دردشة موسيقية

[الألآتى]

أهلاً بالعزيزة سامية ..

وأهلاً بكم جميعاً ..

إذا كان الكلام عن الموسيقى .. فلن أمل أو أيأس .. فالموسيقى حياتى ( دمى ودموعى وإبتسامتى ) ..

وإذا كنتِ أختى العزيزة تريدين معرفة سيرتى الذاتية أو شهاداتى فى الموسيقى .. فإليكِ هذه الصدمة ..

أنا لا أحمل أى شهادات فى الموسيقى .. كل شئ تعلمته ودرسته ذاتياً .. عبر سنوات طويلة من العمر .. هذا غير الخبرات والتجارب التى إكتسبتها من طول إشتغالى بالموسيقى ..

وإذا كنتم تريدون معرفة أصل الحكاية .. فلا مانع ..

الأصل ياإخوانى .. أن عائلتى تنتمى للموسيقى بشكل أو أخر .. وللعلم إن لقب ( الألآتى ) ليس مهنتى فحسب .. ولكنه لقب العائلة .. ومذكور فى بطاقتى وجميع أوراقى ..

كان جدى ( حسن الألآتى ) الكبير .. رجلاً كفيف البصر .. وكان أديباً ساخراً .. نزح من تركيا فراراً من الحكم العثمانى .. ولجأ إلى مصر وبالتحديد .. منطقة القلعة .. ليكون فى حماية الوالى ( محمد على باشا الكبير ) .. ( قرأت هذه المعلومات فى كتاب قديم وجدته عند عمتى الكبيرة .. ولا أعرف أين هو الأن ) .. وكان والدى مطرباً ومتعهد للحفلات .. وأخى الأكبر ضابط إيقاع ( طبال يعنى ) ولازال .. برغم كونه موظفاً كبيراً فى وزارة العدل ..

فوجدت نفسى أحب الموسيقى بحكم النشأة .. وبحكم إنتمائى لهذه العائلة الهشك بشك ..

وتعلمت العزف على الأكورديون والأورج منذ الصغر .. ( عمرى كان حوالى 16 سنة ) .. ولم أمارس العزف فى أى حفلات أو أى تجمع .. لأنى كنت أحب الموسيقى وكفى ..

وتأتى الرياح بما لا تشتهى السفن .. تعثرت فى دراستى الثانوية .. فتطوعت فى الجيش .. ومكثت فيه حوالى 20 سنة .. وبحكم هذه الظروف لم يكن فى إمكانى بالطبع دراسة الموسيقى فى معهد أو كلية .. وإلتحقت بمعهد الموسيقى العربية ( الدراسات الحرة ) .. ولكنى لم أستمر أكثر من عام واحد .. لظروف الجيش والزواج .. وكنت أيامها قد إحترفت العمل بالموسيقى .. العزف فى الحفلات والأفراح والليالى الملاح .. فقررت أن أكمل دراستى ذاتياً .. فقرأت كل مايقع فى يدى من كتب وأبحاث عن الموسيقى وعلم النغم والتدوين الموسيقى .. حتى جاءت الفرصة .. وإلتحقت بأحد قصور الثقافة .. وعملت مدرباً لفرقة الموسيقى العربية لمدة تقرب من خمس سنوات .. وكانت هذه السنوات الخمس فرصة ذهبية لأتعلم أصول القيادة وأعرف طبيعة كل آلة موسيقية .. وتعرفت أثناء ذلك على بعض الطلبة فى كلية التربية الموسيقية .. وكانت هذه فرصة للإطلاع على منهج الكلية ودراسة مايدرسونه دون الحصول طبعاً على الشهادة ..

ونسيت أن أقول .. أننى كنت الأول فى العزف على البيانو أثناء العام الذى إلتحقت فيه بمعهد الموسيقى العربية ..

ولم أكتفى بذلك .. فقررت تعلم العزف على العود .. وإشتريت عود بالفعل .. وأعتقد أننى سأتقنه عما قريب ..

واليوم .. بعدما تركت العزف فى الحفلات .. وكان ذلك منذ سنوات .. وتركت أيضاً الجيش .. وأصبحت متقاعد ( برتبة نقيب ) .. تفرغت للتلحين والتوزيع الموسيقى .. طبعاً بعد التمكن من الكمبيوتر وبرامجة الصوتية والموسيقية .. صحيح أن أعمالى قليلة ولكنى مبسوط كده .. ومرتاح كده .. يكفى أننى أمارس هوايتى الأثيرة عندى ..

يبقى أن أقول .. أننى تركت العزف فى الحفلات .. لكى لا أكون مضطراً لعزف شئ لا أحبه ..

كفاية كده ولا نقول كمان ..

[غازي الضبع]

المشاركة الأصلية كتبت بواسطة الألآتى

أما مافعلته ياعم غازى .. فلا يعدو أن يكون زخرفة أو دندشة لإعطاء الأغنية شكلاً جديداً دون تغيير التوزيع الأصلى ..

وعموماً : أنا فى حاجه لسماع الأغنية الأصلية وسماعها بعد التوزيع ليكون حكمى صحيحاً ..

وأؤكد لك ياعم غازى أننى مبسوط جداً لمحاولاتك هذه .. وخصوصاً أنك غير دارس للتوزيع الموسيقى .. ولا مانع من التجربة ..

إمبارح لما قريت كلامك الجميل ده ، رحت دورت على الشريط الوحيد المتبقي عندي عشان أسمع الأغنية اللي قولتلك عليها Coco jumbo وقعدت أضحك جامد قوي
وأقول أد إيه الواحد كانت دماغه رايقة ..
ربنا يسهل وأحاول أرفعها هنا ، وأنا متأكد إنها هاتعجبكم أن شاء الله ، وعلى فكرة هي فعلا ذات توزيع جديد ، وإنت بنفسك اللي هاتقول كده لما تسمعها بس أنا يمكن مش عارف أوصف أنا عملت فيها إيه بالظبط .
وقعدت أضحك أكتر لما سمعت باقي الشريط ( لم أسمعه منذ حوالي 10 سنين ) .. وخاصة إني عامل فيه ميكس لذيذ قوي بين كذا أغنية منها يامالكا قلبي على كل ده كان ليه ( بالعود ) ثم فجأة موسيقى ليلة القبض على فاطمة ( بالأورج ) ثم أغنية زحمة يا دنيا زحمة على هيئة موال ..
وأول مابتديت أقول الموال ده ( في الشريط ) قمت بسرعة قفلت الباب على نفسي لحسن حد يسمع ويضحك عليا
ولسان حالي بيقول يادي الكسوف ..
لآ وأبو مندور يقولي إبقى إرفع الشرايط هنا في المنتدى ..
دا المنتدى مانع عدوية سلطان الموال ، أحط أنا بقى غازي الضبع
ساعتها مش هايمنعوني من التحميل .. دول هايضربوني بالنار
لكن الأغنية اللي أعدت توزيعها جديرة بأنها ترفع في المنتدى ( على أن تحذف بعدها بخمس دقايق )
ربنا يسهل وأحاول أرفعها ..

[unicorn]

الاخوان الاعزاء غازى و ابلة سامية , الاستاذ الجليل و الاخ الاكبر محمد الالاتى ,
السلام عليكم
اسف لانشغالى الفترة الماضية و لم اتابع معكم الحديث و لكن ما شاء الله المكان دائما عامر بكم
و دامت المودة بيننا ان شاء الله
استاذنا الكبير الفنان الالاتى
لفت نظرى فى احد ردودك انك تقول انك احيانا تشعر انك وحدك فى هذا العالم
صدقنى اكاد اجزم ان 75 % من الاعضاء الحقيقيين فى المنتدى ينتابهم نفس الشعور
و كلنا نهرب من دنيا الهلس و الهجص الى المنتدى
و الدليل على ذلك هذه الصفحة التى فتحناها للدردشة و الحوار
فالمفروض بعد ان استمتعنا بأى لون من الطرب الشرقى فى المنتدى ان نخرج منه,
و لكننا فتحنا هذه الصفحة لاننا لا نريد الخروج لأننا ببساطة ماصدقنا نلاقى ناس لهم نفس التفكير و نفس الميول الفنية و الاستماعية لنجالسهم و نتكلم معهم فى شئ له معنى لأنه على النقيض من ذلك فى خارج المنتدى مازال هناك المغنيين اللطاف
ذوى الشعر المسبسب و الابتسامات الساحرة و الاصوات التى تقلب المعدة ,
و ما زلنا لا نريدهم... فللأسف نهرب منهم الى المنتدى لاننا جميعا و حيدون خارجه.
كما اندهشت جدا من ان حضرتك غير دارس للموسيقى برغم شرحك الاكاديمى المنظم و المبسط , و اسمح لى هذا يزيدك فخرا و يزيدنا تقديرا و احتراما لموهبتك فى الموسيقى و موهبتك فى الشرح , و مما زاد اعجابى بك انك تقول انك عازف للبيانو الذى احبه جدا برغم علمى انه من اسهل الالات فى تعلمه الا ان اتقان العزف عليه انا متأكد انه صعب جدا.
واستمعت الى اعادة توزيع يا قليى يا خالى التى تفضلت حضرتك و رفعتها و .......
مش عارف ....كلها اورج ...مافيهاش حياة يا استاذ محمد... عمار الشريعى اللى عاملها؟؟؟؟
فى رأيى انه لو انه هو اللى عامل هذه التوزيعات فهى لم تضف شيئا الى تاريخه بعكس الحانه هو التى لن ننساها ابدا.
و لذلك احب اسأل حضرتك و برضه أسأل غازى و ابلة سامية مين اقرب الموزعين الموسيقيين الى قلوبكم؟؟ و ليه؟؟؟؟
(بالنسبة لى و دون اى تأثير عليكم انا بحب عمر خيرت)
اما بانسبة لموضوع عم الdj فاحب اطمنك و اطمن ابلة سامية انى عندما اعطيه اسطوانة فى اى حفلة باحمر عنيه فى اثناء ذلك و ببرق فى عينه عشان يخاف و يكش و يقول يارب عدى الليلة دى على خير..... الراجل ده شكله لبط(مع انى غلبان و فى حالى و الله) .
و هما دايما زى ما قولت لحضرتك عيال صغيرين فتحوا عنيهم على الهجايص و مش فالحين غير فى هز وسطهم بس.
و بالنسبة لرد فعل نقابة الموسيقيين تجاه هؤلاء الDJ , فعلا حاجة مخجلة ان تقول نقابة محترمة لها اعضاء و لها شئون قانونية لا املك سلطة على من يحييى الحفلات , و يبقى لهم حق بعرور و الصغير يغنوا للعنب و لمؤاخذة للحمير ماداموا عارفين ان النقابة ليس لها اى سلطة على احياء الحفلات.... ولا ايه رأي جضرتك يا أستاذ محمد؟؟؟
نيجى لاستاذ غازى
يا عم غازى يا استاذ غازى ايه فايدة منتدى السميعة اذا ماسمعوش صوتك و الحاجات اللى عملتها عشان تاخد رأى نهائى لهذه التجارب .
و تأكد ان الحكم عليها سيكون موضوعى جدا و لو طلعت وحشة لا قدر الله ماتخافش مافيش مشانق و قطع رقاب بل بالعكس سنحترم محاولاتك جدا .
و انا متأكد انه مادام المايسترو عصمت قالتلك غنى يا غازى يبقى اكيد صوتك حلو .و الصوت الحلو لن يلام الا على الكلمات او الالحان .
ياللا ارفع الحاجات دى خللينا نسمعها.
و الصفحة التانية بتاعتك حانجيلك فيها يا باشا و فكرتها عجبتنى جدا جدا جدا يا غازى يا جميل يا صاحب السبق دايما.
و احب ارد على ابلة سامية بالنسبة الى مشاركة باقى الاعضاء لنا فى هذه الصفحة ان فى كتير بيخشوا الصفحة و اكيد بيستفيدوا من شرح الاستاذ محمد و من مناكفة استاذ غازى و اكيد مستنيين الفرصة فى موضوع موسيقى نثيرة يخاطب اهتماماتهم و يشاركونا بأذن الله.

[الألآتى]

المشاركة الأصلية كتبت بواسطة unicorn

كما اندهشت جدا من ان حضرتك غير دارس للموسيقى برغم شرحك الاكاديمى المنظم و المبسط

حمدلله على السلامة أخى أبو مندور .. فينك ياعم .. وحشتنا ..

معلش .. إسمحلى أرد أولاً على عبارتك السابقة ..

أنا بالفعل دارس للموسيقى .. ولكن دراسة ذاتية .. ليست عن طريق معهد أو كلية .. الفارق أننى لاأحمل شهادة .. رخصة يعنى .. مع إحترامى وتقديرى الشديدين لحاملى الشهادات ..

وبصراحة أكثر .. أنا لى موقف من الشهادات .. على الأقل فى بلدنا السعيد ( مصر ) ..

إن الشهادات فى مصر لا تعنى بالضرورة أن حاملها متمكن من علمه .. هى فقط رخصة للعمل أو لوحة لزوم التعليق على الحائط .. وكتابتها فى الكارت الشخصى .. أنا لا أحب الشهادات ..

وقد كان لى موقف ظريف عندما قررت أن أحصل على بعض الدورات فى الكمبيوتر .. حصلت على أكثر من خمسة دورات .. ولكنى كنت أرفض أخذ شهادة من مركز الكمبيوتر .. متعللاً بأننى أتيت للتعلم وليس للحصول على شهادة .. ولم يكن فى نيتى العمل بالشهادة .. أنا أحب أن أتعلم فقط ..

صحيح أن الكثير من حاملى الشهادات مبدعون فى مجالهم .. ولكن هذا ليس راجع للشهادة نفسها .. ولكن لموهبة صاحبها وإستعداده الشخصى ..

أنا درست الموسيقى كما يدرسها أى طالب ويمكن أكثر ..

نبدأ الأن فى مناقشة ماجاء فى ردك الكريم ..

بالنسبة لقولى أننى أشعر أننى وحدى فى هذا العالم .. وردك بأننا جميعاً فى هذا المنتدى ينتابنا نفس الشعور ..

فى الحقيقة أخى أبو مندور .. هذا ماجعلنى أنتمى لهذا المنتدى .. مشاركة الشعور والإحساس .. وأوافقك فى كل ماذكرته بالنسبة لهذه الجزئية ..

أما بالنسبة لتوزيع أغنية ( ياقلبى ياخالى ) .. فهذا التوزيع من أوائل توزيعات عمار الشريعى لأغانى عبد الحليم .. حيث كانت الإمكانيات أقل .. ومن الجائز أن يكون الشريعى أراد أن يعطى الأغنية صبغة غربية .. ولو تابعت أعمال الشريعى منذ البداية ستفاجأ بأعمال بدائية وبسيطة جداً .. منذ كان يعزف على الأورج ( الفرفيزا ) ومعه طبلة ورق فقط .. ولكنه تطور مع تطور الإمكانيات والتكنولوجيا .. ولم أعرف أحداً إستفاد من التكنولوجيا فى الموسيقى أكثر من الشريعى .. لهذا .. أحبه ..

ولقد تعمدت وضع هذه الأغنية بالذات ( للأستاذ غازى ) للتدليل على مدى تغير شكل العمل بشكل جذرى نتيجة إعادة التوزيع ..

أما بخصوص .. أقرب الموزعين إلى قلبى .. فهو ( على إسماعيل ) بدون تردد .. والأسباب كثيرة .. فلقد تربيت على توزيعاته وموسيقاه التصويرية .. كانت الأقرب إلى قلبى .. فهو الذى مزج الموسيقى الغربية بالموسيقى الشرقية .. وحتى اليوم .. لم أجد موزع بقوة هذا العبقرى .. فأنا أحبه .. لله فى لله ..

صحيح أننى أميل لسماع بعض موزعى اليوم مثل ( عمر خيرت وياسر عبد الرحمن والشريعى بالطبع ) ولكن يظل على إسماعيل هو والدى فى الموسيقى التصويرية والتوزيع ..

الخلاصة : أننى أحب وأحترم الموزع الذى يستعمل الأوركسترا الحقيقى فى أعماله .. وليست الموسيقى الآلية ..

وبالنسبة لموضوع ال Dj .. فأنا لا أستطيع بصراحة أن أحذو حذوك .. وأحمّر عينى .. أخاف أحسن يضربنى ياعم .. أنا ماعنديش الجرأة ..

أما بالنسبة لموقف نقابة المهن الموسيقية بالنسبة لل Dj .. فهى مشكلة بالفعل .. لأن ال Dj إنتشر بطريقة عشوائية فى المدن والقرى والنجوع والكفور .. لدرجة تستلزم إنشاء إدارة كاملة تابعة لوزارة الداخلية .. لزوم مطاردة هؤلاء فى جميع أنحاء الدولة .. وهذا عسير كما نعرف كلنا .. وخاصة أن الأخوة ال Dj لا ينتمون بأى شكل لنقابة المهن الموسيقية .. فهم ليسوا موسيقيين .. وليس أمام النقابة إلا إبلاغ الشرطة عنهم .. وليس أمام الشرطة إلا تحرير محضر إزعاج لهم .. يعنى غرامة مالية .. المسألة تحتاج لتدخل أكبر من ذلك .. ويمكن تحتاج لتشريع ..

يتبقى أن أشاركك فيما ذكرته بالنسبة لعم غازى .. الذى مازال يبخل علينا بأعماله .. وأقول لعم غازى .. ماتخافش ياعم .. مش حانتريق على شغلك .. لأننا كلنا كنا مثلك .. لنا تجارب أولية ونعتبرها من الذكريات برغم بدائيتها .. وأنا متأكد إنك عملت حاجات حلوة .. وبالتأكيد إنك فنان حقيقى .. لأن الفنان الحقيقى لا يعجبه عمله مهما تطور .. فهو يطمح للأحسن ..

[غازي الضبع]

المشاركة الأصلية كتبت بواسطة الألآتى

يتبقى أن أشاركك فيما ذكرته بالنسبة لعم غازى .. الذى مازال يبخل علينا بأعماله .. وأقول لعم غازى .. ماتخافش ياعم .. مش حانتريق على شغلك .. لأننا كلنا كنا مثلك .. لنا تجارب أولية ونعتبرها من الذكريات برغم بدائيتها .. وأنا متأكد إنك عملت حاجات حلوة .. وبالتأكيد إنك فنان حقيقى .. لأن الفنان الحقيقى لا يعجبه عمله مهما تطور .. فهو يطمح للأحسن ..

والله يا أستاذ محمد أنا في الأول كنت مكسوف أرفع حاجة من حاجاتي دي
بس دلوقتي وبعد أن شجعتوني .. فعلا أنا مش عارف أرفعها ..
أنا عندي الوصلة اللي من الكمبيوتر للكاسيت ( عينين من ناحية ، وعين واحدة من الناحية الأخرى )
وحاولت اتباع الخطوات المكتوبة هنا في المنتدى ، ولكن لم أفلح
وللعلم أنا باحاول في الموضوع منذ اشتركت هنا في المنتدى ( من سنة وشوية ) بس فعلا مش عارف
ياريت لو تدلني ، وهل فعلا الوصلة اللي عندي هي المقصودة ..
وتعرف إن أي عمل أنا رفعته هنا في المنتدى كان من مقتنياتي الشخصية على الجهاز دون توصيل الكاسيت نهائيا
لو تقدر تساعدني .. أكون ممنون جدا
تحياتي

[الألآتى]

أمممم .. أه ..

بقى هى دى المشكلة ..

عموماً الوصلة إللى عندك تنفع .. ( من ناحية 2 جاك أوديو ومن الناحية التانية جاك صباع صغير ستريو ) .. صح ؟

طيب .. نمشى مع بعض خطوة خطوة ..

أنا مش عارف الكاسيت إللى عندك شكلة إيه ..

لكن بص فى ضهر جهاز الكاسيت .. لو لقيت .. 2 جاك أوديو ملونين ( أحمر وأبيض .. أو أحمر وإسود ) يبقى مافيش مشكلة .. وحانشتغل على هذا الأساس ..

ركّب الوصلة بتاعتك ( الإتنين جاك أوديو .. فى الإتنين جاك إللى فى ضهر الكاسيت ) حلو ؟ .. حلو

نيجى بقى للكمبيوتر .. حاتلاقى كارت الصوت له عدة مداخل .. إختار المدخل المكتوب عليه Line .. وركّب فيه الجاك الإستريو الموجود فى الوصلة .. فاضل بقى نسجل ..

إفتح برنامج التسجيل إللى عندك ( جولد ويف ، ساوند فورج ، ويف لاب .. ألخ )

ضع شريط الكاسيت فى مكانه .. وأظبط على أول الأغنية .. إضغط على زر Ric الموجود فى برنامج التسجيل .. وبعدها شغل الكاسيت .. حاتلاقى البرنامج بيسجل .. ولما تنتهى العملية .. وقف التسجيل فى البرنامج .. وإحفظ الأغنية عندك فى الكمبيوتر .. وخلاص ..

نيجى بقى للإحتمال الثانى .. ماعندكش إتنين جاك أوديو فى ضهر الكاسيت .. تبقى محتاج وصلة بطرفين .. كل طرف ( جاك صباع صغير إستريو ) .. يعنى كل ناحية .. جاك صغير ..,

الأول تضعه فى منفذ Line فى كارت الصوت .. والتانى تضعه فى منفذ Hidphon فى الكاسيت .. وتعمل نفس الخطوات السابقة

خد بالك .. يعنى ملحوظة ..

يجب ظبط مستوى الصوت الخارج من الكاسيت ليكون ملائماً .. حتى لايحدث تشويه فى الصوت ..

وأى مشكلة تظهر أمامك .. أذكرها .. أحلها لك بإذن الله ..

[الألآتى]

أهلاً بالعزيزة سامية ..

ماشى ياستى .. خلينا فى التسجيل دلوقتى .. علشان أنا يهمنى إن كلكم تسجلوا وترفعوا كنوزكم للمنتدى ..

إنتِ بتقولى إنك نجحتى فى التسجيل .. ولكن الصوت بيطلع سئ .. نحاول نخليه يطلع كويس وإبن حلال ..

أولاً : الصوت الصادر من جهاز الكاسيت لابد أن يكون أقل من النصف .. وبدون مؤثرات .. يعنى بدون إكولايزر .. ( Flat ) .. يعنى .. لابيز ولا تريبل ولا ديلاى .. ولا حاجة أبداً ..

ثانياً : الصوت الداخل للكمبيوتر لابد أن يكون مناسب .. إزاى ؟ .. نقول إزاى ..

أثناء التسجيل .. راقبى مؤشر الصوت فى البرنامج .. ممنوع بتاتاً أن يصل مؤشر الصوت للون الأحمر ..

ملحوظة هامة .. إذا كنتِ تسجلين عن طريق منفذ الهيدفون فى الكاسيت .. راعى أن يكون الصوت فى أدنى حالاته .. لأن الصوت الصادر من الهيدفون يكون أعلى من الصوت الصادر من السماعات ..

والقاعدة الذهبية .. ألا يصل مؤشر التسجيل للون الأحمر .. أتمنى لكِ تسجيلاً واضحاً ومرضياً ..

[unicorn]

بسم الله ما شاء الله
استاذنا الالاتى استاذ فى كل شئ
فى المزيكا و فى الكومبيوتر و هندسة الصوت
ربنا يخليك لينا يا استاذنا و نتعلم منك.
احب اقول لاستاذ غازى انه ممكن كمان يعمل recording باستخدام ال jetaudio اذا لم يكن عنده برامج التسجيل التى ذكرها استاذ ابو حسام, و انصحك باتباع تعليمات استاذ الالاتى بدقة لأنى كنت بسجّل قبل كدة دون الاهتمام بمستوى الصوت او وضع الequalizer و ربنا ما يوريك الصوت طلع عامل ازاى
و اظن بعد كده يا عم ماليكش حجة , و احنا وراك لغاية ما ترفع حاجاتك.

[غازي الضبع]

والآن أيها السيدات والسادة
حان الوقت

.................................................. .................................................. .......................

المفاجــــــــــــــــأة الكبـــــــــــــــــــرى

.................................................. .................................................. ......................

أنا نويت أقدم هدية لأخويا وحبيبي محمد الآلاتي
الأغنية التي حدثتك عنها قبل ذلك .. وبعد أن تمكنت من التسجيل

مع أغنية Coco Jumpo
ولكن بالتوزيع اللي أنا عملته لها من جديد
الفكرة والتوزيع من أوله لآخره بتاعي أنا

ملحوظة هامة جدا : هذا التسجيل من حوالي أكتر من 10 سنين وكان غرضي منه الهزار والفرفشة والتجربة ..
وإوعى حد يتريق :z060:
وخصوصا على الصوت المصاحب للموسيقى .. عشان دا صوت واحد صاحبي ماعرفوش..
.................................................. .......................
وعموما عشان أنا بانكسف قوي
أنا هاداري نفسي لمدة يومين ، وبعدين آجي أشوف رد فعلكم إيه ..
ورأي الأستاذ الآلاتي ..
يعني هاريحكوا من وشي يومين بحالهم :z039:

[الألآتى]

إنت وقعت ولاّ الهوا رماك ... تعالى لعمو ياحبيبى .. ده أنا مستنيك من زمان ..

الواضح إن الأورج المستعمل ( Gem WS1 ) .. كما إن صوت المطرب ( العاطفى ) ضعيف .. مش واضح ..

الإيقاع محتاج شوية Quantize .. ( إدخال النغمات الشاردة داخل حيز المازورة ) .. لأنى سامع تخبيط ( حلل ) ..

وعموماً .. التجربة كويسة بالنسبة لأول مرة ..... وأخر مرة ..