سؤال فنى لخبراء البرامج الصوتية الحديثة

**عادل صموئيل** · #1 03/02/2018, 09h59

احبائى
انا خبير فى حاجات ... وفيه حاجات تانية خبرتى فيها توقفت عند زمن نهاية زمن الفن الجميل
احنا ابتدينا كان التسجيل على تراك واحد يعنى الفرقة كلها مع المطرب وبنسجل كلنا مع بعض... بعدين تطورت الاستديوهات فى الاذاعة وبقت تسجل ستيريو يعنى على تراكين شوية ألات فى السماعة الايمين وشوية فى السماعة الشمال والمطرب بيتحط له 2 ميكروفون كل ميكروفون داخل على سماعة ... بعد كده دخلنا فى نظام التراكات يعنىفى اواخر ايامى مع وردة مثلا كان الديسك فيه 24 تراك والمهندس بيسجل على شريط عريض يعنى حوالى 8 سم .. كان اول حاجة املدون بيبقى عازف كمان بيعزف اللحن كله بالكمان ومعاه عازف ايقاع ... على تراك واحد كان العملية دى اسمها lay out او زى ماتقول قاعدة للى حايسجلوا بعد كده يعنىكل عازف بيلبس الهيد فون وبببيعزف شغله وهو سامع الكمان مع الايقاع ده .. وكل واحد على تراك خاص من 24 تراك والمهندس بيقفل ده ويفتح ده .. المهم بعد ما يكتمل تسجيل صوت الفرقة بييجى المطرب بيسجل صوته ... وهنا زى ماقلت بيبقى كل حاجة على تراك ممكن تعلى او تخفض صوته او تحذفه حتى ... كل الكلام ده على الشريط اللى عرضه 8 سم ... وبعد ما الملحن يقول خلاص كده سجلنا واستكفينا ... الكلام ده كله بيتنقل على شريط ريل عادى بس على تراكين ستيريو .. المهندس بيختار يحط ايه على السماعة اليمين وايه ع السماعة اليسار ... هنا الشريط الريل ده حد آخر مرة دخلت الاذاعة كان خلاص لايمكن فصل اى صوت منه ... يعنى فصل الاصوات ده كان على الشريط ال 8 سم اللى عليه ال 24 تراك منفصلين ... السؤال .. هل حصل بعد كده تقدم علمى بحيث انى فى الملف الصوتى العادى زى مثلا لو انت منزل لى موسيقى لعمر خيرت هل ممكن فيه برنامج اقدر افصل الاصوات تانى عن بعض ؟ يعنى فى الموزع ما ينفعش يتكاب إلا اذا فصلنا الاصوات عن بعض ... انا عندى برنامج كول ايديت ونفس الاصدارات الاحدث لحد 3 من ادوب ... هو عليه 24 تراكل هل توجد طريقة انى احول الملف دو الصوت الواحد الى تراكات كل صوت لوحده ؟

**عمرو الهنداوي** · #2 03/02/2018, 14h08

أستاذ عادل أسمح لي بالرد على سؤال حضرتك على قدر معلوماتي قدر الإمكان:

أنا فهمت من سؤال حضرتك، أنك تريد وسيلة من خلالها لو عندك مثلا ملف "أم بي ثري" لمجموعة أصوات متداخلة مثلا طبل – صوت مطرب – موسيقا – توزيع – كورال .. كله مع بعضه، أنك تفصل كل صوت لوحده في تراك .. هل أنا فاهم صح؟ وده سؤال حضرتك؟؟

لو ده فعلاً السؤال .. فالإجابة لا للأسف .. والمشكلة في تقنية "الأم بي ثري" هي لا تسمع بذلك .. ولو عايز حضرتك كل صوت لوحده لازم ترجع إلى حاجة اسمها أل "Session" و دي التسجيل الأصلي اللي مقسم فيه الأصوات إلى تراكات في استديو التسجيل قبل أن يدمجها مهندس الصوت في ملف واحد أسمه " أم بي ثري" ..

مهندس الصوت داخل الاستديوهات معاه لحد 512 تراك، ويتم تسجيل كل شيء لوحده على تراك مرقم خاص بصيغة ويف Wave وبيكون حجم الأغنية مثلا الخمس دقائق 200 ميجا، ثم تصدر إلى ملف بصيغة أم بي ثري في العموم والصيغة دي بتقلل الحجم بس وبعد التصدير، لا يمكن عمل شيء جوهري بخوص فصل التراكات لحالاتها الأولي .. ويحتفظ المطرب وشركة الإنتاج بي أل "Session" علشان الريمكسات في المستقبل والحقوق والملكية الفكرية..

"الأم بي ثري" بشكله النهائي هو مجرد جامع أصوات، ولا يمكن إعادة فصلها زي حلة الطعام اللي فيها كل مكونات الطبخة وكله داخل في بعضه .. فلا يمكن فصل الطماطم من البصل من الملح .. ولكن يمكن إضافة تراك أو صوت زيادة على الأم بي ثري ولكن ليس فصل صوت معين ضمن التراكات.

كل التحية والتقدير

اخى العزيز
انا قلت كده فى كلامى وقلت ان كان الشريط عريض حوالى 8 سم اللى بيتحط عليه الريمكسات وبعد ما المهندس بيجمعهم مع بعض اعتقد فيه استحالة فصلهم
طيب انا بسألأ تانى ليه .. واحد قعد يقاوح معايا ( واحنا عندنا ناس كتير تتفلسف ) لما بقول انا ما اقدرش ادون لحن موزع اوى واللحن الاساسى مختفى وسط الخطوط اللحنية .. قعد يقاوح يقول لى ل فيه برامج بيترجع الريمكس تانى من الام بى ثرى ... فيه نوعين من التوزيع .. نوع عبقرى بيتعمل بذكاء زى انا قلبى دليلى مثلا ... القصبجى عمل اللحن كامل واداه للموزع قال له خد هولى كله توزيع من اوله لآخره بس ايه ؟؟؟؟؟ تحت اللحن الاساسى ما تجيش جنبه ... الانس دول كانوا بيعملوا للذكرى والتاريخ الناهرده بعد 70 سنة ممكن انت بعود تعزف اللحن كامل وزى الفل ... لكن الطريقة اللى انا مش بحبها ( ومش بحبها انى قافل وخلاص ولكن فى الفرقة الماسية شفتها بعنى كذا مرة ) انا ماحضرتش اندريا رايدر وعلى اسماعيل .. وانا كنت المسؤول عن النوت فى الفرقة يعنى لم اجد اى لحن من بتوعهم قالوا لى انهم كانوا بيجيبوا النوت معاهم وبياخدوها بعد الحفلة او التسجيل ... ليه .. عشان التوزيع اسرار يعنى انت لما بتسمع بتقول ده شغل على اسماعيل او اندريا رايدر بيبقى عند كل واحد خلطة سحرية بتطلع النكهة دى ... لو اى واحد دارس هامونى مسك ابارتاتورا يقدر يكتشف السر ويقلده .. طيب المشكلة ايه ... انتلما تعمل خطوط لحنية كتير متداخلة مع اللحن الاساسى ... انا طبعا لما بدون بدون حرف حرف وانا ماشى لحد مازورة مكتملة بعدين اللى بعدها وهكذا لحد ما الجملة تخلص ... لازم اكون سامع كويس اللى حاكتبه ... فى علم الهارمونى النغمات الكتير اللى فوق بعضها بتدى نغمة تانية خالص ... يعنى انت لو سامع مثلا صول لا سى ... هم مش صول لا سى ... كل نغمة زى الصول مثلا عليها شوية نغمات بتسمعك نغمة صول لكنها خادعة مش صول ... الخلاصة حتى لو انا دونت حاجة انت لما تعزفها حتلاقيها حاجة تانية غير اللى فى الشريط ... يعنى زى طبق كشرى مكون من كذا حاجة لو انا حطيت لك رز بس حايبقى ايه ؟ حتقول مش هو ده الكشرى ... وصلت ؟