موسيقى الشعر - دروس في علم العَروض

[سمعجى]

أخي يونيكورن
الشهير ب ( محمد أبو مندور )

يا باشا إنت ( تتفذلك ) ماشاءت لكَ الفذلكة ،، بل و عليكَ بال( الأنتكة ) ..

و قد أضفتَ لنا درساً عن الهمزة التي يحارُ فيها خلق الله ،،
و باب ( الهمزة ) في اللغة كبير ، و ما ذكرتـَه هو المفهوم المبسط اليسير ..

أشكرك جزيلاً

[سمعجى]

أختنا العزيزة سامية

ياله من هواءٍ هَفهَاف ،، يتهادىَ من هيئةِ الإشراف

يا مدام سامية ،،
حضرتك تتأخلري في المواصلات براحتِك ،،
و تيجي تفتشي عليا كمان ، باعتبارك ( حكومة )

بس انا لمحتِك في الكافيتريا بتشربي نيس كافيه ، و رائد عِمِل نفسه مش شايفِك

نيجي للجَدّ ..

إجاباتِك زىّ الفـُل ، إذا أخذنا في الإعتبار تنوين الكلمات ( قلبٌ ،، حُرَّة ٌ ،، قُرَّةٌ ،، حنانٌ )

تحياتي للحكومة ( قِسم الأيدي الناعمة )

[سمعجى]

أخي العزيز مصطفى الحيدوكي ..

أشكرك جزيلاً ، و أتشرفُ بأن تكونَ معنا أيها المثقف ،،

أنا سايب موضوع الحلول و الإجابات ( لضمير الطـَلـَبة ) ، و كفاية إحساس ( الغشاش ) بتأنيب الضمير ، سيخاصمُ النومُ جفونـَه ، و سيرىَ كوابيساً تلاحقه ، و صدىَ أصواتٍ رهيبة تطارده قائلةً :
ليس لكَ ( عذرَن ) أين تذهبُ من رب ( السماوات ) ، هل انتَ بلا ( قلبـِن )

مع تحياتي

مع تحياتي

[سمعجى]

حبيبي الدكتور محمود
أحلى تحية لحراس الثروة السمكية
سيادتك مدير المدرسة اًصلاً ،،
و استفسارات سيادتك أوامر ،، بس خايف الطلبة يتخضوا لما يلاقوا كلمات ( حُشرومية ) على شاكلة ( المقتضب ، الزحاف ، المجتث ، الأوتاد ، الحشو ) ،،
و تبص تلاقيهم زوَّغوا وراحوا سينما من ( ستة لتسعة ) ، وجايز يمدغوا لبان تشكلتس كمان ، و يضيع مستقبلهم

تحياتي لعالِمِنا الكبير

[سمعجى]

الأخت العزيزة ماردة ،،

أشكركِ على ( الأدبِ الجَمّ ) في مداخلتِك ،، و قد توقعتُ ( صفاءَ النِية ) في التنوين ،، فتـَنـَوَّني و نـَوِّني ،، و في كتابةِ العَروضِ يا أختي ( تـفـَنـَّني )

و أشكركِ على تحياتِكِ العَطرة ، و التي ( تـَبَرّفـَنَ ) بها مسائي

مع خالص تحياتي




* إيه رأيك في – تبََرْفـَنَ – دي يا دكتور محمود ،، شفت ( إستيلاد الألفاظ ) و نحتها من الديكشيناري

[سمعجى]

هالة العزيزة ..

حاشاكِ أن تغشي ،،،
أما حكاية (وعموما هاتتفرج بقى على الشغب اللى على اصله بس مش فى محراب العلم ده

زمان أيام ما كنا طلبة ، كانوا يأتوننا بمراقبين للإمتحانات من خارج المحافظة ، و المراقب الذي لا يتساهل في اللجنة ، ينتظره مجموعة من الطلبة خارج اللجنة ، و يوسعونه ضرباً

باقول لِك إيه .. أنا مش مروَّح النهاردة ،، يا إما نروح ( القِسم ) أحسن

شفتي ،، كنت هانسىَ تصحيح ( الواجب ) ،،
كله صح ،، مبروك يا لولي ،، إمتياز

بس بيني و بينِك ( بيكي ) هذه ليست صحيحة ،، لأننا ننطق الباء في الكلمة ( بـِكِ ) في مسافة زمنية واحدة ، بينما الكاف ( إذا اعتبرنا أنها في نهاية جُملة ) فنـُشبـِعُها نـُطقا ،
مثل ( لقد ازددنا شرفاً بكِ ) ، فيكون النطق العَروضي الصحيح للكلمة هو ( بـِكي )

مع تحياتي يا أختي العزيزة

[سمعجى]

عصفوري الطائر

هيّ العصافير بتدخن !!
العصافير تزأزأ ،، ترفرف ،، تلقط الغـَلة ،، تحُط على غصن شجرة
لكن تدخـَّن ؟!

عموماً أنا مدرس ( ليبرالي ) ،، و باسمَح لنفسي بالتدخين أثناء الحصص ،،
أما أنت ( باعتبارك عصفور ) فمسموح لك بتدخين ( السحاب ) و آهو كله دخان

[رائد عبد السلام]

أستاذنا الغالي وعمنا : سمعجي
انا قلت انتظر لما كله يحل التمارين..وبعدين آخد من كل بستان زهرة ...عشان تكون إجابتي صح لازم ( أستلهم ) حلول الزملاء ..ودي حاجة متعود عليها من أيام الثانوي والجامعة
سماوات = سماواتن
قلب= قلبن
حرة = حررتن أو ... حررة ( قصدي حركة سكون حركة سكون )
بصراحة يا أستاذ كمال شرحك سهل ممتنع والله..
وبخصوص حكاية السندويتشات ..أنا صيتي بقي زي الطبل في الأكل مش في الفهم ..وطبعا يا أستاذنا العقل السليم في الجسم السليم..ده حتي كل الأطفال كانوا أهلهم بيضربوهم عشان ياكلوا ...ما عدا أنا ...أهلي كانوا بيضربوني عشان ماآكلش !!

[صلاح السويفي]

أستاذ كمـال عبد الرحمن

أهو جه اليوم اللي قلت لك عليه ...
عندما أجلس أمامك واضعا ذقني بين راحتي وأنا جالس (مستربع) بلغة القاهريين
و(مصطربع)الضواحي والأقاليم و(مجعبذ) بلغة أجدادي ..

مش قادر أفتح بقي بكلمة وأنا أتابع كل أحاديثك فكل حديثك
كما كل أغاني أم كلثوم لوقالت (ريّان يافجل) فهو جميل ..

احتراماتي..أستاذنا ..

[هاله]

زمان أيام ما كنا طلبة ، كانوا يأتوننا بمراقبين للإمتحانات من خارج المحافظة ، و المراقب الذي لا يتساهل في اللجنة ، ينتظره مجموعة من الطلبة خارج اللجنة ، و يوسعونه ضرباً

يادى الكسوف ياولاد استاذى كان بيضرب المراقبين اللى مش بيغششوه فكرتنى ايام امتحاناتى بتاع الثانويه العامه وانا كنت معاهده نفسى ماغشش ابدا مهما حصل وكان فيه امتحان كنت بكره مادته وكان على حظى جاى صعب جدا المهم بعد انتهاء تسليم الورق قعدت وكنت متضايقه جدا لانى كنت متاكده انى شايلاها شايلاها فلقيت المراقب جايلى وكان من البحيره وعرض عليا كل اوراق الاجابه بتاع زميلاتى اختار اللى تعجبنى وانقل منها فطبعا رفضت بشده وشكرته وهو اللى فضل يتحايل عليا علششان مسقطش فى المادى لكنى فضلت على اصرارى ورفضت وسبحان الله زميلاتى اللى غشوا اثناء الامتحان شالوها وانا وسبحان الله نجحت تخيل ؟
تقوم تيجى تقولى حضرتك ببساطه بتضربوا المراقبين اللى بيرفضوا يغششوكوا ليه كده يااستاذى

مثل ( لقد ازددنا شرفاً بكِ ) ، فيكون النطق العَروضي الصحيح للكلمة هو ( بـِكي )

اقولك على سر ماحدش يسمعه انا عارفه ان كتابه كلمه بك بالاسلوب اللى كتبت بيه كان غلط
بس هقولك حاجه اوى ماجيت اجاوب قلت انها هتبقى بيكى لكن مع شويه تفكير بسيط لقيتنى غلط طبعا لكنى حبيت انى اكتب اللى فكرت فيه علشان ماتفتكرش انى شفت الاجابات السابقه لاخوانى واخواتى
ثم تعالى هنا وقولى اشمعنى يعنى سى عصفور الى سامحله بالتدخين وعدم حل الواجب وقاعد تطبطب عليه كده هو مش تلميذ زينا ولا ايه ؟