طلبات نوتة أ / عادل صموئيل الجزء الثانى

[عادل صموئيل]

احبائى
اولا قبل التعقيب على كل الكلام الحلو اللى كتبتوه نفسى افضفض معاكم شوية يمكن اطول عليكم شوية بس فيه كلام خانقنى وطبعا اللى يحي يقرا اشكره واللى مايحبش طبعا براحته
انا خلال تواجدى فى المنتدى هنا حصل 3 مرات ان اعضاء يضايقونى
طبعا معظمكم شاف جميع اعمالى فى المنتدى من دروس وعزف ومقالات ونوت موسيقية
فى العزف بعد ماقدمت انت عمرى من اول حرف لآخر حرف وكنت مقدم قبلها اعمال كبيرة جدا كتير والرودو والاستقبال من الاعضاء هو اللى شجعنى اقدم اكتر وكبعا انتم واخدين بالكم ان المنتدى عالمى وبيدخله اعضاء منهم موسيقيين كبار وخبراء عالميين وسميعة جامدين اوى وهواة وكل الدرجات .. المهم بعد ماقدمت انت عمرى رد عليا واحد قال عن نفسه انو عازف بزق وهاجمنى اوى وقال ان عزفى وحش وانى مبتدىء او اقل من المبتدىء وكلام من ده انا قبل ما ارد احب اعرف مين اللى بيتكلم ده وده بعرفه من اعمالة الشخصية اللى مقدمها فى المنتدى لأنى بالطبع العلاقة بيننا هى دى .. دخلت على ملفه الشخصى فيه خاصية انك ممكن تشوف كل مشاركات العضو لقيته منزل عمل واحد من عزفه وهو اغنية طلعت يامحلا نورها
هنا انا اتضايقت يعنى ازاى واحد احلا حاجة عزفها حاجة ممكن يعزفها تلميذ فى سادسة ابتدائى على الاكسيليفون يعيب على واحد عازف الاطلال وحديث الروح واكتر من 100 عمل كامل ما اعتقدش حد عزفهم كلهم مجتمعين ... والمشكلة انى انا بعزف ازاى ؟
يعنى لو قاعدين مع بعض وحد منكم طلب اعزف له اغنية بعزفها او عندى حفلة اوتسجيل هنا ده شغل يعنى مالوش دعوة بحاتى النفسية بروح اشتغل لكن لما عايز اسجل لازم اكون عايز اعزف فيه مزاج ومجهز فى ذهنى اغنية معينة ومع انى حافظها من 40 سنة مثلا لكن التسجيل حاجة تانية يعنى بسمعها كتير وارسمها فى مخى .. والمعزوفة اللى طولها ساعة انا بعزفها 6 ساعات بعدين احطها على الكمبيوتر وانا خبير محترف فى المونتاج بطلع احلى ما عزفته وارمى الباقى واحينا بتكون فيه جمل صعبة او تتقال احلى يمكن بعزفها 30 مرة بعدين باخد احلى جملة منهم والزقها .. اتعودت على دع من الشغل مع العمالقة .. بعد ما المعزوفة تخلص مونتاج بسمعها مش اقل من 200 مرة لما احسن انها حلوة بنزلها .. وخلال السمع ده بتعامل معاها على ان حد غيرى عازفها واقيمها

تانى مرة من كذا شهر الاخ اللى دخل اللى اسمه بيانست واللى قال عن نفسه انه دكتور فى الموسيقى .. والله العظيم انا بسعد جدا لما دكتور فى الموسيقى يدخل صفحتنا لأن ممكن انتم تستفيدوه منه وانا كمان يعنى اى دكتور فى الموسيقى ممكن يكون متخرج بعدى بكتير والعلم ممكن يتقدم ويتطور يعنى ممكن يفيدنا بحاجة عمرنا ماعرفناها لكن لما على طول يقول ان النوت بتاعتى كلها غلط ولازم حد منكم يصلحها لى وانى بكتب جمل موسيقية من غير ميزان وقلت انا ازاى مايعرفش حاجة اسمها ادليب .. طبعا الكلام ده ماعجكوش زى ما انو ماعجبنيش والاخ نور الصباح قال عنه الاخ : ملوخيست

والاخ العزيز ايهاب بعد ماقال كلام ماعجبنيش انا رديت رد مطول جدا يعنى قلت ما معناه ان مش معقول الملايين اللى بتوصل لهم النوت بتاعتى فى كل انحاء العالم يعنى اللى بيدخلوا املنتدى والاعضاء اللى بينزلوا النوت فى منتديات تانية يعنى ممكن النوت بتوصل لعشرات المنتديات مش معقول كل دول مش بيفهموا وبياخدوا النوت انها غلط

الكارثة ان الاخ العزيز ايهاب ماقراش الموضوع من اوله قراه من عند كلمة ملوخيست ومع انى قلت من كذا شهر مش عارف ازاى هو اخد الكلام على نفسه واوازى انا اقول عليه ملوخيست وكتب موضوع طويل جدا كله شتائم لدرجة ان ادارة المنتدى حذذفت المواضيع كلها ومنعته من دخول المنتدى ( مش انا اللى حذفت فيه 4 مشرفين على الصفحة ) المفروض دى صفحة بتاعة فن وحوار مش شتائم ونرد ... ومن ضمن الشتائم عمل خير انا عملتو من 42 سنة بيعايرنى بيه دلوقتى .. من يوم ما عرفتونى انا عمرى ماجبت سيرة حد بحاجة وحشة .. الوسط الفنى مش كلو ملائكة فيه وفيه لكن انا دايما بجيب سيرة الناس بالخير

وفيه ملحوظة ذكرها الاخ العزيز تامر عامر عن التواضع وقال انو مرة فى اغنية مال القمر لاحظ غلطة وانو كان خايف جدا وهو بينبهنى وانا قلت له النوتة انا اللى كاتبها واشكره انه نبهنى وانا صلحتها فورا يعنى انا الكسبان وبتحصل كتير عادى جل من لايسهو بس انا ببقى مبسوط لأن الغلطات بتبقى مش فى التدوين .. لكن حاجات رفيعة يعنى مثلا اخى العزيز سويفى كلمنى على الخاص وقال لى فى نوتة نشيد موطنى فيه سنيو فى الآخر لكن مش موجود بيرجع منين .. عادى جدا انا شكرته وصلحتها يعنى ناقصة علامة سينيو فى اول اللحن على اول تانى مازورة ... واعترف مرة الاخ العزيز وائل علوى اكتشف لى غلطة هى تعتبر جسيمة فى اغنية لأم كلثوم تلحين بليغ حمدى ( مش فاكرها دلوقتى من كتر ما بدون ) الغلطة انى فى الكوبليه الثانى انا نسيت جملة بحالها ... ودى جت من انى الاغانى دى بدونها من الذاكرة مش بشغل التسجيل ونسيت جملة طبعا انا شكرت وائل جدا وفتحت الملف وطبعا الجملة المنسية دونتها فى خمس دقائق وظبطت النوتة وشلت القديمة ونزلت الجديدة ..
بس من ساعتها انا برضو اتعلمت حاجة ان الاغانى اللى بدونها من الذاكرة لازم قبل ما انزلها اراجعها على التسجيل والصح مافيهوش عيب ...
من ضمن الحاجات اللى حبيت جدا احكيها لكم
عن اغنية شمس الاصيل ... موجود فوق ان عضو قال لى ان فيه غلط وانا احلت الامر للأخ العزيز محمد الآلاتى وهو رد رد جميل جدا واحب احكى لكم الموضوع
لقيت مشاركة على الخاص بعنوان : محبة
فتحتها لقيتها من عضو جديد اسمه نضال اسكندر من سوريا
بإختصار اولا بيشكرنى بعدين قال ان فى اغنية شمس الاصيل ماشية كويس لحد الكوبليه الثالث لكن فيه ملحوظة هو شايف مقام غلط يعنى انا عاملها مقام كذا وهى مقام كذا

طبعا انا رحبت بيه فى المنتدى وشكرت ذوقه وقلت له انا راجل متواضع جدا ومش بتضايق لما حد يقول على محلوظة محددة فى مكان محدد ... بس انا مش بحب النقاش فى المقامات الصعبة اللى عليها خلافات ( بينى وبينكم بوفر مخى عشان ادون اغنية تانية ) وقلت لو انا ححول الموضوع للأخ العزيز محمد الآلاتى هو خبير اكتر منى فى موضوع المقامات الصعبة دى ( لأن عادة بيختلف عليها اتنين ويقعدوا يتناقشوا طول الليل ) وفاكرين لما كنت بحكى لكم عن اهواك وكل واحد قعد يقول مقام شكل .. انا دونتها وكلكم عزفتوها وخلصنا
وفى البروفة كان موجود عبد الوهاب ولما ابتدت المناقشة فى المقامات وابتدا صراع الديوك عبد الوهاب انتظر عليهم 4 دقائق ونصف بعدين خلاهم يسكتوا وقال غنيها يا عبد الحليم وقال لنا اعزفوا اللى بيقوله عبد الحليم وخلصت .. واتقالت حلوة لدرجة ان عبد الحليم غناها الجملة فى الحفلة 22 مرة لحد ما وسطنا اتقطم .. وانا لما بدون المقاطع المزعجة مقاميا دى اقول لكم على السر انا بدونالحروف اللى انا سامعها ... لأن لو قلت دى مقام احمر وهى كانت مقام ازرق حايطلع التدوين غلط اكيد لكن لما بدون اللى انا سامعه يعنى على النواة كان كذا حصل كذا وكذا بيطلع صح ( ممكن انا مش بفهم فى حاجة اصلا لكن ربنا بيستر وكل مرة بتطلع صح ) المهم ااخ العزيز محمد الآلاتى بعد ما رد عن المقام قال انها ممكن تتحسب مقام كذا او كذا وانو ( محمد الالاتى ) بيستبعد انها سيكاه بلدى زى ماقال نضال واستشهد بعمار الشريعى فى برنامج غواص النغم وطبعا ماحدش حايقول حاجة بعد عمار الشريعى الخبير
قال نفس كلام الآلاتى وان كل الموسيقيين بيعزفوها زى ما انا كاتبها ... وقال محمد الآلاتى ان عادل صموئيل مدونها صح كده طبعا دى شهادة انا اعتز بيها ومش مقعول يكون بيجاملنى

بينى وبينكم انا بتغاظ من المناقشات المقامية دى عشان حاجتين .. ان بيبقى انتين كلو واحد بيقول رأى ومتمسك بيه متعصب له يعنى وبعد 4 ساعات مناقشة برضو كل واحد مازال متمسك برأيه مع ان الاسهل انت سامع ايه يعنى قسم المقام على وتر دوككاه جنس ايه وعلى وتر النواة انت سامع جنس ايه وخلصت وزى ماقلت دى الطريقة اللى انا بكتب بيها ومش بستعمل آلة وانا بكتب طبعا بعتمد على اذنى بنسبة 100%

تانى حاجة وهى حاجة تضحك زمان وانا طالب فى الكلية فى البكالوريوس كان عندنا فى دفعتى كذا بنت بيتنافسوا على المراكز الاولى حافظين ال 47 مقام زى البغبغانات يعنى كذا على كذا يطلع زويل .. و كذا على كذا يطلع كذا وخد من ده للصبح بس مفيش منهم واحدة تعرف طبعا تمسك عود وتسمعك حاجة زى بقدونس على بيض يطلع عجة

انا طبعا آسف للإطالة وليكو كل واحد علبة اسبرين ونص كيلو بن
عايز اعلمكو درسين للحياة .. عشان الاخ اللى قال انى عامل واعظ وبمسح مخكم شوفوا الكلام صح ولا غلط

انا بقعد على قهوة كلها بهوات ( جمع بيه ) ومن خبرتى فى علم النفس ان البيه بينظر لببيه اللى اعلى منه .. يعنى راكب سيارة ايه معاه موبايل بكام
اكتشفت ان فيه شحاذ غلبان قاعد على الارض قدام القهوة من زمان .. طبعا البهوات مش شايفين الشحاذ يعنى بالنسبة لهم شفاف فى الوقت ان الشحاذ ده بيبحلق فيهم طول الوقت .. واكتشفت انه بيعرف عنهم اسرار يعنى كل واحد اصلو ايه وفصله ايه وعمل ايه

قصة تانية انا كنت موجه اول تربية موسيقية فى ادارتين .. المدرسين منكم عارفين لما الموجه الاول بيدخل مدرسة بتترعب لأنه لو راجل ( او ست شرانية ) الوزارة محرضاه انو يمسك على المدرسة اى مخالفة ويعمل لهم مصيبة .. مرة دخلت على احد المُدرسات وشها اصفر وتخضت لما عرفت انى الموجه الاول قلت لها ماتخافيش انا راجل طيب .. يعنى حتى لو شفتك عاملة اكبر المخالفات مش حعمل لك حاجة ولكن حاوجهك الصح ايه
لأن شغلتى اعلمك مش احولك للتحقيق

انا من اهم صفاتى التواضع ولعلمكم التواضع ده بيخليك تكسب كتير .. مرة وانا عادل بيه الموجه الاول قعد جنبى تلميذ فى سادسة ابتدائى وقعدنا نتكلم كاننا اتنين قد بعض الواد طلع عفريت كمبيوتر .. كان عندى مشكلة عويصة مجننانى قال لى على حلها فى ثانية مع ان والله العظيم ممكن 90% من مدرسين الكمبيوتر فى المدارس مايعرفوهاش او حتى بتوع الصيانة

اما عن كتابة النوت ببلاش وبفلوس ليه انا بحب اللى ببلاش بدون مقابل اكتر
تخيلوا لو لسه الزمن الجميل ممتد وفيه ملحن كبير زى عبد الوهاب ومطرب زى عبد الحليم
وطلبوا منى كتابة لحن حاخد فلوس ( وكتير ) لكن النوتة مين حايشوفها الفرقة اللى بيعزفوها فقط وبعد التسجيل بشهرين ماحدش حايفتكر
بمعنى انت النهاردة لما تسمع اغنية فوق الشوك مثلا بيقولوا تأليف وتلحين وغناء حد بيقول تدوين الاستاذ نصر عبد المنصف ؟
لكن النوتة اللى بنولها هنا فى المنتدى شوف كام واحد بيشوفها دلوقتى ... وممكن حتى بعد ما اموت ب 100 سنة ... انا بحس انها حاجة زى عندكم اسمها الصدقة الجارية يعنى شىء او علم بينتفع بيه الناس
واكرر اسفى للأطالة وقلت لكم على السر التحفة القادمة فوق الشوك
مع اطيب تحياتى واشكر كل واحد استحمل يقرأ الكلام ده كله

[عاصم المنشاوى]

الله عليك يااستاذ...
مش بس فن وموسيقى ولكن ...مبادئ وقيم

انا فى كافيتيريا بوتشيللى فى الأوبرا يوم الجمعة 19 اكتوبر من الساعة خمسة ...مين قال انا جاى...؟
طب اللى جاى ياريت يذاكر مقطوعة (كوكتيل) لعبد الوهاب...عشان نعزفها سوى http://www.sama3y.net/forum/attachme...0&d=1136943705
وياسلام بقى لو الأستاذ عادل يعمل لنا مفاجأة وييجى الأوبرا و يقول صولو الكمنجة معانا وأحنا ب العود نرد عليه ....أكيد ح تبقى هايلة
أستاذ / أحمد الأهلاوى والفنان/تامر عامر ...والكابير /أ. أحمد أرمندو ...ويااستاذ عمرو الهنداوى مالكش عذر بقى ده يوم جمعة....والموهوب الشاب /سيد محمود ومخرج الروائع الفنان /أحمد الأمير

ح أشارك فى جمعة "مصر مش عزبة" فى ميدان التحرير ...ثم أذهب الى الأوبرا ....أشوفكم على خير

[عزت شحاته]

نفسى احضر - مش عارف
نسيبها للظروف وربنا هيدبرها
انتوا وحشتونى جدا جدا

[إيمان.]

الأستاذ القدير عادل تحية وشكر وعرفان وتقدير على كل ماتبذله من مجهود كبير ...
من زمان مادخلت على المنتدى وتفاجات بما قراته في الصفحات الأخيرة ..
إستاذي الفاضل لاتدع أحد من الحاسدين يؤثر عليك وعلى تقدمك وازدهارك ..
فانت بشهادة الجميع انسان معطاء وصادق ومتواضع وفنان بكل ماتعنيه هذه الكلمة وأكيد أكيد ماراح نمل من رسالتك مهما كانت طويلة بل على العكس فهي تعكس خلاصة زمن جميل مليء بالفن والاصالة ونتمنى ان لاتنتهي رسالتك ..على كل بطلب منك ان لاتعطي اهتمامك لكل من يحاول أن يؤذي بسمعتك فأنت هرم من اهرامات مصر ومصدررائع نأخذ منه تدوينات الاغاني الخالدة ... وتقبل شكري وعرفاني ...

[salhi_haithem]

السلام عليكم ورحمة الله وبركاته

استاذ عادل هو جيد جدا انك تتكلم عن الاشياء التي تضايقك.. و اعلم انك على حق و هم على باطل و كلما زادت الهوجمات فاعلم انهم يعلمون علم اليقين انك برافيسور و معلم و استاذ و لو كنت "فارغ" بين ظفرين لما تكالبوا و هاجموك.. و اعلم ان لك احباب يدافعون عنك و عليك بكل شراسة و يأمنون بقدراتك و يقدرونك لشخصك اولا و لعلمك ثانيا..

وانا حقيقة لا اريد ان اتكلم على البايخ ايهاب ابو العلم المطلق و هو من عائلة موسيقية عريقة و كلام فارغ, و انا لم ارد ان ادخل معه في صراع لاني قادر اني اثبتله انه لا علاقة له بالموسيقية و معرفته بالموسيقى سطحية جـــــــدا و الدليل انه لو كان موسيقي لما كانت اخلاقه "صفر" لان الموسيقى تهذب الاخلاق, و الذي ليس له اخلاق مستحيل انه يكون موسيقي..و كما قال حبيبي محمد عبد المطلب يا حاسيدين الناس ملكم و مال الناس

ثانيا و هو الدليل الحاسم الذي يقلب كل الموازيين انه (ايهاب) لا يملك علم و لا يعرف الموسيقيين و طرق العزف ايام الزمن الجميل, و الدليل (مرفق) و هي مقدمة ليلة حب عزف كمان لن اقول عن اسم العازف لكن ما يهمني هو الطريقة في العزف و الاداء و هو مطابق بنسبة 90 بالمائة عزف و طريقة و اداء الاستاذ عادل, و هنا اتكلم بحكم اني اعرف و محيط بكل ما قدم الاستاذ عادل من معزوفات حرفا حرفا درجة درجة و لست اقارن في مستويات العزف لكن اقارن في الطريقة و الاداء , و هذا دليل دامغ لا يمكن ان يجحده احد, مع العلم ان العازف من الفرقة الماسية و عندي فيديو لعزفه و انا استخرجت التسجيل الصوتي من الفيديو تحسبا انه واحد يطلع و يقول اشك انه هذا العزف من احد عازفى الفرقة الماسية.. و هذا (التسجيل المرفق) دليل ان الاستاذ عادل من الفرقة الماسية و انه تربى و ترعرع في حضانة الفرقة الماسية و انه الطريقة و الاداء كان مشترك نسبيا بين عازفى الكمنجات.. و انا اتذكر جيدا عندما نبه الاستاذ عادل من الخلط بين عازف ايام زمان الفن الجميل اي الحقبة التى سبقتنا و عازفى هذه الايام من ناحية التكنيك و ذكر الاستاذ عادل انه عازف الكمان اليوم يقاس بكثرت التكنيك و سماه الاستاذ عادل عازف "عفريتي" و قال ليس هذا هو المقياس الصحيح الذي يقيم عليه العازف.. و اراد ايضا ان يعلمنا انه العازف الجيد هو من يعرف كيف يوصل الجملة كاملة و واضحة الى المتلقي دون أكل او انقاص معظم نغماتها, و الدليل حين رفعت فيديو جهاد عقل من اليوتوب اغنية "زمان يا حب" و علق الاستاذ عادل على الفيديو بقوله عازف جــيــد و ماهر لكن الاغنية فقدت بعض من روحها لكثرت الزخرف و التكنيك ..

ثالثا اردت ان اشكر اخي وائل و اخي الاستاذ طارق و اخي الاستاذ فؤاد العلمي و اخي ارمندو و ايضا الاستاذ عادل على المستوى الراقي جــدا في الحوار الذي دار او بالاحرى الاختلاف في كوبيليه اغنية "اهواك", يعني نقاش راقي و اسلوب حضاري و وعي و طرق جميلة في ادارة الحوار رغم الاختلاف و اختلاف الرأى. و الملفت للنظر انه لم يسقط ضحايا.. و الطريقة السلسة التي بدأ بها اخي فؤاد الحوار كانت جميلة و حضرية جدا و قال "انا اختلف مع الاستاذ عادل في الكوبيليه كذى و هذا لن ينقص الاستاذ عادل شئ بعد ما قدم لنا كم هائل من النوتة التي دونت بدقة شديدة" و هذا هو الاصل في الحوار لان الاختلاف وارد و وجهات النظر تختلف.. مش زي الافندي ابو علم مطلق الذي كتبله صفحة كاملة عن نبي الله موسى و الخضر و نبي الله سليمان و كيفية طلب العلم و ووو و هو ولا فاهم حاجة

اسف على الاطالة مع اني مازلت احمل الكثير من الكلام
و شكرا استاذ عادل على توضيح مقطع "طلع البدر علينا" و يارب تحط اغنية حبيبها لست وحدك حبيبها في البرنامج (ان امكن بطبيعة الحال) لاني طلبتها بتاريخ 05/07/2010 و من هنا المشاركة

اخوك هيثم الصالحي

[نور الصباح]

بسم الله الرحمن الرحيم
الأخ العزيز الغالى الفنان والمايسترو الكبير الأستاذ
عـــــــــــــــــــــــــــــــــــــــــــادل باشــــــــا صموئـــــــــــــــــــــــــــــــيل
سلام الله عليكم ورحمته وبركاته
وبعـــــــــــــــــــــــــــــــــــــد :
اســــــــمح لى أقولك بكل إخلاص وكل صـــــــراحة بأنك
إنســـــــان نادر الوجود فى هذا الزمان وقل وجوده فى كل
زمان وكل زمان
فأنا وخلال دراستى فى أعوام ( 1967 - 1968 - 1969 -
1970 - 1971 - 1972 ) وكان يقوم بتدريس الموسيقى
مدرس ( لا داعى لذكر الأسماء ) فى معهد المعلمين ببنى سويف
وعندما اشتريت أول عود فى حياتى ذهبت إليه حتى يضبط لى الأوتار
ويدوزنها ( مع العلم أنه من عازفى العود ) فرفض بحجة أنه لا يعرف
تخيل مدرسا للموسيقى و يعزف عودا ولايعرف طريقة تركيب الأوتار
ولا يعرف دوزانه - كيف ؟؟؟
وأرسلنى إلى شخص آخر مدعيا أنه هو من يقوم بدوزان عوده
فما كان من هذا الشخص إلا أن نعته بكل الصفات القبيحة وقام
مشكورا بتركيب الأوتار ودوزانه وشرح لى بعض الأمور بلا مقابل
مادى ولو طلب لأعطيته وقد عرضت عليه الأجر فرفض
ssssssssssssssssssssssssssssssssssssss
وأنت تقدم لنا الكثير من النوتات والنصائح والخبرات والمهارات
الفنية والحياتية متطوعا وبدون أجر - وهذا شىء عظيم وعمل
جليل لا يفعله إلا الكبار ( كبار النفوس وكبار القلوب وكبار الأخلاق
وكرام المنبت والنشأة )
والناس كما تعلم معادن منها النفيس ومنها الوضيع منها الذهب
والفضة والبلاتين ومنها الصفيح وخلافه وكم ستجد من مثل تلك
المواقف من أناس لا هم لهم إلا الحقد والضغينة على كل ماهو
ناجح ومفيد
فلا تهتم بما حدث ولا تجعله يشغل بالكم ولا تجعله يسيطر
على ذهنك وعقلك وتفكيرك فأنت قمة شـــماء عالية لا يطالها
أحد ولن يبلغ سموها أحد وأنت أحد معالم مصر منارة للعلم والفن والأخلاق النبيلة العالية يستضيء بها الرائح والغادى
و يشع ضوؤها على العالم كله أو كالأهرام لا يطالها الزمن بأى أذى وستظل عملاقا مهما تطاول الأقزام فلن ينالوا منك قيد أنملة
واجعل اهتمامك بالرسالة المقدسة السامية النبيلة والتى تحملها على كاهلك وتتحمل الكثير والكثير من أجل إبلاغها
للأجيال و الأجيال وهذه النوتات والنصائح والدروس سوف يتناقلها وتتناقلها أبناؤنا وأبناء أبنائنا
فســــــــر فى طريقكـ الميمون على بركــــــــة اللــــــــه
وشكررررررررررررررررررررررررررا
أخوكم
نور الصباح

[الألآتى]

أصدقائى الأعزاء

أنا أعلم أنكم جميعاً تحبون الأستاذ عادل .. وأنكم على إستعداد لبذل الغالى والنفيس من أجل الدفاع عنه

ونحن جميعاً نجل الأستاذ عادل ونحترمه ولا نتصور يوماً غيابه عن المنتدى

لكنى أرجوكم وألح فى الرجاء .. لا داعى للهجوم على شخص لم يعد موجوداً بيننا .. وربما لا يستطيع الرد أو الدفاع عن نفسه .. هذه هى أخلاقنا التى تربينا عليها جميعاً

أن نهاجم الشخص الذى يحمل سيفاً .. أما الذى سقط منه السيف .. فلا داعى لمهاجمته فإنه أصبح أعزل

[armendo]

المشاركة الأصلية كتبت بواسطة الألآتى

أصدقائى الأعزاء

أنا أعلم أنكم جميعاً تحبون الأستاذ عادل .. وأنكم على إستعداد لبذل الغالى والنفيس من أجل الدفاع عنه

ونحن جميعاً نجل الأستاذ عادل ونحترمه ولا نتصور يوماً غيابه عن المنتدى

لكنى أرجوكم وألح فى الرجاء .. لا داعى للهجوم على شخص لم يعد موجوداً بيننا .. وربما لا يستطيع الرد أو الدفاع عن نفسه .. هذه هى أخلاقنا التى تربينا عليها جميعاً

أن نهاجم الشخص الذى يحمل سيفاً .. أما الذى سقط منه السيف .. فلا داعى لمهاجمته فإنه أصبح أعزل

الأستاذ الفنان الخلوق محمد الألاتى
اشكرك على نبلك واخلاقك الكريمه واؤيدك فى اننا يجب ان نطوي هذه الصفحه ولا نعود اليها مرة اخرى ونلتفت الى ما هو اهم وهى هوايتنا المحببه الينا جميعا(الموسيقى) وننهل من فن وخبرة الأستاذ عادل والأستاذ ابو حسام والأستاذ احمد الجوادى وغيرهم من الذين يذخر بهم منتدانا الجميل ادامكم الله لنا جميعا.

اود ان انتهز الفرصه وان اطلب منك ان تحدثنا ولو بصوره مكثفه عن دور عازف الأيقاع فى الفرقه الموسيقيه وعلاقة المطرب بعازف الأيقاع وانا اعلم انك خبير بالأيقاعات والمقامات وايضا كما اشار على الأستاذ عادل فى رده على نفس السؤال وبالطبع اذا سمح وقتك بهذا.

مع ارق تحياتى

احمد (ارمندو)

[الألآتى]

المشاركة الأصلية كتبت بواسطة armendo

الأستاذ الفنان الخلوق محمد الألاتى

اشكرك على نبلك واخلاقك الكريمه واؤيدك فى اننا يجب ان نطوي هذه الصفحه ولا نعود اليها مرة اخرى ونلتفت الى ما هو اهم وهى هوايتنا المحببه الينا جميعا(الموسيقى) وننهل من فن وخبرة الأستاذ عادل والأستاذ ابو حسام والأستاذ احمد الجوادى وغيرهم من الذين يذخر بهم منتدانا الجميل ادامكم الله لنا جميعا.

اود ان انتهز الفرصه وان اطلب منك ان تحدثنا ولو بصوره مكثفه عن دور عازف الأيقاع فى الفرقه الموسيقيه وعلاقة المطرب بعازف الأيقاع وانا اعلم انك خبير بالأيقاعات والمقامات وايضا كما اشار على الأستاذ عادل فى رده على نفس السؤال وبالطبع اذا سمح وقتك بهذا.

مع ارق تحياتى

احمد (ارمندو)

أشكرك على رقيق كلماتك أستاذ أحمد .. وإن شاء الله يكون لنا حديث عن عازف الإيقاع ودوره الهام فى الفرق الموسيقية

وعموماً هناك موضوع جديد فى قسم الإيقاعات على هذا الرابط

http://www.sama3y.net/forum/showthread.php?t=98392

[عاصم المنشاوى]

الأصدقاء

غدا -الجمعة 19 أكتوبر- نلتفى فى كافيتيريا بوتشيللى بدار الأوبرا واللقاء الرايع لصالون الأستاذ /عادل صمويل

والدعوة عامة....الميعاد الساعة الخامسة ..أنشاءالله ......

نتمتى حضور الفنان المحاضر الموسوعة "محمد الآلاتى أبوحسام"....