طلبات نوتة أ / عادل صموئيل الجزء الثانى - الصفحة 376

**سليم العباس** · #**3751** 27/02/2015, 20h14

شكرا لك أستاذ عادل على الرد و التوضيح ، و كما تفضلت أن أداء السيدة أم كلثوم دليل قاطع بأن التطريب لا يحتاج إلى المبالغة في استخدام العرب الصوتية .
على كل حال هذا هو الملف الصوتي للأغنية ، و إن كان أداء الفنانة أصالة لهذه الأغنية مستفزا لحضرتك ، فإنها لن تعجبك بأي أغنية أخرى ...
شكرا لك .

**عادل صموئيل** · #**3752** 27/02/2015, 23h19

احبائى

من اشهر اغانى الفنان شفيق جلال

امونة

مع اطيب تحياتى

**علي ثلاثة** · #**3753** 28/02/2015, 09h47

أستاذ عادل
ألف شكر
على مدونة

أمونة

للفنان شفيق جلال

**adel amr** · #**3754** 28/02/2015, 10h42

السلام عليكم
أ/ عادل صمؤيل
لك منى افضل واطيب تحية
انا بشكر حضرتك جدا على نوتة موسيقي زيزينيا وكنت عايز اوضح لحضرتك
النوته دى انا مش هعزفها فردى لكن هستخدمها فى شغل مع اكثر من اله انا كنت طلعت شويه فى اللحن بس كان فى بعض النوتات مش مظبوطه وده لان زى اما حضرتك قولت اللحن معقد شويه فلجأت لحضرتك لانك اكثر منى خبره وموسيقي شاطر فانا كنت محتاج اللحن الميلودى علشان اعمل توزيع بسيط ليه يناسب شغلى وبردوا انا غير متقن لبرامج الموسيقي فالموضوع كان صعب جدا بالنسبه ليا انى اطلع اللحن وادونه كان هياخد منى وقت كبير
فانا بعتذر جدا لحضرتك انى تعبتك وبردوا بشكرك جدا على مجهودك الرائع وده المتوقع من حضرتك
لك منى افضل وارق التحيات
اخى العزيز
اولا اشكرك على ذوقك .. انا بقدم مجهودى لكل الناس ومش محتاج منهم حاجة يعنى تحت امر الجميع فى حدود امكانياتى .. هو بس احب اقول برضو معلومة مهمة جدا للى يحب يعرفها مشكلة التوزيع عشان حد وعلى فرقة ان وجدت ينفذ لحن موزع ويطلع زى ماهو لازم اما حاجة من اتنين .. اما اللى وزع اللحن هو ينفذه بنفسه او انو يكون معاه البارتاتورة الاصلية بتاعة الموزع الاصلى .. يعنى مثلا دلوقتى الموجود عمر خيرت .. المفروض ان عمر خيرت ينفذ اللحن بنفسه او يدى البارتاتورة ليك ودى طبعا فيها قولان ... وانت قلت انك ممكن تدون اهم حاجة فى التدوين انك تكون سامع خط لحنى واضح المعالم والمشكلة دلوقتى ان التوزيع بيغلوش ع الخط اللحنى ده .. ييعنى مثلا ممكن فى مازورة انا اكون سامع لا فا مى مثلا ... هم ممكن اصلا يكونوا مش كده يعنى ممكن يكونوا النغمات اللى بتزن او النغمات المتسلطة بس اللحن مش كده .. وممكن يكون لا فى صوت وفا فى صوت تانى وهكذا .. لذلك انا مبسوط انك تاخد اللحن الاساسى ولو عندك قدرة على التوزيع انك انت تعيد توزيعه بس طبعا يبقى المسموع الرئيسى هو اللحن الاساسى والتوزيع يكون شوية ماكياج خفيف لأن اللحن اصلا حلو ... واخطر مشكلة مع الموزعين دلوقتى ( هم مش موزعين اوى يعنى ) شغل الاستديوهات اللى بيبقى الموزع شاطر اوى ع الاورج وبعدين يفضل يضيف تراكات ويحط حاجات للصبح طبعا كده اللحن ده بيبقى يتسمع فقط ما ينفعش يتنفذ لأنه حتى مش بيكتب التوزيع نوتة يعنى بيعمله كده وخلاص ... وآسف للإطالة بس انتم بتستفيدوا من خبرتى واللى مش متاح تقابلوا دلوقتى حد من زملائى لأنهم تقريبا معظمهم رحل ... انا عزفت مع عبد الحليم حافظ 7 سنوات .. كان فيه خلال ال 3 سنوات الاخيرة كان عايز يعيد تقديم بعض اغانيه القديمة بس كانت المشكلة الاغانى الموزعة لأن كان الموزع بعد تسجيل الاغنية زمان بياخد معاه كل النوت ... وبالطبع مش ممكن حانقدر نقدم الاغنية بأى شكل من الاشكال .. لذلك تلاقيه كان بيقدم الاغانى اللى مش موزعة ... مع اطيب تحياتى عادل صموئيل

**غواص النغم** · #**3755** 28/02/2015, 12h20

https://www.youtube.com/watch?v=6m_d6nYmRis

الفنان ايمن الاعتر أعاد غناء الأغنية في برنامج المسابقات سوبر ستار أمام أصالة التي كانت ضيفة الحلقة وقالت إنه غناها بطريقة جميلة وأنها تعلمت منه.. مش عارف هل هذا مجاملة ام صحيح.. المهم الكثير يقولون انه غناها احسن منها
هنا نأتي لحكاية إعادة الأغنية ب أكثر من صوت هل حضرتك مع هذا النهج ام تفضل كل مطرب يحتفظ باغانيه

اولا عشان نبقى بنتكلم صح اناشخصيا لو عايز احكم على مغنى جديد ما ينفعش اسمعه فى اغنية جديدة لو .. لازم اسمعه فى كذا اغنية من اللى احنا حافظينهم صح .. يعنى مثلا يغنى اغنية لأم كلثوم واغنية لعبد الوهاب بحيث مثلا فى اغنية كذا بيبقى فيها الحرف الصعب فين اشوف يقوله صح وصوته مستريح ولا يقوله وصوته فآخرطاقته او يقوله مش صح .. بعدين اللى بيقلد لازم يقول الاغنية زى ما صاحبها الاصلى يقولها مسموح لو ب2 % يبين شطارته لو شاطر لكن ما يعملش زى اصالة ويحط خمسين عربة فى الجملة .. لأنه هنا بيخرج بالمستمع عن المجال خالص . انا لما ابتديت اسمع المقطع اللى انت نزلته لقيتو بيقلد اصالة فى طريقتها اللى انا مش بحبها انا قلت ممكن على اساس انو حافظها زى ماسامعها .. وانا بصفتى وخبرتى وعشان ما اظلموش نظرت على اليمين لقيت نفس الشخص لو كذا كليب اخترت منهم الهوا هوايا لنى حافظها اوى ودى اللى تخلينى احكم عليه .. لقيته بيغنى بنفس طريقة اصالة يعنى بيحط عرب كتير .. ولوقارنته بعبد الحليم تلاقيه بيبذل مجهود اكتر من عبد الحليم عشر مرات بيقاتل يعنى او كانه شايل اثقال .. ولو شفتها من عبد الحليم تلاقيه بيغنى بمنتهى التلقائية كأنه واحد قاعد حاطط رجل على رجل وبيشرب فنجان فهوة واتمنى يكون اللى اقصده وصلكم .. يعنى ايه طرب ؟ يعنى واحد بيغنى بمنتهى الاسترخاء لأن اللى بيغنيه يمثل 50% من طاقته وغير واحد بيحرت يعنى زى لو عندك سيارة جديدة سرعتها 200 كم /ساعة .. لو مشيت على سرعة 100 حتلاقى صوت الموتور ناعمومنخفض وجميل وهادى والسيارة بتتهادى كقارب على سطه الماء لكن لو ضغطت عليها عشان توصل لأقصى سرعتها حتلاقى الموتور بيزعق وصوته مزعج وتحس ان السيارة بتقاتل وكأنها حاتنفجر فهمتم ليه بنجب مطربى الزمن الجميل ؟
مع اطيب تحياتى عادل صموئيل

كلام جميل سليم منطقي معقول مقدرش اقول حاجة عنه سوى إننا بنتعلم منكم شكرًا أستاذنا عادل صموئيل

**basma2265** · #**3756** 28/02/2015, 15h57

شكرا استاذ عادل علي النوته الرائعه
كلنا بنستفيد من خبرات حضرتك في الموسيقي

الاخت العزيزة
انا اللى اشكرك لأن كلامك بيسعدنى
يعنى انا بكون سعيد اوى لما مجهودى المتواضع يفيد الناس ... واكون سعيد اكتر واكتر لما النوت اللى بقدمها تساهم فى رفع مستوى اللى بيستعملوها .. يعنى كان زمان فيه ناس بتكتب النوت بطريقة معقدة جدا تخلى اى حد هاوى يخاف يقرب منها .. يعنى انا طبعا ما اتولدتش كده كنت مبتدىء جدا طبعا .. كنت افتح كتاب فيه نوت الاقى نوت كتير شكلها مرعب وبالطبع كنت اقعد اقلب الصفحات حد ما الاقى حاجة سهلة .. وطبعا حصلت معايا فى كلية التربية الموسيقية يعنى فى مادة البيانو .. كان فيه البروجرام 30% حاجة مفروضة محددة والباقى حاجات احنا ممكن نختارها كنا طبعا بنفتح الكتب ونشوف حاجات مرعبة ونقعد ندور وقت طويل على حاجة سهلة .. لذلك انا طريقتى فى التدوين حاطط كل الكلام ده قدام عينى .. يعنى لو فيه مثلا 100 لحن اى حد منكم يقدر يعزف منهم 10 .. انا حاولت انه يعزفهم كلهم وبكون فى منتهى السعادة لما حد مبتدىء يقول لى اشكرك انك خليتنى اعزف حاجات عمرى ماكنت اتخيل انى اقدر اعزفها
مع اطيب تحياتى عادل صموئيل

**adel amr** · #**3757** 01/03/2015, 08h02

السلام عليكم
أ/ عادل صموئيل
لك منى أفضل تحيه
انا فاهم كلام حضرتك كويس عن التوزيع والنغمات اللى بتكون مستخبيه وسط التوزيع والهارموني الكتير بس كنت عايز اوضح لحضرتك ان الشغل اللى انا بعمله ده شغل مدارس طلبه هما اللى بيعزفوا فانا كنت محتاج اللحن الاساسي وحضرتك تفضلت مشكور وساعدتنى واختصرت عليا وقت كبير فيه ف بالنسبه للتوزيع هيكون بسيط جدا لان انا اصلا مش موزع واللحن الاساسي هو اللى هيتعزف ان شاء الله
والف الف شكر لحضرتك وربنا يديلك الصحه ويباركلك

**سامى امين** · #**3758** 01/03/2015, 10h25

مستر عادل الكمانجة فجاءة كدة بقى فيها زن وطسطسة حد قالى من الانف وحد قالى من الفرسة انت عمرك قابلتك الحكاية دى قبل كدة والحل اذاى
اخى العزيز
انظر على الانف الاول لازم تكون عالية بدرجة تخلى الاوتار مش لامسة المراية وثانيا برضو الفرسة لأن الاوتار وبالذلا الرفيعين بيسرحوا فيها مع الوقت وتلاقى الوتر بقى قريب اوى من المراية والمقصود ان الاوتار لازم يكون بينها وبين المراية مسافة ولازم تلاحظها لما تكون الكنجة مضبوطة .. بس فيه احتمال يكون الغراء بتاع ظهر الكنجة فك من احد الجوانب يعنى امسها وبخبط عليها بصباعك خبطة خبفبفة داير مايدور لوالغرا فاكك حاتحس بالخبطة تعمل زنة وممكن تكون الدقانة اتحركت من مكانها ولزقت ف المشط .. بس العلاج تروح لعيسوى يعنى تركب مترو الانفاق بتاع شبرا جيزة وتنزل ف محطة عابدين وتسألأ عن قسم الشرطة وتدخل فى الحارة اللى وراه وتسألأ اى حد عن بيت عيسوى وان شاء الله يحل لك المشكلة مع اطيب تحياتى عادل صموئيل

**Naje12** · #**3759** 02/03/2015, 10h40

تحياتي, اطلب نوتة اغنية عايشة وحدا بلاك لزياد الرحباني

**عادل صموئيل** · #**3760** 02/03/2015, 17h31

احبائى
اقدم لكم تحفة فيروز

ستى ياستى

مع اطيب تحياتى