طلبات نوتة أ / عادل صموئيل الجزء الثانى

[Anitta]

انا فعلا بحب الحان الاغاني القديمة جدا يعني بيني بينها حب فظيع بس المشكلة ان مدير المدرسة هو العايز اغاني جديدة .
يعني مثلا انا لما اجي اكلم حد في الاغاني يقولي عارفة كذا او اغنية كذا انا مش ببقى عارفاها بس حد يكلمنى في اغاني عبد الوهاب او عبد الحليم او ليلى مراد و ام كلثوم وغيرها تلايني عارفة كل اغانيهم لانى انا بحب اللحن الماشي مع الكلام الليه معنى مش مجرد كلام . و بحب جدا السيمفونيات و الحاجات الكلها عبارة عن لحن بيتكلم.
يعني انا مجبرة اعمل الاغاني الجديدة و انا مش بحبها و مبعرفش اطلعها سماعي لكن الالحان المعبرة عن كلامها الالحان الحلوة بتطلع لوحدها والا مش هيبقى اسمه الزمن الجميل.
اسفة على الاطالة لكن حبيت اوضح تفكيري .
وشكرا على اهتمام حضرتك

الاخت العزيزة
خليكى ثابتة على موقفك يعنى لما حد مهم يطلب منك اغنية حديثة لازم تفهميه الاغنية دى اذا كان ينفع انت تعزفيها لوحدك على الاورج او لأ .. لن هل انتى تعرفى الاغانى دى بتتعمل ازى عادة ؟
بييجى الملحن او واحد شاطر جدا جدا جدا على الاورج وعندو فى الاستوديو 24 تراك
يروح عامل جملة او يعزف اللحن كلو على تراك بعدين يعدي الشريط ويحط حاجة تانية على تراك تانى ويفضل يعك كده طول الليل او لحد ما التراكات تخلص يعنى وهو بيسمع يعزف حاجات تانية وتانية ولما نيجة نسمع اللحن نلاقى عشرين صوت على بعض واللحن الاساسى مختفى تماما طيب انا اعزف ايه ؟
يعنى انتى قلتى بتحبى السمفونيات .. انتى عارفة السيمفونية اساسها التوزيع يعنى بتبقى جملة لحنيه ومش شرط تكون حلوة او بس عليها 12 صوت تانى ... لكن فى اى وقت بتكونى سامعة الجملة الاساسية ممكن بتتنقل من آلات لآلات تانية لكن طول الوقت سامعة جملة تقدرى تمشى معاها او لما تسمعى السيمفونية كذا مرة وتحفظيها تدندنيها معاها على اسا ان ده علم فظيع يعنى مش اى حاجة وخلاص وكل سيمفونية فى الكلية بيحللوها وبيعملوا عليها دروس خطيرة
لكن الاغانى الهبلة الحديثة دى اساسها الدوشة .. يعنى لو بتسمعى ام كلثومعارفة عبد الوهاب كان بيلحن لها الاغنية فى اد ايه ؟ على الاقل فى سنة يعنى يفضل يعمل ويشيل جمل ويحط جمل لحد ماتطلع مفيش ابدع من كده .. عارفة النهاردة الملحن بيعمل الاغنية فى اد ايه فى يوم زى ماتطلع يعنى وانتى لما تكونى حافظة اغانى كتير حاتبقى سيدة الموقف
مع اطيب تحياتى عادل صموئيل

[ملحن مصري]

تحياتي للجميع

اود ان اوضح لكي اخت Anitta انه ليس ذنبك ولكن للاسف لا يوجد من يؤمن برساله الفن حتي يقدم فنا راقيا ومواكب للعصر
الماده طغت علي الجميع ولكن يبقي دائما الفن الراقي الحقيقي ويزول المزيف

تامر عامر
ملحن مصري

الاخ العزيز تامر
فاكر لما اتقابلنا وانت قلت لى تعمل ايه عشان تبقى ملحن كويس زى الناس المحترمين بتوع زمان قلت لك ايه ؟
اعمل الجملة على اساس ان حاتعزفها فرقة زى بتوع زمان يعنى كمنجات بتعزف اللحن كلو ومعاها الالات الشرقية ومن غير توزيع لأن هنا حايظهر اما حلاوة الجملة او ...
يعنى تخيل لو احنا كوننا فرقة زى الفرقة الماسية او فرقة صلاح عرام حتى وجينا نعزف الاغانى الحديثة بتاعة دلوقتى مش حتلاقى حاجة تعزفها لأن اهم حاجة الجملة الاساسية ... مش موجودة الموجود جملة هبلة مالهاش قيمة لحنية اصلا بيغطى عليها التوزيع الكتير والايقاعات والزحمة يعنى حاجة زى عروسة المولد حتة سكر لكن محطوط عليها حاجات كتير زاحمة المنظر وبعدين المهم ان كل الاعضاء هنا بيعزفوا لوحدهم على آلة واحدة فلازم اديلو ميلودى يعزفو
مع اطيب تحياتى

[عادل صموئيل]

احبائى
اقدم لكم من روائع عبد الوهاب القديمة

بلاش تبوسنى فى عينية

طبعا الاغنية دى تعبتنى جدا فى التدوين لأنها صعبة جدا
اصعب حاجة فيها ان فيها ادليب كتير وده عبد الوهاب طبعا يعنى لما يعمل ادليب لازم اكيد يبقى غنى اوى
طبعا بكرر الادليب ماحدش يقدر يكتبه بدقة 100% زى اللحن اللى على ميزان
يعنى ماينفعش حد مش حافظ الاغنية يحاول يقراه نوتة وخلاص حايطلع حاجة تانية لأن النوار بتبقى نوار وحت والكروش بتبقى كروش وحبة .. يعنى العلامات مش بتبقى محددة لأن المطرب بيغنى براحته
احنا لو على فرقة مفيش مشكلة لن المطرب حافظ واحنا بنعزف بنقرا النوتة لكن 80% ودننا مع المطرب النوتة وظيفتها بتحدد لك شوية المطرب طالع نازل فين وبالذات لو حصل علامة تحويل او اللزم اللى بنرد بيها على الغنا

مع اطيب تحياتى

[نور الصباح]

احبائى

اقدم لكم من روائع عبد الوهاب القديمة
بلاش تبوسنى فى عينية
طبعا الاغنية دى تعبتنى جدا فى التدوين لأنها صعبة جدا
اصعب حاجة فيها ان فيها ادليب كتير وده عبد الوهاب طبعا يعنى لما يعمل ادليب لازم اكيد يبقى غنى اوى
SSSSSSSSSSSSSSSSSSSSSSSSSSSSSSSSSSSSSSS

نور الصباح

[زينة الغريبي]

أستاذ عادل متشكرين على تحفة ياما القمر ع الباب و تحفة يادلع يادلع و أغنية بلاش تبوسني في عنيا

[muhamadibra]

شكرا لرائعة بلاش تبوسني في عنية لمحمد عبد الوهاب
د محمد ابراهيم

[عادل صموئيل]

احبائى

اقدم لكم من روائع فايزة احمد
عمل من العيار التقيل جدا جدا مكتوب فى 17 صفحة

احلى طريق فى دنيتى

الاغنية دى انطلت وانا كنت متردد اكتبها لأنها طويلة جدا جدا وبتاخد مجهود كبير وبتحتاج تفرغ ذهنى ونفسى بمعنى ان الاغانى القصيرة ممكن بكتبها فى ساعة او ساعتين او فى يوم واخلص منها لكن الاغانى الكبيرة كده بتحتاج وقت طويل بالذات لأنى بسمع جزء جزء واخطط يكتب ازى ارسمه فى مخى الاول طبعا عشان اقدم لكم نوتة ما اقدرش اقول سهلة ولكن بحاول بقدر الامكان اخليها اسهل ما يمكن وحاجة تانى انا الوحيد اللى اقدر اكتبها هذه الايام اولا لنى عزفتها مع فايزة يعنى عملنا عليها بروفات كتير شفت كل جزء منها بيتكون ازاى وثانيا حتى لو اتوجد مدون تانى النهاردة ممكن يدونها بيكون بيشتغل فى السوق يعنى اكيد عنده تدوينات بتدر عليه دخل ومش معقول يكتب 17 صفحة لوجه الله بدون مقابل واكيد ممكن تتخيلوا المدون الكبير بيكتب الصفحة بكام
الشىء الاهم يعنى حسيت ان الاخ العزيز اللى طلبها عنده ذوق وحس عالى يعنى ممكن يعزفها كلها
الاغنية دى بتتكون من مقاطع سهلة جدا ومقاطع صعبة طبعا ومقاطع متوسطة واهم واخطر شىء فيها تاخد بالك من السرعات وتغيير المقامات يعنى كذا مرة السرعة بتكون 100 فجأة تبقى 130 بدون مقدمات وفى نفس الحويلة بيتغير المقام كمان يعنى بتحتاج انك قبل ما تبتدى تعزفها تسمع الاغنية عدة مرات عشان تحس بالنقلات الخطيرة دى
واهم شىء اننا مانعزفش النوتة وخلاص يعنى مطلوب شوية احساس وده مش ممكن ييجى لما نقرا النوتة فقط او واحد عمرو ماسمع الاغنية ممكن يعزفها كحروف لكن مش حاتبقى فيها طرب وبالذات لأن فيها كمان كذا ادليب وانا اتمنى ان اللى يحس ان النوتة صعبة عليه شوية انو يشوف الاجزاء السهلة ويشتغل فيها برضو حانبقى عملنا انجاز
انا بسترجع ذكرياتى فى البروفات كان اهم شىء ان كان التركيز مع الاستاذ حسن انور لأن ضابط الايقاع مفيش قدامه نوتة يعنى لازم يكون حافظ اللحن اوى اوى اوى اوى ( شفتم كام اوى ؟ ) ويليه فى الخطورة احمد فؤاد حسن قائد الفرقة انو بيمعل فى النوتة بتاعت مصطلحات عشان يعرف يقود صح وبالذات زى ما قلت لكم فى النقلات الايقاعية
العملية دى بتفكرنى بالملقن اللى فى المسرح ... يعنى مع الممثلين الكبار اوى بيديه حاجة اسمها الكيو يعنى المفتاح يعنى اول كلمة فى الجملة بتاعته والممثل بيكمل .. بإختصار فى الفرقة الماسية ماكانش عندنا اى مشاكل فى النوتة مع العازفين بتاتا يعنى اهم شىء تكون النوتة مكتوبة كويس اوى ... والتصليح او تغيير الجمل اللى كنا بنعمله فى البروفات كان كل عازف بيصلح بقلمو فى وقته بعدين كنا بنكتب النوتة تانى على نضيف ( الحركة دى كانت بتحصل فى الحان عبد الوهاب الطويلة كنا بنكتب النوتة تانى كذا مرة لأن العازف لما بيصلح ممكن يشخبط فى الورقة او مع السرعة ممكن يكتب التصليحة بخط مش واضح فكان الحل المثالى اننا كنا بنعيد كتابة النوتة بحيث قبل يوم التسجيل تبقى النوتة مكتوبة 100% فى منتهى النظافة وآسف للطالة

مع اطيب تحياتى

[نور الصباح]

احبائى
اقدم لكم من روائع فايزة احمد
عمل من العيار التقيل جدا جدا مكتوب فى 17 صفحة
احلى طريق فى دنيتى
SSSSSSSSSSSSSSSSSSSSSSSSSSSSSSSSSS

شكررررررررررررررررررررررررررررررر
أخوكم
نور الصباح

[muhamadibra]

المايسترو د عادل بك طول كما تريد فالاجواء التي تضعنا فيها مهمة جدا وتجعلنا في اشتياق للحن والتحليل الفني العميق الذي يغيب عن امثالي - لك كل شكر وعرفان - اعانك الله
د محمد ابراهيم

[عمرو الهنداوي]

شكرا أستاذي القدير على نوتة احلى طريق فى دنيتى
لفايزة أحمد...
و إذا كان ممكن بعد إذنك نوتة سعاد محمد أوعدك لو حضرتك كان عندك وقت هي أغنية جميلة اوي...