طير بينا يا قلبي وما تنتهيش طيران الدنيا من غير الأحبّة ... هوان فاكهتها ألحانك .... وبهجتها ساعة ما تضحك عيونك نجمتين في الوش اتنين حبايب وما يعرفوش الغش الحب عندك زي ليلة صيف وليف وحاضن جوّه روحه وليف وزي لون الطيف بتفرش في المدي سحر وخيال الله عليك خيّال وحصانك الفن الجميل.. - الحب في الدنيا سبيل.. وحشنا صوتك يا (فوزي) وانت ويّانا صدق اللي قال إن الجمال عمره ... قليل..! ------------------------------------- نورماندي2
كل الحارات صبحت قصور ياللي بدعت الضحك لو وسط القبور وعينيك بعيد... لكن هنا في القلب فنك راح يعيش .. بتبصّ لي ..؟ واللا انت ما.... بتبصليش.! بعدك مفيش .... علي عكس البعض ما زعموا... إنت الدليل علي (أمةٍ عاشت من فنها الأممُ ) ----------------------------------- الشاويش عطية
عمرك ما شفت الملايكة في ثياب أشرار؟ أنا شفت واحد بس كان عايش عشان اللقمة ... وكمان (الإيجار) لابس شاويش والخلقة بتخوّف بس العينين مراجيح و بتحدّف هذار عملاق في جسمه بس زي الوليد من غير ما ازيد ولا اجيب انا ف سيرته: تشوفه غضبان ....حتضحك وتستهتر بتكشيرته .... ----------------------------------- العزيز ...عيد
طلّع لسانك للحياه .... لو قلت آه .....حزنك ح يبلغ منتهاه لكن عشان الدنيا خوّانة وف عيشها وف ملحها لاهيين... ولهيانا لازم تولّع في روحك ثم تاخد قبس ...تهديه لروحك وانت مش ندمان رحمة ونورين علي قلبك الحسّاس لو كنت زي الناس كان البشر عرفوك ملعون أبوكي يا دنية (الظالمين) قولوا علي ناكرين جميل الفن... آمين ------------------------------------
[u] ست الكل
نورك ياست الكل نوّر في الدروب
عن خمر آهاتك أنا ما عرفت أتوب
ويدوب كلامي وأغلي منه يدوب
فلاحة مصرية وعصرية
شجرة دهب ومفرّعة مواويل
وسط الهوانم .. قيصرة
واحنا صفوف بنميل
صفصافة عالية بتغسل شعرها في النيل
ومستحيل.... إن الهوي المكتوب
فوق الجبين ..قناديل
يعشق سوي آهة تهز الروح
وتعصر م العيون... مناديل
العزيز الفاضل unicorn
خالص شكري وتقديري لحسن استقبال ما أكتبه
وتعقيبات الأحبة خير زاد لمواصلة العطاء ..
.... وها أنا أكتب بقية الخالدين ولكنها لم ترفع بعد...
ولك مني خالص الشكر والتقدير
عمنا الغالي : د: أنس
لو أن المحبة تباع لاشتريناها بالغالي والنفيس من أجل عيونك ولكنها نعمة من الله ...اللهم أدمها علينا ...حفظك الله من أجل أحبائك ......وما أكثرهم....
يا سلاااااااااام , كلام يطرب ولا الألحان ولا النغمات , طالع من القلب , يا ريتك تواصل , وصفك كأنه لوحه مرسومه بتنطق وتحكى وتتكلم عن سر كل فارس وعن حقيقته ...
تعيش يا رائد ويدوم عطاءك وشكرا على الإهداء
__________________
إذا ما الطائر الصداح قد هدهده اللحن ورفت نسمة الفجر على أشجانه تحنو هناك السحر والأحلام والألحان والفن
رد: أبطال زمان (2)( إهداء للعم الغالي د: أنس البن ،,, أيقونة مارس،، ، وكل الأحب
والله شرف عظيم يادكتورنا الحبيب المحبوب د : أنس أن تعتمد هذا العمل الذي كنت أنت الباعث والمشجع عليه ، ومن كلماتك التي لا تنسي (أنك تحب هذا الكون كله لأنه من صنع الله ) ...لي رجاء خاص عندك أيها العم الحبيب وهو أن تكتب لنا ولو محطات في مشوارك في الحياة لتشبع محبيك ..ومريديك... في المنتدي وما أكثرهم .... والله بدون مجاملات ، حضرتك شخصية ثرية وحرام أن تحرم محبيك من إرضاء نهمهم في الدخول إلي دنياك الرائعة... وأعدك ياعمنا أننا سوف نقف علي الأعتاب بأدب ...ولن نطمع في أكثر من هذا حرصا علي وقتك الثمين ....تحياتي وعميق شكري لشخصك الكريم .
رد: أبطال زمان (2)( إهداء للعم الغالي د: أنس البن ،,, أيقونة مارس،، ، وكل الأحب
بسم الله الرحمن الرحيم
الاستاذ رائد المصرى
انها محاولات ادبية جميلة مشكور لسيادتك فيها هذا العطاء والبذل المشكور من مجهود جميل
وارانى قد اعجبت بما كتبت عن ست الكل
وعجبنى فيها
يعشق سوى اهة تهز الروح وتعصر م العيون المناديل
كناية فى منتهى الروعة عن كثرة الدموع التى زرفت ومن كثرتها تعصر المناديل جميلة وموفقة وموفق منك تصوير الاشخاص او الفنان بطريقتة او ما يميزة رسم رائع للفنان بكلمات معبرة تجعلك تعرف من هو
تحياتى
رد: أبطال زمان (2)( إهداء للعم الغالي د: أنس البن ،,, أيقونة مارس،، ، وكل الأحب
الأستاذة الفاضلة nahid76 كل شكري علي الاهتمام بقصائد العبد لله ...فهؤلاء الأبطال هم صورة مصر الحقيقية المشرقة...وكان هؤلاء الفنانون مبدعين حقا ... لذلك فقد عاشوا فقراء ..وماتوا خالدين ... كل شكري علي تعقيبك الرقيق.