطر إلى مجاراة إيقاع العصر السريع بدلاً من دفع ثمن غال هو الغياب عن الساحة الفنية و القطع الاختياري لمصدر رزقه، وأعتقد أنه نجح إلى حد كبير في الجمع ما بين المعاصر وبعض من ملامح الفن الأصيل و بالأخص فيما يتعلق بكلمات أغانيه و موضوعاتها. بالنسبة لنا كمستمعين الاستماع لأغاني جديدة متوسطة الجودة أفضل بالتأكيد من سماع الرخيصة و المبتذلة منها.

شكراً وطاب يومك.

**عادل صموئيل** · #**5860** 16/12/2017, 18h37

احبائى

من اغانى ليلى مراد الجميلة

انت ونا اتنين سوا

مع اطيب تحياتى