طلبات نوتة أ / عادل صموئيل الجزء الثانى - الصفحة 629

**عاصم المنشاوى** · #**6281** 28/06/2018, 09h14

صديقى العزيز /هيثم الصالحى...

ارجو من الفنان القدير واستاذنا /عادل صمويل الرد على هذا السؤال ...
فهو من عاشرهم وعايشهم ودخل بيوتهم ورأى وعاصر الحقيقة ورآها رأى العين...
أما رأيى فأن هذا الموضوع قد قتل بحثا...وتاهت الحقيقة بين الطغيان الأعلامى الجبار للموسيقار/ محمد عبد الوهاب... وبين عدم وجود أدلة مادية للراحل رؤوف ذهنى تدعم وتؤيد موقفه...رؤوف ذهنى مات سنة 1985 بينما عبد الوهاب مات بعده فى 91 وبالتالى لم تتح لرؤوف ذهنى برضو الفرصة انه يقدم أدلة مادية على صحة كلامهالذى من المحتمل صدق جزء منه ...خاصة أن موقف رؤوف ذهنى تطوله بعض الشبهات ...فهو كان سكرتيرا لعبد الوهاب وابن خالة السيدة الفاضلة /اقبال نصار الزوجة الأولى لعبد الوهاب وكان فى بيته ومكتبه ...
.تاهت الحقيقة ياصديقى ...ولا نعلم مدى صحتها ...زى ماقلت لحضرتك بسببالطغيان الأعلامى لعبد الوهاب ..
لكنه معروف فى الوسط الفنى عندنا فى مصر وفى هوليوود...انه توجد ورشة كتابة لسيناريوهات وفى الآخر شخص معروف يحط أسمه على الفيلم...فى الأدب نفس الحكاية ...حتلاقى ناس قالت كده على نجيب محفوظ ويوسف السباعى...حتى بليغ حمدى قالو انه اخد من الشيخ امام...مؤلفين لأغانى وحد تانى الأذاعة تقول أسمه....ناس مغمورين يبيعوا أنتاجهم لحد ولما الحاجة تصبح مشهورة ينتابهم الجنون ويدورون فى الشوارع يقولون انا ...صاحب هذا اللحن ...هذه الأغنيه....ده وارد وموجود فى عالم الفن...عبد الوهاب نفسه أخد من الموجى بأعتراف الأتنين دخلة أغنية "أحبك وانت هاجرنى" وكملها عبد الوهاب....
خد اللينك ده ....أحتمال تلاقى فيه الحقيقة

http://www.neelwafurat.com/itempage....4&search=books

واللينك ده

http://www.sama3y.net/forum/showthread.php?t=36784

وفى النهاية دعونا ننتظر رأى استاذنا /عادل صمويل

**nblchar** · #**6282** 30/06/2018, 11h29

الاستاذ الفاضل والكبير.عادل صموئيل....
انه ليعجز الكلام ان يعطيك حقك مما تقدمه للاجيال من خدمات بهذا الزمن الصعب .
ارجو من الله ان يكرمك ويعطيك ما تصبو اليه واتمنى منه تعالى ان يتم عليك عافيتك وصحتك ويمد في عمرك انه على كل شيء قدير . استاذنا الفاضل . لي طلبين عندك الاول. اين وما هي احوال العازفين العمالقة للفرقة الماسية .
اما الطلب الثاني هو نوتة اغنية مش كتير للمطربة فايزة احمد .
ولك احترامي وحبي وتقديري لشخصك الكريم

**عزت شحاته** · #**6283** 30/06/2018, 13h10

اقتباس:

المشاركة الأصلية كتبت بواسطة ابوكارم

الله يرحمك يا استاذ نور
استاذ عزت لك جزيل الشكر
لكن هل الفيديو موجود فى نفس اللقاء
كان حديثا للاستاذ عادل فهل يوجد مع حضرتك
لك كل الشكر والاحترام

-------------------------------
للا سف الفيديو مش موجود معايا

**salhi_haithem** · #**6284** 30/06/2018, 17h49

السلام عليكم

تم تحديث فهرس الأستاذ عادل

هيثم

**عاصم المنشاوى** · #**6285** 30/06/2018, 18h43

الأستاذ /عادل صمويل

أعزى نفسى وأعزيك فى وفاة زميلك الاستاذ /ميشيل المصرى .....مع المسيح ذلك افضل جدا....

**qusay.qq** · #**6286** 01/07/2018, 03h29

رحل صانع ليالي الحلمية...الأستاذ ميشيل المصري..لروحه النوروالسلام والراحة الأبدية..
نعزي أستاذنا /عادل صموئيل/ وندعو لكم طول العمر .

**خليل سليم** · #**6287** 01/07/2018, 12h59

رحم الله الموسيقار ميشيل المصري والذي أمتعنا بأعماله الموسيقية الكبيرة في مسلسلات من الذي لا يحب فاطمة وأولاد آدم وليالي الحلمية وغيرها... تغمد الله روحه الطاهره والعزاء والصبر والسلوان لعائلته واصحابه والى استاذنا الكبير عادل المحترم متمنيا له الصحه الداءمه والعمر المديد وحفظه الرب ....

**عادل صموئيل** · #**6288** 01/07/2018, 17h22

ورحل ميشيل المصرى ... انا مش عارف ابتدى منين يعنى القصص كثيرة ... ميخائيل نخلة حبيب الشهير بميشيل المصرى ... يمكن البعض يعرف عنه انه عازف كمنجة من اشهر عازفى الفرقة الماسية وفرقة ام كلثوم واحيانا كان بيعزف الصولو فى الماسية .. او نعرف عنه انه ملحن التتر بتاع مسلسل ليالى الحلمية وبعض المسلسلات الشهيرة ... او انه موزع موسيقى كبير ... لكن ميشيل المصرى كان اكبر من كده بكتير .. هو مش فقط كان زميلى فى الفرقة الماسية ولكن كان صديق شخصى يعنى لمدة طويلة كان لما يكون عندنا شغل الصبح فى الفرقة الماسية وشغل تانى فى المساء تسجيل او بروفه كان يمسك فيا اروح عنده البيت ويعزمنى ع الغدا ونقضى الوقت لحد موعد الشغل وكانت لقصة دى بتتكرر يمكن 3 مرات ف الاسبوع .. كان فنان ستايل يعنى بيحب السيارات الامريكية الكبيرة .. وشيك فى كل حاجة ... لكن الاهم وهو قيمته القومية الكبيرة كانت فين ... عشان نفهم اقول قصة تانية ... الموسيقى المصرية كانت قبل 1950 وبعد 1950 تقريبيا يعنى ... من مطلع القرن العشرين .. كانت الموسيقى عبارة عن ملحن ومطرب وفرقة ... وكان كل الاغانى الملحن بيحفظ الفرقة بالعود يعنى بطريقة التلقين .. كان تقريبا كل الشغل كده ... لكن لما الاحان كبرت والمقدمات الموسيقية طولت ... وتعدد المطربين وتعدد المحنين ... كان الضغط كله واقع على فرقة واحدة او مش تقول فرقة يعنى كانوا مجموعة من العازفين الشاطرين اى ملحن بيحتاج يعمل لحن بيتصل بيهم ... بس كان فيه فرقة تقريبا ثابتة هم فرقة السيدة ام كلثوم .. بالطبع كان معظم العازفين فى الوسط الفنى من اللى بيعزفوا مع السيدة ام كلثوم ... المهم .. حصل احتياج شديد جدا جدا للمدون الموسيقى بالذات لما تزايد عدد العازفين اللى بيقروا نوتة بمهارة وصار اللحن اللى لازم تعمل له اسبوع بروفات مضنية عشان تسجلة مع العازفين المهرة والتدوين بيتسجل فى يوم ... لكن السيدة ام كلثوم احتفظت بطريقة تحفيظ الملحن للفرقة كانت طبعا بتعمل السلطنة الغير عادية اللى بتتميز بيها اغانى ام كلثوم ... طيب انا بقول كده ليه لتوضيح الكلام المهم القادم ... فى دول الخليج نفس الموضوع ... لحد سنة 1970 تقريبا ... كان الفن بدائى يعنى كان بعض المطربين من دول الخليج بييجى مص يشجل كام اغنية فى اسبوع ويسوقهم لمدة السنة فى بلده ... طبعا كان الضغط على الفرقة الماسية لأنها اسرع واحسن فرقة فى القراءة الفورية يعنى المطرب مكمن يسجل 5 او 6 الحان فى يوم بدل مع اى فرقة مستواها اقل ياخدوا اسبوع .. لكن كنت ادخل الاستدوديو انظر الى النوتة طبعا اول حاجة الاقى اللحن سطر واحد ... بيكون اما لحن شعبى قديم عندهماو الملحن عامله يعنى بنفس النهج اللى معظم الاغانى وقتها .. كانت الجملة الواحدة نعزفها مرة فرقة ومرة صولو ومرة فرقة والمغنى يغنيها المذهب وهى موسيقى الكوبليه وهو الكوبليهات يعنى احنا كنا بنعزفها ييجى خمسين مرة ... طبعا كان شىء بدائى وبيظهر انه اقل من الموسيقى المصرية فى السبعينات شوفوا وصلت لإيه ... وتصادف تواجد بعد الشباب السعودى والخليجى الموهوب اللى اتوا الى القاهرة ودخلوا المعاهد الموسيقية واتعلموا موسيقى بجد واظهروا مواهبهم فى التلحين ... منهم محمد عبده واسماء كبيرة الآن كانا مازالوا فى المستهل يعنى ... وهنا ظهرت عبقرية ميشيل المصرى ... يعنى هو كان من قبلها بوقت طويل سافر الى لبنان وعمل مع فرقة فيروز فترة طويلة .. ثم سافر الى الخليج وهناك تفهم الموسيقى الخليجية بدروبها ... وللعلم انا كخبير فى الموسيقى المصرية وزملائى كتار كنا مانعرفش الكتير عن الموسيقى الخليجية .. حتى فى البروفات كان احمد فؤاد حسن لما المطرب الخليجى يغنى موال .. يقول سيبوا الخبراء يعزفوا معاه يتابعوهيعنى بالطريقة الخليجية او زى ما بيعملوا فى الخليج ... المهم ان ميشي المصرى اتقن اولا لغتهم وتراكيبها وحفظ تفعيلات الموسيقى الخليجية ( المبهمة بالنسبة لنا ) وايقاعاتهم الصعبة وبدء يدون لهم ... والتدوين افاد الملحنين كثيرا جدا ... يعنى تخيل الملحن لما يلاقى مدون بيكتب اى شىء بيدونه والفرقة تعزفه فورا ... فى الفترة من 1970 لحد 3 او 4 سنوات بعدها حصلت طفرة فى الاغانى الخليجية يعنى بقا فيه مقدمات كبيرة والكوبليهات بقى كل كوبليه لحن .. ولما نيجى للأيقاعات .. الايقاعات الخليجية كانت صعبة جدا على المصريين .. لأنها مش زى ايقاعاتنا يعنى لما تسمع ام كلثوم تسمع ضابط الايقاع رق ومعاه طبلة وبونجز او احدهم .. و100% لكن الخليج كانت ايقاعاتهم مركبة يعنى تلاقى 4 عازفين على طبول مختلفة وبيعملوا كونتر مع بعض ... ده بعكس الايقاع المصرى .. يعنى الايقاع المصرى زى ما قلت ضابط الايقاع الرق بيقول الايقاع المطلوب سواء ملفوف او مقسوم الخ ... والطبلة بتمسك له الوحدة والبونجز بيزخرف الفراغات ...يعنى كلهم مع بعض حاجة واحدة .. لكن الايقاع الخليجى تسمع كذا اياع متداخلين فى بعض ... واذا جبت ضابط ايقاع عبقرى زى المرحوم حسن انور .. بيقول حاجة صعب تجيب معاه 3 او 4 عازفين ايقاع مصريين يعزفوا معاه باقى التداخلات ... لذلك كانت عبقرية ميشيل المصرى انه خلا المطرب لما ييجى عشان يسجل اغانى او يعمل خفلة فى مصر كان بيجيب معاه عازفين الايقاع من الخليج ... وكان حسن انور لما بيعزفوا مع بعض بيضلع بصمة جميلة مع الايقاعات دى ... كان المطرب الخليجى اول ما بينزل مصر بيروح فورا لميشيل المصرى يتفقوا على وقت يكتبوا الالحان وكان ميشيل بيقود الفرقة الماسية فى الاستدوديو فى الالحان اللى بيدونها لأن اللى كاتب اللحن طبعا بيبقى اقدر واحد انه يقوده ... انا زى ما انتم عارفين مدون يمكن اكتر من 3000 لحن ... 95% منهم الحان مصرية ومدون الحان سعودية ولكذا دولة اخرى ... لكن تدوين الاغنية المصرية بالنسبة لى اسهل من تدوين اغنية خليجية .. اذكر ان ميشي المصرى اخدنى معاه شيؤاتون القاهرة وهناك زرنا المطرب محمد عبده ميشيل كان رايح يدون له اغنية اسمها هيا معى ... بالظبط ميشيل دونها فى 25 دقيقة ... وكل مصرى اشتغل بعد كده مع الخليجيين او عمل فرقة لهم فهو بيشتغل على الاساس اللى وضعه ميشيل المصرى يعنى هو اللى فك للمصريين طلاسم موسيقى الخليج ... من ضمن المواقف المضحكة اللى حصلت بينى وبين ميشيل المصرى .. كان عنده بيانو فى البيات كانت حالته 100% لكن مرة نغمة صول فى منتصف البيانو حصل فيها نشاز والنغمة فى البيانو فى ثلثى البيانو من اليمين بتبقى شاكوش بيضرب على 3 اوتار زى القانون .. بس صلب .. وقوة شدها رهيبة يعنى .. فيهم وتر خس شعرة بالطبع مع الوترين التانيين المضبوطين بيعمل نشاز قد يمشى مع اى حد لكن مع موسيقار كبير زى ميشيل خلاه اتجنن ... ومع انقراض اللى بيشدوا البيانو هو ما قدرش يمسك نفسه ونزل للسيارة وجاب طقم العدة وطلع منه مفتاح وحاول يشد فيه الوتر طبعا ما ينفعش والوتر باظ اكتر يعنى بقا شىء فظيع ... تصادف اننا فى الفرقة الماسية وهو بيقول لى اعمل ايه .. انا كان كل زملائى فى الفرقة بيسألونى فى اى حاجة لأنى بفهم فى 70 حاجة غير الموسيقى .. قت له دى حاجة بسيطة انا عندى مفتاح شد بيانو ( والمفتاح للعلم كان حاجة نادرة جدا ) هو سمع دى واتجنن كانت الساعة 12 بالليل قلت له بكره اجى لك اظبطه لك .. عارفين طبعا الفنون جنون قال لى نروح دلوقتى وفعلا جابنى عين شمس واخدنا المفتاح ورجعنا شبرا اغاخان وظبطت له نغمة الصول .. طبعا انا فاهم هو كان محتاجها اد ايه يعنى ما اتضايقتش ... انا اتمنى ان دول الخليج اولا السعودية ثم الكويت يعملوا تكريم للموسيقار ميشيل المصرى ...... اسكنه الله فسيح جناته

**ابوكارم** · #**6289** 01/07/2018, 21h54

اعزى اﻻستاذ عادل صموئيل
واعزى جميع اﻻاصدقاء بالمنتدى
لوفاة الاستاذ ميشبل المصري

**عاشقة العود** · #**6290** 02/07/2018, 12h15

استاذ عادل يسعد أوقاتك. يا ريت تدون لنا رائعة الفنانة اصالة نصري " لو تعرفوا" الحان الموسيقار سيد مكاوي لاني بحثت عنها كثير وما وجدتها توجد فقط نوتة واحدة غير واضحه وفيها اخطاء كثيرة.
مع اطيب تحياتي القلبية استاذنا الفاضل https://youtu.be/_dPW3uMUEF0