عايز واسطه

**سعدالشرقاوى** · #1 05/08/2009, 06h52

عايز واسطة

لمّا تلاقى السّلم عالى
لمّا الكلّ يقول وانا مالى
لو كان حالك يشبه حالى
قوم تعالى لى نشوف لك واسطه
,,,,,,,,,
هيّه الكنز اللى مخبّيلك
شمس رخيصه تنوّر ليلك
عايز الدّنيا بحالها تجيلك
شغـّل مخـّك شوف لك واسطه
,,,,,,,,,,
لمّا الحقّ يضيع من ايدك
لمّا النّدل ح يصبح سيدك
لمّا درجتك مش ح تفيدك
تبقى حياتك من غير واسطه
,,,,,,,,,,,
لمّا تعوز تفرح بوجودك
وتبنى نجاحك على مجهودك
كلّ النّاس ح يلاحظوا جمودك
وصعب وصولك من غير واسطه
,,,,,,,,,,,
لمّا الدنيا تبقى مصالح
واللى يضرّ يتوه فى الصّالح
واللىّ يخاصم واللىّ يصالح
لازم يبحث عن ميت واسطه
,,,,,,,,,,,
لمّا الحقّ يتوه فى الباطل
والمقتول يتحوّل قاتل
لمّا الايد تتمدّ لعاطل
يبقى ياويل اللى مالوش واسطه
,,,,,,,,,,,,
عايز تسرق عايز تنهب
عايز تقعد عايز تهرب
عايز تشتم عايز تضرب
قبل دا كلـّه تشوف لك واسطه
,,,,,,,,,,
عايز تحلم أىّ منام
عايز تاكل واللا تنام
أو فى الحرّ تاخد حمّام
كلّ شئونك عايزه الواسطه
,,,,,,,,,,,
فى كلّ مجال لو مانتش غاوى
تشغـّل مخـّك تعمل حاوى
أولى اعدادى ساعتها تساوى
مؤهّل عالى لو فيه واسطه
,,,,,,,,,,
طول ما جناب البيه مسنود
يبقى طموحه مالوهش حدود
ولا بيلاقى طريق مسدود
والمفتاح مصنوع بالواسطه
,,,,,,,,,,
قول لى ازّاى ح تعالج ولدك
واللا تقضىّ مصالح والدك
لو حتىّ المسئول من بلدك
مش ح تخلـّص من غير واسطه
,,,,,,,,,,,
بكره تكلـّم بيها اخواتك
بكره تقابل بيها حماتك
ولو عوزت أختك واللا مراتك
خوفى ساعتها تشوف لك واسطه
,,,,,,,,,,,
لمّا تركنا الفرصه ياغالى
ولسان حالنا يقول وأنا مالى
وحقّ عيالك ويّا عيالى
مدهوس تحت رجول الواسطه
,,,,,,,,,,,,
عمر الدوله ما تلمح خيرك
طول ما ف ايدك فرصة غيرك
جبت حرام وكـّلته لغيرك
رحت النّار ومعاك الواسطه
,,,,,,,,,,
خيبه ودخلت كلّ حياتنا
رفعت نسبة سلبيّاتنا
نفسى دقيقه قبل وفاتنا
نور العدل يطفىّ الواسطه
,,,,,,,,,,
نفسى أشوفنا صحينا وفوقنا
ومن غير واسطه أخدنا حقوقنا
يحكم فينا ضميرنا وذوقنا
ويقتل بينا وباء الواسطه
,,,,,,,,,,,,

**عفاف سليمان** · #2 05/08/2009, 07h14

والله يا عم سعد
جيت ع الجرح
لحد الان محتارين ببنتى بسبب الواسطه
لا واسطه نافعه ولا اى حاجه شافعه
ولا عارفين نروح فين ولا نيجى منين
من مدرسه لمدرسه والهم طايل حالنا وحال الناس
كل مكان يقول لا هنا ولا هناك
ومن اداره لاداره وتووووووووه يابن ادم
وشوف لك واسطه يمكن تنفع
لا واسطه نافعه ولا اى حاجه تانيه شافعه
وربنا يرحمنا برحمته
وينور لينا طريقنا وبصيرتنا
حتى المجموع الكبير مش نافع
طيب ايه الحل وايه العمل
كل واحد يقولك روح هنا وروح هناك
وعلى راى الفنان رافت فهيم
روح يا خويا شوف مصلحتك
تحياتى لك يا عم سعد
ياللى مش ناسى اى سلبيه من سلبيات حياتنا
اختكم عفاف

**abuzahda** · #3 05/08/2009, 09h23

اقتباس:

المشاركة الأصلية كتبت بواسطة سعدالشرقاوى

عايز واسطة

لمّا تلاقى السّلم عالى
لمّا الكلّ يقول وانا مالى
لو كان حالك يشبه حالى
قوم تعالالى نشوف لك واسطه
,,,,,,,,,
هيّا الكنز اللى مخبّيلك
شمس رخيصه تنوّر ليلك
عايز الدّنيا بحالها تجيلك
شغـّل مخـّك شوف لك واسطه
,,,,,,,,,,
لمّا الحقّ يضيع من ايدك
لمّا النّدل ح يصبح سيدك
لمّا درجتك مش ح تفيدك
تبقى حياتك من غير واسطه
,,,,,,,,,,,
لمّا تعوز تفرح بوجودك
، تبنى نجاحك على مجهودك
كلّ النّاس ح يلاحظوا جمودك
صعب وصولك من غير واسطه
,,,,,,,,,,,
لمّا الدنيا بتبقى مصالح
واللى يضرّ يتوه فى الصّالح
واللىّ يخاصم واللىّ يصالح
لازم يبحث عن ميت واسطه
,,,,,,,,,,,
لمّا الحقّ يتوه فى الباطل
والمقتول يتحوّل قاتل
لمّا الإيد تتمدّ لعاطل
يبقى ياويل اللى مالوش واسطه
,,,,,,,,,,,,
عايز تسرق عايز تنهب
عايز تقعد عايز تهرب
عايز تشتم عايز تضرب
قبل دا كلـّه تشوف لك واسطه
,,,,,,,,,,
عايز تحلم أىّ منام
عايز تاكل واللا تنام
أو فى الحرّ تاخد حمّام
كلّ شئونك عايزه الواسطه
,,,,,,,,,,,
كلّ مجال ، لو مانتش غاوى
تشغـّل مخـّك تعمل حاوى
أولى اعدادى ساعتها تساوى
مؤهّل عالى لو فيه واسطه
,,,,,,,,,,
طول ما جناب البيه مسنود
يبقى طموحه ماله حدود
ولا بيلاقى طريق مسدود
والمفتاح مصنوع بالواسطه
,,,,,,,,,,
قول لى الزّاى ح تعالج ولدك
واللا تقضىّ مصالح والدك
لو حتىّ المسئول من بلدك
مش ح تخلـّص من غير واسطه
,,,,,,,,,,,
بكره تكلـّم بيها خواتك
بكره تقابل بيها حماتك
ون عوزت أختك واللا مراتك
خوفى ساعتها تشوف لك واسطه
,,,,,,,,,,,
لمّا تركنا الفرصه ياغالى
ولسان حالنا يقول وأنا مالى
حقّ عيالك ويّا عيالى
مدهوس تحت رجول الواسطه
,,,,,,,,,,,,
عمر الدوله ما تلمح خيرك
طول ما ف ايدك فرصة غيرك
جبت حرام وكـّلته لغيرك
روحت النّار ومعاك الواسطه
,,,,,,,,,,
خيبه ودخلت كلّ حياتنا
رفعت نسبة سلبيّاتنا
نفسى دقيقه قبل وفاتنا
نور العدل يطفىّ الواسطه
,,,,,,,,,,
نفسى أشوفنا صحينا وفوقنا
من غير واسطه أخدنا حقوقنا
يحكم فينا ضميرنا وزوقنا
، يقتل بينا وباء الواسطه

,,,,,,,,,,,,

الله ينوَّر عليك يا عمّي سعد

بس انا عايز اقولك مفاجأة !

بعد أكتر من ربع قرن من السياحة في بلاد الله ، وجدت أن الواسطة وباء إنساني
أقصد إنه على مستوى البشريّة كلها ، مش بس في مصر
حتى كندا التي تمثل سقف الرفاهية و الحريات في العالم ، فيها واسطة و هدايا تسهيل (هنا مش بيسموها رشاوي)

و في الإمارات ، المعادل العربي لكندا ، من حيث الرخاء و تعدد الثقافات . خرجت علينا الصحف ذات صبح بعزل مجموعة من كبار المسئولين بقرار من الفارس العربي محمد بن راشد ، الراتب الشهري لواحدهم يكفي بناء مدرسة في بلادنا ، لكنه عزلهم و شهر بهم بسبب الفساد الإداري

أنا معاك إنها آفة تنخر في تكافؤ الفرص ، بس حبيت اقولك: إطمن ! ، مش في مصر بس .

مش عارف ليه و انا بقرأها تخيلت عبقري المنولوج إسماعيل يس ، و هو بيغنيها . فقد كان ، رحمه الله ، يقضي معظم وقته بحثاً عن كلمات مُشابهة ، حتى أنه غنى لزجالين لم يعرفهم أحد غيره. فقد كان مُخلصاً لفنه لدرجة السفر إلى القرى و النجوع للبحث عن كلمة تجمع بين المرح و العمق و الصدق ، زي كلامك ده يا عمّي سعد ،
أتمنى على أخي ناصر دويدار أن يحمل هذه التحفة إلى ماسبيرو ، فلربما كان هناك خليفة لسيّد الملاح أو إسماعيل ياسين

**فؤاد** · #4 05/08/2009, 10h19

صحيح
والله ماني عارف أقول شئ
ألا فعلاً الدنيا كلها واسطه
وفعلاً تتعجب من موضوع يمشي كده بدون واسطه
تقول في نفسك وساعات علي الملاً
الموضوع ده خلص بدون ولا واسطه ولا أشي
وتكون مبسوط أوي
شكراً علي الموضوع
يااااااااااااااااااااااااااااااا
صاحب التوته

**abuzahda** · #5 05/08/2009, 10h22

اقتباس:

المشاركة الأصلية كتبت بواسطة فؤاد عبد الحميد

صحيح

والله ماني عارف أقول شئ
ألا فعلاً الدنيا كلها واسطه
وفعلاً تتعجب من موضوع يمشي كده بدون واسطه
تقول في نفسك وساعات علي الملاً
الموضوع ده خلص بدون ولا واسطه ولا أشي
وتكون مبسوط أوي
شكراً علي الموضوع
يااااااااااااااااااااااااااااااا

صاحب التوته

يا عم فؤاد ، يا واسطة الأحبّة

هو احنا بنعرف نشوفك ، من غير واسطة ؟!

**Tarek Elemary** · #6 05/08/2009, 11h53

أجيبلك واسطة يا عم علشان تشغل الموبايل بتاعك
يا عم سعد يا جميل
أيه الحلاوة دى يا راجل يا عبقرى

**علاء طه ياسين** · #7 05/08/2009, 12h19

أخي وشقيقي
سعد الشرقاوي

ها قد عادت العصافير مرة أخري تزقزق علي أغصان التوتة ..
عودا حميدا يا أبو مدحت ..
وتألق كالمعتاد منك ..
والكوسة والرشوة والواسطة والمحسوبية أمراض انتشرت ..
ونحن لنا الله ..

علاء

**غازي الضبع** · #8 05/08/2009, 12h50

أذكر أنني حينما ذهبت كي أستخرج رخصة القيادة منذ عدة سنوات
قال لي أحد أصدقائي : لازم تشوف لك واسطة ..
هناك يابني .. مابيعترفوش بحاجة اسمها سواقة .. أد ما بيعترفوا بالكارت المتدبس على الورق
قلت : أوكيه ..
ذهبت إلى حلاق منطقتي ،، وهو أكبر واسطة في حيينا
( بجد مش هزار )
قاللي : خـُد الكارت ده ،، روح المرور ،، امتحن ،، اسقط ،، خش اتصور ،، استلم رخصتك ،، وتـَنــّك راجع

أخذت الكارت ، وذهبت ، وانا مطمئن
فوجدت اسمي في لجنة الاختبار رقم 48 وكنت آخر واحد في الكشف
فجلست أشاهد الـ 47 مختبر اللي قبلي
وكان منهم أطفال صغار ( تحت السن القانوني ) للقيادة
ووجدت أن منهم من طلع على الرصيف وهو بيختبر
ومنهم من أطاح بكل الأقماع المرورية الموضوعة للاختبار
والطامة الكبرى .. كانت هذه الفتاة التي صدمت ضابط المرور الذي كان يقوم باختبارها

وأخيراً جاء دوري ..
فدخلت باطمئنان شديد ( وفي بطني بطيخة صيفي )
وامتحنت .. والحمد لله ..
اجتزت الاختبار بمهارة لدرجة أن صفق لي من كان يشاهدني من الخارج ..
فلم أ ُخـرج الكارت
وذهبت للتصوير ،، كي استخرج الرخصة
وكانت المفاجأة الكبرى
أن اسمي كان أيضاً رقم 48 في كشف المقبولين !!!

**abuzahda** · #9 05/08/2009, 12h57

اقتباس:

ذهبت إلى حلاق منطقتي ،، وهو أكبر واسطة في حيينا
( بجد مش هزار )
قاللي : خـُد الكارت ده ،، روح المرور ،، امتحن ،، اسقط ،، خش اتصور ،، استلم رخصتك ،، وتـَنــّك راجع

أخذت الكارت ، وذهبت ، وانا مطمئن

أنا لما رجعت ، بالرخصة ، يومها ، صحابي قالوا لي : مبروك
إنت صحابك قالولك إيه ، يا ابو فارس ..... ؟

..............

الله ينعم عليك

**Tarek Elemary** · #10 05/08/2009, 13h21

العزيز غازى
الحلاق عندك كان تاجر فى الوكالة (الحضرة) عندى و ذهبت لمرور محرم بك و كان قائد المرور عزمنى فى مكتبه و رسبت فى الإشارات و لم أمتحن قيادة و إتصورت و خرجت بالرخصة فى نفس اليوم

شهادة كوسة تدين المجتمع كله الذى تطاله الواسطة و المحسوبية