السلام عليكم
ألف شكر أستاذ عادل على هذه التحف الجميلة و الرقيقة .. ممتاز و ممتع جـــــدا
فيه أغنية لصباح طلبت كم مرة و أخر واحد طلبها أخي عمر الهنداوي من ألحان الدكتور جمال سلامة أغنية ساعات ساعات لو سمح وقت و تكرمت علينا... الاغنيه كانت تمثل حياة صباح وأقرب اعنيه لقلبها لانها كانت تحكي تناقض الحياه في داخلها .. https://www.youtube.com/watch?v=WJWh7DAtO0w
هيثم
__________________
ღღღღღღღღღღღღ أستاذ عادل صموئيل لك مني كل عبارات الشكر و العرفان
استاذنا الفاضل عادل كنت اشاههد فيلم اسمه صاحبة الملاليم ل محمد فوزي، تفاجئت في اغنية حلوه جداً اسمها ( رح توحشيني) من ألحانه
ان تكرمت علينا واعجبتك ولديك الوقت ان تدونها وان لم تستطع لا مشكلة يكفي الكم الهائل الذي دونته
دمت لنا https://youtu.be/edfEbIMzmdw
الاغنية دىبالطبع كان من المستحيلات تلاقيها النوتة على النت لعدة اسباب لأن عشان حد يدونها اولا مكانتش مطلوبة جماهيريا يعنى احنا بنحاول ندون الاغانى اللى ناس كتير تحتاجها .. ثانيا ان الى يدونها لازم يكون من عازفى الزمن الجميل يعنى حافظ الملحنين كل طريقته ازاى عشان كمان طريقةالتسجيل زمان دى فى اوائل الاربعينات كان بيسجلوا بدون نوت وبالطريقةالبدائية يعنى ممكن يكون حاجةبسيطة مش مظبوطة 100% ف لازم المدون يظبطها صح كمان لازم المدون يكون واخد باله من اداء ليلى مراد فى الوقت ده كانت لسه مبتدئة يعنى لما يكون نهاوند واللحن فيه نقلة بيعمل بياتى على النواة ممكن حد عادى ما ياخدش باله منها يعنى انا ليه قلت اغنية من العيار التقيل لأن فيه نقلات خطيرة جدا وسط الكوبليهات فى الميزان وفى المقام وطبعا كان القصبجى العبقرى بيستغل موهبة ليلى مراد المهم اتمنى النوتة تعجبكم وللعلم الحمد لله فيه دقةمتناهية فى التدوين يعنى انا كتبتها على يومين عشان اديها حقها لأن طريقةالغنا فى الوقت ده كان ممكن انت تتلخبط فى العلامامت العارضة لازم تاخد وقتك وبعدين كمان لاحظوا اللزم الصغيرة ذات الحروف المتشابهة زى حرف صول صول .. دى احيانا بتبقى 2 او 3 او 4 .. وقتها كان لو الزمن اتكسر فى اثناء التسجيل طبعا عازفين عباقرة والمايسترو عبقرى وضابط الايقاع بيلموا الموضوع متاخدش بالك ان حصل غلطةلأن كان صعب يعيدوا التسجيل من الاول كان مكلف جدا جدا إلا لو حصل مصيبة يعنى .. وهنا المدون لازم يعمل تجبير لكسرالزمن .. كمان فيه فى اول موسيقى الكوبليه الثالث كلكوعة كده دى جت من ان وقتها كان الاسطوانة 3 دقائق وتقلب الوجه الثانى والى سجل الاسطوانة عشان مايعملش فراغ لزقهم ف بعض بس اكل ربع حرف وبرضه هنا خبرة المدون انه ازاى يصلح الخطأ مع اطيب تحياتى
شكرا للنهر المتدفق ..نهر العطاء بلا مقابل....يارب يخليك لينا....
شكرا على اغنية بشتاقلك ساعات ..كلمات عماد حسن و تلحين محمد ضياء.بالمناسبة الاغنية من ألبوم "خايفة" انتاج 1992 ..يعنى الاغنية دى تقريباعمرها تلاتين سنة ...تخيل؟...والمقطوعة الموسيقية الاشهر للراحل محمد فوزى.."فتافيت السكر"..والاغنية الصعبة بتوقيع القصبجى " بتبص لى كده ليه"...
أستأذن حضرتك بمناسبة الذكري ال تمانية وعشرين لرحيل بليغ حمدى...تخيل حضرتك ..كانت وفاته زى أمبارح سنة 1993...نفس سنة وفاة الموسيقار أحمد فؤاد حسن ...ربنا يرحم الجميع...
أستأذن حضرتك..أغنية "حبك الجبار" لنجاة وبليغ حمدى وحسين السيد..أصدق من كتب مشاعر المرأة وحتلاقيه فى الاغنية دى...ودى كانت بداية خروج بليغ من المرحلة السنباطية وتألق بليغ بداية من 1965..صاروخ أنطلق ولم يستطع أى حد أيقافه.....ولحضرتك جزيل الشكر....يااستاذئا
السلام عليكم
ياه و يا عيني على الاغاني الجميلة و الابداع... الف شكر استاذ عادل
على ذكر ليلى مراد في بداياتها كلامك صح أستاذ عادل حيث لاحظت نفس الملاحظة في أغنية يا ما ارق النسيم لما تسمعها يتبين في جملة أو مازورة إنها كرد و المازورة التالية بياتي و هكذا كذا مرة في الأغنية و طريقة الأداء متشابهة جدا حتى على أصحاب الإختصاص يلتبس عليهم الأمر في يا ما ارق النسيم
هيثم
اخى العزيز
اهم ما فىالموضوع ان انا فاهم دماغ كل ملحن وكل مطرب يعنى عارف عايز يعمل ايه .. والى بيشجعهم على كده ان المطرب بيبقى عبقرى يعنى بيقول اى حاجة زى ما ساعدهم العازفين العظماء يعنى لولا العازفين دول مكانش فيه صولوهات كتير اتعملت اصلا يعنى اقل حاجة بوفاة عمر خورشيد ماحدش عمل صولو جيتار له قيمة زى الصولوهات اللى اتعملت خصيصا لوحود عمر خورشيد لأن مش حيتقال
__________________
ღღღღღღღღღღღღ أستاذ عادل صموئيل لك مني كل عبارات الشكر و العرفان
انا كنت متردد اكتبها من زمان لأنها صعبة جدا محتاجة مزاج معين يعنى لكن لما اخ عزيز طلبهاوقال انها موجودة بس ما عجبتوش وطلب منى اعادةتدوينها عملتها .. مشكلةالاغنية دى انها مش فقط تحتاج مدون شاطر عبقرى جهبذ ولكن لازم يكون واحد حافظ ام كلثوم بتتنفس كيف والملحن بيعمل ايه وتكتب ايه وماتكتبش ايه يعنى ايه اللحن وايه الحلية .. اللى اخطر من كده ليه الاغنية دى صعبة جدا جدا السبب انها قديمة وكل التسيلات الموجودة لها بعد ما ام كلثوم عملتها بسنوات وكانت بتغنيها ف الوصلة التالتة ... واصعب شغل يتكتب هو اللى ام كلثوم بتغنيه ف الوصلةالتالتة يعنى بعد ماتكون غنت ساعتين ونصف او 3 ساعات .. ام كلثوم كانت بعكس كل املطربين اللى لما يغنى ساعة خلاص يستهلك ..كانت عاملة زى موتور الديزل كل ما يشتغل اكتر يسخن اكتر الاداء يبقى احلى 10 مرات .. كانت المشكلة انها بتكون متسلطنة اكتر من اللازم وبتصدر وتقول حاجات من الصعب تتدون وممكن تعمل موال فى اى لحظة ..وهنا صعب انك تستخلص اللحن الاساسى لكن الحمد لله عملتها ارجو الاخ اللى طلبها يقول لى ايه رأيه عشان هو قال ان حد تانى مدونها وماعجبتوش مع اطيب تحياتى