المقامات الموسيقية - الصفحة 5

**الألآتى** · #41 02/08/2009, 21h41

لأ .. غلطان .. رحل الأوكتافات يمين ..

وبعدين أنا قلت .. ماتشغلوش بالكم بالمسائل دى دلوقت .. حاتتعبوا .. خليكم فى صميم الدرس ..

أحسن كده مش حانخلص فى سنتنا ..

**unicorn** · #42 02/08/2009, 22h56

خلاص يا استاذ محمد ,
ما فيش خروج عن الدرس ,
و غازى خلاص فهم
خش بينا على اللى بعده .

**الألآتى** · #43 03/08/2009, 02h22

الدرس الثانى

عرفنا يعنى إيه مقام .. كويس .

عايزين نعرف بقى .. مما يتكون المقام ..

المقام ياجماعة يتكون من ثمانية نغمات تفصل بينهم سبعة مسافات .. أو بطريقة أخرى ..

يتكون من سبعة نغمات زائد جواب النغمة الأولى ..

يعنى ( دو ، سى ، لا ، صول ، فا ، مى ، رى ، دو ) .. ماتنساش تقرا من الشمال لليمين .

وممكن كمان .. نعرف المقام بأنه .. يتكون من إتنين ( تتراكورد ) .. يادى النايبة .. يعنى إيه ( تتراكورد ) ؟

كلمة ( تتراكورد ) تتكون من مقطعين .. تترا .. وتعنى أربعة .. وكورد تعنى تون أو نغمة ..

يعنى كلمة ( تتراكورد ) .. تعنى أربع نغمات

إذن المقام يتكون من إتنين أربع نغمات .. يعنى ثمانى نغمات .

طيب واحد يقول لى .. وليه اللفة الطويلة دى .. ماتقول ثمانى نغمات وتخلصنا .. لازم يعنى إتنين تتراكورد .

أيوه .. لأن كل مقام يختلف عن غيره .. بإختلاف هذا التتراكورد .. وتسمى فى الموسيقى العربية ( جنس المقام )

يعنى لو حطينا جنس نهاوند زائد جنس حجاز .. حاينتج عندنا مقام النهاوند العادى ( الحجازى )

ولو غيرنا الجنس التانى وخليناه جنس كرد .. حاينتج عندنا مقام نهاوند كردى ..

ولو غيرنا الجنس الأول وخليناه راست .. مع الإحتفاظ بالجنس الثانى ( حجاز ) .. حاينتج لنا مقام ( سوزناك )

وهكذا .. فتغير التتراكورد أو الجنس .. يغير المقام ..

وهنا يأتى سؤال ليطرح نفسه .. كيف نعرف المقام ؟

هناك طريقتان لمعرفة المقامات ..

الطريقة الأولى .. معرفة أبعاد كل مقام .. أى معرفة المسافات بين نغمات المقام .. وذلك بقراءتها على المدرج الموسيقى ..

وكل مقام تختلف أبعاده أو مسافاته عن الأخر ..

وعلشان مانلفش وندور .. ممكن نرجع لدروس النوتة الموجودة فى المنتدى .. لنعرف أماكن النغمات على المدرج الموسيقى .. وكذلك المسافات بين نغمات كل مقام ..

الطريقة الثانية .. معرفة المقام عن طريق السمع .. يعنى بودانك ياشاطر ..

لأن لكل مقام وقع معين ومميز فى الأذن .. وهذه لاتأتى إلا بالخبرة .. وسماع الأغانى والموسيقى بكثرة .. ومقارنة مانسمعه مع مانعرفه من المقامات ..

وماتقلقوش .. كل ده حانعرفه بالصوت والصورة .. وحانحاول نستطعم كل مقام فى ودانا ..

ياللا .. ذاكروا الدرس كويس وإهضموه .. علشان نكمل الحكاية .

ملحوظة .. مش عايز حد يسأل سؤال بره الدرس .. علشان ماأبطحش نفسى عليه ..

**محمودسعد** · #44 03/08/2009, 03h17

ممكن اسأل سؤال برئ ؟

من غير مايكون فيه هفوه مني ؟
هو عنوان الموضوع المقامات الموسيقيه
طيب ؟
ماتيجوا نتكلم في المقامات بطريقه فلاحي كده او حتي صعيدي لامؤاخذه
يعني ايه البياتي من غير ماشوفه علي البيانو او الاورج ؟
اسمعه ازاي وايه هو ؟ ومش مهم هو بيتكون من ايه ؟ المهم هو ايه ؟ وبيتقال ازاي ؟
والصبا والرصد والنهاوند والسيكا
وغيرهم
وبعد كده نخش عالتقيل اللي هو علم النغم او الطبقات زي الدو والري والمي والفا صول لا سي
متهيالي هاتفرق كتير؟
والالاتي سيدمن يوجه والدلباني طبعا

**الألآتى** · #45 03/08/2009, 04h49

اقتباس:

المشاركة الأصلية كتبت بواسطة محمودسعد

يعني ايه البياتي من غير ماشوفه علي البيانو او الاورج ؟
اسمعه ازاي وايه هو ؟

ماشى ياعم محمود .. نخش على الفايدة ..

الملف الموجود فى المرفقات .. فيه الطريقة إللى تخليك تعرف المقام من غير نوتة أو آلة موسيقية ..

**غازي الضبع** · #46 03/08/2009, 04h58

اقتباس:

المشاركة الأصلية كتبت بواسطة الألآتى

الدرس الثانى جاهز ..

يا عم الحاج .. خلينا في حتة واحدة عشان مانتلغبطش
وبعد ما الدروس تكتمل .. ليك عليا هاجمعهالك واظبطهالك
وإن شاء الله ننزلها في كتاب كمان ..
اصبر شوية ، وخلينا هنــــــــا
ما تستعجلش على رزقك

**غازي الضبع** · #47 03/08/2009, 05h09

اقتباس:

المشاركة الأصلية كتبت بواسطة الألآتى

يتكون من إتنين ( تتراكورد ) ..

هنا عندي سؤال ..
يعني الـ تتراكورد دي .. نصف سلم
يعني مثلا أول أربع نغمات يبقوا تتراكورد ، والأربعة التانيين يبقوا التتراكورد الباقي ..
ولا إيه ؟

اقتباس:

وتسمى فى الموسيقى العربية ( جنس المقام )

يعنى لو حطينا جنس نهاوند زائد جنس حجاز .. حاينتج عندنا مقام النهاوند العادى ( الحجازى )

ولو غيرنا الجنس التانى وخليناه جنس كرد .. حاينتج عندنا مقام نهاوند كردى ..

ولو غيرنا الجنس الأول وخليناه راست .. مع الإحتفاظ بالجنس الثانى ( حجاز ) .. حاينتج لنا مقام ( سوزناك )

وهكذا .. فتغير التتراكورد أو الجنس .. يغير المقام ..

هل نفهم من كده إن جنس المقام هو نصف المقام .. اللي قولنا عليه فوق

وبعدين ايه النطة الجامدة دي يا عم .. الحجاز والسوزناك والراست والنهاوند العادي ( الحجازي ) .....
خضتنا يا عم

**الألآتى** · #48 03/08/2009, 07h37

حاضر ياغازى .. حانقل الدروس هنا .. بس عايز تفاعل علشان أحس إنى عملت لكم حاجة مفيدة ..

اقتباس:

المشاركة الأصلية كتبت بواسطة غازي الضبع

هنا عندي سؤال ..

يعني الـ تتراكورد دي .. نصف سلم
يعني مثلا أول أربع نغمات يبقوا تتراكورد ، والأربعة التانيين يبقوا التتراكورد الباقي ..
ولا إيه ؟

التتراكورد ليس نصف سلم .. إنما نصف أوكتاف .. لأن فيه فرق بين السلم والأوكتاف ..

السلم هو سبعة درجات نغمية .. أما الأوكتاف فهو سلم زائد درجة .. يعنى ثمانية درجات ..

ويبقى عندنا الأربع نغمات الأولى من الأوكتاف عبارة عن تتراكورد

والأربعة نغمات الثانية .. تتراكورد تانى ..

اقتباس:

المشاركة الأصلية كتبت بواسطة غازي الضبع

هل نفهم من كده إن جنس المقام هو نصف المقام .. اللي قولنا عليه فوق

الجنس هو نصف المقام فعلاً .. ويعنى أربع درجات نغمية ..

يبقى المقام فيه جنسين .. جنس أصلى وجنس فرعى .. وبتغير هذه الأجناس ينتج لنا المقامات المختلفة

اقتباس:

المشاركة الأصلية كتبت بواسطة غازي الضبع

وبعدين ايه النطة الجامدة دي يا عم .. الحجاز والسوزناك والراست والنهاوند العادي ( الحجازي ) .....
خضتنا يا عم

مافيش نطة ولا حاجة .. دى كانت مجرد أمثلة لتغير الأجناس .. وبعدين حانتكلم على المقامات دى بالتفصيل .. ماتقلقش .

**Islam Eidrisha** · #49 03/08/2009, 07h41

الله ينور يا أستاذ محمد
ونحن بانتظار سماع باقي نماذج المقامات -بعد ما سمعنا نماذج من البياتي- للمقارنة بين المقامات وتلك المقارنة من شأنها تثبيت كل مقام في الأذن وفصله عن غيره من المقامات للقياس عليه فيما هو قادم عند سماع أغنيات لأول مرة.

**غازي الضبع** · #50 03/08/2009, 07h45

سيب حكاية التفاعل دي عليا أنا

**
طيب .. احنا كده فهمنا إن التتراكورد أو جنس المقام هو نصف أوكتاف أو أربع نغمات
بس إنت ما جاوبتنيش
هل هم أول أربع نغمات في المقام
ولا أي أربع نغمات
ولا الأربعة اللي على اليمين ، ولا إللي على الشمال
يعني .. أعرف منين جنس المقام ؟؟