دردشة موسيقية

[unicorn]

المشاركة الأصلية كتبت بواسطة الألآتى

ولكننا ياجماعة لسنا فى صدد المفاضلة بين ملحن وأخر .. نحن نبين أساليب كل ملحن ومميزاته ..

أنا شخصياً يعجبنى فى عبد الوهاب أشياء .. ويعجبنى فى السنباطى أشياء .. المسألة ليس لها علاقة بالشعبية والإنتشار ..

عندك حق يا استاذ محمد

احنا خرجنا عن الموضوع الاساسى و دخلنا فى المفاضلة بين الناس الكبيرة دول , معذرة يا باشا .
بس انا حبيت اسألك سؤال هل تستطيع تمييز الحان السنباطى ؟؟؟؟ يعنى اذا كان مثلا لعبد الوهاب طابعا موسيقيا مميزا فهل لسنباطى ايضا طابع مميز يمكن عن طريقه معرفة ان صاحب اللحن هو السنباطى؟؟؟؟
اصل انا كان نفسى اعرف ملحن انا قلبى دليلى لليلى مراد و ان كنت ناسى افكرك لهدى سلطان لاعجابى الشديد بجمال اللحن و عرفت انه السنباطى و لكنى لم اقدر على معرفة ذلك بنفسى .
فهل موسيقى ممارس للموسيقى مثل حضرتك يستطيع هذا التمييز؟؟؟؟
نيجى للاستاذ غازى المتعب
انت مش عايز تقول ايه اللى حصل؟؟؟؟؟
الانكار مش حايفيدك.....
حاتقول و لا تيجى قدام البيه المأمور و تقول.....
لأ بجد يا باشا شوقتنا فعلا نعرف الست المايسترو دى قالتلك ايه؟؟؟؟؟؟

[الألآتى]

طيب .. نكمل ..

نرد عليكم فى الأول وبعدين نمسك فى إثنان آخران من الملحنين ..

بالنسبة لمقطوعة ( عزيزة ) عشق الأستاذ أبو مندور ..

نتكلم عنها شوية .. وأهو كله كلام فى المزيكا ..

هذه المقطوعة برغم جمالها وحيويتها وإعتبارها من أعمال عبد الوهاب الموسيقية المميزة .. لكنها ليست أحسن مقطوعاته ..

ولا نعتبرها من عبقريات عبد الوهاب لبساطة تنفيذها .. وربما هذا هو سر جمالها ..

تعتبر ( عزيزة ) من قوالب التحميلة .. برغم إيقاعها الراقص .. والتحميلة ياإخوانى عبارة عن جملة رئيسية يتم عزفها بجميع الألآت .. وتتكرر هذه الجملة على مدار التحميلة .. ويتخللها جمل موسيقية للألات المنفردة ..

والألات المستخدمة هنا هى ( الأكورديون ، الناى ) مع ملاحظة وجود الكمان والقانون فى جمل قصيرة جداً ..

وواضح طبعاً أن الألآت المستخدمة شرقية .. ولا وجود للنحاسيات والخشبيات فى المقطوعة ..

يستعمل عبد الوهاب فى مقطوعته .. مقام ( الكرد ) وهو المقام السائد طوال المقطوعة .. فيما عدا تحويلات قصيرة لمقام النهاوند المجاور للكرد .. والجزء الأخير من المقطوعة يستعمل مقام العجم ( الميجور ) ثم يعود للكرد لينهى مقطوعته ..

وقد إستعمل عبد الوهاب طريقة السلم الملون ( كروماتيك ) بين أجزاء المقطوعة .. ليستقر على سلم مقام النهاوند ليبدأ الجزء التالى ..

ولايمكن أن ننهى تحليلنا البسيط هذا قبل أن ننوه لطريقة عبد الوهاب فى إنهاء المقطوعة .. فقد أنهى المقطوعة بنغمة معلقة .. كيف ؟

المفروض أن ينهى الأستاذ عبد الوهاب مقطوعته على درجة ركوز مقام الكرد ( الرى ) .. أو حتى النهاوند ( الصول ) .. لا مانع .. ولكنه أبى أن ينهى المقطوعة كأى موسيقى .. فأنهاها على نغمة المى بيمول .. وليس على نغمة الرى أو الصول .. والموسيقيون يسمون هذه القفلة .. قفلة معلقة .. وهذا هو عبد الوهاب ..

بالنسبة لسؤالك ياأبو مندور .. عن مدى معرفة أسلوب السنباطى .. ذكرنا من قبل .. أن السنباطى يتميز بضخامة موسيقاه ويحب أن يستعمل الأوركسترا بكامله .. وككل ملحن .. يفضل السنباطى إستعمال بعض الجمل الموسيقية المميزة .. حين تسمعها تعرف أنه السنباطى .. إسمع مثلاً مقدمة أغنية ( عايز جواباتك ) ومقدمة أغنية ( على عينى بكت عينى ) وقارن بينهما .. ستجد تشابهاً كبيراً فى الجمل الموسيقية .. كما يحب السنباطى إستعمال أسلوب ( الأدليب ) فى موسيقاه )

والأدليب ياسادة .. هو بداية اللحن ويكون العزف بدون إيقاع .. أى عزف يعتمد على إشارة المايسترو .. ومعظم أعمال الستباطى الكبيرة هكذا .. أدليب ضخم بعرض الوتريات .. يمكنكم الأن معرفة أسلوب السنباطى بمجرد سماع أحد ألحانه ..

أما الأخت العزيزة ( سامية ) ..

فأنا مش زعلان .. أنا مبسوط بيكم جداً .. ولكنى كنت أحب تواجد موسيقيين غيرى حتى نثرى الموضوع أكثر .. وعموماً البركة فيكم .. وسنستمر بإذن الله .. لأننا نتحدث فى شئ نحبه جميعاً ..

وسأعمل بإقتراح أخانا أبو مندور وأتحدث عن على إسماعيل وأندريا رايدر وفؤاد الظاهرى بصفتهم من أشهر الموزعين وواضعى الموسيقى التصويرية للأفلام .. فإلى الرد القادم ..

[غازي الضبع]

بعد كل هذه المناجاة
وكل هذا الاستفزاز الفني
وكل هذه المحبة ..
بس خلليكوا فاكرين إن إنتوا اللي عايزين
وأنا نبهت قبل كده ، وقد أعذر من أنذر ..

مضطر أكمل لكم الحكاية ..
بعد أن تقابلت مع مدام عصمت ( الله يمسيها بالخير إذا كانت لسه موجودة ) .. وهي بعد أن سمعتني - يا سامية - بدندن كده أغنية يا تمر حنة لفايزة أحمد مع صاحبي اللي حكيتلكم عليه بتاع الأكورديون بصحبة كام واحد من زملاؤه في الفرقة .. جات واتعرفت عليا وقالتلي : صوتك حلو بس عايز يعلا شوية عن كده ..
قولتلها : ربنا يخليكي دا انا كنت باهزر يعني مش باغني بجد ..
قالتلي : لا والله صوتك فعلا حلو ..
وراحت فاتحة الأورج اللي أمامها .. وقالتلي طب إنت حافظ إيه تاني ..
قلت لها : حافظ كل أغاني عبد الحليم وشوية لطلب وشوية لعبد الوهاب ..
قالتلي : مش حافظ حاجة لمحمد فوزي ..
ضحكت وقولتلها : يعني مش كفاية اللي قولتلك عليهم دول ..
قالتلي : حافظ مال القمر ماله..
قولتلها : آه
راحت عاملة المقدمة بتاعتها على الأورج وقالتلي : سمعني
طبعا قعدت اتنحنح ، واعمل نفسي باسلك في صوتي ، وابتديت .. مال القمر ماله .. ماجيناش على باله ..
وبعد ما خلصت حسيت إنها هاتقولي ماشفش وشك هنا تاني ..
واحتمال تطرد صاحبي دا من الفرقة كمان ..
لكن الحقيقة حصل العكس تماما ..
لقيتها معجبة قوي بصوتي ، وقالتلي طيب تستناني بعد البروفة .. نكمل .. ولا إيه رأيك تخش معانا في البروفة ..
كانوا بيعملوا أغنية قمر له ليالي للأستاذ داوود حسني
قولتلها مش حافظها .. قالتلي أقعد اسمعنا وشوف احنا بنعمل إيه ..
لكني مش عارف ليه حسيت إني مكسوووف فاعتذرت وقولتلها طيب هو أنا أصلي عندي مشوار مهم دلوقتي ، ينفع آجي لحضرتك يوم تاني .. قالتلي مافيش مشكلة .. خلليها بعد يومين .. مستنياك .. إوعى ماتجيش ..
ومشيت وأنا حاسس إني خلاص وصلت ، وباقول في عقل بالي ..
الظاهر إن العندليب هايرجع تاني ..
ورحت قعدت أسمع في أغاني محمد فوزي كلها ..
آه .. نسيت أقوللكم إني سألتها إشمعنى محمد فوزي ..
قالتلي : عايز تتعلم الغنا إسمع محمد فوزي ، وشوف مخارج الكلام منه إزاي ..
قعدت أسمع أغاني فوزي كلها اللي طبعا أنا عارفها وحاببها ، بس المرة دي كان لها طعم تاني خالص ، وحسيت فعلا إن كل الحروف خاجة منه واضحة جدا ، وكل النغمات متقسمة وباينة وواضحة على الآخر ..
وحفظت أغلب أغانيه اللي سمعتها ..
وانتظرت اليومين يعدّوا..
إلى أن جاء اليوم المعهود .. ولبست واتشيكت وشربت يانسون طبعا قبل ماروح .. ومارضيتش أشرب ولا سيجارة ( أيام ما كنت بادخن ) ..
وتوكلت على الله ورحت لمدام عصمت ..

وإلى لقاء آخر إن شاء الله
غازي

[unicorn]

استاذنا / ابو حسام

الله على شرحك البسيط و تحليلك الموسيقى السهل فعلا فى منتهى الجمال يا استاذ محمد
انا كنت بشوف فى الموسيقى الالية قوالب السماعى و اللونجا و البشرف و التحميلة و لا افهم ماذا تعنى هذه المسميات و الان قد عرفنا واحدة و هى التحميلة .
و بالنسبة لمزيكا عزيزة يا استاذ ابو حسام تحليل حضرتك لها هايل و بالذات كلمة (ولا نعتبرها من عبقريات عبد الوهاب لبساطة تنفيذها .. وربما هذا هو سر جمالها ..)
عجبنى اوى تلخيص حضرتك لها فعلا لحنها بسيط جدا و سلس جدا و تألفه الاذن التى تسمعه لاول مرة بسهولة و هذا شأن عبد الوهاب فى معظم الحانه..... السهل الممتنع الذى لا يأتى به سواه.
و اكيد طبعا دى مش احسن الحانه و انما كانت احد الامثلة التى ارويها على عبقرية عبد الوهاب التى هى فى رأيى البساطة الشديدة فى اللحن و صعوبة التنفيذ .
و زى ما قلت لحضرتك على اسماعيل (الذى و عدتنا تكلمنا عنه ) استطيع ان اميز الحانه بسهولة و لا استطيع ان اقول كيف فلا املك قدرة التعبير الموسيقى الرائع الذى تملكه حضرتك لاحترافك بالموسيقى.
اما عن انتظار حضرتك لاحد الاعضاء الموسيقيين ليحمل عنك قليلا كثرة اسئلتنا فأكيد ا/ احمد الديب بيتابع من بعيد و منتظر لحظة ما ليدخل مع حضرتك.
شكرا على سرعة ردك يا استاذ محمد و منتظرين نفاذ وعدك .
نيجى لابلة سامية التى لا تريد ان تشاركنا برأيها برغم تأكدى من حسن ذوقها و سلامة حسها الموسيقى و التى تقول انها ليست متخصصة فى الموسيقى طيب ايه رأيك نقفل الصفحة دى خالص و نقفل المنتدى كمان لان المتخصصين فى الموسيقى امثال ا/ محمد الالاتى وا/ احمد الديب قليلون جدا
ده احنا لسة كنا بنقول حانفتح معهد موسيقى على ما تفرج ....ياعنى شايفانى انا و غازى متخصصين اوى؟؟؟؟ ما احنا عمالين نسأل ا/ محمد و بنحاول نعرف ؟؟؟
هو يمكن يكون الاستاذ غازى اكثر تخصصا و ده حايظهر بعد ما يخلص حكاية المايسترو عصمت....
والله خلتنى اضحك ضحك يا غازى على اسلوبك و طريقة سرد الحكاية و بالذات لما ابتديت تسلك زورك و تتنحنح و تشرب ينسون و عملت الواد المطرب اللى ماحاصلش
و مش عارف ليه جاه على بالى ان المايسترو عصمت دى شبه المطربة اللى فى فيلم دليلة (بتاعت الحلو فى الفراندة شاورلى و بص لى و القلب فى الزمان ده بسرعة بيتملى)
كمل يا غازى الموضوع يزداد سخونة و شديتنا اكتر.......

[unicorn]

نسيت اسأل استاذ محمد الالاتى
اغنية حبيب الروح لليلى مراد الحان السنباطى؟؟؟
هى ينطبق عليها المواصفات التى قلتها حضرتك من حيث ضخامة البداية بكامل طاقة الاوركسترا بس بالنسبة للادليب ما اظنش لان الايقاع فيها شديد و قوى.

[الألآتى]

أهلاً أخى أبو مندور ..

بالنسبة لمطالبتى بإشتراك بعض الأخوة ( موسيقيين وغير موسيقيين ) ليس الهدف منه تخفيف الحمل عنى .. فأنا لن أملّ من أسئلتكم وإستفساراتكم .. فهذا شئ يسعدنى بالتأكيد .. ولكنى أحببت أن يشاركنا الأخوة لزيادة إثراء المناقشات وتكثيف المعلومات .. والأستاذ أحمد الديب ( حبيبى ) .. أتمنى أن ينسلخ قليلاً من مهامة الإشرافية ويشاركنا بمعلوماته الثمينة .. كما لاحظت عدم دخول ومشاركة أساتذتنا المشرفين .. ربما لأن المهام الإشرافية من الثقل بحيث لا تعطيهم وقتاً للمشاركة .. ولكن كلى أمل فى إشتراكهم جميعاً .. فسنسعد بذلك بالتأكيد ..

أما عن سؤالك بخصوص ( حبيب الروح ) فهى للسنباطى ولا شك .. فأسلوبه واضح كل الوضوح .. وأعتقد أن هناك أدليب فى الأغنية وإن كان غير موجود فى الأغنية الموجودة فى المنتدى .. إستمع للأغنية من الفيلم .. وستجد الأدليب ..

وعموماً .. إذا كنت ذكرت من قبل .. أن السنباطى عاشق للأدليب .. فهذا ليس شرطاً أن يكون فى كل أعماله ..

ملحوظة : مازلنا فى إنتظار الأستاذ غازى ليكمل لنا حكايته مع الغناء والأستاذة عصمت ..

[unicorn]

الف شكر يا استاذ محمد
و الله العظيم انا لم اكن اعرف مسبقا ان الاغنية من الحان رياض السنباطى و لكن من وصف حضرتك لاسلوبه وجدته متمثل فى هذه الغنوة.
و دى نتيجة معلومات حضرتك القيمة التى بدأت تؤتى ثمارها معانا يا استاذ محمد .
ما زلنا فى انتظار نفاذ وعد حضرتك....
و الاستاذ غازى اكيد حايكمل قصة مدام عصمت و قصة بداية سطوع نجم جديد فى مصر المحروسة:unsure::band:
بس بجد و بدون تهريج انا بشكر غازى على فتح هذه الصفحة المفيدة فعلا.....

[غازي الضبع]

[

و الاستاذ غازى اكيد حايكمل قصة مدام عصمت و قصة بداية سطوع نجم جديد فى مصر المحروسة

بس بجد و بدون تهريج انا بشكر غازى على فتح هذه الصفحة المفيدة فعلا.....

[/quote]
يابو مندور لا شكر على واجب ، أنا فرحان أكتر منك بوجود هذه الصفحات ، واللي فعلا باعتبرها مفيدة جدا لوجود كبير الآلاتية معانا فيها .. وإن شاء الله الكل يشارك معانا ، هم بس تلاقيهم بيصيفوا ..
أما بالنسبة لتكملة الحكاية بتاعة التجربة الخطيرة ليا في الغناء ، وهي بالمناسبة تعتبر أحد التجارب لأن هناك تجارب أخرى في التمثيل وفي التلحين وفي التأليف وفي العزف وفي إلقاء المنولوجات وتقليد الفنانين ..
وأقولك على سر ..
قرب شوية ..
أنا سجلت 3 شرايط قبل كده .. والله
طبعا مش في استوديو دا كان بس كاسيت نضيف شوية ، وميكسر ، وجهاز صوت كده من اللي بيستخدموه في الـ DJ
ومش عايز أقولك والله حققوا نجاح ساحق ( على مستوى المعارف والأهل والأصدقاء ) ..
وطبعا كان بصحبة صديقي الفنان خريج التربية الموسيقية والذي يلعب عود ، كما أنه ممتاز في الأورج
والأورج بتاعه كان فيه إمكانيات جبارة ولو إن أكيد بقى فيه الأحدث دلوقتي. بس كان الأورج لوحده عامل مهرجان في الشريط وكأن هناك فرقة موسيقية كاملة ، وكورال وناس بتسقف ، وناس بتزغرد .. وخصوصا إن صاحبي كان متمكن قوي من الأورج ..
وفوجئت بعد الموضوع ده ، وكان منذ حوالي 12 سنة إن فيه ناس معرفهمش سمعوا الشريط وعجبهم قوي ..
لدرجة إن أحد الفتيات خدت الشريط ماعرفش منين ، وسمعتوا في مدرستها ، وبقدرة قادر بقى مع كل بنت من زمايلها نسخة من الشريط .. وبقت الـ .... بجلاجل.
والموضوع كبر واتشهرت على حس الشرايط دي شهرة جامدة قوي ، بس بدون ماحد يعرف إن أنا اللي مسجله بصوتي ..
وبصراحة أنا قصدت إني ما ألمحش لأي حاجة جوة الشريط تدل عليا ، عشان مااتعرفشي لو حصل حاجة ..
المهم .. الحوارات كتير والتجارب الفنية أكتر ..
أنا بس عامل عليكو إنتوا مالكوش ذنب ..
خللينا في الدردشة أحسن ..
ودلوقتي هافتح مجال جديد نتناقش فيه ..
عن طريق توجيه سؤال لكبير الآلاتية وطبعا للناس كلها ..
.. لما تيجي الكلمات ..
وييجي الملحن .. والموضوع لسه حبر على ورق ..
بيبص للموضوع إزاي ؟؟
يعني بيعمل إيه ؟
وعلى أي أساس بيختار المقام والحاجات دي ..
ولو هي أغنية طويلة ذات مقطوعات موسيقية داخلية .. ( إنت عمري ، أمل حياتي ، فاتت جنبنا ، أغدا ألقاك ، .... )
بتتعمل الموسيقى الأول ولا اللحن الأول .. ؟
ولا دي مالهاش قواعد ، وبتفرق من ملحن لآخر ..
يعني ..
إيه اللي بيحصل من البداية للنهاية ؟؟

تحياتي
غازي

[الألآتى]

يادهوتىىىىىىىىى .. أنا إللى جبته لنفسى ..

سبنا أساليب الملحنين ودخلنا فى التقيل ..

عموماً إسألوا زى ماإنتم عايزين .. بجد ياجماعة ..

أنا بحب جداً الأسئلة خصوصاً الخاصة بعلم النغم .. لأنى أعتبر العلم ده من عند الله سبحانه وتعالى .. ولابد من نشره .. لأنى مش حاخد العلم ده معايا وأنا ماشى .. لابد من تركه للأخرين .. علشان حد يفتكرنى بالخير ..

وقبل ماأجاوب .. أضم صوتى لأختنا سامية وأخانا أبو مندور .. كمل حكايتك ياعم غازى مع أبله عصمت .. أنا ليا قريب أمين شرطة فى قسم الموسكى .. يعنى كمل أحسن لك ..

نرد فى الأول على سؤال عم غازى .. والخاص بطريقة تلحين الأغنية ..

شوف ياعم غازى .. شوفوا ياجماعة ..

أساليب الملحنين تختلف فى طريقة تلحين الأغنية ..

ساقدم لكم مثالاً لكى تعرفوا طريقة من هذه الطرق ..

عندما قدمت أم كلثوم كلمات أغنية ( حانة الأقدار ) لمحمد الموجى .. ماذا فعل الموجى ؟

وضع خطة لحنية كاملة وبرع فيها .. إسمعوا الأغنية وستعرفون مقصدى ..

الخلاصة : الملحن الذى يحترم نفسه وفنه .. يضع الكلمات أمامه .. ويختار المقام المناسب حسب نوع الكلمات .. حيث أن لكل مقام شخصيته وطبيعته .. فالكلمات الحزينة غير الحماسية غير المرحة غير العاطفية .. ألخ .

ثم يختار الإيقاع الملائم .. هل هو سريع .. هل هو بطئ .. رباعى ، سداسى ، ثلاثى .. ألخ .

ثم يبدأ فى تخيل الجملة اللحنية ليبدأ بها لحنه .. وبعدها ينتقل لجزء أخر .. وهكذا .. حتى ينتهى من لحنه ..

ثم يقوم بوضع الجمل الموسيقية ( اللازمة الموسيقية الأولى ) ثم يضع الجمل الموسيقية للربط بين الكوبليهات ..

وبالطبع يستخدم الملحن آلته الموسيقية المفضلة لعزف الجمل اللحنية .. وعن كيفية حفظ اللحن ..

هناك من يكتب الجملة التى يؤلفها ( إذا كان يكتب النوتة ) وهناك من يسجلها على جهاز كاسيت ..

ثم يأتى دور التنفيذ ..

يأخذ الملحن أغنيته للمدون ( كاتب النوتة فى صورتها النهائية ) .. وإذا كان اللحن موزع .. يكتب نوتة لكل آلة .. وتأتى بعدها مرحلة البروفات مع الفرقة الموسيقية .. ثم التسجيل فى الأستوديو ..

هذه المراحل حاولت تبسيطها جداً دون الدخول فى تفاصيل موسيقية أو تقنية ..

أما الأن .. فى زماننا الهباب ..

فإن عاتق العمل كله يقع على الموزع ( غالباً ) فالملحن يلحن الكلمات فقط .. دون اللزم الموسيقية .. ثم يقوم الموزع بعمل باقى الخطوات .. من وضع الجمل الموسيقية وإختيار الإيقاعات والتنفيذ ..

وغالبية ملحنى اليوم .. يلحنون بطريقة واحدة .. يضع الكلمات أمامه ويدندن بأى لحن يخطر على باله مع التخبيط على أى حاجه ( كرسى ، ترابيزة ، أى حاجه ) ويسجل اللحن ببقه ( فمه ) على كاسيت .. ثم يعطى الكاسيت للموزع .. إللى حايوجع دماغنا بالخبط والرزع إللى إحنا شايفينه دلوقتى ..

ملحوظة : كثير من ملحنى اليوم يلحنون على الجيتار .. وطبعاً الجيتار ليس به ربع تون .. لذا نجد معظم أغانى اليوم من مقام الكرد أو النهاوند .. علشان يريحوا نفسهم .. ربنا يريحنا منهم ..

[الألآتى]

نرد دلوقتى على الأخت سامية بخصوص التوزيع الموسيقى ..

الكلام عن التوزيع الموسيقى لا ينتهى .. ولا يكفى مجرد رد فى موضوع لشرح وتبسيط التوزيع الموسيقى .. ولكنى سأحاول على أى حال ..

التوزيع الموسيقى ياسادة .. هو فن التوافق والتناغم ( الهارمونى ) .. هكذا بكل بساطة .. مهما حاول الكثيرون تعقيده ..

ولا يتصدى للتوزيع الموسيقى إلا الدارس الفاهم .. لأن التوزيع مرحلة متقدمة عن التلحين ..

الموزع لابد أن يكون دارساً لتاريخ علم الهارمونى .. دارساً لفن القيادة ، يعزف على أكثر من آلة .. يعرف إمكانات كل آلة موسيقية أو إيقاعية فى الأوركسترا .. بإختصار .. العملية مش هيصة ..

وعلشان أقرب ليكم المسألة .. الخط اللحنى العادى يسمى ( ميلودى ) كأن يعزف العازف جملة موسيقية معينة .. فإذا أضفنا عازفاً أخر يعزف جملة موسيقية مختلفة فى نفس الوقت .. يسمى هذا ( بوليفونى ) أو ( كاونتربوينت ) .. أى جملة متعارضة تسير مع اللحن الأساسى وتختلف عنه فى شكل الجملة الموسيقية .. بحيث ينتج عن هذا تناغم وإثراء للعمل .. دون نشاز ..

ومن الطبيعى أن يكون لكل موزع أسلوبه وطريقته فى التوزيع ( كما الحال بالنسبة للملحن ) .

ولقد عرفنا جميعاً الموزع العبقرى ( على إسماعيل ) ولا أحد يختلف عليه كموزع متمكن أضاف بالتأكيد لكثير من الأعمال ..

ولكن على إسماعيل نفسه .. لاقى نقداً شديداً عندما تصدى لتوزيع أغنية ( أنا كل ماأجول التوبة ) لعبد الحليم حافظ ..

فلقد قام على إسماعيل بتوزيع الأغنية بطريقته المعهودة ( التى يحبها ) وإستخدم النحاسيات والألآت الخشبية فى التنفيذ .. مما أدى لتعرضه لنقد لكون الأغنية شعبية .. لا تتحمل نحاسيات أو خشبيات ..

هاهو موزع واحد .. أضاف للعديد من الأغنيات وأضعف أغنية مثل ( التوبة ) .. فما بالكم بباقى الموزعين ..

وهاقد جاءت الفرصة لنتحدث عن أساليب الموزعين ( أندريا رايدر ، على إسماعيل ، فؤاد الظاهرى )

وقبل أن نتحدث عن كل منهم .. ينبغى علينا أن نذكر بعض أعمالهم حسب ماتسعفنى الذاكرة ..

أندريا رايدر : الموزع المصرى الأرمنى

بعض أعماله : الرجل الثانى ، دعاء الكروان ، شارع الحب ، غروب وشروق ، اللص والكلاب ، السمان والخريف ، الخروج من الجنة ،

على إسماعيل :

بعض أعماله : الأيدى الناعمة ، عروس النيل ، يوم من عمرى ، أبى فوق الشجرة ، معبودة الجماهير ، أفلام فرقة رضا ، الأرض ، صغيرة على الحب ،

فؤاد الظاهرى :

بعض أعماله : القاهرة 30 ، رد قلبى ، الزوجة الثانية ، إسكندرية ليه ، شفيقة ومتولى ، فى بيتنا رجل

هذا غير عدد غير محدود من أعمالهم التوزيعية للأغانى ..

فمثلاً .. أندريا رايدر قام بتوزيع عدد كبير من أغنيات الموسيقار محمد عبد الوهاب

وعلى إسماعيل قام بتوزيع عدد كبير من أغنيات عبد الحليم حافظ

أما فؤاد الظاهرى .. فلم تكن له أعمال تذكر بالنسبة لتوزيع الأغانى .. ربما يكون وزع أغنيات ولكنها غير معروفة .. ولكن هذا لا ينفى أنه موسيقى بارع ومخضرم قام بتأليف مقطوعات موسيقية كبيرة وأوركسترالية بجوار الموسيقى التصويرية للأفلام .

نأتى الأن لأساليب هؤلاء الموزعين ..

أندريا رايدر : يتضح أسلوبه جيداً فى أفلام ( الرجل الثانى ودعاء الكروان وشارع الحب ) فهو موسيقى غربى بكل المقاييس .. يستخدم كل إمكانيات الأوركسترا من آلات نحاسية ( ساكس بأنواعه ، كورنو ، هورن ، باص هورن ، ترومبيت ، باصون .. ألخ ) وآلات خشبية ( كلارنيت ، فلوت ، بيكالو ، أوبوا .. ألخ ) وآلات وترية ( كمان ، فيولا ، تشيللو ، كونترباص ) .

يحب إستعمال الجمل الضخمة الفخيمة وإيقاعاته غربية غالباً .. إسمعوا له أغنية ( جبار ) لعبد الحليم أو أغنية ( لست قلبى )

على إسماعيل : تلميذ أندريا رايدر النجيب .. درس الموسيقى الغربية وتشبع بها لكنه لم ينسى أنه شرقى .. خلط بين الألآت الغربية والألآت الشرقية فى موسيقاه .. يحب إستعمال الألآت الخشبية فى أعماله .. يستخدم الوتريات بطريقة مميزة تجعلك تعرف شخصيته من مجرد سماع أحد أعماله . . إسمعوا له موسيقى فيلم ( يوم من عمرى ) وأغنية ( ضحك ولعب وجد وحب ) من نفس الفيلم .

فؤاد الظاهرى : كبير كبير .. مش عارف أقول عنه إيه الراجل ده ..

موزع شرقى حتى النخاع .. يحب إستخدام الألآت الشرقية مثل القانون والعود والناى .. والألآت الإيقاعية مثل الدفوف والنقرزان ..

له عمل موسيقى شهير ( الأرض الثائرة ) .. ولقد إستخدم مفردات هذا العمل فى كثير من أفلامه .. مثل ( رد قلبى ، فى بيتنا رجل ) .. إسمعوا له موسيقى ( الزوجة الثانية ) ..

وكفاية عليكم كده أحسن تبقى موسوعة .. ومانعرفش ناكل عيش ..

فى إنتظار أسئلتكم .. التى أسعد بالتأكيد بالرد عليها ..