احبائى
ردا على الموضوع السابق بخصوص ااغانى المنسية من الاذاعة حقول اللى اعرفه
اى مطرب محترم عالى المقام زى عبد الوهاب وام كلثوم وبالطبع كل اللى كان فى نفس المكانة من سنة 1930 ومابعدها , المطرب ده كان بتعمل له حاجة اسمها مطرب معتمد فى الإذاعة المصرية , والكلمة دى يعنى من تاريخ التعاقد ده كان المطرب بيجيب كل تسجيلاته السابقة على هذا التاريخ وكانت وقتها الاسطوانات الحجارى بتاعة الحاكى , او كانت الاذاعة بتتصل بكل الشركات اللى المطرب ده عمل عندها اسطوانات و وكانت بتشترى نسخة من الشركة وبالطبع المطرب والمؤلف والملحن كانوا بيقبضوا فلوس من الاذاعة , وبالطبع معنى كلامى ان كل مطرب كان بيجيب كل تسجيلاته السابقة , وكل التسجيلات اتالية كانت اوتوماتيكيا بتتسجل فى الإذاعة وتخرج للناس عن طريق الإذاعة المصرية , يعنى اصبح العكس بدل ماكان المطرب قبل الاعتماد بيسجل عند شركة الاسطوانات والإذاعة بتشترى منها , كان بعد الاعتماد المطرب بيسجل فى الإذاعة وشركة الاسطوانات بتشترى من الاذاعة , ولكا ظهرت الشركات الحديثة واللى ملك المطربين زى شركة محمد فوزى واللى اصبحت بعد كده صوت القاهرة , وشركة صوت الفن اللى ملك عبد الوهاب وعبد الحليم حافظ ووحيد فريد , كانت الشركات دى بالتعاون مع الإذاعة بينتجوا الاغنية , لأن كان ساعتها الفن تطور والفرقة الموسيقية كبرت والتكاليف اصبحت عالية بالنسبة للوقت ده , وبالطبع مش زى دلوقتى كانت المكاسب كلام فارغ , مما يستدعى ان الشركة والاذاعة بينتجوا اللحن بنسب محددة , طبعا من كلامى ده واضح جدا ان اى اغنية كانت موجودة فى مكتبة الإذاعة , اما اللى بيحصل ان كان فيه حاجة فنية خطيرة فى التقنية , ان الاسطوانة زمان كانت لو ما اتكسرتش او اتخدشت او اساعملت بطريقة غير صحيحة , يعنى كانت الاسطوانة زمان فيهفى الحاكى او الجرامافون او البيكاب ابرة , الاول كانت حديد كبيرة جدا زى المسمار , والابرة دى فيه منها نوعين , نوع رخيص ( كان ال 100 بعشر قروش مصرية يعنى ال 1000 بجنيه ) ودى كانت الابرة بتستعمل مرة واحدة ولازم تغيرها , وكتر الإستعمال الابرة سنها بيتبرى وتؤذى الاسطوانة , والابر النوع الفخم كانت الابرة بتستعمل عشر مرات وكان تمن ال 100 ابرة جنيه مصرى واحد وكان بيساوى خمسة دولار وقتها ) ومن هنا كان الشغوفين بإستعمال الاسطوانات لازم عشان يحافظوا عليها لازم يحسبوا الابرة اشتغلت كام مرة , والمعروف او التميز ان الايطوانة بتحتفظ بكفاءة التسجيل عليها مدى الحياة , بعد كده ظهرت الابرة الالماظ والاسطوانات المرنة اللى مش بتتكسر وكان زمنها كل وجه ساعة وكانت الاسطوانة القدييمة كل وجه 3 دقائق ونصف انتهت مشكلة الابرة , لأن البرة كانت ممكن تشتغل آلاف المرات ) , لما فى الاربعينات ابتدا التسجيل على الشرائط المغناطيسية فى سر خطير يمكن ماتعرفهوش , ان الريط المغناطيسى بتقل كفاءته بعد سبع سنوات , يعنى كان لازم يتنقل على شريط تانى جديد وكل سبع سنوات كان فيها جهاز من المهندسين شغلته الوحيدة عملية نقل الشرائط دى , وكمان بتتنقل على اجهزة عالية الجودة عشان تطلع النسخة بنفس كفاءة الشريط الاصلى , يعنى بيبقى شريط اصلى بيتنقل على شريط جديد , بعدين الشريط الاصلى بيروح لإستويوهات انتاج البرامج بيسجلوا عليه , تسجيل ببقى من الدرجة التانية , يعنى زى برامج الاذاعة المختلفة , على الناصبة مثلا وغيره , مش بيبقى شريط جديد لسه خارج من العلبة ولكن شريط اغنية ممسوح وبيتسجل عليه لحد ما يستهلك , العملية دى خلت فيه حركة خروج ودخول للشرائط واللى هى اغلى شىء فى الإذاعة , الدخول والخروج سهل سرقة الأغانى , والمصيبة كان الشريط اللى عليه الاغنية مش بيتسرق على اساس انه شريط عليه اغنية كذا , ولكن كان بيتسرق وبيتباع فى السوق ب 3 جنيه لهواة التسجيل بيشتروه مستعمل بدل ما يشتروا شريط جديد من المحل ب خمسة جنيه ساعتها , من الكوارث اللى انا حضرتها , بعد وفاة ام كلثوم بسنة جه واحد مندوب عن اذاعة تونس وانا قابلته , قال انهم فى تونس بيموتوا فى ام كلثوم بيعشقوها , وعايزين فى ذكرى ام كلثوم يعملوا اسبوع 24 ساعة فى اليوم ام كلثوم فقط ,
وطبعا قالوا حانجيب الاغانى كلها كلها منين , بالتاكيد الاذاعة المصرية عشان ال 500 سطر اللى انا كتبتهم فوق ودوشتكم بيهم , والراجل اخد تصريح من الاذاعة ودخل مكتبة الشرائط وهناك فوجت انه قعد يلطم على وشه , وقال يانهار اسود ( يعنى ما يقالبها بالتونسى ) قال احنا فى الإذاعة التونسية عندنا اغانى اد دول عشر مرات ولكم ان تتصورا شعورى وانا بسمع منه كده ..... وبدون تعليق طبعا و وللعلم كل الاغانى النادرة اللى بنقدر نصطادها بتكون من الدول الشقيقة او من الاماكن المحترمة زى سماعى هنا واللى عليه حاجات انقرضت من الاذاعة من زمان زى الديناصورات
ام عن اغنية من غير ليه
عبد الوهاب كان زى اى ملحن بيسجل الاغنية على شريط ويديها للمطرب يحفظ من الشريط , بس عبد الوهاب كان عنده تميز خطير , انه من هواة التسجيل وكان عنده اجهزة فى البيت من اللى قلبك يحبها ( والاحهزة دى وخبرتى انا فيها اكتر حاجة خلتنى انا وهو اصحاب ) المهم انه كان بيعمل الاغنية بصوته فى تسجيل عالى الجودة جدا فى بيته زى تسجيل ستوديو الاذاعة , وكان لما بيسجل بيسجل براحته يعنى يسجل المذهب مثلا عشر مرات لحد مايطلع احلى حاجة , بعدينبيستعين بواحد من خبراء المونتاج من الكذا ساعة تسجيل بيمسك المقص ويفصل له اغنية على العود 100% وطبعا تشرفت بصفتى خبير من خبراء المونتاج انى عملت له الحكاية دى كذامرة وبالذات عشان كنت بدون له اللحن , يعنى هو كان بيستفيد من انى بسمع اللحن وانا بقصه 300 مرة وفى التدوين ببقى فاهم هو عايز ايه بالضبط , المهم التسجيلات دى كانت بتتسرب بطرق كثيرة وانتم سمعتوها واشهرها لا تكذبى وست الحبايب وغيرها وكلكم سمعتوها , كانت اغنية من غير ليه هى المرشحة ليغنيها عبد الحليم وانا دونتها وطانت جاهزة , ولكن شاء الله ان يرحل عبد الحليم قبل بدء البروفات بشهر , طبعا فيه حاجة عايزكم تحسوا بيها , انا بعد ما اشتغت مع عبد الحليم او ام كلثوم صعب جدا اشتغل مع اى فسل او بتاع او سموا كما تشاءوا من اللى بيهببوا دلوقتى يعنى نفسى بتصعب عليا ( علما انه ممكن فى حفلة يدفع لى اد اللى قبضته من الفرقة الماسية فى سنة ) طبعا نفس الإحباط ده حسه عبد الوهاب يعنى الأغنية لما تكون معمولة عشان يخلدها عبد الحليم وانتم عارفين طبعا مكانة الأغنية اللى بيغنيها العمالقة بتبقى ايه بعدين فى الذكرى والتاريخ , وطبعا مفيش حد ممكن يحل محل عبد الحليمطالما معمولة لعبد الحليم , يعنى عبد الوهاب لحن لشكوكو واسماعيل ياسين وممكن يلحن لأى حد طالما بيدفع , لكن الاغنية لما تكون معمولة لعبد الحليم .... انتم طبعا فاهمين اللى ممكن اقوله فى 900 سطر وما اقدرش اقول اللى جوايا , وبعد عشرات السنين اما اللحن يموت او عبد الوهاب حس انه ممكن بعد مايموت اى حد اى كلام يسرق اللحن ما صاحبه مات , وقرر ان اغنية لعبد الحليم ما ينفعش إلا يغنيها عبد الوهاب بصوته , بس جت مشكلة خطيرة , ان عبد الوهاب كان لآخر لحظة صوته يمكن احلى من الاول , بس صحته ماتساعدش انتاج الاغنية
لأنه طريقته كان بيغنى فى التسجيل الكوبليه 950 مرة ولسه عايز احلى , ومن هنا جت الفكرة الجهنمية ومش حقول من اللى اشاربيها , اننا ناخد تسجيل عبد الوهاب واللى كان متسجل سنة 1975 , والنوتة اللى انا دونتها
ونسجل الموسيقى ونركب عليها صوت عبد الوهاب , بإمكانية التكنولوجيا ساعتها كانت عملية جنونية , بس بصراحة عبد الوهاب صرف كتير كتير كتير كتير , لدرجة اننا سجلنا الموسيقى فى ستوديو فى فرنسا بعد ماعملنا خمسين بروفة فى مصر , لأن كانت طبعا التكنولوجيا فى فرنسا اعلى كتير فى التركيب ده ساعتها , وطلعت الاغنية
اما مين غناها بعد كده مش تفرق لأنهاالمهم انها اتسجلت بصوت عبد الوهاب يعنى دخلت موسوعة عبد الوهاب ,
او ضمن كنوز عبد الوهاب , ولو كان هانى شاكر فقط غناها مع احترامى الشديد لهانى شاكر وهو صديقى وزميلى فى الكلية , بس اغانى هانى شاكر مالهاش بالطبع خلود اغانى عبد الوهاب وبالذات دى لأنها بصوته بعد ما بطل غناء عقود طويلة .
ومن الاسرار اللى احب اقولها لكم , كان السنباطى بيقبض من ام كلثوم اعل اجر 2000 جنيه فى اللحن فى السنوات الأخيرة , كان كل اغنية بيلحنها السنباطى لغير ام كلثوم يعنى لوردة مثلا لازم بيجيب فرقة ويسجلها بصوته
يعنى كان بيقبض الفلوس من ام كلثوم ويصرفها على تسجيل الحانه , والمؤسف والمخجل والمقرف والمقزز
ان الناس دول ماعملوش فلوس , يعنى تخيل لما الاطلال الملحن العبقرى يقبض فيها 2000 , واى اغنية حقيرة لعمر دياب مثلا الملحن بيقبض فيها تلاتين تلاف الفين وتسعمية وخمسميت الف ..... الخ جنيه
على فكرة : انا مشغول حاليا بكتب لكم اغنية رائعة من العيار التقيل اوى اوى
يعنى اى حد عايز اغنية من الحاجات السهلة ينتظر شوية , يعنى انا شطارتى انى بكتب الاغانى الكبيرة , والاغانى الصغيرة ممكن اى حد يدونها
فلو بحثت في الشبكة العنكبوتية عن مدونة - سوق العبيد-
لعثرت على –زمردة-
وكما هو معلوم فإن فرانك بورسيل قد جمع بعض المعزوفات
ومنها زمردة فلو تتبعنا موسيقاها لكانت مطابقة لما هو مدون سهوا
تحت اسم- سوق العبيد
وتجد صحبته صورتين للمقطوعتين.
هذا وإذا كنت مخطئا فإنني أعتذر
ولك مني جزيل الشكر
اخى العزيز
طبعا هنا احنا لما بنتكلم مع بعض بنتكلم لخبراء فى الموسيقى
اساس المشكلة اللى انت بتتكلم فيها هى المطابع
يعنى فى المطبعة بيبقى العامل او الفنى بيعرف لغة عربية ولما بيكون الكتاب المراد طبعه باللغة الإنجليزية مثلا لازم يكون عامل طباعة بيعرف جيدا اللغة الانجليزية , وغير كده لو انت عايز تطبع كتاب باللغة الايطالية او الالمانية مثلا هنا , لازم تنزل وسط العاصمة وتختار مطبعة متخصصة فى اللغات دى وهم مش كتير يعنى عشرة % من مجموع عدد المطابع فى الدولة كلها لأن عندهم ناس متخصصين فى اللغات دى وعشان ماتحصل غلطات خطيرة , لن بالطبع اللى بيشترى كتاب ايطالى اكيد لازم بيكون بيفهم جدا فى اللغة الإيطالية ومش معقول طول ما بيقرأ حيلاقى غلطات لغوية
طبعا انا بحكى القصة دى عشان اعرف اشرح الموضوع , المشكلة الخطيرة والخطيرة جدا وهى طباعة الموسيقى
يعنى انا شخصيا تعرضت لها , صعب جدا تلاقى فى مطبعة على اى مستوى كان , تلاقى شخص بيفهم فى الموسيقى
ومن هنا لازم الموسيقى صاحب الكتاب يبقى متواجد معاهم لحظة بلحظة لحد ماتنتهى كل العمليات الإعدادية للكتاب وحتى يمثل للطبع ودى حصلت معايا انا شخصيا , لأن اى هفوة منى او جزء او صفحة اكون انا مش معاهم لازم تحصل فيها مصيبة من الناحية الفنية , لأن العامل او الفنى مش فاهم ايه اللى فى الورق اللى بيطبع فيه , يعنى عندك مثلا النقطة اللى بعد اى علامة ايقاعية هو مايعرفش دى ايه , المشكلة الأخطر ان ايام طبع كتاب الاستاذ حبقجى كان الطبع بالزنكوغراف يعنى الصفحة بيتعمل لها اكلشيه يعنى قالب معدنى بيتحط على ماكينة الطبعاة ساعتها وبيطبع عليه , يعنى اى غلطة مهما كانت الكتاب بينطبع وخلاص , اما دلوقتى الكمبيوتر عم معجزات اننا ممكن نصلح ونعدل بدون خسائر فادحة فى التكاليف , ولكن يبقى ان الموسيقى لازم يكون موجود فى المطبعة طول الوقت لحد ما الكتاب يتم طبعه
اما بالنسبة لك من حسن حظك انك عارف الفرق بين زمردة وسوق العبيد
او احيانا بتكون جمل موسيقية فيها غلطات فادحة فى التدوين نفسه
بس المشكلة كمان تكمن فى ان بعدض المدونين وبالذات من غير بلد منشأ اللحن بيكونوا سامعين اللحن بطريقتهم هم يعنى ممكن فى التدوين بيطلع حاجات مختلفة عشان كده انا مش بحب اشوف اى كتب مدونات موسيقية عربية , بحب اعتمد على نفسى فى التدوين لأنى عزفت مع كل الملحنين والمطربين وعارف اصل اللحن
ولو تلاحظ انى اى عضو بيطلب نوتة بطلب التسجيل مع انى ممكن اكون انا حافظ اللحن لكن بحب اتأكد من اى حرف بكتبه
عشان بعدين ما يجيش حد يقول عادل صموئيل كاتب غلط
مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 14/11/2011 الساعة 13h38
طبعا دى لما تشوفوا النوتة حتشوفوا فيها مجهود وتفكير 15 يوم للتدوين , انا المرة دى حبيت اشوقكم شوية , بس جابت نتيجة انكم ابتديتم تفكروا يعنى لما قلت لكم انها 18 صفحة سعدت جدا لما حد منكم قال انه لعبد الوهاب , والاغنية دى فى توقيت عملها , بعد رحيل ام كلثوم وعبد الحليم وكان عبد الوهاب لسه عنده موسيقى كتير , حط فيها كل اللى قدرعليه يعنىشىء مهم جدا ان الاغنية الطويلة جدا , كل جملة فيها تكون احلى من التانية , يعنى لو بتلاحظوا فى ملحنين كتير لو الاغنية طويلة تحس ان نصها الاخير متكلفت , او مش على مستوى اللى قبله , او تحس انه لحن بجد ( يعنى فكر واختار واضاف وحذف 100 مرة ) , والنص التانى من الاغنية تحس انه قعد مسك العود وطلعه وخلاص , لكن عبد الوهاب كان بيحرص على ان الاغنية لو فيها 300 جملة موسيقية لازم كلهم يكونوا بنفس الدرجة من الحلاوة والفكر والقيمة لأن كان المبدأ بتاعه ان جملة متكلفتة من ال 300 ممكن توقع اللحن كله , مش بس التلحين كمان الإخراج , يعنى لما تسمع اللحن تلاقى فى البروفات كان بيضيف حاجات صغيرة زى مثلا ايقاع الزفة فى الكوبليه الأخير , فى الفترة دى كان عبد الوهاب انا كنت بحسه فى كل لحن انه ممكن مايكونش موجود تانى السنة الجاية , او انه آخر لحن حايعمله فى حياته , الشعور ده كان بيخليه يضيف على ابداعه ابداعات , عارفين مين اللى عزف صولو الكمان فى الكوبليه الأخير ؟
طبعا هنا انا دونت اللحن وتعمدت التبسيط لأقصى درجة ممكنة دون المساس [اى فتفوتة فى اللحن ماعدا تقاسيم على القانو والاكورديون والتقاسيم زى ما انتم عارفين بتبقى ارتجالية ومش بتتكتب , والعازف اللى عايز يعزف التقسيمة بيكون بيعزفها سماعى ومن ابداعه هو مش بيحفظ تقسيمة حد , ممكن ياخد من روحها ويضيف هو بصمته ,
الاغنية دى كانت مكتوبة فى المنتدى انا شفتها بس كانت فظيعة , يعنى صعبة شوية واللحن ده عشان طويل اوى محتاج كتابة تكون بتساعدك شوية , اللحن ده كان ممكن يكون 16 صفحة لكن انا تعمدت انه يكون بالحجم ده عشان الموازير ما تبقاش زحمة , طبعا انا بستفيد من كلامكم معايا يعنى اخت عزيزة منكم قالت انها من اهم المميزات فى طريقة تدوينى او اخراجى للنوتة ان الموزير مفرطة بالمصرى يعنى مش زحمة متكربسة , وده درس مهم جدا لكل من عايز يدون ... يعنى لو تلاحظ ان لو عامل عدد الموازير فى السطر 4 , احيانا بتكون موازير فيها زحمة عشانتبقى مريحة فى القراءة وعلامات التحويل لو وجدت تبقى واضحة انا بطرد مازورة من السطر وانزلها السطر التالى بيبقى المدرج ده 3 موازير , فيه حاجة تانية كمان مهمة جدا , لو كروش فى آخر المازورة مربوط فى كروش فى اول المازورة اللى بعدها , بحاول اخلبكم دايما جنب بعض بأى طريقة عشان انت تلاقى الرباط قدامك ما يبقاش الرباط نصه فوق ونصه تحت , دى بالنسبة للمحترفين عادى لكن للهواة ممكن تلخبطه , الاوى بيحتاج نوتة هى بتقرا نفسها , طبعا انا مع تبسيطى للحن ان شاء الله كلكم حاتقروه من غير مشاكل يعنى بقى سهل اوى , بس انصحك اسمع كوبليه كوبليه وركز فيه بعدين اعزفه لأنها طويلة جدا جدا ما ينفعش تاخدها مرة واحدة من الاول
وللعلم احنا فى الفرقة الماسية ومع ام كلثوم كنا بنمسك كوبليه نقعد فيه اسبوع كل يوم بعدين ناخد كوبليه تانى , يعنى ممكن عبد الوهاب اول بروفة ناخد اكوبليه التانى او التالت عشان التركيز
مع اطيب تحياتى واتمنى ان تسعدوا بها
واهدىه لجيش مصر العزيز داعيا الله ان يحفظه من الشرور التى تحاول الإساءة والوقيعة بينه وبين الشعب
فيه كذا ملحوظة
طبعا النشيد ده عازفه اوركستر كبير وتوزيع والمفروض انه يتعزف فى المدرسة على اورج واحد طبعا راعيت التبسيط عشان الاورج لو حده يبقى مالى مركزه واللحن ما يبقاش فاضى لعدم وجود الآلات الأخرى
زكمان عشان فيه ردود كتير فى التسجيل بتبقى كورد مكون من كذا نغمة انا اخترت هنا الأساسية
فيه لزمات صغيرة جدا بترد على الكورال اختصرتها لأنها ممكن توقع اللحن فى حالة الاورج الواحد
هنا الملاحظ فى الكورال انه مش كورال عادى برد ولكن ده مجموعة من المطربين الجامدين جدا ودة كانت من اهم صفات كورال زمان , كانوا مطربين مش جايبينهم يردوا على المطرب وخلاص زى ما بيحصل دلوقتى وده بيظهر فى العُرب الكتير فى اللاحن
بس هو اعتقد كده بقى سهل جدا تنفيذه
واكرر انا بصفتى كنت موجه اول فى وزارة التربية والتعليم كنت احب جدا المدرس اللى بيسمعنى حاجة جديدة فى المدارس مش ال كام نشيد التعبانين واللى استهلكوا 100 الف مرة وزهقنا منهم
مع اطيب تحياتى
الاستاذ العزيز و الغالي عادل صموئيل المحترم
رفعت اليك 5 صور و تظهر فيها بعض الوجوة المميزة في الفرقة الماسية لعازفي الكمان, كان نفس من زمان بعيد اعرف اسمائهم, و اذا اعطيتني اسمائهم فسوف اكون في غاية الامتنان لشخصك الكريم
1- في الصورة رقم 1 تظهر حظرتك في واحد من حفلات وردة الجزائرية.
2- في صورة رقم 2 و 3 يظهر عازف اشاهدة من حفلات يعود تاريخها الى الستينيات و حتى اواخر الحفلات للفرقة الماسية, من هوا هذا العازف؟ لم اسمع له اي عزف صولوا في اي من الحفلات.
3- في صورة رقم 4 عزف الصولوهات للفرقة الماسية المشهور بالجزء الثالث من مقدمة رسالة من تحت الماء, و كثير من الصولوهات للفرقة الماسية, من هوا هذا العزف؟
4- الصورة رقم 5 يظهر جالس الى جانبك ايضا واحد من اقدم الوجوه في الفرقة الماسية, سمعت له مرة صولوا في احد اغاني وردة الجزائرية, اشيب الشعر, من هوا هذا العازف؟
سوف اكون في غاية الامتنان لردكم الكريم
----------------------------------------
حبيب قلبي و اخي العزيز عاصم المحترم
اشكرك عن النبذة المفصلة لتاريخ اغنية في يوم و ليلة مع دعائي لك بالتوفيق و النجاح الدائم انشاء الله
-------------------------------------
الاخ العزيز سويفي
اشكرك على كلامك الطيب و اتمنى لك كل خير انشاء الله
اخوكم المخلص
وسام
الأخ العزيز وسام
العازف اللى بتسأل عليه اسمه نبوى ابراهيم زكان لفترة من الوقت قائد اوركسترفرقة رضا للفنون الشعبية بعد وفاة المرحوم على اسماعيل
اما عازف الصولو الاستاذ عبد الفتاح خيرى وكان زوجا للفناة فايزة احمد لبعض الوقت اول ما بدأت فى مصر وكان بيعزف جيتار وهو اللى عزف صولو الجيتار فى انت عمرى وانت الحب
اما العازف اللى بشعر ابيض هو الاستاذ ميشيل المصرى وقد كان حجة فى الموسيقى الخليجية
مع اطيب تحياتى عادل صموئيل
--------------------------------------------
الله ينور عليك ياستاذي العزيز ,, هذه الوجوه و ان لم اراهم في الحقيقة و لكن محفوظين في القلب منذ صغري, و اليوم تعرفت على اسامي اخرى
و انا في غاية الامتنان لردك الكريم
وسام
التعديل الأخير تم بواسطة : وسام اكرم بتاريخ 17/11/2011 الساعة 17h48
[QUOTE=وائل علوي;559939]هل ممكن احد من الاخوة الافاضل يعيد كتابة هذه النوتة الجميلة بالانكور انا وانت لوحدنا لفريد الاطرش حيث ان كتابتها غير واضحة وهي على هذا الرابط http://www.sama3y.net/forum/showthre...6%CA%C9&page=2
مع خالص تحياتي
-----------------------------------------
اخي العزيز وائل المحترم
هذه النوتة بعد تصحيح صغير على الصور و جمعها في ملف واحد (بي دي اف) ؛ هل هي واضحة الان؟
في انتظار ردك الكريم
الاخ العزيز وائل المحترم
بناء على طلبك اعدت كتابة نوتة (انا و انت لوحدينا) على برنامج انكور. كما ارفقت لك نسخة من ملف انكور في حالة رغبتك بالتدوين, بصراحة انا لست متأكد 100 % من النوتة.
مع التقدير
وسام
رد: طلبات نوتة
العرض العادي
