سؤال ل الاستاذ الالاتي او الدكتور هشام خلف

[Hisham Khala]

يا حسن أنت ملخبط ما بين المقام (السلم) و الأكور (كوردات - التآلف)
مقام (سلم) دو ماجير : دو - ري - مي - فا - صول - لا - سي - دو
تآلف (أكور) دو ماجير (دو + مي + صول)
درب إيدك الشمال تعزف اللحن المصاحب بزمنه و إيدك اليمين اللحن المليودي (يعنى لحنين مختلفين في النغم و الأزمان)
دليل المقام في الألحان الشرقية يتبع القواعد الغربية بتصرف.
الأوكتافات العالية (جواب جواب ال دو) أنا جاوبتك عليها قبل كده رقم 8 ^ فوق المدرج و الأوكتافات السفلية رقم 8 ^ أسفل المدرج.
بالنسبة إلي السيكاه (قبل ما أجوبك: تعرف تلعب طولة؟) (يك - دوه - سه - جهار ..)
باللغة الفارسية (يك = 1 ) - (دوه = 2 ) - (سه = 3 ) - (جهار = 4 ) و كلمة (كاه = نغمة)
يبقي كلمة سيكاه معناها النغمة الثالثة في السلم الشرقي = مي نصف بيمول.
دوكاه = ....... في السلم الشرقي = نغمة ....... في السلم الغربي (أكمل)
جهاركاه = ........ = نغمة ...... (أكمل)
يكاه (خللي بالك مقلب) = النغمة رقم 1 و لكن ليست دو في الغربي بل نغمة صول و هي مفروض أول وتر في العود و لكن العود له عدة دوزان خاصة لأول وتر(ممكن فا و ممكن مي).
يا حسن أنا ها كتب موضوع مهم جداً أسمه :
SKIPPING , FRONT PHRASING, BACK PHRASING & SYNCOPATION
و ها أنزله تحت باب: دروس و محاضرات- فصل : تمارين عملية لقراءة النوتة على نفس الرابط الموجود في الرد السابق.
إذا فهمت هذا الموضوع سوف تتقدم في قراءة النوتة.
تحياتي, د.هشام خلف

[حسن عبد العليم]

دكتور هشام ازيك ووعامل ايه انا سعيد جداا بمعرفتي بحضرتك لاني حاسس بتحسن شديد معايا
يوم عن يوم ومش قادر ااقولك احساس الواحد ايه لما يشوف حاجه مكتوبه قداموا ويعزفها بيانو
او اي اله تانيه حسب هوايه كل واحد بقي ....

انا عندي سؤال لحضرتك وهوه خاص بالمقامات ... في مقامات فيها ربع تون يبقي معني كده ان المقامات دي
مش ممكن تتعزف ع البيانو ؟؟؟ لان حضرتك قولت قبل كده البيانو مفهوش الربع تون .؟؟؟؟

بالنسبه للاوزان اللي هيه بتيقي 4\4 او 3/4 ..... 4 اللي تحت يعني زمن الروند مقسم الي 4 نوار
و4 اللي فوق يعني كل مازوره تحتوي علي 4 نوار او مايعدلها من الازمان الاخري انا عندي برنامج انكور
بس فيه حاجه غريبه ان انا ممكن انتقل للمازوره التاليه من غير ما اطبق القاعده بس شرط اني مزودش عنها
لكن ممكن ااقل ماشي يعني هل هذا صح .... يعني مثلا مازوره المفروض فيها 4 نوار او ما يعادل من الازمان
الاخري ممكن احط فيها 3 بس ؟؟؟؟؟؟؟

هل اي لحن في مجال الموسيقا لازم يكون مرتكز في اساسه علي احدي المقامات ولا فيه الحان ممكن
متبقاش متبعه مقامات ؟؟؟؟؟؟؟؟؟؟؟

لما الواحد يجي مثلا يلحن حاجه مثلا ع البيانو عشان دا اللي انا بفهم شويه فيه بيلعب الجمله الاول
من وحي خياله وبعدين يدونها ؟؟؟؟ ولا العكس ؟؟؟؟ وبعدين اذاي ااقدر احط الزمن المناسب للحن
واحدد ايضا السرعه المناسبه ( >>>> ( tempo

طيب ولول لحن انا سمعتوا وبحاول اكتبوا اذاي بردوا ااقدر اوصل للتمبو المناسب خصوصا انو بيزيد بالواحد
ولا فيه سرعات معروفه كل الالحان بتتبعها ؟؟؟؟؟؟؟؟؟؟؟؟؟؟؟؟

وعلي فكره اانا بهديك ارق امنياتي لكن بجد انسان موهوب جداااا ان الواحد يوفق ما بين الدراسه
والهوايه الشخصه اللي اتجهاها بعيد جداا عن مجال دراسته فدي هبه من ربنا ليك وربنا يوفقك
وعلي فكره انا قريت كل تمارينك واحسن حاجه الشرح المبسط مع الافاده للجميع المبتدئ والمحترف
شكرااا ليك مره تانيه علي ان القالك في رساله اخري ............ خالص امنياتي ..........

[الألآتى]

بعد إذنك يادكتور هشام .. أرد ..

المشاركة الأصلية كتبت بواسطة حسن عبد العليم

في مقامات فيها ربع تون يبقي معني كده ان المقامات دي
مش ممكن تتعزف ع البيانو ؟؟؟ لان حضرتك قولت قبل كده البيانو مفهوش الربع تون .؟؟؟؟

كما قال لك الدكتور هشام من قبل .. البيانو لايستطيع عزف الربع تون .. وبالتالى لا تستطيع عزف المقامات الشرقية المحتوية على الربع تون على البيانو ..

المشاركة الأصلية كتبت بواسطة حسن عبد العليم

بالنسبه للاوزان اللي هيه بتيقي 4\4 او 3/4 ..... 4 اللي تحت يعني زمن الروند مقسم الي 4 نوار
و4 اللي فوق يعني كل مازوره تحتوي علي 4 نوار او مايعدلها من الازمان الاخري انا عندي برنامج انكور
بس فيه حاجه غريبه ان انا ممكن انتقل للمازوره التاليه من غير ما اطبق القاعده بس شرط اني مزودش عنها
لكن ممكن ااقل ماشي يعني هل هذا صح .... يعني مثلا مازوره المفروض فيها 4 نوار او ما يعادل من الازمان
الاخري ممكن احط فيها 3 بس ؟؟؟؟؟؟؟

الرقم العلوى فى الميزان يعبر عن عدد الأزمنة فى المازورة .. والرقم السفلى يعبر عن نوع الزمن ..

المازورة الرباعية يجب أن تكتب فيها أربعة نوار أو مايعادلها .. وإذا أردت أن تكتب ثلاثة نوار فقط .. يجب عليك تغيير الميزان ليصبح 4 / 3 .. لأنك إذا كتبت ثلاثة نوار فى المازورة الرباعية سيكون الزمن الرابع عبارة عن سكتة تساوى زمن النوار ..

المشاركة الأصلية كتبت بواسطة حسن عبد العليم

هل اي لحن في مجال الموسيقا لازم يكون مرتكز في اساسه علي احدي المقامات ولا فيه الحان ممكن
متبقاش متبعه مقامات ؟؟؟؟؟؟؟؟؟؟؟

لايوجد لحن بدون مقام .. لأن المقام هو الحالة التى تكون عليها الجملة اللحنية .. حزن , فرح , شجن , حماس .. ألخ ..

فإذا عزفت أولحنت جملة من أربع نوتات أو أكثر .. فأنت داخل حيز أحد المقامات ..

المشاركة الأصلية كتبت بواسطة حسن عبد العليم

لما الواحد يجي مثلا يلحن حاجه مثلا ع البيانو عشان دا اللي انا بفهم شويه فيه بيلعب الجمله الاول
من وحي خياله وبعدين يدونها ؟؟؟؟ ولا العكس ؟؟؟؟ وبعدين اذاي ااقدر احط الزمن المناسب للحن
واحدد ايضا السرعه المناسبه ( >>>> ( tempo

المفروض أن تفكر أولاً فى الجملة اللحنية وبعد ذلك تكتبها .. لأن الكتابة قبل سماع الجملة .. قد تصلح للموسيقى البحتة وليس للألحان .. وتصلح أيضاً للهارمونى الرأسى .. لأنها قواعد معروفة مسبقاً ..

وبالنسبة لوضع الزمن المناسب والسرعة .. أنت الذى تحدد هذا .. لأنك الملحن .. يجب أن تتعود أذنك على الموازين والأزمنة .. أنت الذى تقوم بتحديد الميزان المناسب للحنك ..

المشاركة الأصلية كتبت بواسطة حسن عبد العليم

طيب ولول لحن انا سمعتوا وبحاول اكتبوا اذاي بردوا ااقدر اوصل للتمبو المناسب خصوصا انو بيزيد بالواحد
ولا فيه سرعات معروفه كل الالحان بتتبعها ؟؟؟؟؟؟؟؟؟؟؟؟؟؟؟؟

نفس الرد السابق .. أذنك الموسيقية هى التى تعرف الميزان .. معظم الإيقاعات تبدأ بالدم .. إسمع الإيقاع وعد مع نفسك .. واحد إتنين ثلاثة أربعة .. حتى تصل للدم التالية .. فإذا وصلت للدم التالية فى العدة الخامسة .. فالميزان رباعى .. وإذا وصلت فى العدة الرابعة فالميزان ثلاثى .. وهكذا ..

[حسن عبد العليم]

الاستاذه الافاضل الدكتور هشام خلف والاستاذ محمد الالاتي انا مش عارف اشكركم اذاي والله
وربنا يزيدكم كمان وكمان من علمه الغزير ......

انا كنت سألت عن ان الواحد لو عمل اي جمله لحنيه لازم تكون علي مقام قاللي السيد
الفاضل الاستاذ محمد الالاتي لازم هتدخل تحت اي مقام اوك.....

طيب انا دلوقتي كتبت الجمله دي وسمعتها من علي برنامج انكور وعاوز حضراتكم
تسمعوها من خلال الملف الصوتي المرسل وتصححوا ليه الاخطاء اللي
فيها ... وعاوز اعرف هيه تبع اي مقام مع ان انا اللي كتبها بس عشان أجابه حضراتكم
هتوضح ليه اكتر واكتر ومهما كانت الاجابه بسيطه او الخطأ ساذج او بسيط ارجوا بأخذه
في الاعتبار لان الصغير وتافه بالنسبه لحضراتكم كبير جداااا بالنسبه لي وشكرااا ليكم ...

انا عاوز اعرف ايه الاخطاء اللي عندي ؟؟؟؟ والجمله دي تتبع اي مقام ؟؟؟؟؟؟
هل هي حلوه ولا وحشه ؟؟؟؟ يعني تتسمع ولا لأ ؟؟؟؟؟؟
ولوو كانت حلوه ليه ولو كانت وحشه بردوا ليه ؟؟؟؟؟؟؟؟؟؟؟

[الألآتى]

أهلاً بالأخ حسن

يرد عليك الدكتور هشام .. لأنه المتخصص فى البيانو والأكوردات ..

أما المقام المستعمل فى المقطوعة .. فهو سلم اللا مينور .. أو مانسميه فى الشرقى .. نهاوند الحسينى ..

[حسن عبد العليم]

حضرتك انا عاوز اعرف هيه ليه اتبعت المقام دا بعد اذنك عاوز
1_
2_
3_ الخ

عاوز اسباب موضوع المقام دا هوه شكله سهل جدااا ... واجابه حضراتكم هتوضح اللي انا مش فاهمه
وبقيت الاسئله دكتور هشام هيرد عليها اللي هيه في الرد السابق

حلوه ولا لا لواحد لسه مبتدئ ذيي وايه كم الاخطاء اللي فيها ... الخ

ومتشكر جدااااا ليكم علي سرعه الاستجابه والتوضيح ....

[الألآتى]

المفروض أن نعكس السؤال .. المفروض أن نسألك نحن .. لماذا إستعملت هذا المقام ؟

ولكن بما أنك لم تدرس المقامات .. فسأجيبك ..

هناك مقامات قريبة لإحساس كل واحد منا .. والنهاوند والكرد من أقرب المقامات للأذن البشرية .. حتى ولو لم تكن تعرف المقامات ..

المفروض أن تدرس المقامات جنباً إلى جنب تعلم العزف .. فليس من المعقول .. أن تظل تعزف وتحاول التلحين أو تأليف الموسيقى دون دراسة أو معرفة المقامات ..

وإذا أردت أن تصبح مؤلفاً موسيقياً أو ملحناً .. يجب عليك سماع الكثير والكثير من الأغانى والموسيقى .. لكى تتكون لديك حصيلة كبيرة من الجمل الموسيقية واللحنية .. تفيدك فى إبتكار جمل جديدة كل مرة ..

أما عن رأيى فى مقطوعتك .. أنت إهتممت أكثر بالأكوردات .. أكثر من الجمل الميلودى ..

إهتم أكثر بالجملة الميلودى ( الأساسية ) .. حتى تكون الأكوردات أو الهارمونى صحيح وجيد ..

[Hisham Khala]

السلام عليكم
الأستاذ محمد الآلاتي رد على أسئلتك بوضوح و بصراحة.
يبدو أن هذه المقطوعة تم تأليفها إلكترونياً عن طريق البرنامج فقط (وده مش عيب) و لكن عشان توصل إلى درجة التأليف دون إستعمال آلة (يعني اللحن سمعه في دماغك ثم تكتب النوتة مباشرة بدون آلة موسيقية) أعتقد أنه ها يحتاج منك عدد من السنين (أنا شخصياً بأكتب النوتة من دماغي مباشرة و بأوزعها دون العزف على أي ألة)
أما عن قواعد التأليف الموسيقي فهي غير متوفرة في هذا اللحن و القاعدة الأولي في التأليف:
اللحن مكون من عدد من التيم (Themes) و تكون التيمة (الجملة الموسيقية أو الفكرة الموسيقية) مكونة من الآتي:
نصف جملة سؤال + نصف جملة جواب *أو* عبارة سؤال + عبارة جواب
و نصف الجملة = "عبارة" Phrase
و كل عبارة = نصف عبارة سؤال + نصف عبارة جواب
مع ملاحظة عندما يكون الميلودي سريع يصاحبه باص بطئ و عندما يكون الميلودي بطئ يصاحبه باص سريع Balance
العبارات و النصف عبارات تنتهي على النغمة الأساس (التونك) ^أو^ المتوسطة 3 Mediant ^أو^ المتسلطة 5 Dominant ^أو^ تحت المتوسطة 6 Submediant ^أو^ فوق المتوسطة 4 Susmediant = تحت المتسلطة Subdominant
تعالي نطبق الكلام ده على جزء من نشيد صوت بلادي لعبد الوهاب (دو مانيير = نهاوند): أسمع اللحن و شوف النوتة
1. التيمة (الجملة) مكونة من 16 مازورة.
2. نصف الجملة (العبارة) مكونة من 8 موازير.
3. نصف العبارة مكونة من 4 موازير.
4. ستلاحظ أن نصف الأول من العبارة الأولي (أول 4 موازير) هو السؤال و أجابته هو النصف الثاني من العبارة الأولي (مازورة 5 إلي مازورة 8).
5. نفس الشيئ بالنسبة للعبارة الثانية ، و العبارة الثانية هي جواب للعبارة الأولي.
6.يلاحظ أن نهاية أول نصف عبارة (مازورة4) هي نغمة مي من زمن بلانش = يعني منتهية بنغمة طويلة زمانياً ، نغمة مي هي النغمة 3 و تسمي المتوسطة للمقام دو مانير Mediant note
7. نهاية النصف الثاني من أول عبارة (مازورة8) هي النغمتان دو نوار - ري نوار و كان المفروض أن تنتهي هذه النصف عبارة بالنغمة دو من زمن البلانش و لكن عبد الوهاب قسمها و قفل بنغمة ري عشان يعطي تمهيد للعبارة الثانية التى ستبدأ بنغمة الري ، كما أن قفل العبارة الأولي بنغمة الري أدي إلي مفاجأة لحنية تيقظ المستمع و تشد إنتباه.
8. النصف الأول من العبارة الثانية (مازورة 12) أنتهت بنغمة لا بلانش (النغمة 6 Submediant ) = النغمة 3 نزولاً: دو1 - سي2 - لا3.
9. نهاية التيمة على نغمة دو بلانش (النغمة التونك Tonic )
10. الصيغة الإيقاعية أو الزمانية (بلانشات - نوارات - كروشات - دوبل كروش ....) متشابة بالنسبة إلي نصفي العبارة الأولي و مختلفة بالنسبة إلى العبارة الثانية ، و هذا يسمي التنوع Variation عشان المستمع لا يمل.
11. الباص (أنا اللي موزعه) لما يكون الميلودي بلانش ها تلاقي مقابل له دوبل كروشات في الباص Balance
12. الأكورات لما ها أكلم في الهارموني أبقي أشرحها
أما عن أنواع القفلات: التامة - الدينية و المفاجأة مرة أخري
قد يتم تطبيق القواعد جيداً و لكن اللحن برضه يطلع مش مؤثر ، القواعد مهمه لكن جمال اللحن شئ آخر و بعدين القواعد معمولة عشان تتكسر (بس مش أي واحد يكسرها)
يا حسن أنت شددتني لموضوع ما كنش أوانه ، أنا بأكتب عن front & back phrasing & syncope و أنت جرتني إلي علم التأيف الموسيقي.

[حسن عبد العليم]

السلام عليكم

شكرااا لحضارتكم علي التوضيح ولكن لازلت اسئلتي متكرره وهدخل في الموضوع علي طول
واسئتلتي من داخل اجابه حضراتكم

الاستاذ الالاتي قال لازم ادرس المقامات لكي اصبح قادر علي وضع جمل لحنيه
المقصود من كلام حضرتك ان انا ادرس كل المقامات ؟؟؟؟ ولا اتعرف علي المقامات الاساسيه بس ؟؟؟؟ وما المقصود بالدراسه هل هي اني اعرف تأليف كل مقام واحفظوا تمام ولا ايه ؟؟؟؟؟


حضرتك قولت ان انا اهتتمت بالاكوردات اكتر من الميلودي وكنت المفروض اعكس .. ولكن .. الاغنيه اللي الدكتور هشام نزلها لعبد الوهاب بلادي فيها الاكوردات
اكتر من الميلودي ؟؟؟؟


دكتور هشام حضرتك قولت ان اذا كان الميلودي سريع لازم يبقي الباص المصاحب بطئ والعكس.... هل دي قاعده ولا هل هيه حاجه ذوقيه لبيان جمال اللحن فقط ؟؟؟؟؟


دكتور هشام هل المقصود بالسؤال والجواب ان السؤال بيبقي في الدرجات الوسطي
والجواب في الدرجات العليا ؟؟؟ بعد اذنك ممكن توضح اكثر ؟؟؟؟

حضرتك قولت العبارات العبارات والنصف عبارات تنتهي علي النغمه الاساس !! هل ؟؟؟ النغمه الاساس هيه اللي انا بادئ منها اللحن .. ا اللي فاهمه ان المتوسطه هيه في النوته اللي هيه نغمه السي لو كانت كده يبقي الباقي مفهوم .. ( المتسلطه وتحت المتوسطه ........) اذا كان غير كده ياريت حضرتك توضح ؟؟؟؟؟


ممكن يكون فيه لحن جميل ومؤثر ومش يتبع القوعد كويس ؟؟؟ ولا كده يبقي كسرها ؟؟؟


سؤال اخر

المقامات المرتكزه علي درجه الدو

نهاوند وراست و نواأثر

اولا كده مرتكزه يعني بادئه بالدو ولا نغمه الدو مكرره فيها كثير في موازير مختلفه ؟؟؟؟ .. وعشان ااقول نهاوند او ... لازم اعرف التأليف الموسيقي
لكل واحد ؟؟؟


واسف علي كتر الاسئله شكرااا ليكم

[حسن عبد العليم]

السلام عليكم

دكتوري العزيز الفاضل دكتور هشام ازيك وعامل ايه بقيت تغيب عليه في الرد شويه وعذارك عشان كتر مسؤلياتك
انا النهارده عملت بنصيحتك ... هدخل في الموضوع علي طول

انا النهارده عملت والله الجمله اللحنيه دي في دماغي وبعدين عزفتها بيانو وبعدين كتبتها انا مش عارف ااقولك
ايه انا سعيد جدااا المره دي عن المره اللي فاتت كتير لان الفرق كبير بين المرتين .... بس مش عارف انا كده في
تحسن ولا لأ ... بس انا حاسس اني في تحسن ... يااريت حضرتك ترد عليه وبسرعه وتقولي ايه رأيك ...

وياتري كم الاخطاء اللي كان في اللي فاتت مقارنه بالجمله دي ايه الفرق .... دكتور هشام انا هتعبك معايا بس
سوري اعتبرني تلميذك الطماع اللي عاوز ياخد علمك الغزير كلوا ؟؟؟ !!!!! وانا حطيت تعجب واستفهام عشان
عارف انا دا محتاج صبر ووقت طويل ..........

انا حاولت اطبق فيها كلام حضرتك اللي شرحتوا علي نشيد بلادي للموسيقار الكبير محمد عبد الوهاب ...
بس ياريت حضرتك ترد عليه وتقولي ايه الاخبار ....

مستني الرد من فضلك لاتتأخر عني ....

تلميذك ... حسن .....

ودا اللينك سوري يا جماعه انا مش عندي برنامج بيحول امتداد
mid to rm

فهضطر ارفعها ع الربيد شير واحط اللينك هنا لو امكن تحولوها زي المره اللي فاتت وترفعوها بدون للينك
اكون شاكر جداا للاداره