من أشعار سعدالشرقاوى ـ انا الفلاح وأعمال أخرى

[NAHID 76]

بسم الله الرحمن الرحيم
عمنا جميعا سعد الشرقاوى
والله حضرتك كل كتاباتك زى ما بنقول بتيجى على الوجيعه
وفعلا كما قلت ان كان كبيرها مع الديابه قاعد
والديب الكبير جاى قريبا أم الدنيا شفت
قول عشت وشفت
تحياتى

[سعدالشرقاوى]

اخى الاستاذ/طارق
كلمات بسيطه من فيض بحركم
ارجو ان تتحملوها

قريت فى شـــعرك نــــغم ,,,,,على قافيتك غنّيت
(على فين ياشيخ الطريقه),,,,,و(مدد يااهل البيت)
,,,,,,,,,
انا( مش بحبّك) وبس ,,,,,انت حبيب الروح
من( قبل ستين سنه) ,,,,,قبل الحمام ماينوح
,,,,,,,,,
عــربى معاك عزّه,,,,,ضافت علــيك احمال
بكّيــتنى على (غزّه),,,,,بعد الصّوان ماانشال
,,,,,,,,,
قلمك لجام فارس,,,,,مرهــون على همسه
حببتنى ف( مارس),,,,,والسّر يوم خمــسه
,,,,,,,,,
(لاسكندريه) رساله,,,,,جابت معاها الخــبر
(واليــــتم )له حاله ,,,,,وسوق العروبه جبر
,,,,,,,,,
(جـــــفارا )ودمنهور,,,,,وكـلام لمحــبوبى
على حبّنا الماسور,,,,,فين( جرح مكتوبى)
,,,,,,,,,
سارح وافــكارك ,,,,,تلمس سنـــين عمرى
وآصحى من( الغربه),,,,,على نغمة العمرى
,,,,,,,,
ياعم طارق لو سامعنى,,,,,نجمكم فى الشعر لامع
هوّ ايه الشـــــعر يعنى,,,,,غير كلام م القلب طالع
,,,,,,,,,
الصحبه دايما تحــلالكم,,,,,وهدفكو ايه غير حب الناس
وان جينا نحسب اعمالكم,,,,,نحتاجو يومها متين كراس
,,,,,,,,,
عاوز اقـــول لك يامه ويامه,,,,,وعشان وقتك غالى ياعمى
كلام فى كتابتك يسوا علامه,,,,,وخايف اكون تقّلت ف دمّى
,,,,,,,,,,

[NAHID 76]

بسم الله الرحمن الرحيم
الشاعر سعد الشرقاوى
قول كمان وكمان
هديه رائعه من انسان ذواق
الى شاعر ثائر متمرد بس يستاهل
مبروك طارق
تحياتى

[Tarek Elemary]

يا عم سعد منك لله ....
جرحت شهادتى ليك و صعَّبت علىَّ الرد و خلِّيتنى فى نص هدومى كما يقال
لكن مش مشكلة إحنا فى صيف و طالما الشورت شرعى و يوارى العورة يبقى خلاص أرضينا الرب و هو منتهى الأرب
لا أجد من الكلمات ما أستطيع به التعبير عن عرفانى و عظيم إمتنانى
و ربنا يديم المعروف
شكراً يا عم سعد

[Tarek Elemary]

المشاركة الأصلية كتبت بواسطة NAHID 76

الى شاعر ثائر متمرد بس يستاهل
مبروك طارق
تحياتى

المقامة الناهدية
و لما كانت ليلة البارحة و العيون سارحة و البال شارد و الإنصراف للبيت ليس بوارد و أنا فى محل العمل أجاهد
قررت الدخول للسماعى لنسيان أوجاعى و لأفرد فى بحر الخيال شراعى حيث تكثر لدى الدواعى و قد كان ما كان و ضغطت على العنوان و دخلت بلا إستئذان.
فإذا بالعزيزة ناهد تدل عليها الشواهد على العام و الخاص أرسلت بعض الرسائل تمازح و تسائل و الحق أنها تستاهل فقمت بالرد السريع مقتطفا من الحسن البديع و من الكلم الوديع محاولا رد الكرم بعد يوم منصرم
و أرسلت لها رقم الهاتف لنتحدث و نتكاشف ففوجئت بظلها الوارف و حديثها ذو الزخارف و صوتها الحميم الجارف فكان لقاءا على الهواء خاليا من كل هراء مؤكدا على حب المنتدى و الولاء و مترفعا على الجهلاء و حديثا باسما على من راح و من جاء بلا نرجسية أو خيلاء
فحلت علىَّ السعادة و زادت الإرادة و قويت العزيمة و زاحت الشعور بالهزيمة و أنارت الدرب بنور الرب و أخوى الحب فأردت أن أشارككم قصتى و لا أخفى فرحتى و عظيم سعادتى، و تبقى الأمانى بلقاء يضم باقى الأصدقاء كمال النور قاطن دمنهور و رائد الشاطر بن القناطر و الدكتور أنس أُنس من إئتنس و الحبيب إسلام المشرف الهمام و باقى الشلة فى أبهى حُلة
وإلى الله نتضرع أن نجد المتبرع ليتبنى المشروع و يلم الجموع فتضاء الشموع
و أطيب المنى و أرق تحياتى

[سعدالشرقاوى]

شم النسيم
شم النسيم لمّا جه شوفت العـجب فى الناس
الشمس نورها وصل شربوا البصل بالكاس
حتى الفسيخ اتنـــفخ خــــللا النفوس عامت
والعركه قامت مابين مصران وبنــكرياس
00000
البيـــــضه وصلت دولار لو يعنى فسـدانه
ولمون عصــــيره مرار والنفس حمضانه
والحـــــــرب دايره مابين الرنجه والامعاء
والمعده اصلا فى عــــيد الفطر تعــــبانه
00000
ولكلّ واحد مكان مخــصوص ح ياكل فيه
وحماته ساءله المدام ايه اللّى نفــــسك فيه
هاتى الصحاب والكـــلاب والقــطّه ويانه
واتغدى ويّا العيال واللى يفـــــيض ارميه
00000
عايزين مواصله عــشان تنقلنا او حنطور
وتجيبنا اخر النهار تعرضــــنا ع الدّكتور
احسن عليهم زحام والحجز ع الاســـبوع
وعيالنا ممكن تجوع على بال ماييجى الدور
00000
حتى حمـــــيده اللى كات حالته على قده
وعياله دســــته ودين سبحان من ســــده
سمع مراته صــــــدر منها يمـــين بطّال
بسرعه لم العـــيال وسنار الغـــرام شدّه
00000
هات كل حاجه شـكك يعنى لاخر الشّهر
عايزين نشمّوا النّسيم كفيانه كسرة ضهر
ساعة ماتفرج قــوام ح نلفوا ونســــدّدوا
وان عيشنا نستوردوا حتى النكد والقهر
00000
احســن مكان ح يتاويك وانت ولـد لامع
تعــجبنى مدّة اديك على عـتـبة الجـــامع
قضيت حياتك مع مراتك وشورها عليك
والفقر ينده عـليك وعامل لى مش سامع
00000
يابو العيال شمّهم وبلاش نســــــيم ينشم
نظرك لفــــوق يلوحك ولا حد بيك يهتم
خللّى المدام تسـندك فى خلاصة الموّال
وعيش وربى العـــيال وخللّى عندك دم
مع تحيات/سعدالشرقاوى

[Tarek Elemary]

المشاركة الأصلية كتبت بواسطة سعدالشرقاوى

شم النسيم

يابو العيال شمّهم وبلاش نســــــيم ينشم
نظرك لفــــوق يلوحك ولا حد بيك يهتم
خللّى المدام تسـندك فى خلاصة الموّال
وعيش وربى العـــيال وخللّى عندك دم

مع تحيات/سعدالشرقاوى

تحياتى يا عم سعد
الموضوع شيق و المعالجة بأسلوبك المعتاد الخاص بك و المسجل باسمك ممتعة
الفينالة (الخاتمة) تعجبنى كثيرا لكن لو العيال مش نضاف بقى يعمل أيه؟
فكرة .... علسان تبقى النضافة إجبارية
تحياتى و شكرا

[سعدالشرقاوى]

استاذنا/طارق
اعتقد انّ رائحتهم اكيد
ح تكون افضل من كلّ الاصناف
الموجوده فى القصيده
من بصل- وليمون حامض -وفسيخ -وحماته

[علاء طه ياسين]

عمي وحبيبي سعد الشرقاوي
البيـــــضه وصلت دولار لو يعنى فسـدانه
ولمون عصــــيره مرار والنفس حمضانه
والحـــــــرب دايره مابين الرنجه والامعاء
والمعده اصلا فى عــــيد الفطر تعــــبانه
ما اظنش حد من الشعر سبقك للمعني ده .. بس قول لي انت مش بتحب الرنجة ولا ايه
بترسم حياة الناس ببساطة شديدة ... فنان بصراحة ..
تحياتي ليك
علاء

[عفاف سليمان]

اخى الكريم الاستاذ سعد
بعد صباح الخير على حضرتك واهل سماعى الكرام الطيبين الاخيار
حبيت اجى اعلق على كلماتك التى لا مثيل لها من كلمات
والله انا نفسى وقعت فى شرك الذقون والكلام بالله والرسول
وأُعجبت بشخصيه تتكلم عن الرسول والدين
وكنت بتمنى ان اتعرف على اسرة هذه الشخصيه
وعندما تعرفت على الاسره يا هول ما سمعت\
من الزوجه وبناته
يأخذ مال زوجته ويحوش ماله
ويأخذ من بناته مكافأة الجامعه لانهن متفوقات فى دراستهم
حتى ارض زوجته كان يريد ان تكتبها باسمه بالضرب والاهانه
ورغم ذلك دارس معى المواريث ويعلم انه لو مات سوف يدخلون اهله فى ميراث زوجته وبناته
طيب او ازاى انت بتتكلم عن الحق والرسول والله
وانت لا تطبقه فى بيتك مع بناتك
والله يا استاذ سعد
كرهت هذا الشخص لدرجه اننى اكاد اتقيىء حين رؤيته من ريائه وكذبه
ابعدنا الله عن هذه الشخصيات اللهم امين
والله انا لا اكره احد فانا احب الناس فى الله جميعا
ولكن على قدر اندهاشى واعجابى بهذه الشخصيه
على قدر اشمئزازى منها بعد علمى بامور كثيره وهذه اقليه مما فعل
واللهم جنبنا الرياء
ولك خالص تحياتى والجميع
اختكم عفاف