طلبات نوتة أ / عادل صموئيل الجزء الثانى

[nzar123]

الف الف شكر لك د عادل
على كل مدونات الاغاني وبالنسبه لي
اغنيه انت اللي كنت بدور عليك،،،،وعلى نوتها الموسيقيه
واغنيه مغرم صبابا اخدونا يابا للمطرب محمد رشدي
فالف الف شكر لك

[عادل صموئيل]

احبائى
اغنية عبد الوهاب من فيلم رصاصة فى القلب

ياجلاس

مع اطيب تحياتى

[طارق سرحان]

المايسترو الماسى الذهبى السطورة الاستاذ عادل صمويل ارجوا ان تتكرم وتدون اغنية سلامات يا حبيبنا يا بلديات للفنانة نادية مصطفى ربنا يخليك تعيش الف سنة شباب وتبدع وتسعدنا لو تعلم سيادتك مدى فرحتنا واحنا بنعزف اغانى لا يمكن كنا نعرف نعزفها من قبل ان يرزقنا الله عز وجل بمعرفة سيادتك جزاك الله خير الجزاء على كل ما تقدمة للمكتبة المصرية والعربية من تدوينات صحيحة جدا تحفظ بها التراث المصرى الجميل الى يوم القيامة

شكرا ياطارق نزل لى الرابط بتاعها وانا تحت امرك

[يوسف قاسمي جمال]

شكرا لسؤالك عن اهل المغرب،هذا لطف و كرم اخلاق منك،انا من مدينة مراكش التي مسها الزلزال ،الحمد لله على كل حال ،احدد شكري لك و لفنك الجميل .

[عادل صموئيل]

احبائى .. الناهردة اقدم لكم بكل فخر واعتزاز قصيدة من اروع ماغنت ام كلثوم وتلحين السنباطى :
سلوا قلبى
... من زمان وانا دونت 90 % من اغانى ام كلثوم كنت بخاف اجى جنبها لأنها صعبة جدا ومش اى حد يقولها .. بس لما حد طلبها وبإلحاح قلت ادونها .. طبعا القصيدة فيها دروس كتير تهم المحبين للفن الراقى يعرفوها .. هى بتتكون من رباعيات مش كوبليهات ... الرباعيت يعنى كل بيت بينقسم الى شطرين وكل بيتين بيعتبروا 4 شطرات وده الى خلاهم سموها رباعيات .. وكان السنباطى مبدع فى النوع ده ومنها حاجات كتير زى رباعيات الخيام .. الرباعيات بيبتدى بمقام ويعمل رباعية وبنفس المقدمة الموسيقية اللى بتكون جملة وتسليمة .. بيعمل رباعية تانية فى نفس القام .. اخطر حاجة فى الرباعيات ان كل رباعية لها قفلة ولازم تكون سخنة عشان الجمهور يصقف .. يعنى فى اللحن الى بيكون 3 كوبليه بيبقى قفلة واحدة فى المذهب وبرجع لها كل كوبليه لكن تميز الرباعيات انه بيعمل ييجى 15 قفلة سخنة او حسب عدد الرباعيات اللى حايلحنها .. وكان احمد رامى بيقعد مع ام كلثوم ويختاروا الاغنية من ديوان او قصيدة طويلة ويوضبوها مع بعض ده اذا كان الشاعر توفى من زمان .. تميز الرباعيات انه لما بييجى يغير المقام بياخد اول مازورتين من الجملة اللى انت بتكون حفظتها ويدخل منها على المقام التالى .. فيه شىء غريب وانا بدون انى بعد مادونت الرباعية التانية وابتديت اغرق واندمج ف اللحن .. تقمصتنى روح السنباطى .. يعنى تسنبطت .. ودى ادتنى شىء جميل اوى انى بعد كده يعنىكل ما امشى فى اللحن احس انه بقا اسهل معايا .. وده انت تلاحظه لما تسمعها من ام كلثوم اول رباعية بتغنيها الناس بتصقف شوية ولما توصل للرياعية التاتة بيكون الناس اتسطلوا او اتسلطنوا او تسمبطوا .. تلاقيهم بقوا يستوعوا الجملة بسرعة اوى ويصقفوا كتير ويطلبوا الاعادة بإلحاح .. لذلك السنباطى كان بيحاول يبقى سهل فى اول رباعيتين ولو عايز يدى الاصعب .. لأن الجمهور بقا جاهز للأصعب علما كمان ان الكلمات برضه صعبة مش اى حد يفهمها إلا المثقفين والعجيب ان ام كلثوم زودت ثقافة الشعب بكل اطيافه من قمة المجتمع الى قاع المجتمع كان الناس بتحفظ القصائد الصعبة دى وتندندها .. طبعا هنا انا بخلاف عادتى انا عند اول كل رباعية بكتب اول كلمتين منها .. لأن انا لو ماعمتلش كده وانا بدون حاتوه وانت مش حاتعرف انت فين .. وطبعا القصائد دى مش اى حد يعزفها لازم يكون حافظها كويس .. لاحظت كمان حاجة انت لما تسمع تحس ان القصيدة صعبة جدا .. لكن انا لما دخلت جواها لأن المدون ده زى الطبيب الشرعى بيدخل جوا ادق التفاصيل اكتشفت انها سهلة .. يعنى انت لما تشوف التدوين حتلاقيها سهلة جدا .. ليه .. عبقرية السنباطى .. بيعمل اللحن جميل جدا وسهل مافيهوش كلاكيع كتير عشان يدى ام كلثوم فرصة للإبداع .. يعنى لو عمل لها كل الجمل معقربة وحط فيها كل قوته ام كلثوم وهى بتغنى حاتحس انها مقيدة بأغلال .. لأنها لما بتعيد الجملة بتبدع .. ولما تعيد المقطع بتبدع اكتر ولو عادت المقطع 3 مرات تديك الاعجاز الكلثومى كله ف لازم يديها مساحة تطلع طاقتها .. كمان لما تسمع اللحن فيه اجزاء تحس فيها بعبقرية توظيف الدفوف لأن السنباطى كان عملاق الغناء الدينى يعنى يعرف يوظف الدفوف فين .. تميز طريقة السنباطى انه لما يخرج من الرباعية وعايز يروح للمقام التالى زى ماقلت انه بياخد اول مازوتين من الجملة اللى انت خلاص حفظتها لأن سمعتها كتير ويروح منها للمقام التالى .. لما الجمهور يطلب بإستماتة اعادة المقطع للمرة الرابعة مثلا هنا الفرقة بتقول الجملة الجديدة وبترجع تقول الجملة السابقة بدون لخبطة او بدل ما كانوا جيقولو الجملة التالية بيكرروا نفس الجملة ... فيه كمان حاجة خطيرة مع ام كلثوم بالذات .. عشان مش بتستعمل نوتة والملحن بيحفظ الفرقة على العود فى 40 بروفة انت بتبقى حافظ اللحن موسيقى وغنا .. يعنى اول رباعية بتقول سلوا قلبى .. تانى رباعية بتقول ويسأل ف الحوادث .. ممكن بعد ما قالت سلوا قلبى 3 مرات والفرقةعملوا الموسيقى داخلين على ويسأل فى الحوادث الجمهور بيصقف اوى وطالب الاعادة تروح هى قابلة سلوا قلبى تانى .. هنا العازف حافظ الكلمات ..يعنى لو هى اعادت من اى بيت هو داخل معاها .. طبعا لو فيه نوتة حاتحصل لخبطة .. او ممكن تعيد من مكان بعيد انا جاهز معاكى اى مكان .. وده اللى عمله عبد الحليم العبقرى فى الكام سنة الاخيرة كان بيعمل 40 بروفة عشان برضه العازف يبقى حافظ اللحن واول كلمة فى كل مقطع لو حب يعيد من اى مكان انا جاهز لو مركز ف النوتة حاتحصل لخبطة .. وهنا عايز اقول حاجة .. الموسيقى الشرقية طربية .. يعنى انا لو عايز اعزف لك اغنية انا طبعا ممكن اقراها من النوتة بس حاتطلع جافة بدون احاسيس ولاتطريب لذلك لازم الاول اطلعها من النوتة واحفظها بعدين اعزفها بدون نوتة اطلع فيها احاسيسى .. اقول لكم على سر .. السنباطى وعبد الوهاب كانوا مش بحبوا النوتة .. يعنى كل اغانى عبد الوهاب العظيمة كان بيحفظ الفرقة بالعود إلا الاغانى الاخيرة اللى غناها كانت النوتة دخلت الفرق .. السنباطى كان بيحس ان النوتة دى زى ابغض الحلال يعنى ... كان بيستعمل النوتة مع اى مطرب لكن مع ام كلثوم ما ينفعش .. لازم يحفظ الفرقة سماعى عشان لما تكون الفرقة حافظة بيطلع الابداع وده سبب الطرب اللى مش ممكن اللى انت بتحسه إلا مع ام كلثوم ... المهم .. انا بعد مادونت القصيدة الرائعة دى وحاسس انتى متسنبط اكتشفت ان فيه قصيدة زيها انا مادونتهاش .. ابتديت اشتغل فيها وانا فى نفس المود .. بس هى اصعب كتير من سلوا قلبى انتظروها قريبا واطيب تحياتى

[salhi_haithem]

استادي القدير و الجليل
الف شكر على كل ما تقدمه لنا من رواءع الموسيقى الاصيلة. و انت ما شاء الله ترسم القطعة في مخيلتك قبل حتى سماعها و هدا من فضل الله و نتيجة تمرسك و تجربتك
حفضك الله لنا و امتعك بالصحة الوافرة و السعادة الكاملة..

[طارق سرحان]

استاذنا اللى يستاهل تقلة دهب الاسطورة استاذ عادل صمويل انا كنت طلبت من سيادتك اغنية سلامات سلامات المطربة نادية مصطفى التمس العذر من سيادتكم انى معلوماتى عن الانترنت فقيرة جدا اتمنى اى من الاخوة ينزل اغنية سلامات للمطربة نادية مصطفى شكرا جزيل الشكر على اغنية سلو قلبى واشكر كل من طلب من سيادتك تدوينها الف الف الف شكر

[عاصم المنشاوى]

أتفضل يااستاذ طارق أغنية نادية مصطفى ...سلامات سلامات...غنتها من 38 سنة فاتت...
انا شخصيا مش بحب كلمات الاغنية دى...
بص بتقول ايه...
تسوى ايه العيشه بعيد وانت فيها غريب ووحيد
د ان لقيت في الغربه المال فين حتلقي راحت البال..
طبعا مفيش حد مبسوط فى الغربة ولا حد سعيد وهو بعيد عن اهله وبلده وأحبابه...يبقى مالوش لازمة ولا فيه داعى ان احنا نكبته ونحسسه بالذنب...هو يعنى كان عايش فى سويسرا واضطر يشتغل فى الخليج مثلا..مالكل اضطر يسافر.عشان لقمة العيش وعشان الوضع فى بلده مش كويس...
وممكن تقارنها بأغانى الغربة اللى عملها بليغ مثلا الطير المسافر لنجاة وحمزة ...سلامات ياحبايب مع كلمات مرسي جميل عزيز...ياطير الشوق فايزة وسلطان وعبد الرحيم منصور.. فرق ياراجل بين حد يطبطب عليك وحد بيؤنب فيك..الاغنية كسرت الدنيا فى التمانينات لأن ده وقت هجرة كتير من المصريين وغيرهم للعمل فى الخليج والعراق وساعات ليبيا...ماعلينا دى أراء وأذواق...

أستاذنا عادل صمويل يواصل تحطيم الصخور وتعبيد الطرق لنا بالسهل الممتنع وهو استاذ مدرسة التبسيط...ربنا مايحرمنا منك...
أستاذنا يضرب المثل بأن يدون لنا قصيدة حب فى مدح الرسول محمد بقلم احمد شوقى بمناسبة المولد النبوى الشريف...هو الاستاذ غير المسلم..ليؤكد لنا ان الفن والموسيقي لغة عالمية..لغة الانسانية.. وانه حقا...أنشروا الموسيقى والفن فهى لاتصنع ارهابيين

اخى العزيز عاصم اشكرك لذوقك .. احنا كنا فى مصر طول عمرنا مافيش فرق بين مسلم ومسيحى وانا طبعا مولود قبل منكم بفترة كبيرة شفت العصر الذهبى للوحدة الوطنية والمحبة قبل ماتطلع الشوطة او الوباء بتاع نشر الكراهية بس ما اثرش فينا .. يعنى شوف كام اغنية دينية فىالزمن الجمسل مش حاتصدق ان المؤلف مسلم والملحن مسلم والمنفذ مسيحى عادى جدا وينعملها بمحبة ومودة وانا لما اخ معرفوش شخصيا فلسطينى عايش ف فلسطين طلبها متأخرتش مع انها متعبة جدا وخدت وقت طويل بس انافخور انى عملتها وللعلم عملتها حلو اوى اوى يعنى تعبت عشان اعملها سهلة جدا اى متوسط يقولها زى الفل وانا عارف انى بعمل عكل كبير لأن الاغانى دى مش بنتطلب كتير او بيخافوا من صعوبتها يعنى مش حتلاقوا لها نوتة تانى من تدوين اى حد لذلك انا لما عملتها راعيت انها مش بس تتوجد نوتة ولكن تبقى نوتة فىمتناول الكل .. وانت لو قريت كلامى مع تقديم سلوا قلبى انا قلت ان حصل عندى تسنبط خلانى وانا ف المود اكتب قصيدة تانية للسنباكى وام كلثوم فىنفس المجال بس اصعب من دى بكتير اوى عملت نصها وشغال فيها واطيب تحياتى

[عادل صموئيل]

احبائى
اقدم لأخى العزيز طارق سرحان اغنية نادية مصطفى

سلامات سلامات

بس عايز اوصل رسالة يعنى هل تعلم انا مطلوب منى كام اغنية ؟ اقل حاجة بيبقى مطلوب منى 20 اغنية ومنهم اغانى صعبة او بتحتاج مزاج ومود معين او فيها كلكوعة بتقفل معايا وبتعطلنى يوم ده غير مشاكل صحية فى النظر ,, يعنى مابقتش زى زمان بس بكافح .. وانت مانزلتش الرابط وخلتنى ادور عليها .. علما بان الاغنية دى انا كتبتها بالظبط فى كوب شاى متوسط الحجم يعنى 25 دقيقة لما ربنا اذن .. وبعدين الفنان مننا بيبقى له مود بمعنى زمان لما كنت بدون للملحنين كنت مربوط يعنى لازم الناهردة بالليل اروح لفلان حتى لو عندى حفلة كان بينتظرنى بعد الحفلة .. يعنى كان ممكن اكون تعبان او قرفان بس لازم اروح لكن دلوقتى انا بشتغل عند نفسى .. يعنى حسب المود ما يقول يعنى مكمن مثلا مافيش مزاج نهائى والمود ممكن انت تطلب اغنية وانا احس انى عايز اعملها دلقوتى .. يعنى الفنانين مجانين زى ما انتم عارفين كمان جاجتين .. من اسبوع كنت محوش شغل كتر ونزلته مرة واحدة عشان افضى الكمبيوتر يعنى بتاع 7 اغانى بس خفت لاحديفتكر ان ال 7 اغانى دول اتعملوا فىساعةولا حاجة ولاعندى برنامج بيسمع الموسيقى يطلعها نوتة زى ما مرةواحد متخلف كمبيوتر قال عنى وقال ايه كمان انى بكتب النوت غلط لأنى انا بدخل الاغنية ف برنامج يطلعها نوتة .. وهو مش فاهم ان مافيش برنامج كده وفيها برامج عبيطة ب بتطلع شخابيط مش مكمن تعرف تعزفها وجرب ادخل عدننا فىالمنتدى قسم البراومج حد منزل برامج كده وشوف .. المهم .. انا حتىلو حافظ الاغنية من خمسين سنةوعزفتها مليون مرة .. الأمانة تقتضى انى بجيب التسجيل الاصلى واقعد اكتب منه مازورة مازورة .. لن انا دلقوتى بقيت المرجع الوحيد فىكل دول العالم لأن عشرات المعاهد الموسيقية فى كل دول العالم بتاخد من النوت بتاعتى منهم معهد كونسيرفاتوار النمسا عملوا قسم موسيقى شرقية بيشتغل من النوت بتاعتى .. المهم اتضح ايه عن الاستاذ اللى قال انى بدون النوت غلط .. اكتشفت انه حافظ الاغناى من عند فيفى عبدو او من شارع الهرم .. يعنىلما تسمع الاغانى اللى بيرقصوا الراقصات بيغيروا فى الموسيقى تغيير كبير.. وناس تحفظها كده .. ولما احنا نكتبها زى ما ام كلثوم بتقولها يبقى احنا اللى غلط مع اطيب تحياتى

[ادريس مبارك]

السلام عليكم استاذ عادل اتمنى تكون بخير وصحة
طلبي استاذي نوتة مقدمة اغنية محمد عبده - صوتك يناديني
طبعا انا بحثت عنها في الفهرس وحصلتها في موضوع الاستاذ قصي
بس كنت احتاج نوتة للبيانو ونوته للكمان، طبعا المقدمة الموسيقيه فقط


ولكم جميعا الشكر والتقدير لما تقدمونه