الأدباتى

[حمدى شبانة]

ف الدنيا بيدوم بس الخير
وسيرة اللى قلبه كبير
لكن اللى من إخواته يغير
سيرتُه بتبقا صحيح مُرَّة
الله الله يابدوى جاب اليسرا

[حمدى شبانة]

صحيح غريبة أوضاعنا
عدم المحبَّة مضيَّعنا
يوماتى بتزيد أوجاعنا
ياهلترا فيه إيه بُكرة
الله الله يابدوى جاب اليسرا

[حمدى شبانة]

أدباتى وسحنِتى باسمة
وشفايفى دايماً مبتسمة
مؤمن بحظِّى وبالقسمة
والرزق على رب القدرة
الله الله يابدوى جاب اليسرا

[حمدى شبانة]

أمِدْ إيدى لو فيه صُلح
وباقى أنا عالعيش والملح
أصل المحبة أساسها الصفح
راح نتسإل يوم الآخرة
الله الله يابدوى جاب اليسرا

[حمدى شبانة]

الأدباتى وشخصيات تاريخية
1 ـ سيدنا محمد
ــــــــــــــــــــــــــــــــــــــــــــــــ



دقَّق ف قولى شوف معناه
كلامى عن ( رحمة مُهداه )
أتى بكتاب فيه شرع الله
سيرته ليوم الدين عَطِرة
الله الله يابدوى جاب اليسرا

معروف بإنُّه ( صادق وأمين )
وبعثُه ربنا للعالمين
عانَى كتير ويَّا منافقين
وكدِّبوه كل الفَجَــرة
الله الله يابدوى جاب اليسرا

مبعوث من المولى تعالَى
بكتاب كريم ويَّا رسالة
ظهوره مَحا كل جهالة
الرب نصره على الكَفَـرة
الله الله يابدوى جاب اليسرا

[حمدى شبانة]

شخصيات الأدباتى
أحمد شوقى
ـــــــــــــــــــــــــــــ

يسعد مساكم يا حضرات
كلامى عن بيه م البهوات
كتاباتُه معروفة علامات
ف الشعر له باع وشُهرة
الله الله يابدوى جاب اليسرا

من غير مانتعب ونفكَّر
مع بعضنا راح نِتذكَّر
( وُلِدَ الهُدَى ) هيَّة الأشهر
كمان كتب عن كيلوباترا
الله الله يابدوى جاب اليسرا

حقول لكم والسر ف بير
بدون ( إِمارة ) لكنُّه أمير
ف الشعر قدِّم ياما كتير
وشُهرته ( أمير الشُعرا )
الله الله يابدوى جاب اليسرا

[حمدى شبانة]

شخصيات تاريخية
عبدالله النديم
ـــــــــــــــــــ

أدباتى أنا ف الموعد جيت

كلامى عن شخصية ياريت
لو أبقا زيُّه شُهرة وصيت
دا أديب وشاعر بالفطـرة
الله الله يابدوى جاب اليسرا

الليلة جايب شخصيَّة
زجال من الأدباتيَّة
أيام الثورة العُرابية
أسس مجلات لها شُهرة
الله الله يابدوى جاب اليسرا

( تنكيت وتبكيت ) و ( المسمار )
مجلِّتين صوت للأحرار
أدباتى يِنشِد ليل ونهار
وشُهرته ( خطيب الثورة )
الله الله يابدوى جاب اليسرا
ــــــــــــــــــــــــــــــــــــــــــــــ

[حمدى شبانة]

شخصيات الأدباتى
ــــــــــــــــــــــــــ
بيرم التونسى

أديب أصبَّح وأمسِّى
أقولها وأعلِّى ف حسِّى
شخصية عُمره ماكان منسى
وف الزجل قيمة ودُرَّة
الله الله يابدوى جاب اليسرا

أغانيه وأشعاره يا أحباب
دايماً بتسحِر الألباب
( هوَّة صحيح الهوى غلاب )
أعماله حلوة مُفتخـرة
الله الله يابدوى جاب اليسرا

( القلب يعشق كل جميل )
أهل الهوى .. شمس الأصيل
كلام عشقناه جيل ورا جيل
( يا أهل المغنى ) خدوا عبرة
الله الله يابدوى جاب اليسرا

كتب لنا ( عزيزة ويونس )
و ( سيرة الظاهر بيبرس )
مصرى وجدُّه من تونس
أستاذنا إنتم بيه أدْرَى
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــــــــ

الإمام الشافعى

أنا الأديب والمولى مُعين
إقروا معايا يا مُتابعين
عن شخص مولود بفلسطين
فى غزَّة الصامدة الصابرة
الله الله يابدوى جاب اليسرا

فقيه وصاحب مجلس علم
ألِّف كتاب ضخم بيضُـم
أراؤه وسمَّاه ( الأُم )
ومذهَبُه علامة كُبرى
الله الله يابدوى جاب اليسرا

ترك لنا ف الشِعر ديوان
أبياته سايرة ف كل أوان
ومسجِدُه فى مصر كمان
وعلومه بينَّا مُنتشـرة
الله الله يابدوى جاب اليسرا
ـــــــــــــــــــــــــــــ

[حمدى شبانة]

شخصيات الأدباتى
ـــــــــــــــــــــــــ
عمر بن الخطاب

أدباتى والشعر هوايتى
سعادتكو مقصدى وغايتى
إنتم يا أحبابى مرايتى
ومعايا الليلة وبكرة
الله الله يابدوى جاب اليسرا

شخصية الليلة يا صايمين
خليفة م الخُلفا الراشدين
أكيد حتعرفوا يطلع مين ؟
علشان ( مبشر م العشرة )
الله الله يابدوى جاب اليسرا

قوى وكان بيخاف ربُّه
التقوَى نابعة من قلبه
أمَّا ( الفاروق ) كان لقبُه
و ( العدل ) دى صفتُه الكُبرى

الله الله يابدوى جاب اليسرا