كلمات : فتحى قورة
ألحان : منير مراد
غناء : شادية
قد تتعجبوا .. لماذا إخترت هذه الأغنية بالذات .. بالرغم من أنها أغنية خفيفة كمعظم ألحان منير مراد لشادية
إخترتها .. لأنها مصيبة من مصايب منير مراد .. أغنية خفيفة تحمل فى داخلها فكر لحنى وتمكن من إستخدام المقامات ..
المقام : نهاوند .. وبالتحديد ( نهاوند كردى ) الذى يقابله فى الغربى .. المينور .. أو سلم دو الصغير
خلاص ؟ .. لأ مش خلاص .. ماكانش حد غُلُب .
عمنا منير مراد .. خدعنا .. إشتغلنا يعنى ..
قعد يلعب فى النهاوند .. رايح جاى .. دون أن يرسى على درجة الركوز .. لم يرتكز طوال الأغنية ..
طيب عمل إيه ؟ .. لعب على الدرجة الخامسة للمقام .. التى هى بداية جنس الفرع للمقام ..
وهى فى حالتنا ( الكرد ) .. ولا زم ناخد بالنا ياجماعة من الحكاية دى .. وخصوصاً المبتدئين فى تعلم الموسيقى والمقامات .
المبتدئ سيعتقد أنه إستعمل مقام الكرد .. وخاصة أن دليل المقام فى النوتة واحد ( المى بيمول ، اللا بيمول ، السى بيمول )
الدليل واحد بالنسبة لنهاوند الدو .. وكرد الصول أيضاً .
وأيضاً لأن بداية الغناء من الصول ( النوا ) .. ونهايته أيضاً ..
الله .. أمال عرفت منين إنه نهاوند يافلحوس ..
من طبيعة المقام .. من إحساسه .. فعندما تنتهى الجملة اللحنية أو الموسيقية على درجة الصول ..
لا نشعر بالراحة .. لأنها قفلة معلقة .. تحس إنك متعلق .. لا طايل سما ولا أرض ..
هذا الكلام كله .. ليس معناه أنه لم يستعمل الكرد .. بالتأكيد إستعمله وأبدع منه جمل لحنية وموسيقية جميلة .
هيا بنا الأن ندخل فى الأغنية ..
مقدمة موسيقية .. تتحاور فيها الوتريات بأشكال العزف المختلفة ( بستكاتو ، قوس ) والبستكاتو .. هو النقر بالأصبع على الأوتار .. والقوس .. هو العزف العادى ..
ثم يدخل القانون وبعده الناى فى جملة جميلة جداً من الكرد .. ثم يعزف القانون الجملة الرئيسية ويسلم للغناء
تغنى شادية ( حه وبه ويه وبه ويه كمان .. مكتوبين فى القلب جوه من زمان ) ومع إيقاع المقسوم ..
ويرد عليها الكورس بنفس المذهب ..
لازمة موسيقية من الكرد .. وتغنى شادية ( لما بتسلم عليا .. بانكسف ماعرفش ليه ) ..
إسمعوا الجملة اللحنية القادمة ( أرجع أتندم وأقول ياريتها قالت .. وألقى دمعة شوق إليك ع الخد سالت )
ياساتر .. ماهذا الجبروت الموسيقى .. جملة جميلة جداً من الكرد .. إستعمل فيها عمنا منير مراد .. حرف خارج حيز المقام
( عُربة يعنى ) حرف واحد ورجع بسرعة .. لكنه وجعنا .. أمتعنا ..
وترجع شادية تقول ( روحى إنت .. قلبى إنت .. ياحبيبى ) لتنهى الكوبليه .
يردد الكورس نفس المذهب .. وتسلم الموسيقى من مقام الحجاز .. تسليمة صغيرة جداً ..
وتغنى شادية ( فى كل خطوة تقابلنى صورتك .. فى كل حتة شايفاك معايا )
وتعود من نفس الطريق إلى الكرد .. ثم النهاوند المعلق .. وتنهى الكوبليه
يرد الكورس .. وتسليمة أطول قليلاً لمقام العجم ..
وتغنى شادية من العجم ( فيه كلمة شاغلنى بيها .. أه لو تسألنى عنها )
وتعود من نفس الطريق .. كرد ثم نهاوند .. وتنتهى الأغنية
لاحظتوا أن الملحن لم يستعمل أى مقام شرقى به ثلاثة أرباع التون .. هذا هو منير مراد ..
الذى يعتقد الكثيرون أنه ملحن بسيط أو خفيف .. كلا البتة ( على رأى محمد صبحى فى مسلسل ونيس ) .
إسمعوا منير مراد فى لحن ( من يوميها ) لوردة .. إسمعوه فى لحن ( علمنى الحب ) لصباح .
مصيبة من مصايب منير مراد ( حه وبه )
العرض الشجري