حملة نظافة

**سعدالشرقاوى** · #1 01/10/2009, 17h32

(حملة نظافة)

علشان أمسك طرف الخيط
مش ها تسنـّد يوم ع الحيط
وعمرى ما وافق أبقى عبيط
ولا ها تبان على صدرى رياله
,,,,,,,
علشان بلدى وغالية وأمّى
علشان خيرها موسّع كمّى
ودايما عيبها بيحرق دمّى
وعند الشدّه تبان رجّاله
,,,,,,,,
و عالمها بايع متجوّل
وخبيرها عاطل متسوّل
ميادينها خايف تتحوّل
لمقالب مليانه زباله
,,,,,,,,
ولا يتحمّل صبرى وجلدى
وأعظم ناس فى الكون من بلدى
ولاها أقبل لضنايه وولدى
مثله الأعلى يكون شيكا باله
,,,,,,,,
سلوكيّات شيء مش معقول
عايشه معانا خلاص على طول
ونرمي بلانا على المسؤول
لنشر غسيلنا على الحمّاله
,,,,,,,,
كنـّا نشوفك حلوه وزينه
وبكره يكون أجمل فى عنينه
ولمسة سحر ف كلّ مدينه
ومهره وعشقوها الخيّاله
,,,,,,,,
لجمالك والرّيحه الحلوه
ودلالك وحلاوة الغنوه
ياعروسه وطلعت فى الجلوه
بعيونها السّوده القتـّاله
,,,,,,,,
ياخساره والكلّ أذيكى
وبيرمى غيامه على عنيكى
دخان وتراب بيخليكى
مخفيّة في عزّ القيّاله
,,,,,,,

حضارتنا وتاريخ أيّامنا
مع نيلنا وحرس أهرامنا
ومبادئ وأدب إسلامنا

ونظافة الإيد الشـّغـاّله

,,,,,,,,
كلمتنا من غير أغراض
وزمانها مليان أمراض
والصحّه بتحتاج أعراض
تبان في ضمير العمّاله
,,,,,,,
عشان النظافة من الإيمان
والبيئة تعبت م الإنسان
صرخ كيانى بكل لسان
حبّة نظافة يارجّاله
,,,,,,,

**NAHID 76** · #2 01/10/2009, 20h22

بسم الله الرحمن الرحيم
خالى الفاضل سعد الشرقاوى
أولا أسم الله على قلم حضرتك أنت فين من زمان وحشتنا التوته وأخبارها
ثانيا
طبعا بعد العيد منظر البلد حرك فيك الساكن وتحدثت عن جمالها وحلاوتها وما ينبغى لنا أن نفعله تجاه الوطن الغالى ليظل محتفظنا برونقه وريحته وجماله
وده فعلا أحساس عالى بالوطن وما نحب أن يكون عليه
عبرت عن جمال بلدنا أروع تعبير شفته فى المقطع المكتوب باللون الأزرق
رائع هذا المطع جدا وينفع أن يغنى أو يكون مطلع أغنيه جميله
أما عن حضور قريحتك وكلامك أحسدك عليها
دائما وأبدا يا خال امسك القلم وأكتب
تحياتى

**عادل فؤاد رفاعى** · #3 01/10/2009, 20h51

الله ينور على الشعر العامى الرائع والذى يعبر عن الحالة السيئة والظروف المريرة التى يمر بها الشعب المصرى بس ياترى العيب من مين؟؟؟

و عالمها بايع متجوّل
وخبيرها عاطل متسوّل
ميادينها خايف تتحوّل
لمقالب مليانه زباله

طول عمر مصر التفوق فيها تفوق أشخاص بس حتى تفوق الاشخاص مبقاش موجود دلوقتى

عشان النظافة من الأيمان
والبيئة تعبت م الانسان
صرخ كيانى بكل لسان
حبّة نظافة يارجّاله

فالإسلام دين النظافة: قال رسولنا الكريم صلى الله عليه وسلم : " نظفوا أفنيتكم ولا تشبهوا باليهود"

شوف اليهود فين واحنا فين

ومبادىء الاسلام اصبحنا نتبعها فى المظهرواللبس والشكل

لكن لا يوجد أفعال

تحياتى

**abuzahda** · #4 02/10/2009, 02h22

عمنا الشاعر الباصر الخابر
سعد الشرقاوي

و الله يا عمي سعد ، كإنك بتقرا الطالع

مش هقولك الكلام العادي ، علشان انت مش شاعر عادي

الكلام العادي ، إن إحدى وظائف الشعر : إستشراف المستقبل

إنما عندما يكون الكلام بخصوص عمنا سعد الشرقاوي ، و القصيدة دي بالتحديد

يبقى الموضوع له علاقة بقراءة الطالع (و النازل كمان)

ليه؟ لإن ، و الله أعلم ، حملة النظافة على وشك البدء

**القمر الساهر** · #5 02/10/2009, 03h11

الأستاذ سعد الشرقاوي تحية لك الله على الموضوع الحيوي والمهم والكلمات البسيطة والمعبرة والمؤثرة والإيقاعات الساحرة .بلدنا تستاهل كتير قوى .أشكرك الف مرة .

**البياتي** · #6 02/10/2009, 03h55

الشاعر الأصيل ابن البلد سعد الشرقاوى
كل مل تكتبه شعر هادف باسلوب بسيط وسهل وجميل يدخل القلب
الف شكر لك من قلبى ولكل من يكتب كلمه هادفه لها رساله هنا فى هذا المنتدى الجميل

**سعدالشرقاوى** · #7 02/10/2009, 09h16

اقتباس:

المشاركة الأصلية كتبت بواسطة NAHID 76

بسم الله الرحمن الرحيم
خالى الفاضل سعد الشرقاوى
أولا أسم الله على قلم حضرتك أنت فين من زمان وحشتنا التوته وأخبارها
ثانيا
طبعا بعد العيد منظر البلد حرك فيك الساكن وتحدثت عن جمالها وحلاوتها وما ينبغى لنا أن نفعله تجاه الوطن الغالى ليظل محتفظنا برونقه وريحته وجماله
وده فعلا أحساس عالى بالوطن وما نحب أن يكون عليه
عبرت عن جمال بلدنا أروع تعبير شفته فى المقطع المكتوب باللون الأزرق
رائع هذا المطع جدا وينفع أن يغنى أو يكون مطلع أغنيه جميله
أما عن حضور قريحتك وكلامك أحسدك عليها
دائما وأبدا يا خال امسك القلم وأكتب
تحياتى

الله ينور عليكى ياماما ناهد ياست الكل
ماتعرفيش قد ايه بنحب البلد وبنغير عليها
وعشان كده أى سلبيّة بتوجعنا
ربنا مايحرمنيش من نظرتك ومشاركتك الجميله اللى دايما
باغلف بيها موضوعاتى المتواضعه
ويارب نشوف مصر فى مكانها الطبيعى
اجمل بلاد العالم

**سعدالشرقاوى** · #8 02/10/2009, 09h22

اقتباس:

المشاركة الأصلية كتبت بواسطة حبيب عبد الوهاب

الله ينور على الشعر العامى الرائع والذى يعبر عن الحالة السيئة والظروف المريرة التى يمر بها الشعب المصرى بس ياترى العيب من مين؟؟؟

و عالمها بايع متجوّل
وخبيرها عاطل متسوّل
ميادينها خايف تتحوّل
لمقالب مليانه زباله

طول عمر مصر التفوق فيها تفوق أشخاص بس حتى تفوق الاشخاص مبقاش موجود دلوقتى

عشان النظافة من الأيمان
والبيئة تعبت م الانسان
صرخ كيانى بكل لسان
حبّة نظافة يارجّاله

فالإسلام دين النظافة: قال رسولنا الكريم صلى الله عليه وسلم : " نظفوا أفنيتكم ولا تشبهوا باليهود"

شوف اليهود فين واحنا فين

ومبادىء الاسلام اصبحنا نتبعها فى المظهرواللبس والشكل

لكن لا يوجد أفعال

تحياتى

ياحبيبى ياحبيب عبدالوهاب
وحبيب كل اهل سماعى
لو سالتنى العيب من مين؟
لازم اقول لحضرتك ان النظافه
هى من المسئوليات المشتركة
ولو ان هناك حملة لابد ان تشارك فيها
جميع المؤسسات والمسئولية الكبرى
على ذوى الاقلام
حتى لانرى التفوق فقط على المستوى الشخصى
وزى ماقلت حضرتك
وياريته موجود بالصورة المطلوبة

**سعدالشرقاوى** · #9 02/10/2009, 09h32

اقتباس:

المشاركة الأصلية كتبت بواسطة abuzahda

عمنا الشاعر الباصر الخابر

سعد الشرقاوي

و الله يا عمي سعد ، كإنك بتقرا الطالع

مش هقولك الكلام العادي ، علشان انت مش شاعر عادي

الكلام العادي ، إن إحدى وظائف الشعر : إستشراف المستقبل

إنما عندما يكون الكلام بخصوص عمنا سعد الشرقاوي ، و القصيدة دي بالتحديد

يبقى الموضوع له علاقة بقراءة الطالع (و النازل كمان)

ليه؟ لإن ، و الله أعلم ، حملة النظافة على وشك البدء

حبيب الروع
المبدع
الاستاذ/سيد ابوزهده
بالمناسبة فى اخر رمضان رايت وعد فى الحلم
وضحكنا ولعبنا وقرانا حكاية اسمها (الحمامه الايه00)
مش فاكر فى كتاب لونه وردى غلافه بخط صغير
ماقريتهوش واستوعبت القصة جيدا وابحث عنها
واملى ان شاء الله ان اجدها بالنص 0
وبمرور سيادتكم على صفحتنا احدثتم بها اجمل حملة نظافه
وقد تزينت بكم
وربنا مايحرمناش من افكارك العظيمة

**د أنس البن** · #10 02/10/2009, 16h30

حبيبنا ابن الريف سعد الشرقاوى
قصيده فى وقتها فعلا زى ما قال أخونا فى الله إبن البلد أبو وعد صاحب الكلمات اللى جواها كلمات ,
ما علينا ..... إنت فتحت موضوع مهم واستطعت بمهاره تغطيه من كافة جوانبه وأركانه ,
النهارده وانا رايح اصلى الجمعه سمعت حوالى ثلاثة ميكرفونات لثلاثه من خطباء المساجد للأسف بيقولوا كلام ما أنزل الله به من سلطان , اللى بيتكلم غلى انفلونزا الخنازير على إنها انتقام من ربنا منا وغضب علينا لسوء أعمالنا , واللى يقول .. أى والله .. ربنا أمر الفيروس يدخل جسم الخنزير .. وأمره يخرج منه علشان يعدى الإنسان .. ثم أمره يخرج من الإنسان علشان يعدى إنسان آخر .....
دا اللى قدرت القطه بودانى . حتى شيخ المسجد اللى كنت فيه تناول نفس الموضوع بنفس السذاجه والسطحيه
ما علينا ... قلت لنفسى والله لو كان الواحد منهم بس يتكلم فى النظافه وأنها الدين ومعنى النظافه ظاهرا وباطنا أى النظافه الحسيه والنظافه المعنويه (على فكره هنا كلام كتير قوى قوى وغالى .. لكن مش وقته) ... كان كفايه قوى الواحد منهم بعد المقدمه وحمد الله والصلاة والسلام على رسول الله يتلو آيه من القرآن وحديث لسيد ولد آدم .. ثم يقرأ القصيده بتاعتك , وبعدها التائب من الذنب والدعاء وأقم الصلاه .... لو عمل كده أعتقد إنه سيكون قد كفى ووفى وأفاد وأقام مقاصد الشرع
بارك الله فيك يا حاج سعد