احبائى
اقدم لكم لحن من اروع ما لحن عبد الوهاب واروع ماغنت وردة
بعمرى كله حبيتك
كاملة فى عشرين صفحة وده تقريبا اطول لحن كتبته
اولا الفنانة وردة من وجهة نظرى كانت الله يرحمها اجل صوت عربى .. يعنى غير ابداع كل العمالقة كانت وردة احلى نبرة صوت وتتميز بمساحة صوتية واسعة جدا وبالذات فى القرارات يعنى كانت بتنزل تحت نغمة صول اللى تحت المدرج وتغنى فا ومى ولسه عندها مساحة .. والخاصية دى نادرة فى الاصوات النسائية بالإضافة الى الجوابات .. ها اذكر حاجة انى كل ما افتح برنامج انكور كنت اقول مع نفسى الله يمسيكى بالخير يا وردة .. يعنى مرة زمان فى وسط بروفة وكانت مشاكل التدوين بالقلم الرصاص .. بعدين كنت لازم اتصل بالنساخ اللى بيكتب النوتة بالريشة والحبر الشينى هى قالت مفيش ماكينة تكتب النوتة .. ساعتها الفرقة الماسية نظروا بإستغراب لن ده كان حلم .. وكان وقتها الكتب الموسيقى كانت بتطبع عن طريق الزنكوغراف .. يعنى عشان تطبع صفحة نوتة لازم على الاقل تكون حاتطبع منها آلاف نظرا لإرتفاع تكلفة الزنكوغراف .. لكن اللى احنا بنعملو دلوقتى برامج التدوين دى زمان كانت حلم زى حلم عباس بن فرناس انه يطير ... لكن لاتنسوا ان كل اللى بننعم بيه اليوم من تكنولوجيا كانت زمان احلام ناس كان الناس الاديين بيفتكروهم مجانين لكن الحقيقة ان فكرهم كان سابق عصرهم ..
لما اتكلم عن عبد الوهاب فى اللحن ده بالذات فهو تقريبا آخر لحن كبير عمله ووضع فيه كل ما استطاع من جهد وفن وخبرة .. حتى تلاقى جمل كتير مرحة وفيها شقاوة ولاتتناسب مع سنه لكن عبد الوهاب المتطور دائما واللى كان من المستحيل انك تتخيل هو حايعمل ايه .. لذلك كل النقلات اللحنية واللى كان اللحن ده فيه اكبر عدد من النقلات ومعظمها مش من المألوف ان تيجى دى بعد دى لكن عبد الوهاب كعادته كان بيعمل اللحامات الغريبة دى بمنتهى السلاسة .. ومن الغريب فى الحان عبد الوهاب ان مثلا لو قدامك اربع اتجاهات شمال وجنوب وشرق وغرب .. عبد الوهاب لازم يعمل شمال شرق يعنى الشىء المش مألوف .. او لو اجتمع 17 عاقل بيعملوا كذا ومجنون واحد بيعمل شىء مخالف كان عبد الوهاب بيعمل الشىء المخالف .. ومن اهم الحاجات اللى انا شخصيا كنت بقراها منه ان فى المرحلة دى وبالذات مناول ليلة حب وما تلاها .. انه كان حاسس انه فى مركلة النهاية .. يعنى فى ليلة حب كان عارف ان ده آخر لحن لأم كلثوم .. يعنى مش متوقع تغنى لحن مثله تانى لا السن ولا الصحة .. نفس الموضوع بالنسبة لباقى الآلحان لذلك تلاقى كمية الزخم الفنى كل لحن بتزيد .. كان حاسس ان لسه المنجم بتاعه فيه كنوز كتير .. وكان عايز يطلعها كلها للبشرية ... وهنا درس احب ان محبى الفن يستوعبوه . الفنان الرائع هو اللى آخر اعماله انضج كتير جدا جدا من اوائل اعماله .. يعنى فيه مخرج مصرى شهير انا كنت احب جدا جدا افلامه الاولى لكن افلامه الاخيرة خرجت عن السياق يعنى اصبحت مملة زى الافلام الفرنسية وصار يجيب ممثلين دمهم تقيل ومطرب اسمر مش يعرف يغنى اصلا .. بحيث ان اى فيلم قدين له انا بشوفه مليون مرة احب اشوفه تانى والافلام الاخيرة ما اطيق اشوف منه اكتر من ربع ساعة ..
طبعا النوتة دى حتاخد منك وقت طويل هى مش صعبة ولكن النقلات اللحنية زى ماقلت محتاجة منك اجادة فى التنقل من جملة لجملة ودى بتحتاج انك على مهلك ماوراناش حاجة
مع اطيب تحياتى
التحفة القادمة ان شاء الله ححاول فى والله مانا سالى انطلبت كتير
مع اطيب تحياتى
رد: طلبات نوتة أ / عادل صموئيل الجزء الثانى
العرض العادي
