رد: طلبات نوتة أ / عادل صموئيل الجزء الثانى
- شكراً أستاذ عادل على التدوين الجميل لرائعة السيد مكاوي ليلة مبارح .
- استفسار :
هل ورود علامتي ( لا دييز - سي نصف بيمول ) متجاورتين يميزان مقام السيكا دون غيره ؟
- أرجو تدوين أغنية فيروز ( تبقى ميل ) إذا سمح وقت حضرتك بذلك .
تحياتي لحضرتك .
اخى العزيز
بتحصل كتير اوى تجاور علامتى سى نصف بيمول ثم لادييز متجاورتين ... هى مش اساس مقام او لازم لكن هى بتبقى حلية او عُربة فى الجملة ومش شرط فى مقام السيكاه دون غيره يعنى طالما وجدت السى نصف بيمول فى اى مقام وارد ان تكون لا دييز فى اى جملة فيه
واكرر ان الموسيقى الشرقية مافيهاش ثوابت .. يعنى مثلا اى ملحن من العمالقة لوعمل 70 جملة فى مقام السيكاه عمرك ماحتلاقيهم لا شبه بعض ولا طعم بعض وده بييجى من عدم التقيد بالثوابت ... فى الموسيقى الغربية لازم التقيد بالثوابت والصح والغلط مع ان عندهم سلمين او مقامين فقط هم الصغير والكبير وبيهربوا من المشكلة دى بالتوزيع .. يعنى الجملة بتكون مش شرط حلوة اوى زى موسيقانا الشرقية لكن بتستمد حلاوتها من التوزيع ... يعنى عندك فى الهارمونى مثلا فيه نغمات متوافقة ونغمات متنافرة وفى التوزيع بتبقى الجمل متكوبة تحت بعضها فى خط افقى .. ولازم لو اخدت اى نغمة بخط رأسى يعنى النغمة بذاتها بيكون تحتها كذا نغمة من المفترض لازم يكونوا متوافقين معاها يعنى مثلا مايكونش نغمة دو مثلا وتحتها دو دييز او رى مثلا ... تلاقى فى توزيعات الرحبانية بيعمل الغلطة دى او انغمة النشاز وهو قاصد بس بتطلع تجنن لنها معمولة بحرفية عالية جدا .. ممكن مع موزع متوسط تطلع نشاز ومقرفة ... المهم ان الملحن وهو اثناء التلحين بيمسك العود ويقول الجملة عشرات المرات ( ده لو استقر عليها طبعا ) بيبتدى زى ماتقول يداعب بعض النغمات بحيث انو يحليها .. فى وسط المداعبة دى بيكون اصلا فى سى نص بيمول مع لا ناتوريل .. بيروح عامل ال لا دييز مرة يلاقيها اجمل وتكون ... وصلت الرسالة ؟ واغنية فيروز حشوفها بس فيه طلبات كتير
مع اطيب تحياتى عادل صموئيل
التعديل الأخير تم بواسطة : tarak766 بتاريخ 01/02/2019 الساعة 16h16
|
العرض العادي
