ليه خيالك .. وأعمال أخرى

[سمير حسين]

كانت البـــداية فى الحكـاية ... ازاى أخش هذا المكان
فضلت أسأل والناس قالولى .. اكتب وابقى من الفرسان
حاولت مرة ومرة تانيــــة ... سألت عمدة بن الجمعان
قاللى الحكــــاية من البداية ...وفضلت هاجم كالرهوان
أول مشاركة كانت تقيـلة ... كنت خايف م الموجودين
هما أساتذة وانا شبل طالع .. وسّط عباقرة ومعروفين
ربك كرمنى وفضلت أكتب .. حتى المشاركة الأربعين
شكرا ياعمدة يا ابن جمعة ..هاشيل جميلك طول السنين

[سمير حسين]

مرة عازمنى واحد صاحبى .... عامل ليلة ف وسط الشارع
والشارع كان اسمه التونسى ... قلت أغنى وامتـــــع نفسى
جاى أغنى أول مــــــــــرة .... لسه بقــول : أول راح قــايم
واحـــد كان قـاعد يسمعنى .... هب وثـــار وضربنى بكرسى
قلت ياواد حاول من تانى ....لازم أعمـــــــل اللى ف نفسى
كلت كوارع ومافيش مانع.... يمكن ده اللى يصـــــلح حسى
شافنى أخوه التانى راح قايم .... فتح المطوة غرسها ف وشى
كل الناس اتلمـوا وضربوا .... قلت حــــاغير تانى وظيفتى
وبعد ما كنت ناوى اطلع مطرب .. قلت افتح لى معمل طرشى

[سمير حسين]

الأستاذ المحترم / الباشا قمر الزمان ..
شكرا جزيلا لكرم سيادتكم لهذا التعبير عما أكتبه وهذا شرف آخر لا أستحقه فالفضل لله أولا وجميع السادة مسؤلى المنتدى اللذين أعطونا الفرصة لننهل ونستمتع بما يحتويه هذا المنتدى الرائع وبقدر ما نملك نجتهد ونحاول .. لك شكرى وتقديرى .. سمير

[سمير حسين]

لسه دماغى مش مظبوطـة ...عايز أقوم أربطهـــا بفوطة

كل ما أقوم واحاول أكتب ... تطلع كلمــــــاتى مغلوطــه

فات كام يوم والبــرد تاعبنى ... احلف والناس بتكـــــدبنى

عايز اخف يا ناس واتحرك ... أحسن أنا حاسس بالدوخة

أكتب ت تطلعلى النـــــون ... يبقى المعنى مش مضمون

لازم اتعالج عشان أصحى ...وحا اقوم أعمل شاى ولمون

[سمير حسين]

سعر اللحمـــــة قايد نــــار .... وكل شوية يقولوا حترخص
حنحـــــارب رفع الأسعــــار .... قلت أصبر واتنيل واخلص
سألت العيلة وانا محتـــار .... تاكلوا بصارة ؟ تاكلوا خضار؟
قالوا جميعا وف صوت واحد ... روح هـــــات لنا أكلة ممبار
جنب حارتنا فتح جـــــــزار .... عامل يافطة كبــــيرة وكاتب
حانحطــــــــــــــــــــــم كل الأسعار
قلت دا راجل سعره مهاود .... وكسب الجولة من التجار
جبت اللحمة وكمان فشة .... وخدت تلاته كيلو ممبــــار
بعد يومين بقرا فى جريدة ....لاقيت الصـــــــــــــــورة
صورة مين ؟ صورة مين ؟ .... آه على فكرة دا الجــــزار
أتارى سيادته كان غشاش ... بيجيب حاجة مش معروفة
جايب لحمه ياناس مغشوشة ... لا هى جاموسى ولا أبقار
وجــــع المعدة بقى يألمنى .... كل شوية ليل ونهـــــــــــار
اتنين حكما كشفوا عليـــا .... بيشوفوا ايــــــــــه الأضرار
واحــــــــد فيهم قال للتانى ... صاحبك واكل نص حمــــــار
وآدى حكايتى مع الجـــزار ... وضريبة رفع الأسعـــــــــــــار

[سمير حسين]

عمى الباشا انا أقدر أقول ... ان كلامك مش معقـــــول
دى اللى يفكر حتى يقولها ... يبقى صحيح هو المخبول
حاشا لله دا أنت كبـــــــير ... وكلامـــــــك فرحنى كتير
كل كتابتى با اشوفك فيها ... ماهو طبعا بقى لك تأثير
شكـرا ليك ولكل الناس .... على كل هــــذا الاحساس
رأيك فيا دا فضل عظيم .... شجعنى وعملى أســـاس

..... أهداء للأستاذ / الباشا قمر الزمان

[سمير حسين]

انت كمان يعجبنى كلامــك ... والعينة بينّة قدامـــــــــــك
انت كلامك شعـــر لوحـده ... بيورينى حسن مقامــــــك
كل ما تكتب أنا راح أكتب ... وكأنى قاعـــــد قدامــــــك
دنا با اكتب على قد حالاتى ... والبركة فيك وف أمثــالك

... مع خالص تحياتى ....

[سمير حسين]

واحنا صغـار وانا فى طفولتى
كنت بلاعب عـــــــزة قريبتى
طفلة جميلة مالهــــــــاش حيلة
كنت اضربها واسيبها وأجرى
تضحاك هى وساعـــات تبكى
لمــــا كبرنا شـــــوية شــــوية
وبـــــــــــدأت أفهم ايه مشكلتى
وقـدرت أعرف حبـــة بحبـــة
انى خــــلاص ودعت طفولتى
كبرت وبقت حلــوة ..عروسة
باسم الله م العين محـــــروسة
وان هيمان وبافـــــــكر فيهــــا
جه اعصار وضرب أرضيها
واللى كمان مزروع حواليهـا
راحت منى وبابكى عليهـــا
قوموا معايا نشوف أراضيها
وندور من بدرى عليهــــــــا
وآنادى بالصـــــــوت العالى
عودى ياعزة ............
لأ مش عزة
دى فلسطين والقدس وغـزة

[د أنس البن]

حلوه يا سى سمير
والفكره جيده
والأسلوب أكثر تمكنا
لأ .. تستاهل تاخد مواطن سماعى
مبروك .....

[سمير حسين]

الأستاذ الفاضل د / انس البن
..... تحياتى وسلامى لشخصكم الكريم ...
.. كان لرأى سيادتكم فيما أكتبه آثر عظيم فى نفسى .. وأثلج صدرى .. أشعرنى بسعادة بالغة .. لم لا فهذا التقدير ينم عن فيض كرمكم وعظيم أصلكم .. متعكم الله بالصحة .. وجعلكم سندا لنا ... ولا يسعنى سوى أن أقدم لسيادتكم عظيم شـكرى وامتنانى ..وأطيب تمنياتى .. وعظيم احترامى ... سمير