أطلب تحليل أغنية ادى الميعاد لمحمد فوزى

[شريف-زغيب]

أولا هى ليست الاغنية الوحيدة التى سأطلبها لمعرفة مابها من كنوز ومقامات وابداعات موسيقية ولكن هناك الكثير.
اغنية ادى الميعاد اعتبرها من ضمن افضل الاغانى لمحمد فوزى ان لم يختلف معى الاصدقاء.
اعذرونى لأننى لست مختصا يعنى لو خرجت كلمة كده ولا كده متعاتبونيش عليها انا هاقول اللى انا حاسه ناحية الاغنية.
احس انها اغنية جديدة فى وقتها فيها شغل من فوزى وإن كان أغلب تلحينها بالكمنجات وأحس انه لحنها كما لو هناك ساعة تمشى او واقفة يعنى احس الحيرة فى لحنه.
هذه الاغنية تعشقها الشحرورة صباح حيث سمعتها فى حديث اذاعى فى برنامج تسجيلات من زمن فات قالت انها تعشق هذه الاغنية لمحمد فوزى وتمنت ان تغنيها
اتمنى من المختصين الموسيقيين فى المنتدى تحليل الاغنية واتحافنا بدراستها موسيقيا

[غواص النغم]

إختيار جميل
للجميل
محمد فوزي
ودائما ما اخلط بينها واغنية جميلة اخري له من كلمات صالح جودت:
انتي ياساعة قوليلي الحق وانت يا قلبي انا سامع دق
ممكن لان الاغنيتين عن الساعة وانتظار الحبيب
في انتظار
كلمات الاغنية

للمساعدة في تحليل الاغنية لمن يريد تحليلها
والذي نقول له مسبقاً:

بقى ان نذكر ان الاغنية من فيلم :
عدو المرأة : 1946 مع صباح
ومن كلمات مصطفى السيد

تحياتي

[شريف-زغيب]

ادى الميعاد قرب ولا جاتشى

وصبحت أنا تايه معرفشى
الساعة واقفة ولا بتمشى
ادى الميعاد الميعاد قرب
الفكر بالوقت بيجرى يسبق خيالى لميعادها
ويهون عليا عمرى واسعد امالى بودادها
جمالها.. رقتها. . دلالها.. خفتها
على كل دول انا مقدرشى وصبحت تايه معرفشى
الساعة واقفة ولا بتمشى
ادى الميعاد الميعاد قرب
موهوم وخايف ليبان حبى ساعة لقايا وياها
دى الساعة بدق وقلبى بيحسب الوقت معاها
قوامها..حلاوتها..كلامها..شقاوتها
على كل دول انا مقدرشى وصبحت تايه معرفشى
الساعة واقفة ولا بتمشى
ادى الميعاد الميعاد قرب
اللى تشوف الحسن عينيه يميل وتكتر اوهامه
ويمر كاس الحب عليه يشرب من الكاس احلامه
عيونها..نظرتها..جفونها..لفتتها
على كل دول انا مقدرشى وصبحت تايه معرفشى
الساعة واقفة ولا بتمشى
ادى الميعاد الميعاد قرب


ادى الميعاد:
ك:مصطفى السيد
ل وغ :محمد فوزى.

[الألآتى]

بسم الله نبدأ فى تحليل أغنية ( أدى الميعاد )

كلمات : مصطفى السيد

ألحان وغناء : محمد فوزى

بدأ اللحن بمقدمة موسيقية سنباطية من مقام الراست .. ويظهر أن عمنا فوزى .. رجع لصوابه سريعاً فظهر أسلوبه المميز فى الجملة الموسيقية التالية .. الجملة السريعة الرشيقة

ويغنى من الراست ( أدى المعاد قرب ولا جاتش ) ..

ولكنه ينتقل لمقام جديد عند ( الساعة واقفة ولا بتمشى )

المقام الجديد هنا هو ( النوا أثر ) .. وتحويلة قصيرة جميلة للكورديللى عند نهاية المذهب

المهم ..

نفس موسيقى المذهب .. ولكنه يسلم للنهاوند .. ويغنى ( الفكر بالوقت بيجرى يسبق خيالى لمعادها )

وتحويلة للحجاز .. ليمهد للعودة للنوا أثر ثم الكورديللى لينهى الكوبليه

موسيقى جديدة .. يبدأها بسلم ملون ( كروماتيك ) ثم جنس نهاوند ..

ويغنى من نفس الطريق .. ( موهوم وخايف ليبان حبى ساعة لقايا وياها )

واضح طبعاً .. سر إختيار فوزى لهذه الجملة الكروماتيكية .. ليؤكد حالة الوهم والخوف .. شغل محترفين

وبعده يعود لنفس السيناريو ونفس الطريق .. للنوا أثر ثم الكورديللى لينهى الكوبليه

موسيقى جديدة من مقام العجم .. أو الدو ميجور .. ويغنى ( إللى تشوف الحُسن عينيه .. يميل وتكبر أوهامه )

والملاحظ هنا .. أن عمنا فوزى لم يكتفى بالعجم فقط .. ولكنه حود على مقام ( الشوق أفزا ) من درجة الدو ..

والشوق أفزا عبارة عن جنس عجم وجنس حجاز .. وخلاص .

يعنى غنى ( إللى تشوف الحُسن عينيه ) من العجم .. وغنى ( يميل وتكبر أوهامه ) من الشوق أفزا .. ملحن بيفكر ويخطط

ونفس الموضوع والسيناريو .. لينهى الكوبليه والأغنية ..

يبقى أن نذكر أن الإيقاعات المستخدمة غربية .. مثل الفوكس تروت والسلو روك .. فيما عدا الشطرة الأولى من المقدمة .. فنجده إستعمل إيقاع السنباطى

أرجو أن أكون وُفقت فى هذا التحليل المتواضع

[شريف-زغيب]

رائع يابوحسام وتحليل متميز وضح لنا مجموعة المقامات الموسيقية التى وضعها محمد فوزى والتى تناسب كلمات مصطفى السيد .
وشكرا على التلبية الجميلة.
ولكن انا استفسر عن شئ يابوحسام:
حضرتك ذكرت بأن المقام الجديد وهو النوا أثر وتحويلة قصيرة للكورديللى عند نهاية المذهب هى فى الكلام الاتى:
جمالها.. رقتها. . دلالها.. خفتها
على كل دول انا مقدرشى وصبحت تايه معرفشى،
قوامها..حلاوتها..كلامها..شقاوتها
على كل دول انا مقدرشى وصبحت تايه معرفشى،


عيونها..نظرتها..جفونها..لفتتها
على كل دول انا مقدرشى وصبحت تايه معرفشى

هل هذه هى المقصودة؟

[الألآتى]

النوا أثر موجود بالتحديد عند ( على كل دول أنا ماقدرش .. وصبحت تايه ماعرفش )

والكورديللى عند النهاية ( أدى المعاد قرب ) ويسمى أيضاً حجاز كار كورد

[شريف-زغيب]

وضحت ووصلت المعلومة يابوحسام .
ومعلش بقى استحملنى انا عايز أستفز طاقاتك وابداعاتك التحليلية اكثر واكثر واطلب منك ان توضح لنا معلومات عن مقام النوا أثر وليه ذكرت انه المقام الجديد فى الاغنية؟

[الألآتى]

المشاركة الأصلية كتبت بواسطة شريف-زغيب

وضحت ووصلت المعلومة يابوحسام .
ومعلش بقى استحملنى انا عايز أستفز طاقاتك وابداعاتك التحليلية اكثر واكثر واطلب منك ان توضح لنا معلومات عن مقام النوا أثر وليه ذكرت انه المقام الجديد فى الاغنية؟

إسأل كيفما شئت ياأستاذ شريف

النوا أثر .. من مشتقات النهاوند ..

وهو يتكون من عقد نوا أثر على الدو .. وجنس حجاز على النوا

والعقد هو مايزيد عن أربع درجات

وقد ذكرت أنه المقام الجديد .. لأن محمد فوزى لم يبدأ به .. بل بدأ بالراست

[حماد مزيد]

تحية لكم أخوتي جميعا
وأشكر الأخ أبو حسام على تحليله الممتع
وأسلوبه الشيق
ودمتم أهلا للفن والمعرفة
وجزاكم الله كل خير

[محمد محمد صادق]

عزيزي محمد بك الآلاتي النوأثر مش من فصايل النهاوند ده مقام مستقل زي مقام النكريز الفرق بينهم ان النوأثر بيعمل حجاز على النوى و النكريز كرد على النوى ... تحياتي