طلبات نوتة - الصفحة 81

**عمرو الهنداوي** · #**801** 30/11/2011, 13h12

ياجماعة دى نوتة ياحسن ياخولى الجنينة من تدوين
استاذ عادل والنوتة عبارة عن صورة وانا حولتها الى
ملف بى دى اف لكنى اتمنى استاذ عادل لو لسه عنده
النوتة ينزل ملف البى دى اف بتاع الاغنية
الاصلى لو كان لسه عنده
كل التحية
عزيزى عمرو
اليكم النوتة المطلوبة من حسن حظكم انى لقيت الملف
بس مش عارف ماعرفتش احذف الاولى
مع اطيب تحياتى

**عادل صموئيل** · #**802** 01/12/2011, 15h17

احبائى
اقدم لكم نوتة اغنية من العيار التقيل جدا

اكتر م الحب

غناء ميادة الحناوى وتلحين محمد سلطان
اللحن ده انطلب وانا اول ماسمعته بصراحة ما عجبنيش ( ده ذوقى الشخصى ) , طبعا يهمنى اوصل وجهة نظرى لتلاميذى , اللى بيتعلموا منى حاجات تانية مهمة جدا فى الموسيقى غير مجرد نى بكتب نوتة وهم بيعزفوها
اول حاجة اللحن طويل جدا جدا , يعنى اكتر من حجم ميادة الحناوى , يعنى توب ميادة الحناوى بااالكتير نص الحجم ده , يعنى انا هنا كاتب 16 صفحة , ميادة بالكتير 8 صفحات عشان المستمع يقدر يستوعب اللى بيسمعه , يعنى حتى انا عادل صموئيل شخصيا , شوفوا كل جملة سمعتها كام مرة عشان الكتابة ودلوقتى اللحن عشان حجمه كبير جدا كله طار من مخى ما فيش ولا جملة لزقت , يبقى عامة الشعب المستمعين فقط حايحسوا بإيه ؟ عبارة عن قطار سريع جدا بحيث انك ما تحفظش اى منظر من مئات المناظر اللى بتعدى عليك , وده انا بعتبره مش ذكاء من محمد سلطان , هو متأثر بطريقة فايزة احمد الله يرحمها يعنى اللحن كان طريحة , شيلة كبيرة اوى , بس اختلاف فايزة عن ميادة ان الااعات بتذيع لها اللحن كتير , يعنى من اللحن للحن التانى 6 شهور ممكن يكون الجمهور استوعب فيها اللحن , ولو سمعت اللحن تحس بنكهة فايزة احمد فيه ظاهرة جدا , من اكتر الحاجات اللى ضايقتنى وتضايق اى مدون الصولوهات وبالذات صولو الكمان , يعنى لما تسمع زمان صولو الكمان تلاقى اما صولو بيقوله هو فقط او صوله الفرقة بتقوله بعدين الصولو بعدين الفرقة بتقوله تانى وهنا العازف بيلتزم بالنوتة , ممكن يقول حاجة قليلة جدا من عنده يعنى بصمته , لكن لازم يلتزم جدا بالنوتة , وده اللى انا اشتغلت فيه عشرين سنة , وهنا الفرقة بتقول جملة بعدين الكمنجة بتقولها هنا تبقى دقت طعم الجملة من الفرقة بعدين بتتذوق طعمها من الكمنجة بعدين تسمعها من الفرقة تانى عشان انت تكون تقريبا فهمت الجملة , لكن هنا ظهرت طريقة ( ظهرت بعد جيلى ) ان عازف الكمنجة الصولو والاورج بالطبع والعدوى دى ظهرت على جميع عازفى الصولو ) ان العازف عايز يستعرض عضلاته التكنيكية وبيخرج عن النص بيعمل حاجات عفاريتى يطلع فوق اوى وينزل فجاة يعنى كانك راكب مراجيح مدينة الملاهى , وهنا هو اول بيضيع الجملة , بيضيع ستيعاب الجملة بالنسبة للمسمتع لأنه مش حايفهم العفاريت اللى حصلت , يعنى مش ممكن المجهور يدندن الجملة , والكارثة لما الصولو يبتدى الاول زى اللحن ده , يعنى بيقول حاجة هلامية انت مش حاتفهم منها حاجة بعدين الفرقة تقول الصحيح هنا انت مش حاتلحق تستوعب الجملة , انا اول ماسمعت ده لولا ان الفرقة بتقول نفس الجملة بعد الصولو كنت مش ممكن حاقدر اكتب الصولو , وحتى لو تهورت وكتبته كان مش ممكن حد حايعرف يعزفه ولا حتى العازف اللى عزفه , لأنها حاجة فورية بتطلع منه وصعب هو نفسه يكررها تانى وانما حيقول حاجة تانية , من عيوب اللحن ان لو بصيت على النوتة من اولها لاخرها حتلاقى موازير كتير فيها دوبلات كروش كتير , لو تمعنت فيها وسمعت اللحن حتلاقيها مش تلحين ولكن تفصيل يعنى تعمد عرقلة الجملة او تشبه التمارين التكنيكية ود ه شىء يضيع الطرب , وللعلم تعبتنى جدا انى استوعبها مع السرعة العاللية بس عزائى انها بعد ما اتكبت انكم من السهل تطلعوها , وبرضه دى من اهم مساوىء الجيل اللى بعدنا من العازفين , يعنى احنا اهم شىء عندنا الطرب ثم الطرب ثم الطرب , والتكنيك ده حاجة من نفسك انت تذاكرها فى بيتكم , لذلك تلاقى كل الحان الزمن الجميل فيها الجمل طربية جدا وسهلة او تسميها السهل الممتنع , يعنى فيه مثلا مازورتين فى السطر الرابع والخامس من المقدمة استحالة انك تقدر تدننهم , ل انت قدرت 99% من الناس مش ممكن حتى حاتستوعبهم , بينما كل اغانى ام كلثوم مافيها المصيبة دى , الجيل اللى طلع بعدنا كان دماغه تكنيك بحت يعنى العازف يمسك الكمنجة ويروح واخد ال 16 صفحة طحن , انا طبعا جربت الموسيقى دى والموسيقى بتاعة زمان , كنا زمان بنستمتع باللى بنعزفة ونتمنى الجمهور يصقف اوى ونعيد المقطع تانى وتالت يعنى نفسنا الحفلة ماتخلصش , اما ايام الألحان اللى بطريقة اللاحن ده انا شخصيا كنت بحس انى مش بعزف ولكن بشيل نقلة زلط , كنت بحس ان كتفى ظهرى وجعنى من الكمنجة , يعنى الملحن زمان كان اهم شىء عنده ان العاف يتمتع اوى اوى باللى بيعزفه عشان يطلع كل اللى جواه , لما تسمع ام كلثوم تلاقى فى الكوبليه الاخير العازف بقاله ساعة ونصف بيعزف بس لسه مستمتع ومتسلطن وبيعمل عرب وسحبات جميلة , اما الالحان دى العازف بيبقى خلاص البنزين بتاعه خلص وعمال يستحمل لحد ما اللحن يخلص , وانا لولا الظروف النفسية اللى بتمر بيها مصر والانتخابات ما كنتش حاكتب اللحن ده يعنى اخد منى عشر ايام فى اقصى ظروف الاكتئاب النفسى وهنا لازم اكتب حاجة انا مش عايز اكتبها , المهم انتم عندى , يعنى اللحن فيه اجزاء صعبة واجزاء سهلة , عايزكم تعزفوا الاجزاء الصعبة , طبعا عشان تبقوا استفدتم كلكم من تعبى ما يستفيدش ممنه واحد او انتين فقط
على فكرة اللى يحب يرد بلاش اقتباس يعنى رد فى موضوع جديد لأن انا كاتب هنا كمية كبيرة لو خمسة نزلوها فى ردودهم حتاخد خمس صفحات
مع اطيب تحياتى وآسف للإطالة

**عمرو الهنداوي** · #**803** 03/12/2011, 23h42

ياجماعة دى نوتة السيدة فيروز سكن الليل كاملة
ومن تدوين استاذ سيمون شاهين
يمكن شكلها يخوف شوية لكنها سهلة اوى
على فكرة فى اشاعة فى المنتدى انه استاذ عادل
بيكتب انت عمرى والله اعلم
هههههه
كل التحية

**عادل صموئيل** · #**804** 04/12/2011, 14h03

احبائى
اقدم لكم الاغنية اللى طلبتوها كتير
انا كنت مش عايز ادونها لأن فيها تفعيلات صعبة
لكن بناء على الحاح الجماهير الشعب يريد
اقدم لكم نوتة

الحب اللى كان

هى بجد صعبة جدا تفعيلاتها بس لو انت حافظ اللحن جدا ممكن تستوعب التفعيلات دى
مع اطيب تحياتى

**عاصم المنشاوى** · #**805** 08/12/2011, 11h51

االأستاذ /احمد "السنباطى"...

دى نوتة "لست قلبى"أو "انت قلبى"...اتمنى توفى بالغرض مؤقتا لحين كتابتها....طبعا سيبك من الشخبطة اللى انا عاملها على النوتة لما كنت مبتدئ.....دى حاجات من 15 سنة[/

الصديق الفنان/نزيه محمد.....اخيرا ياعمنا شرفتنا هنا ونورتنا....ياريت تنزل لنا نوتك هنا ...بدل طريق رأس الرجاء الصالح ده...هاهاها...مع الأعتذار والحب للجميل دائما عم احمد "نور الصباح"...اللى عرفنا على حضرتك...

**عاصم المنشاوى** · #**806** 08/12/2011, 12h09

الصديق /هيثم الصالحى
آدى نجوم الليل ...برضو ...تصبيرة ...لحد ماعمنا الماسى الأستاذ /عادل مايكتبهالنا...

**عاصم المنشاوى** · #**807** 08/12/2011, 12h28

الأصدقاء
ودى نوتة "رقص العوالم"...أو "رقص الهوانم"....كتبها لنا صديقنا الفنان الفلسطينى فى منتدى "سماعى"...(سليمانا)...شكرا ياعمنا

**swaifi73** · #**808** 09/12/2011, 18h09

أخواني وأعزائي أعضاء المنتدى الكرام أقدم لكم نوتة موشح(أرجعي يا ألف ليلة)
من الموشحات الأندلسية غنته الفنانة فيروز في وصلة مع عدة موشحات متواصلة مع موشح بلغه يا قمرو وموشحات أخرى
وهذا الموشح كنت درسته ايام دراستي
أتمنى أن ينال إعجابكم

**armendo** · #**809** 09/12/2011, 20h37

اقتباس:

المشاركة الأصلية كتبت بواسطة فؤاد العلمي

أخي العزيز أحمد
خذ مثلا أغنية أغدا ألقاك في مقطع أنت يا جنة حبي، إنه تصوير رائع جدا جدا لمقام الصبا. استعمله من قبل السنباطي في لسه فاكر.
(في العود، العزف على السي أو المي هو شيء واحد، فقط إزاحة وتر).
أخي، أنا أنتظر منك نوتة أهواك لأقول هل هي سليمة أم ناقصة. وإذا لا زال السكانير معطل، ممكن أن تأخذ صورة بالموبايل وترفعها (فقط المقطع الذي نناقشه).
المقام الأول هو كرد عشيران، أي على 'لا' وليس على الصول كما ذكرتَ.

اخى فؤاد
اليك نوتة اهواك بعد ان تحايلت على الكومبيوتر بتغيير اسم الملف
اخوك...احمد

**عادل صموئيل** · #**810** 09/12/2011, 21h53

احبائى
ومصر تعانى من النزع الاخير والفن على وشك ان يلفظ انفاسه الاخيرة

اقدم لكم حاجة حلوة عشان تفتكرونا بيها

امل حياتى

17 صفحة دونت فيهم كل فتفوتة من اللحن , حتى اللزمات الصغيرة التى تعيد المقاطع داخل الكوبليهات
واللزمات دى جميلة جداً مع ان احيانا فى المونتاج بيتجاهلوها , مع اننا كنا عشان نعمل لازمة من دول كنا بناخد فيها وقت طويل جدا
اتمنى ان تسعدوا بها , انا دونت الادليبات كلها على ميزان هى مضبطة من ماحية النغمات واقرب ما يمكن من الإيقاعات و وبالطبع لما تحفظ اداء ام كلثوم اوى حاتلاقى الادليب سهل جدا
ملحوظة تانية , انا طبعا ببسط كل حاجة صعبة بس هنا حتالاقوا كام مازورة صعبة , هى مش صعبة اوى لكن لو قمت بتبسيطها اللحن حايختل لأنها مش حليات ولكن من صلب او العمود الفقرى للجمل
مع اطيب تحياتى , ياترى لما ام كلثوم قالت
انا غن قدر الإله مماتى .... لن ترى الشرق يرفع الرأس بعدى

كانت بتتنبأ بسنة 2011 ؟؟؟ وهل كمان حايكسروا تمثال ام كلثوم ؟