إبداعات الشاعر طارق العمرى ، بدون تعليقات

[Tarek Elemary]

يا عُمرِنا اللِّى هانْ
يا حِلمِنا اللِّى كان
غَمِّسنا بيك الألم
حَلَّينا بالأحزان
***
و الصبر فيك كان دوا
بيطبب اللِّى إنكَوَى
و ف حرّْ صيفك نَدَى
منه الفؤاد إرتَوَى
***
العمر فات و إنقضَى
و الحلم صار أوهام
ضاع الأمل فى الفضا
من يأسه م الأحلام
حتى الشعور بالرضا
أصبح كلام فى كلام
***
و الحلم قوتْ الغلابة
قنديل فى آخر الشوف
و الظلم شرع الديابة
بكلام مافيهش حروف
وآيش يقلب الدنيا غابة
إلا الهوان و الخـوف
***
آه يا أمل أجيال
على شطه ما رسينا
وصفولنا طولة البال
شربنا و نســينا
و فوقنا على دى الحال
أغراب فى وادينا
***
وأمَّا الأمل يِتْسِرِقْ
يبقى مافيش بُكرَه
و بيَأسِنا نِتْحِرِقْ
و نموت بلا ذكرى
و لو الهوان يتعِشِقْ
يبقى الحبيب يكره
***
ياولاد أملكم هناك
آخر طريق الشَّقَا
صعب و حَصاه أشواك
لكن غُنَاه شَقْشَقَة
و يا مَجْدْ مين كان بناك؟
قال اللِّى عِشِقْ اللُّقا
و عجبى

[Tarek Elemary]

هذه خاطرة بين الشعر و النثر و بينى وبين نفسى كنت لا أعرضها ولكن ما تغلاش عليكم بشرط عدم معاملتها على أنها من أىٍ من قوالب الإبداع إعتبروها فضفضة ... مش احنا أصحاب برضه؟

*****
مش بحبك لأ
أصل كلمة حب
أصغر من شعورى
و انتِ ساكنة بين عروقى
و انتِ قاعدة جوة قلبى مربعة
و الضحكة فى الوش المنوَّر
زَىّْ بدر مزهزهة فوق الشفايف
و انتِ ساكنة الليل بدور
و انتِ مالية الفجر نور
و اللى بينى و بين عيونك مش غرام
و لا حب من حب البشر
أصل انتِ مش بشر
إنتِ جايبة من الملايكة
القلب و النور و الصفا
وإنتِ أسطورة ف حياتى
زَىّْ عرسان البحور حضنك دَفَا
إنتِ يا ضحكة نسيم الفجر
فوق ورق الشجر
إنتِ يا موجة حنان
تغسل شطوطى بحبها و تحضن رمالى
إنت يا بسمة حياتى
و ضحكة فى عمر القدر
*****
اللى بينى و بين عيونك
ما يساعيهش الكون كتابة لَمَّا أقول
علشان كده أنا مش بحبك
أصل كلمة حب عاجزة ...
عاجزة توصف للعقول
و البشر ... كل البشر
ما ألِّفوش كلمة تعبَّر عن شعورى
معذورين ...
علشان بشر ..... عشقوا بشر
و إنتِ أبداً مش بشر
لو شافوكى زَىِّ ما شايفاكى عينى
كات عيونهم
تشكر المولى اللى خالقك
و اللى نَزِّل واحدة من حور الجنان
أرض البشر
كانوا قالوا
زَىِّ ما باقول من زمان
ان شمس الدنيا بِترَوَّح
و تبكى كل ليلة
كل ليلة من بعد الغروب
غيرانة منك .. من جمالك
و البُكى يفضل مع نور الصباح
حبات ندى
فوق الغصون فوق الورق
كانوا قالوا
إن زّيِّك ماإتخلَقْش اثنين
وإن ضِحكِك
كان مطر فوق الصحارى
خَضَّرِت و بَقِتْ واحات
و إن هَمسِك
لحن أجمل من غناوى الطير
على شجر الربيع
*****
حُب البشر
فيه هجر و أسيَّة و عذاب
و فيه غرض و فيه حلاوة
حُب البشر
فيه قلب بيْدُق
و أيادى بِتِرْتِعِش و فيه قساوة
بس إحنا مش زَىِّ البشر
و لا حبنا زَىِّ البشر
لَمَّا نتقابل
نحس ان إحنا من ألفين سنة متفرقين
وأما نتفارق
نحِس ان احنا مش متفرقين
كل واحد فينا
ساكن جوة قلب التانى
ومضلل عليه
فى العينين صورة
و فى الودنين كلام
و حلم أجمل م الخيال فى عقلنا
لافى حِقد و لا خَطِيئة و لا نِفاق
لافى غيرة و لا دلال فيه إشتياق
علشان كدة أنا نفسى أألف ألف كلمة
فى كلمة واحدة
كلمة توصف حبى
و شعورى و أحاسيسى الجميلة
اللى مش زَىِّ البشر
أصل كلمة حب أصغر من شعورى
اللى غلغل و إنتشر
*****
أنا شايفك من بعيد
فدادين ورود مِتلَوِنة فَرْح ونعيم
وانا حاسس بيكى
نسمة صيف طرية
فوق عيونى و طيف كريم
و أنا فارشك ع الربيع
خضرة و زهور
و أحلى نشوة فى دنيتى
و أنا سامعك
ضحك طفل
و لحن أنعم من جناحات الفراش
بس و حياة اللى خالقك
آية لعباده البشر
كل شعر الدنيا
مش قادر يعبر عن شعورى
وعن هوايا
و اللى بينى وبين عيونك
حاجة تتحس بقلوب العاشقين
حاجة تفضل جوة مابين الضلوع
شوق وإشتياق و هوى وحنين
مهما مَرْ العمر بينا
و مهما راح الليل
و جَه بَدَلُه النهارمليون نهار ...
برضه حاسس بالحنين
مهما كنتى بين ضلوعى ...
و مهما داب عودك حنان
بين الإيدين
أنا مش بحبك ...
لأ دا كلمة حب دى
لاجل البشر
كلمة أصغر من شعورى
اللى غلغل و إنتشر

[Tarek Elemary]

وزنه ضايع حسه زور
حَرْفُه تَايِّه فى البُحور
فاكر انِّه رغم جَهْلُه
المعَرِّى و عب صبور
***


فاكر ان الشعر آفية
كلمتين بالسجع كافية
و ان حاولت تقولُّله كلمة
تسمع الأباحة شافية
***


يا سلام على تعبيراته
و لَّلا تمجيده لذاته
فاقد النور و البصيرة
صوته ساكن فى وداناته
***


صفر فى حروف الهجاء
لو بدأ ماله إنتهاء
تشوفه لو يمدح فى ذاته
ربنا يزيح البلاء
***


الحروف قهرانة منه
كان أملهم يوم يِفِنُّو
يعملوا أغنية حلوة
مش يعفرتهم بجِنُّه
***


حتى علامات السكون
فتح نصب ويش يكون
سيباويه مين يابنى وسع
نحــن مقبرة الفنون

للأسف الشديد صادفت أحدهم بهذا المنتدى و يا ليتنى لم أتواصل معه فأنا من اخطأ و ليس لى من عذر

[Tarek Elemary]

فى هذا المنتدى تنسمت الفن و إستنشقت الإبداع و تبادلت المداخلات مع عظام المنتدى كلٍ فى مجاله و أشهد أنه قلما يجود الزمان بمثلها صحبة و تجتمع هكذا كوكبة بصفاءِ نفسٍ يلمسه الضيف الذي يمر مرورا عابرا بالمنتدى و شرفت بهم أيما شرف فكانت هذه المشاكسات و المداعبات:

طلّْ الصفا و النور ... من طاقة اللاب توب

فرسان بنات الحور ... المعجونين بالحب

و العشق كاس بيدور ... لقيتنى هايم صَبْ

يابو زهدة صوتك دفا ... وياك بيحلى الكلام

يا كمال يا رمز الوفا ... يا منجم الإلهام

القلب بيكم أنس ... و اتبددت أوهام

[Tarek Elemary]

نَفْسْ الكَلام عَنْدِنا ... نِقْراه و يِجْمَعْنا
يوصل لإيد عمَّنا ... يبقاله مية مَعْنى
يا حالة بِتْعُمِّنا ... و هواه بيجمعنا
بتعمل ايه قول لَّنا ... نسِّيتنا أوجاعنا
غويناك يابوى كُلِّنا ... إشجِينا سمَّعنا
حروف كلامك غُنَى ... شَنِّفْت أسْمَاعْنا
من لهفة الأشواق ... جايلك و أعدى بحور
حبك بدأ فى بولاق ... عطَّر هوى دمنهور
صابر و أنا المشتاق ... لمَّا يصيبنى الدور
من زمرة العشاق ... و أحظى بطاقة نور
عقلى اللى تايه فاق ... بكلامك المسحور
يا كعبة الأخلاق ... حواليك قلوب بتدور

[Tarek Elemary]

تشى جيفارا كان زعيم ثورى وكان فعلا ولد
و انت يا سِيِدنا أمير فى الشعر زيك مااتولد
نديم حكيم مصرى صميم و حجته تقنع بلد
ناعم حرير قلبه الكبير يساعى ماتعدش عدد
حليم صحيح لكن صريح ساعة الوغى تلقاه أسد
مصرى و هاجر بس جدره جنب شط النيل وتد
حمال أسية ع الكتاف تقولش كان جبل أحد
هايم بآل البيت و عاشق للنبى ماشى يقول أحدٌ أحد
أنا بيه بقيت صوفى متيم زَيُّكو لكنه ليه عنكم شرد
سألت كل الناس عليه قالولى أبدا لم ورد
ده أصله زى البدر ييجى و يختفى ويرجع هلاله يتولد
إسهر ليالى نص كل شهر عربى حتما ضرورى يتوجد
من يومها و انا سهران يا عمى بس ليه طال الأمد؟
ارجع يا سيد الكل طل بنور و فل و قووول مدد
مدد يا سيد الناس تعالى ف حر ليل الصيف برد

[Tarek Elemary]

و بالبلدى بقى هاقول
================= ===========

على فَيْن يا شيخ الطَرِيقَة وِاحْنَا لِيِكْ مَجَاذِيِب؟
مَا تْسِيِب قُلُوبْنَا فِى ضِيِقَة يابُو زَهْدَة لمَّا تِغِيبْ
دَاليُوم فى قُرْبَكْ دِقِيقَة و فْرَاقْ جَنَابَك رَهِيِبْ
طَبْ كُنْتْ قُوُلِ الحقيقة دا الحُبْ قِسْمَة و نَصِيِبْ
_______
لمَّا انتَ ناوى تِسِيبْنَا شوقْنَا لِوَصْلَكْ حَارِقْنَا
كَان لَيْه لِحُوشَكْ تِجِيبْنَا تِغْوِينَا ثُم تْفَارِقْنَا
حَسِّسْتِنا انَّكْ حَابِبْنَا دُوبْنَا و هِمْنَا و عِشِقْنَا
فَجْأَة نْلَاقِيكْ قَالْ قَالِبْنَا و بْسَهْمْ هَجْرَكْ رَاشِقْنَا
_________
فِى الْعِشْقْ دَهْ كاس و دَايِّرْ والشِعْرْ فى الهَجْر سلوى
دا ما كَانْشْ إِحسَاسْ و هَاجِرْ و لا كان مغامْرَةْ و نَزْوَةْ
طَبْ حتى عُوُد لِيِنَا زَايِّرْ يِحْلَى الأمل بيك و يِقْوَى
خُوفى تدور الدوَّايِّر تِسْقِيك مرارة و قَسْوَة
______
و الله ما تهون علينا يابو وجد يابو طَلَّه عنبر
لو يِقْسَى قلبك علينا هَوَانَا بِيْزِيد و يِكْتَر
قِسْمة و لَاهِى بإِيدينا مكتوب علينا و مِسَطَّر
لو عُدت هانقِيدها زِينة و يفوح هواك المعطر

[Tarek Elemary]

الله يا فَنَ بترا الجميلْ

بحرفٍ شجىٍّ بهىٍّ نبيلْ

يزينك يوسف من جُبِهِ

وراثة جيل من بعد جيل

-------

ويرسم شَفَقًا عِنْدَ الأصيلْ

و غصنًا مُدلىً رقيقًا طويلْ

ينافِسُ (حافظ) فى حبِه

و هو الأثيرُ بِعشْق النيل

-------

ألا يا يوسف لا فُضَّ فُوك

و سلمت يمينك يابن الملوك

ويا هاشمى جميل المحيا

صِدقُكَ بادٍ بِدونِ الشِكُوُكْ

[Tarek Elemary]

تنساب منكِ المَعَانى

و لا أراكِ تُعانى

و الحرفُ طوعُ اليمينِ

و نَظْمُه قدْ دعانى

***

كالنَّحلِ فوق الزهورِ

فلا تَمَلِّ مرورى

فكيف و العطرُ عِطرُك؟

يفوح بين السطورِ

***

أعُبُّ ما أرتوى

و بلوعتى أكتوى

سَلِمَ اليراعُ و جاد

قولى فلن أرعوى

[Tarek Elemary]

فى الحب رائد ... فى الإنسانية دليل

و كلامه شاهد ... و مهما قلت قليل

و فى الظهور زاهد ... مع إنه بدر ف ليل

إحتار دليلى معاك ... سكن القناطر دوح

من يومى ماشى وراك ... تلميذ فى فن البوح

سبحانه مَنْ سوَّاك ... نسمة ترد الروح

لما الوصال ع الميل ... بالشكل ده حاله

يبقى اللُّقا يا جميل ... يِهْنى لِمِين نَاله

نسمة فى وقت أصيل ... يا بِدْع موَّاله