بتسمــــــع إيــــــــه ؟

**M O H A M E D** · #1 20/03/2008, 12h10

بسم الله الرحمن الرحيم

السلام عليكم يا أحلى سمّيعة فى الدنيا

من أول اشتراكي فى المنتدى و انا بفكر أفتح الموضوع ده
موضوع نتعرف من خلاله على أذواق بعض

يعنى كل واحد يقول

إيه هي أغانيه المفضلة ؟

يعنى كل واحد يعمل لستة بأحب الأغاني إلى قلبه

- مع وضع روابط إن أمكن -

ايه رأيكم ؟

**غواص النغم** · #2 20/03/2008, 12h49

هبدأ بـ 10 أغاني بحبهم جداً

1- أقول أمتي - للشيخ سيد النقشبندي .. و لحن بليغ حمدي
إبداع
إبداع
إبداع
و مش هتقدر تمسك دموعك !

2 - الحب اللي كان - ميادة الحناوي ..
و المرة دي الألحان و الكلمات كمان لـ بليغ حمدي .. الراجل ده عبقري

3 - إيه فكر الحلو بيا - عبد الغني السيد .. ألحان مين ؟ محمود الشريف ...
محمود الشريف أكتر ملحن محيرني .. أبدع فى العاطفي ، الوطني ، و الصور الغنائية ، حتى المونولوجات

* التلت أغاني دول من كتر ما دورت عليهم عرفت كل المواقع اللى لها علاقة بالطرب !

4 - الحب الحقيقي - للفنانة شادية

و لو قلنا فى البعد ارتاحنا .. نبقى بنضحك على روحنا ........ كلمات صلاح فايز
الأغنية دي بتفكرني بأيام جميلة
و سيبنا من كل اللي فات .. سيبنا من الشوق و الآهات
رجعنا نعيش أيامنا الحلوة .. خلينا نعيد من تاني الغنوة

5 - في قلبي غرام - محمد عبد المطلب .. و اللحن البديع لـ عبد العظيم محمد

أغنية تسكن القلب .

6 - على طول على طول - نجاح سلام شاركها فى الغناء ملحن الأغنية سيد اسماعيل

كل ما اقول الملحن جاب آخره ألاقيه يجيب جملة لحنية أجمل ..
و استنى استنى على باب الجنة .. خليني اتهنى

7 - طير بينا يا قلبي .. لـ محمد فوزي
و طير بينا يا فوزي

8 - حكايتي مع الزمان - وردة .. و اللحن لبليغ حمدي أكيد
و لا عتاب هيشفي جراح .. و لا هيجيب اللي راح !

9 - و هل يا ترى يعود طيري .. للملحن الرائع محمود الإدريسي
موسيقى مختلفة ، فيها انطلاق و سلاسة غير معقولة

أختتم بأجمل و أروع و ألذ حدوتة سمعتها فى حياتي
10 - حدوتة - محمد قنديل .. كلمات صلاح جاهين و لحن سيد مكاوي
و آااااااااااه
آه من طريقك الطويل .. و لا ليا غير قلبي دليل
عطشان يا مية سلسبيل .. حالي يا ست الحسن حال
إرخي شعورك الطوال .. خديني من حر الجبال
و ان ما لقيت عندك لقلبي دواه
لاعشق عيون الشمس و أهوى الهوا
و لو كنتي ست الحسن و الجمال
يكون أمير أحلام غرامك أنا

سلام

-

**عادل محمد** · #3 22/03/2008, 22h14

الاخ الجميل محمد السلامونى والاخ - الفظيع - الغواص ، اٍزيكم
عبد الوهاب : فى الليل لما خلى اولا ثم اهون عليك ، جبل التوباد ، الروابى الخضر
ام كلثوم : رق الحبيب اولا ثم ، ياما ناديت ، اغار من نسمة الجنوب ( قصيدة ياليتنا - انا اسميها كده - )
اسمهان : اسقنيها اولا ثم ياطيور
سعاد محمد فى دور انا هويت
شهرزاد : وادى الدنيا
فايزه : يالاسمرانى
عبد الحليم : انا لك على طول اولا ثم لا تلمنى واهواك - التسجيل القديم -
قنديل : تلات سلامات اولا ثم حبيب والله
طلب : بياع الهوى
كارم : امانه عليك
نجاة: اما غريبه
لطفى بو شناق : لو كان بايديا
بس تعرف يا سلامونى ان سؤال الجدع الغواص الذ ، انا لا احب لعبد الوهاب غنوتين : محلاها عيشة الفلاح لان الفلاح ما بيتمرغش على ارض براح ، والغنوة التانيه ، مين زيك عند ياخضرة ، لأنك لما تسمعها تعرف سبب نكبة 48
تحياتى لكما ولكل الاخوه

**سمعجى** · #4 22/03/2008, 22h34

أخي محمد السلاموني

تحياتي لموضوعك .. و لولا إن ( قائمتي ) طويلة ، لكتبتها ..
و فعلا صاحب المغارة أخي عبد المنعم كان عامل موضوع ( عكسي ) يخص الأغاني التي لا نحبها ، و قائمتي فيها أطول

أحييك على ذوقك الذي وافق ذوقي في ( حدوتة ، في قلبي غرام ، أقول أمتي ، الحب اللي كان )

أستاذنا الدكتور عادل ..

آهي ( يتمرغ ) دي إهانة ما بعدها إهانة ، و ناس كتير كانت بتنتقد
المعني ده ، لكن السؤال اللي هايفضل شاغلني ، هل عبد الوهاب
كان فاهم ، و لا كان حَسن النية ؟!

مع تحياتي

**غواص النغم** · #5 23/03/2008, 00h18

اهلا بكم
بالنسبة لرأي المتواضع ستجدونه
هنا
محمد عبدالوهاب نجم الاسبوع

**M O H A M E D** · #6 23/03/2008, 05h32

أستاذنا الجميل الدكتور عادل محمد ..
تحية لك و لذوقك
و بالنسبة لموضوع أخويا عبد المنعم فأنا ترددت في المشاركة فيه و في الآخر فضلت أحتفظ برأيي
يعني مثلاً أنا مش بحب أغنية الربيع لفريد الأطرش ، و عارف إن في ناس بيعشقوها
و برضه أغنية لعبة الأيام لوردة
و أغاني تانية كتير
و عندي مشكلة مع بعض الأصوات زي فايزة أحمد و محمد رشدي ، و لدي أسبابي الخاصة
و مع إني قناديلي المزاج و بحب كل أغاني محمد قنديل
لكن فى له أغنيتين لا يمكن أسمعهم ، و مش لازم أنبه الناس لهم !
و لذلك قلت نتلكم عن الأغاني اللى بنحبها أفضل
و سعدت بإن 4 أغاني من قائمتي تتوافق مع ذوق شاعرنا الجميل الأستاذ كمال
و ده شوقني أعرف و لو بعض الأغاني من قائمتك الطويلة
الأستاذ الغالي صلاح .. شكراً لكلماتك الطيبة ، و فى انتظار مشاركاتك القادمة ..
و أم كلثوم لي معها وقفة بإذن الله
و شكراً لكم جميعاً

**غازي الضبع** · #7 23/03/2008, 07h37

حبيبي محمد السلاموني
أنا هادخل في الموضوع على طول
إنت عارف أنك كلامك كله بيعجبني

الأغاني المفضلة لديا :

في قلبي غرام .. عبد المطلب
حسدوني .. عبد الوهاب
نبتدي منين الحكاية .. عبد الحليم
والله مانا سالي .. عبد الوهاب
حن ( ياللي هجرت الروح ) .. عبد الوهاب
ردني إلى بلادي .. فيروز
يا لولي يا غالي .. فايزة
حلفتك .. فايزة
دنيا جديدة .. فايزة
رجعت الشتوية .. فيروز
على وش القمر .. فايزة
بعمري كله حبيتك .. وردة
ما بين الليل والكاس .. عبد المطلب
ست الحبايب .. فايزة وعبد الوهاب
فاتت جنبنا .. عبد الحليم
سَهرت .. عبد الوهاب
فاكرة .. نجـاة
لا تيجي اليوم .. فيروز
ضي القناديل .. عبد الحليم
لأ يا حلو لأ .. محمد مرعي

وغيرهم الكثير ، ولكن هذه المجموعة المفضلة لديا ..
كما أن هناك بعض الأغاني التي قد لا تنتمي إلى نفس فصيلة الأغاني السابقة ، ولكني مولع جدا بهم ، ولا أملّ نهائيا من سماعهم ولو مائة مرة ..
1 - الشيطان .. عبده الأسكندراني
2 - يا قلبي صبرك على اللي راح .. عدوية
3 - I Want Spend My Life Time Loving You .. Tina Arina

**عادل محمد** · #8 23/03/2008, 11h11

أنا أعتذر بشده ياجماعه ، سوف أبتعد عن موضوعنا، ولكن التعليق استبد بى الآن .
يا أبو كمال ، أقرأ أيقونتك ، وفى كل مره أتوقف طويلا طويلا عند : بوحا هيروغلوفيا .

**NAHID 76** · #9 23/03/2008, 11h31

بسم الله الرحمن الرحيم
الاستاذ محمد السلامونى
انا دخلة المنتدى اقدم اقتراح الى بيحب قبلية معين فى اغنية معينة ويدندن بها بينة وبين نفسة يكتبة وياريت يبقى مسجل لقيت حضرتك سابقنى بالاغانى الى نحبها مش القبليهات
جزى ممن احبة فى الاغانى الى ان تسعفنى الذاكرة التى لم يرحمها الزهيمر
دليلى احتار ولما القاك قريب منى وقول البعد تاة عنى
لسة فاكر زرعت فى ظل ودادى غصن الامل وانت رويتة وكل شيئ فى الدنيا دى وافق هواك انا حبيتة
الاطلال
هجرتك
من اجل عينيك
سهران لوحدى
يا نيل انا والى احبة نشبهك فى صفاك
قصة الامس
ولسة ولسة فى وصلة تانية تحياتى

**هاله** · #10 23/03/2008, 14h10

السلام عليكم ورحمه الله وبركاته
اخى العزيز ا/محمد السلامونى
احب اشكر حضرتك على مواضيعك التى دائما ماتكون محط انظارنا
اما بالنسبه للاغانى التى افضلها فهى كثير جدا
ولى عوده لما تبقوا فاضيين علشان اقولهالكم