يعنى المفروض لما تكون ممثلة مش مطربة اصلا واللحن المفروض انه كوميدى او على الاقل فيه خفة دم ... الملحن بيعمله سهل اوى , يعنى بيكون اكثر امانا عشان يتنفذ صح بقدر الامكان
وهنا بيبان قدرة سعاد حسنى انه عمل لها لحن انا بعتبرهصعب او على الاقل مش اى حد وخلاص يقدر يغنيه .
فيه حاجة مهمة , انا التدوين بتاعى من مميزاته حاجة , وانا بدون بكون واخد بالى كويس اوى ان مين اللى حايستعمل النوتة , يعنى مرة واحد قال عادل صموئيل ده عامل زى الترزى بيفصل النوتة بالضبط على اللى حايعزفها ممكن يكون موسيقار كبير وممكن يكون تلميذ فى ابتدائى , وانا هنا فى الصفحة التانية بعد ما كتبتها بالسرعة اللى كتبت بيها الصفحة الاولى , بصراحة لقيتها صعبة شوية قمت مسحتها واعدت كتابتها تانى يعنى خليت السرعة 170 واعدت الكتابة خليت الزمن الضعف يعنى النوار تبقى بلانش والدوبل كروش تبقى كروش
شكلها بيبقى اسهل كتير جدا , واللى خلانى عملت كده ان اااااااااالاغنية متسجلة على اورج فقط , وعازف الاورج بيتفزلك فى اللزم وبالذات لما يكون لوحده , يعنى اللزم بتكون فيها رغى كتير وعشان ماتبقاش صعبة دونتها تانى , هى مش صعبة لكن محتاحة تتفصص وهم معظمهم شبه بعض
اخي العزيز عادل
بعد التحية والسلام
اتمنى ان تكون باحسن حال
لي طلب عندك صغير وهو اعادة كتابة نوتة وحياتك يا حبيبي
لسيد مكاوي
النوتة المرفقة جيدة من ناحية المقام و الحروف وهي سليمة بنسبة كبيرة ولكن بها عيبان اساسيان وهما سوء الخط طبعا و سرعتها اعلى بكثير من السرعة الاصلية يعني زمنها ملخبط
عشان كده ان طلبتها من حضرتك وياريت تلبيها اكون شاكرا لك افضالك عليا
اخوك وائل
والاغنية دى انا اتكلمت عن ظروفها لما قدمت لكم نوتة اى دمعة حزن
لكن فى الحفلة حصل حاجتين من الحاجات اللى مش ممكن تحصل ابداً وتتحفظ فى التاريخ
احنا لما بنكون على المسرح ( وفى الحفلة دى كان مسرح مقام على ملعب نادى الترسانة ) بيكون تحت المسرح مباشرة جهة اليمين فريق الإذاعة بيتكون من المذيع بتاع الراديو وجنبه مهندس صوت معاه ميكسر كبير متصل بكل الميكروفونات اللى على المسرح وبيخرج وصلة لجهاز بيودى لجهاز الارسال ووصلة لعربية التليفزيون اللى بتكون خارج الحفلة وفيها المخرج بتاع التليفزيون ووصلة عن طريق كابل التليفون بتتجه مباشرة لمبنى الاذاعة والتليفزيون , وهناك بيسجلوا الحفلة للطوارىء , غير طبعا من ضمن طاقم الاذاعة مهندس صوت تانى واخد وصلة من الميكسر وقدامه جهازين تسجيل كل جهاز عليه شريط وقبلان نبدأ العزف بديقة بيدور الجهاز الاول بيسجل وقبل ماتخلص البكرة اللى على الجهاز الاول ومدتها 30 دقيقة بيكون شغل الجهاز التانى عشان مايفوتش حرف من الحفلة وفى المونتاج بيكونوا الاغنية من الشرائط دى , بس طبعا الاول بينسخوهم كذا مرة ويتركوا الاصل لأن المونتاج كان بالمقص يعنى الاربع بكرات بيطلع منهم بكرتين , وبمجرد ماتخلص بكرة الجهاز الاول بيشيل الشريط ويحط شريط جديد انتظاراً لقيل ماتخلص بكرة الجهاز التانى بدقائق وهكذا يعنى ممكن الأغنية تاخد 4 شرائط او خمسة حسب طول الاغنية , ودى طريقة التسجيل المتبعة فى الاذاعة عموماً , بقول الكلام ده ليه اولا معلومة يمكن تحبوا تعرفوها ولكن تمهيد للحدث الجلل اللى حقوله , طبعا انا قلت كابلات واجهزة كتير طبعا دى حفلة اذاعة وتليفزيون ع الهواء , لازم بيكون الكهرباء من ماكينة كهرباء خاصة مش من التيار العادى اللى ممكن يتقطع , ولازم تكون فيه ماكينة توليد احتياطية واقفة جنبها لو حصل عطل تتوصل فى ثانية , والكابلات اللى ماشية على الارض بيكون معاها فريق كبير من العمال المساعدين والفنيين بيثبتوها فى الارض عشان ماتتحركش , وبيثبتوها باجهزة خاصة بحيث ان الكابلات تصبح كانها ملزوقة فى الرض لو حد مشى عليها ماياخدهاش فى رجله , اما بالنسبة للفرقة انا قلت انهم على يمين الفرقة ليه ؟ لأن الآلات الكهربائية الاورج والجيتار بتاخد كهربا من عند مهنس الاذاعة مش من اى فيشة وخلاص , المهم حانبتدى , دايما قبل رفع الستارة فيه تقليد بيقولوا نقرأ الفاتحة ومايعادلها عند اخواننا المسيحيين , قرينا الفاتحة واتفتحت الستارة وعبد الحليم قال اللى عايز يقوله وانتم عارفين بيحب يقود الفرقة , ادا اشارة البدء ونزل بإيده المفروض ان اول حرف زى ما انتم عارفين كورد من الجيتار , الجيتار قاعد جنبى عمل الكورد ماطلعش صوت مافيش كهربا , وعلى فكرة لو عندك تسجيل كامل للحفلة تسمع الكورد ده من غير كهربا فى الاول , عارفين يعنى انا وكلنا متعودين ان اشارة البدء بنسمه كورد الجيتار زى القنبلة ماسمعناش حاجة , حصل لنا حاجة شبه سكتة قلبية , يعنى لما تسمع اللحن وشوف فيه شغل جيتار اد ايه بين صولوهات منفردة وصولوهات مشتركة غير ان ليه دور فى الرتم طول الاغنية , قعدنا نص دقيقة مذهولين , يعنى الاغنية باظت , لأن لو اشتغلنا من غير جيتار , مش حاتبقى الفرقة الماسية ولكن تبقى فرقة حسب الله , مش من الناحية الفنية ولكن تخيل حضرتك انك بتعمل بروفات على اللحن ده خمسة واربعين بروفة واتسجل فى يوم كامل وانت طول الوقت بتسمع جنبك شغل الجيتار , لو عزفتها من غير شغل الجيتار حاتحس طول الوقت انك انت غلط او فيه حاجة ناقصة , وكمان مين اللى على المسرح حاينظم مين يقول مطرح الجيتار , طبعا الانظار اتجهت تحت لبتوع الإذاعة , اتارى عامل متخلف شغلته يبقى جنب الاسلاك اللى طالعة المسرح , حبكت قبل رفع الستارة بلحظة انه يجيب كباية شاى وهو داخل خد السلك بتاع الجيتار فى رجله , طبعا ممكن حد ما يقرش الظرف ده ولكن مع عبد الوهاب وعبد الحليم دى تبقى كارثة , ولو عبد الوهاب موجود كان منع غناء اللحن بالطريقة دى , كمان حصلت كارثة تانية , انتم عارفين ان الفرقة الماسية 12 كمان لكن عبد الحليم كان بيجيب عشرين كمنجة تانى من الخارج يعنى شوية من فرقة الموسيقى العربية وفرقة صلاح عرام , ودول كانوا مش ثابتين يعنى مش هم هم كل مرة , هم كانوا شاطرين وحلوين جدا لكن كانوا بيختلفوا عن الفرقة الماسية اننا حافظين عبد الحليم , يعنى عبد الحليم بيعمل مايسترو لكنه طبعا مش مايسترو يعنى شوية هزار على خفة دم يعنى حركاته نصها بينى وبينكم غلط , وكنا مش بناخد على حركاته , يعنى قدامنا النوتة وحافظين اللحن من كتر البروفات , يعنى حتى فى غاتت جنبنا دى عمل حركة فى ايقاع راح واخد مزهر من عازف وقعد يطبل معاهم والعازف جاب مزهر تانى من جنبه على الارض طبعا الحركة دى احنا فوجئنا بيها بس اكيد كان متفق مع عازف المزهر عشان كده جاب معاه مزهر تانى , المهم خلصنا المقدمة والمذهب وجينا نعزف الكوبليه الاول بتاع مرة تانية برضه صدفة , فيه لازمة انتظار ( ومعناها المازورة او اتنين بيتكرروا كتير قبل الغناء مباشرة ) ومالهاش حد معين فى التكرار يعنى ممكن فى النوتة مكتوبى 4 مرات وعبد الحليم وام كلثوم وريد ممكن يخيلك تعزفها 22 مرة لحد ما يبقى جاهز , او يكون بيشاور بإيده نبطء شوية او لحد ما الناس تسكت وتبطل تصفيق
المهم حاجة فنية لما تكون حتعيد الازمة كلها تانى لازم تلتزم بالمكتوب فى النوتة وإلا ..... لكن لما يكون انتظار للغناء عينك وانت بتعيد ع المطرب لأنه حايعمل اشارة انه حايقول , المهم فى الازمة دى بتقول دو مى فا صول
وتتكرر اربع مرات ونعيد الازمة او موسيقى الكوبليه مرة تانية , عبد الحليم طبعا بيهزر جه بعد ماعملنا اتنين من الاربعة قبل مانكمل التانية عمل اشارة إعادة من الاول , وهنا حصلت الكارثة العازفين اللى من الفرقة الماسية بياخدوا عبد الحليم على قد عقله لكن ماليش دعوة بيه انا بشتغل على النوتة , والعازفين الغرب افتكروه مايسترو بجد وراحو عايدين من الاول , وتسمع بقى اطباق بتتكسر وعربيات بتخبط فى بعض , يعنى دى فى اى فرقة بتحصل كتير لكن فى الفرقة الماسية ماتحصلش كل عشرين سنة , كفاية ولا اكمل ؟
كان فيه عادة ايام ام كلثوم ان فى البروفات كل يوم الصحفيين بيحضروا البروفات وبيوصفوها وصف دقيق وكان جريجة الاهرام مفرغة صفحة 3 لبروفة ام كلثوم , زكانوا كل يوم بينشروا كلمات الاغنية بحيث ان الشعب على يوم الحفلة بيكون حفظ الكلمات , ولما توفيت ام كلثوم , انتقل التقليد ده لعبد الحليم , بس حصل حاجة غريبة , ان عبد الوهاب خلا الصحفيين يحضروا البروفة جزء من الوقت واخدوا الكلام ونشروه لكن مانشروش نهاية القصة ,
يعنى واحدة ضحكت امام انتين اصحاب لكن هى بتضحك لمين فيهم والراجل اتجنن ياولداه هى بتضحك ليه ولا لصاحبة , وكان ده السر اللى كان الناس مترقبينه قبل الحفلة , ولو تلاحظوا انه لما قال بضحك لك يا اسمرانى الشعب اتنطط , وباين الصوت اوى , كل واحد حس انه طرف فى القصة والبنت بتضحك له هو ,
ودى من العبقريات بتاعة عبد الوهاب انه لازم فى كل اغنية يحط شىء او عفريت بحيث ماتبقاش تقليدية , يعنى لو الناس علافت النهاية قبل الحفلة اكيد مش حايوصلوا للترقب اللى خلاهم اتجننوا , يعنى الذكاء بتاع عبد الوهاب
حس انها لماتكون اغنية عاطفية انت بتتمتع بحلاوة الكلام , لكن لما تكون قصة من النوعية دى اكدي حايشدك تعرف ايه النهاية , انا آسف للإطالة ولكن الذكريات بتحكم , وبجد لو الايام دى حسيت ان حاييجى فى يوم وكل الناس دى تموت وافضل انا اتكلم عنهم , لكنت سجلت كل لحظة وكل ثانية لأن كل لحظة كان فيها عبقرية لن تتكرر .... الله يرحمهم
وآسف على الإطالة مع اطيبب تحياتى
احبائى
بمناسبة قرب حلول شهر رمضان المبارك
اتقدم لكم بأطيب التهانى والتمنيات لكل اخوتى الاحباء فى الامة العربية والإسلامية
واقدم لكم
اهه جه ياولاد
هى سهلة جدا لكن يلزم فى تنفيذها وجود 3 مجموعات يعنى اللحن بيغنيه الثلاثى المرح وكورال رجال وكورال اطفال
وعشان يطلع بنفس الدرجة لازم تكون انت ال 3 مجموعات
مع اطيب تحياتى
احبائى
اقدم للكم من روائع فريد الاطرش
مين يعرف ايه مكتوب لى معاك
اتمنى ان تسعدوا بها واقدم مع النوتة هدية اتمنى تعجب كل مدرسى الموسيقى
يعنى توزيع للأغنية لأربع آلات اكورديون وكمان ومدولين واكسليفون
من اللى كنت بعمله للمدارس فى المسابقات
طبعا بيكون عازف الاكورديون هو العازف الاساسى واللحن الاساسى وشغل محدود لبقية الآلات لكن ان شاء الله يعجبكم
انا عامل تسجيل للتوزيع عشان تسمعوه واحب اسمع رأيكم
طبعا فى المدارس باخد اجزاء من اللحن حسب مقدرة الطلبة اللى بيكونوا من ابتدائى واعدادى وثانوى يعنى بتكون سهلة مش مفروض افترى عليهم
فى المرفقات
نوتة مين يعرف فريد الاطرش
نوتة مين يعرف توزيع عادل صموئيل
تسجيل مين يعرف توزيع عادل صموئيل هى طبعا على برنامج انكور يعنى 4 اصوات بيانو
احبائى
بعد مانزلت لكم نوتة مين يعرف من توزيعى المتواضع للمدارس , وحسيت ان فيه اعضاء طلبوا منى مقطوعات تانية
حبيت انزل لكم حاجة تانية وعندى طبعا لسه كذا حاجة وتحت امركم
اولا اقدم لكم مقطوعة موسيقية من تأليفى اسمها فرحة العيد , وانا عامل لها توزيع وسهل جدا جدا ومرفق تسجيل طبعا لما تعملوها على الآلات حاتبقى احلى كتير , وعمال معاها ايقاع عشان تحسوا بيها وبيبدأ بعد 4 موازير
وثانيا اقدم لكم اغنية انا قلبى دليلى وعامل لها توزيع لكن هنا التوزيع اصعب شوية , يعنى انا دايما قبل ما اعمل اى عمل لازم اشوف مين اللى حايعزفه , لأن الموسيقار الشاطر بيحب شغله يطلع اعلى حاجة من انه يعمله على مستوى اللى حايعزفوه والموسيقار الفاشل ممكن يكون سشاطر موسيقيا لكن غبى يعمل حاجة صعبة وتتنفذ مش حلو , فى الآخر شغله حايبقى وحش , والمقطوعة دى كان حظى حلو وكان فيه طلبه شاطرين اوى ومدرسين شاطرين يعنى عجبتهم وتعبوا شوية عشان ينفذوها , هنا فيه ملحوظات كتير احب ان المدريبن يعرفوها , طبعا شغلى من العمالقة علمنى حاجات كتير فى التوزيع اول حاجة عدم تشويه اللحن الأصلى يعنى , اول حاجة تكتب اللحن الاصلى بحاله من غير اى تغيير , ثانيا التوزيع يكون خفيف وبيخدم على اللحن يعنى ما يطغاش عليه فى اى وقت , كلمة خفيف انه حاجة زى رشة الملح يعنى بتحلى الحاجة مش تفسدها , ثالثاُ التوزيع بيبقى جمل موسيقيةة بفكر فيها كتير مش مغمات تلطعها فوق بعض وخلاص , واهمية الجمل الجميلة فى التزيع عشان تبقى سهلة للتلاميذ انهم يحفظوها , طبعا بالنسبة لشغل المدارس بتكون آلة الأكورديون هى اكفأ آلة تتعامل معاها عشان هى الآلة المضمونة تديك نغمات صحيحة مفيهاش مشكلة الصوابع المش مضبوطة فى الكمنجات مثلا , لذلك انا عادة بديها اللحن الاساسى عشان يبقى ثابت ومايهربش من ودن المستمع واللحن يحصل له دروب فى اى جزء , هنا اصعب حاجة شغل الجيتار أنا بصراحة افتريت فيه يعنى عامله صعب يعنى مستوى عمر خورشيد عايز واحد بيقرا نوتة , طبعا فى المدارس انت مش حاتلاقى عمر خوريد ولكن كبيرك حاتلاقى عمر افندى او عمر الجيزاوى , بس فى الفترة دى انا لقيت بنت فلتة يعنى بتدرس بعد الظهر فى الكونسرفاتوار جيتار وبتقرا نوتة , طبعا مش معقول الاقى واحدة زى كده وما استغلهاش , المطلوب منك انك فى الجيتار هنا خد من الاكور على قد ماتقدر , او ما يريح الطالب , وعموما صوت الاكورديونات بتطغى على كل حاجة يعنى الجيتار ببيقى مسموع طشاش يعنى مش حاتفرق , انا عملت مع اللاحن ايقاع حسيت انه احلى كده لما تسمعوه , اهم شىء شوفوا انا موزع ازاى يعنى تابعوا كل خط لحنى فى النوتة , اتعلمت من عبد الوهاب ان الحركة او الحلية او اللعبة لما تكررها غير فيها ما تكررهاش زى ماهى , يعنى انت لما بتسمع موسيقى عبد الوهاب تلاقى الجملة كل ماتتعاد الرد علها مختلف , لما تسمع قلبى دليلى حاتلاحظ فيه كوبليه انا عامل فيه شغل جامد وكوبليه عامل شغل خفيف وده مقصود ان المستمع يحس بالتلوين , قد يتهيأ لك انها طويلة وصعبة ولكن هى مش طويلة انا مكرر الموسيقى كل مرة مرتين , يعنى لو حسبتها حتلاقيها ثلث الحجم اللى انت بتسمعه , بس طبعا المقطوعة ككل طولها حوالى خمس دقائق يعنى سيمفونية تملا بيها حفلة
اتمنى انها تعجبكم وتفتكرونى بيها بعدين , وحسب رد فعلكم عندى حاجات تانية بين السهل والمتوسط والصعب وتحت امركم وانا عشمى فيكم كبير , لأن المدرسين اللى كنت بشتغل معاهم مع ان عندهم النوت لكن ممن يرموها ومايستعملوهاش تانى , لأن مش بيحبوا يتعبوا نفسهم يعنى لو لقوا حاجات اسهل وزى النيلة ومالهاش اى طعم اكيد حايستعملوها , لكن انا حديك عشر مقطوعات ممكن يكفوك عشرين سنة يعنى كل سنة حسب ظروف التلاميذ عندك تقدر تعمل واحدة او اتنين وممكن تكررها بعد سنتين تلاتة
مع اطيب تحياتى ولآسف على الإطالة لأن كل حاجة بتحتاج شرح
بس ليا عندكم طلب ماحدش يرد او يعقب إلا بعد مايسمعهم كذا مرة
انا مش بحب المدح وخلاص بحب الرد اللى انت تحسه فعلا بالذات فى الحاجات دى لأنها شغلى الخاص يعنى هنا انت بتسمع عادل صموئيل غير التدوين وغير العزف
الاستاذالعزيز و الغالي عادل صموئيل المحترم
عثرت على برنامج مجاني 100 % اسمه MP3 Speed و قد رفعته اليك مع هذه المشاركة.
البرنامج بستطيع ان يفلل السرعة فقط او السرعة و التردد معا, و لكن لا يستطيع نقليل التردد فقط ( Pitch )
كمثال ايضا رفعت اليك المعزوفة الاصلية ( فرحة العيد) و المحورة حيث اخترت السرعة80 %, و واضح ان التردد او درجة ارتكاز المقام اقل بكثير من المعزوفة الاصلية.
يقوم البرنامج بخزن الملف الجدبد المحور فوريا على سطح المكتب Desktop للمقارنة.
يمكنك اجراء تجارب اكثر على البرنامج لأ ستشاف امكانيتة. و سوف ابحث ايضا على برامج اخرى انشاء الله قريبا.
مع خالص اماتي و تقديري
وسام
التعديل الأخير تم بواسطة : وسام اكرم بتاريخ 21/07/2011 الساعة 22h17
السلام عليكم ورحمة الله وبركاته
يا استاذ عادل بارك الله فيك وفي اعمالك و نحن في امس الحاجة الى اشياء مثل هذه موزعة لاخذ فكرة عن كيفية التوزيع و الجمل المعتمدة و هذا مجال اخر نتعلم منك و انا سعيد جدا من اعمالك و متحمس كثيرا.. ممكن انو الاخوان يرونا انه النوتات اهم من نوتات موزعة و لكن من فترة الى فترة نرى عمل جميل مثل قلبي دليلي او مين يعرف او من اعمالك الشخصية هذا اثراء لنا و لممنتدى و انا في انتظار اغنية قلبي و مفتاحو و اغنية ساعة بقرب الحبيب او اغنية حاجة غريبة لاني حاسس انك ستبدع في توزيعهم ... وفي انتضار جديدك عندي سؤال بشأن الاغنية التي من تاليفك و هي جميلة جدا هل الايقاع يكتب بهذه الطريقة ( ملف مرفق) و شكرا على ردكم
اخوك هيثم الصالحي
اهلا هيثم الإيقاع ممكن يتكتب بكذا طريقة لكن افضل طريقة هى الطريقة العالمية يعنى المدروسة فى مصر فى المعاهد الموسيقية , لأن الجميع درسوها ولن يحدث لبس فى تطبيقها , والمفروض فى الإيقاع ان لا يكتب على مدرج موسيقى ولكن كما كتبت ان هنا فى الملف المرفق
والملوحظة ان الدوم رأسها لأسفل والتك رأسها لأعلى , وبالطبع بدون ان تكتب عليها دوم او تك فالدارس درسها هكذا
مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 21/07/2011 الساعة 23h02
رد: طلبات نوتة
العرض العادي
