كلمات كمال عبد الرحمان والحان سامي دربز
يا سلاااام يا عم احمد !
الموت لَعَبها معاك !
و منين دخل لَك ؟! ..
أكيد مِن فتحةِ الشِباك
***
مِش قُلت لك دا لئيم
راضِيه و لو بالكلام
و اعمِل لُه كام تعظيم
و ابدأ معاه بالسلام !
***
أو كُنت تِعزِم عليه ،،
بأحلى تعميرة
أو حتى أكلة فيسخ ،،
و تهضِموا بـ بيرة
***
جَرَى إيه ! باهزّر معاك ،،،
ما انتَ اللي غاوي هزار
يا بو قلب بَفتـة ،، بيطلَع مِنُّه ألف نهار
***
كان نِفسي ما ابكيش عليك ،،،
لكن البُكا غلاّب
و انتَ اللي كان في عنيك ،،،
باقرا بـِلادي ف كِتاب
***
ربك كَريم يا أصيل ،،،
و الجنــة للمُخلِصين
و الصِدق دايماً جميــل ،،، ملعون أبو الكدّابين