طلبات نوتة أ / عادل صموئيل الجزء الثانى

[عزت شحاته]

الف شكر يا باشا
ع الهديه الجميلة ( حلاوة شمسنا )
=========================================
لى طلب واتمنى ما ترفضهوش
نوتة ( دموع فى عيون وقحة ) تتر المقدمة
https://www.youtube.com/watch?v=9_68qhzY30A

انا عارف ان حضرتك مش بتحب قوى شغل عمار الشريعى عشان كتر خطوطة وتشبيكاته اللى ف احيان كتير بتخفى اللجن الاساسى او الجملة المقصوده
لكن غصب عنى دى النوتة التانية اللى طلبوها فى مسابقة
وكل المدربين بيصرخوا ع النوتة ومش لاقينها
ياريت حضرتك تلبى طلب المدربين الغلابه
وليك كل الشكر مقدما
اسمع التسجيل ده معمول على فؤقة شوف كام خط لحنى والمايسترو شغال من النوت الاصلية بتاعة عمار الشريعى معرف توصل اليها ازاى وما ينفعش تتعزف غير كده لأن الجملة اللى انت بتسمعها بتبقى كذا جملة تحت بعض ولو كتبت واحدة منهم لوحدها حتطلع حاجة تانى غير اللى انت بتسمعه واللى يسمعها يحسها غلط انت فاكر اللى حصل السنة اللى فاتت فى اغنية فيها حاجة حلوة ؟ انت طلبتها وانا دونتها وكلعت اول جملة زى ما انا سماع بالضبط وانت قلت الجملة دى غلط لنى مدون جملة بتتكون من كذا خط لحنى مع بعض ولما بنتكب خط واحد منهم بتطلع حاجة تانى غير اللى مسموع واللى يسعمها يحسها غلط انى كاتب غلط يعنى طيب انا اجيب لنفسى الكلام ليه ؟







https://www.youtube.com/watch?v=sE4GAlBfi9o

[عمرو الهنداوي]

أستاذ عادل "دموع في عيون وقحة" موسيقي مهمة فعلا .. أرجو حضرتك تدوينها رغم صعوبة تدوينها لكثرة التوزيع فيها .. بس حضرتك عادل صموئيل

إليك الملف

كل التحية والتقدير

ياعزيزى عمرو
انت شفت الاخ اللى فى نوتة رسالة من تحت الماء لما كتب ان النوتة مش مطابقة للأغنية ... لما انت ماكتبتش الصولو بتاع الكمنجة والاكوردات بتاعة الجيتار عشان النوعية دى حتى فى الفرقة الماسية مش بتتكتب يعنى انا عزفتها مع الفرقة الماسية والنوتة مكانش مكتوب فيها صولو الكمنجة وعمر ما كتبنا اكوردات الجيتار دى اجتها شخصى للعازف نفسه ... المصيبة او الكارثة ان ممكن عازف مبتدىء بيفتكر ان لما اكتب صولو كمنجة زى ده حيعرف يعزفه او صولوا زى ماليش امل فى الدنيا دى ... دى صولوهات محتاجة مهارات معينة .. يعنى صولو رسالة تحت الماء شفت التقسيثمة الرائعة اللى عزفها الحفناوى فى الكوبليه التانى ؟ لا الحفناوى يقدر يقول صولوا محمد مصطفى اللى فى المقدمة لنه محتاج تكنيك غربى عالى جدا جدا ... ولا محمد مصطفى يقدر يقول الصولو بتاع الحفناوى بالحرفية والعبقرية العالية دى لأن الصولو محتاج واحد خبير فى التقاسيم زى الحفناوى .. كذلط انور منسى كان ما يقدرش يقول صولو من بتوع الحفناوى ولا العكس لأن دى تخصصات ,,, والاخ اللى معترض على نوتة رسالة من تحت الماء لو حضرتك بتعزف كمنجة بكفاءة محمد مصطفى .. كل اللى عزفوها بعد كده عزفوها سماعى ما احتاجوش نوتة .. ولو كنت حضرتك بكفاءة عمر خورشيد كان بيبقى النوتة مكتوبة قدامه زى اللى انا كاتبها هو بيحط الكوردات من نفسه من عنده بخبرته ... يعنى فى المازورة 4/4 يحط كام اكورد هو وشطارته ولو عازف جيتار تانى مش بكفاءة عمر خورشيد مش حايعرف يحطهم ولو كتبناهم لو ممكن يتلخم ما يعرفش يقراهم ... يعنى هو بيحس بموهبته ان هنا عايزة اكور سى بيمول مثلا او صول ما جير او لا مانير وهكذا ... المشكلة هنا ان فيه جمل كتير فى اللحن د ه بتسمعها .. دى مكونة من خمس خطوط لحنية لو انا كتبت جملة واحدة منهم لما تسمعها حاتسمع شىء تانى وخيقولوا انا كاتبها غلط ... وما حدش يقدر يستخلص الخمس جمل او الخمس خطوط اللحنية ليه .... فيه سر خطير جدا جدا كان بيعمله الموزعين ... يعنى فى الاستديو بعد التسجيل بيلم الورق وياخده معاه عشان ماحدش يبص فيه ويكتشف سره ,,, فيه حاجة اسمها سر الخلطة ... يعنى فى زنة او نكهة بتيجى منين من ايه مع ايه ... لو انا بصيت فيها وعرفت خلاص ممكن كل الناس تعملها ويفقد الموزع التفرد بتاعه .. انا كنت مسؤول النوت ف الفرقة الماسية مكانش عندى ولا اغنية موزعة ... ولاحظ ان كان لما الموزع بيموت كان مانقدرش نعزف الاغنية تانى ... يعنى مثلا فاكر حبيبها ؟ ما يقدرش عبد الحليم يغنيها تانى لأن بعد وفاة على اسماعيل النوت مش موجودة ومش حنألف فيها يعنى

[عمرو الهنداوي]

أستاذ عادل مساء الخير وأتمني تكون حضرتك بخير ومبروك لمصر الصعود لكأس العالم...

والله يا أستاذ عادل حضرتك قيمة فنية كبيرة وشخصية كريمة جداُ والكل يعلم هذا .. ومش عايز أتكلم عن دور حضرتك في إثراء المنتدى و إحياء التدوين الموسيقي وتخليد أغاني العملاقة .. يعني أتكلم عن "عادل صموئيل" أقول أيه غير انه والله نعمة ربنا أعطها للغلابة أمثالنا..

أستاذي العزيز المنتدى متسع لكثير من الناس ومنهم هواه ومنهم فنانين ومنهم محترفين ومنهم من هو تحت خط المبتدئ فقد يخون التوفيق البعض منا في التعبير في جملة أو بوست مع حماس زائد و دون معرفة...

الصديق بتاع رسالة من تحت الماء هو في غالب مش عارف انه التقاسيم والصولوهات لا تكتب ويبدو انه مش عارف موضوع صعوبة التسهيل الموسيقي والكتابة للمبتدئين والمتوسطين وبالتأكيد خانه التوفيق في كتابة بعض جمله وبحماس زائد .. كلنا لما بنبقي مش عارفين وعندنا حماس زائد بنعمل أخطاء ودور العظماء أمثال حضرتك أنك تمتص هذا الحماس وتفهمنا وبالفعل حضرتك عملت كده وردت عليه بالعلم والمنطق وبالأسماء كمان ..

لك حق طبعا تزعل انه ممكن حد مش عارف يعزف النوتة يطلع العيب في كاتب النوتة أو نوتة موزعة بعد كتابتها على خط واحد ستكون ناقصة وبالتالي العازف يعتقد انه ده خطأ من كاتب النوتة .. كل ده وارد

حضرتك قيمة كبيرة والكل يقدر دورك ونحن نفتخر بيك وبدورك فلا تدع موضوع الصديق بتاع بوست رسالة من تحت الماء يأخذ اكثر من حقه .. حضرتك قمت بالرد عليه بكل صبر وحكمة .. وهذا يحسب لك وحضرتك قيمة كبيرة ونحن نعلم هذا.

لكن في سؤال لحضرتك وحضرتك كنت في التوجيه الموسيقي .. يعني أستاذ زي أستاذنا الجميل عزت شحاته أزي يطلب منه أغنية من أعمال الشريعي وأعمال الشريعي معروفة بكثرة التوزيع الموسيقي ومطلوب منه يقدمها والوزارة لا تقدم له النوتة ولا الدعم في الحصول على النوتة من الجهات المختصة؟ طيب موقف زي اللي فيه أستاذ عزت يتصرف فيه أزي؟ هو مش المفروض وزارة التربية والتعليم يكون لها دور .. حضرتك كنت بتصرف في المواضيع دي أزي؟ أنا مش قادر اصدق انه أستاذ يطلب منه تدريب تلاميذه على أغنية موزعة لتقديمها في حفلة والجهات المتخصصة ليس لها أي دور؟؟؟ طيب هو الأستاذ المفروض يعمل أيه في موقف زي كده؟

كل التحية والتقدير

[KamelArab]

شكرا على هذا التوضيح.....
ولكن نحن نريد تنويط الصولو والأكورات ولو كانت صعبة جدا
والسؤال هل هيه صعبة العزف أم صعبة التنويط؟؟؟
نريد نوتة كاملة للألات الموسيقية...ولو تكرمتم بتنويط كامل لأي معزوفة لعبد الحليم ترونها مناسب وذلك لتبيان الحالة
والله موفق الجميع
وشكرا على هذا المجهود المتميز


ممكن تشوف الردود فى صفحة طلبات النوت بتاعتى عشان ما اكتبش نس الكلام فى مكانين

[عادل صموئيل]

ولكن نحن نريد تنويط الصولو والأكورات ولو كانت صعبة جدا
والسؤال هل هيه صعبة العزف أم صعبة التنويط؟؟؟
نريد نوتة كاملة للألات الموسيقية...ولو تكرمتم بتنويط كامل لأي معزوفة لعبد الحليم ترونها مناسب وذلك لتبيان الحالة

ده رد الاخ العزيز وانا نقلته هنا للتوضيح عشان ما اكتبش الكلام كذا مرة فى كذا مكان ...
طبعا واضخ ان الاخ العزيز مش متمرس او بيشوف نوت شرقية كتير او ممكن بيشوف نوت غربية فقط ...
النوت الشرقية بتختلف عن الغربية ... الغربية بيبقى كل شىء مكتوب فيها .. يعنى اى صولو من اى نوع والتعبير والاكوردات واليد الشمال للبيانو وكل شىء ... بس انت عشان تحصل عليها فى اى دولة اوروبية كلها متاحة فى محلات الكتب الموسيقية يعنى تدخل تطلب اى عمل لبيتهوفن مثلا وتقول رقمة تلاقيه موجود .. وطالما فيه تداول تجارى اولا ببيقى فيه استثمارات بمليارات ... ودى بتشجع اللى بيدنوا انهم يدونوا لنه مش بيدون ببلاش ولو جه الله زى ما انا بعمل ولكن بياخد فى الصفحة الواحدة مئات الدولارات لأنهم على مستوى العالم حايبيعوها بملايين الدولارات ... وعادة مين اللى بيكتب النوت دى ... يعنى ممكن تطلب اى مقطوعة للجيتار حتلاقى النوتة موجودة لكن اللى بيدونها اما المؤلف بتاعها واذا كان رحل بيبقى حد متخصص فى الجيتار ... يعنى واحد بيعرف يكتب الكورد ازاى وبأنه اصابع الموضوع مش كورد وخلاص .. ده محتا متخصصين فى الجيتار نفس الموضوع للبيانو ... بيبقى متخصصين فى البيانو بيكتبوا اليد اليسرى .. لكن عندنا فى مصر من بذء التدوين الموسيقى فى الثلاتينات ... اقصد من يوم ما ابتدا الفرق تشتغل بنوتة ... كان دايما فيه نوعين من المدونين ... اما موزع موسيقى زى اندريه رايدر وعلى اسماعيل ثم فى العصر الحديث عمر خيرت وياسر عبد الرحمن ... او مدونين موسيقين بيدونوا للملحنين زى انا مثلا ... والنوت الموسيقية بتاعة الموزعن دى بيحتفظ بيها الموزع وبعد وفاته ماحدش يقدر ينفذ العمل لأن لو حب يدون التوزيع من عنده حايطلع طبعا كلام تانى غير المسموع ... انا مش متخصص فى البيانو ولا الجيتار والاساتذه اللى علمونى نفس الموضوع اجنا طول عمرنا بنكتب النوتة زى ما اللى انا بدونه .. بدون صولوا الكمان اللى ممن حد تانى يقوله لكن حضرتك فيه تسجيات عزف كتير لرسالة من تحت الماء اكتر من 8 عازفين وكل واحد منهم بيقوله بطريقة ... لأن الصولو ماحدش مدونه ( وصعب حد يدونه ولو اتدون ماحدش حايعرف يقراه حايبقى صعب جدا ) واى عازف بيحط نفسه فى مكان انه يقول الصولو لازم يكون عازف قدير جدا مش اى عازف مبتدى او عادى وبيبقى حافظ شىء وبيقوله سماعى ... واكرر انا مدون رسالة من تحت الماء زى ما كانت فى الفرقة الماسية ... والله لو تواجد عازف قدير عايز يقول الصولو هو حر وحايقوله سماعى مش منتظر حد يدونه له ... اما صولو الجيتار او الاكوردات ... عمر خورشيد كان واحد فقط ولم يتكرر ولن يتكرر يعنى كان عبقرى غربى وعبقرى شرقى وحتى تلاحظ ان بعد وفاة عمر خورشيد صولوهات الجيتار فقدت قوتها لأن الملحنين ما وجودش حد يسد مطرح عمر خورشيد وكان بيضع الكوردات من عنده وعلى ذوقه .. وماحدش موجود دلوقتى يقدر يحط كوردات جيتار فى عمل كبير يعنى حتى مسابقى التربية الموسيقية بتاعة وزارة التربية والتعليم تلاقى اللى بيضع الجيتار كل سنة بياخده من كتاب اجنبى لأنه ممكن بيعرف جيتار غربى لكن ما يعرفش جيتار شرقى .. وانا بخبرتى من الطلب بعرف مستوى الطالب ... من غير ما اشوفه ... يعنى مثلا كتير ينطالب تقسيمة فريد بتاعة كذا الربيع مثلا .... على طول بعرف انه عازف مبتدىء ماعندوش فكرة عن الموضوع ... لأنه اصلا مش عارف يعنى ايه تقاسيم اصلا ... التقاسيم دى بيعملها عازف لازم يكون بارع جدا فى الارتجال ... يعنى ممكن يكون شاطر فى النوتة او السماعى لكن ماعندوش براعة الارتجال .. الارتجال ده زى التلحين بالضبط بس تلحين فورى يعنى لازم يطلع حلو لأن معندوش فرصة زى التلحين انه يطلع جمل ويحسنها ويختار منها .. يعنى كل 500 عازف سماعى تلاقى واحد يقول تقاسيم وكل 10 الاف عازف حتلاقى مدون .. وكل 1000 مطرب حتلاقى واحد يقول موال ... وكررت ... ان التقسيمة لو اتدونت مش بتبقى زى اللحن اللى انت بتشوفه .. ولكن حتكون صعبة جدا جدا جدا جدا .. ماحدش حايعرف يقراها ولو عازف خطير ف القراءة مش حيقول الاحساس يعنى فى الفرقة الماسية كان بيتكتب فى النوتة كلمة تقاسيم على كذا ... والموال كان بيتكتب فى النوتة موال والمطرب ببقى حافظ شىء واحنا بنقول وراه اسمها بنونس يعنى او نمسك له اساس المقام او نقول حروف تسلطنه ... كمان مشكلة خطيرة ان البعض بيكتب يقول ان فيه غلط فى نوتة كذا يعنى لو رجعتم ورا شوية واحد كاتب انه مسك العود وقعد يقسم وقادته التقاسيم لأغنية فى يوم فى شهر فى سنة وقارن اللى بيقوله لقا انا كاتب غلطات كتير فى النوتة ... بالطبع انا شفت النوتة ومالقيتش فيها الهوا ... وعملت نسخة ميدى من ملف الانكور يعنى عزف للنوتة الموجودة ونزلتها وهو لا رد ولا حد من الاخوة رد والعملية دى عملت لى احباط بصراحة
اما عن الاخ العزيز عزت شحاته .. اللى بيطلب منه الحاجات دى مش وزارة التربية والتعليم لأنه بيبعتوا النوت واظن فى الفهرس فيه حاجات توزيع عادل صموئيل دى كانت الوزارة بتطلبها منى اعمل لها توزيع خفيف للتلاميذ يعنى طبعا غير توزيع المحترفين ... اللى بيطلبوا منه الطلبات دى ممكن جهة تانية زى رعاية الشباب او حاجة كده مايعرفوش موسيقى .. زى لما تتفرج على فيلم تلاقى اى واحد مسك ساكس او اى آلة وعزف دى بتخلى اى واحد جاهل يفتكر فعلا انك لو مسكت اى آلة حاتعزف او اى حد بيعرف يمسك اورج حا يعزف اى حاجة ... والمفروض انه وهو يقول لهم ع الحاجات اللى ممكن تتعزف او لأ يعنى فيه ملحن خطير اسمه محمد القصبجة عمل حاجة اسمع اوى اغنية انا قلبى دليلى .. حتلاقى فيها توزيع رهيب ... سيمفونية يعنى بس عامل اللحن الاساسى بحاله فى القمة والتوزيع حاجة تحته بحيث انك ممكن على عود مثلا تعززف اللحن الاساسى ويطلع فى منتهى الجمال مش ناقصه حاجة دى العبقرية
مع اطيب تحياتى

[muhamadibra]

لا احباط ولا حاجة يا مايسترو -- انا تابعت هذا الموضوع ومن وجهة نظري ان المشكلة تتمحور في العنوان الذي لا يطابق السؤال- ولو تم تعديل العنوان مثلا الي ( استفسار عن سبب عدم تدوين التقاسيم والاكوردات في النوت الشرقية ) لكان اكثر افادة للجميع -- وقد استفدت واستمتعت شخصيا بالردود - وكلها في اطار من العرض المحترم - لاجدال ان المايسترو قامة وقيمة مرتفعة - وصفحته ثابتة عندي ازورها عدة مرات يوميا -- وأغلب الهواة والمحترفين كذلك يستمتعون بتدويناته العبقرية - كنت اتمني حضور اللقاء السنوي معك يا مايسترو لكن منعني ظروف السفر
د محمد ابراهيم

[عمرو الهنداوي]

أستاذي العزيز عادل صموئيل

نوتات حضرتك بشوفها الألاف البشر وهم مختلفون في ثقافتهم الموسيقية وكل واحد يفضل انه النوتات كلها تكون على الشكل اللي يحبه .. وطبيعي منهم من يوجهه انتقاد أو ملحوظة بعلم أو بدون علم أو حتى عايز يوقف المراكب السايرة وخلاص .. أستاذي العزيز لا تقف كثيراً عند مثل هذه الأمور ولا تضع الأمر يسبب لك ولا إحباط ولا شيء كما قال صديقنا العزيز د. محمد إبراهيم ... وفي كل المواقف اللي حضرتك تكلمت عنها حضرتك تصرفت بشكل رائع وبهدوء وبالدليل في الرد .. يبقي شاغل نفسك ليه قوي بالمواضيع دي؟؟

يا أستاذ عادل الناس بتستوعب الأشياء على قدر علمها وفهما وقدراتها ومن خرج عن هذه الأشياء لا يستوعبه العقل وبالتالي الإنسان يرفضه وينتقده لأنه لا يعرف كيف يتعامل معاه .. يعني ممكن حد يسمع أغنية في الليل لما خلي أو الجندول أو سلوا كؤوس الطلا يقول الله على اللحن والكلمات والأداء وممكن واحد تأني قدر بس يتفاعل مع اللحن فقط .. فيقولك اللحن حلو لكن الكلام وحش وبكدة في ثانية بقي أمير الشعراء أحمد شوقي أي كلام وممكن واحد ثالث ولا يفهم كلام ولا لحن ويقولك على أم كلثوم هي الست دي بتقول أيه؟ وأيه العك ده..

ونفس الأمر يحدث معاك ممكن أي حد يعزف نوتة من نوتات حضرتك ومتطلعشي معاه كويسة .. على طول حايطلع العيب في كاتب النوتة وليس في عازف النوتة وهكذا .. فأستاذي العزيز لا تحبط من اختلافات البشر هذا قانون خلقه الله بينهم .. البشر يستوعبون على قدر علمهم وثقافتهم واي شيء خارج نطاق علمهم وثقافتهم يعتبر غير مفهوم...

كل التحية والتقدير

[عادل صموئيل]

احبائى
طبعا انا لما بفضفض معاكم بستريح نفسيا
انا هنا حاولت ادون حتة من دموع فى عيون وقحة دونت نص جملة .. النص جملة ده يعتبر درس بالنسبة لكم وانا بشؤح فيه ليه ما ينفعش نكتب الموزع
اول حاجة شوفوا الجملة بادية منين ... من دو اللى فى الخط التانى فوق المدرج ودى معمولة للبريمو كمنجة وبعدين الجملة بتنزل لحد المازورة التامنة بتنزل الجملة الاساسية تحت لحد ال مى بيمول اللى فى مفتاح ف او المسافة اللى تحت المدرج ودى بيعزفها الشيللو والكونتر باص وطبعا فى المدارس لاعندك بريمو كمنجة ولا شيللو وكونترباص .. فى المازورة التمنة برضه الكمنجات البريمو والسكوندو بتقول حشو مالوش لازمة يعنى حاجت سريعة زى : دورى مى دورى مى دورى مى دورى مى انت لو عزفتها لوحدها حايبقى دمك تقيل لن الجملة تحت فى حتة تانية بإختصار لو حاولت ادونها حاتطلع مش تأليف عمار الشريعى حاتطلع من تأليق محمود المليجى .. وانا قلت قبل كده وافكركم تانى فى الالحان الموزعة المشكلة الخيرة ان فى الهارمونى حاجة اسمها النغمة المتسلطة .. يعنى بيبقى فيه ليها كذا مدلول يعنى لما تقول دو مى صول سى بيمول مثلا مع بعض جربها على البيانو ... المستمع حايبقى سامع السى بيمول لنها حاتتسلط على النغمات التانية ... مع ان فيه 3 نغمات تحتها ... اما لما تكون سامع 12 خط لحنى مع بعض ... التسلط بييجى حاجة ماحدش ممكن يعرفه فين ... يعنى عارفين ف الالوان لما تحط اصفر على اخضر يديك ازرق ... انت بتتبقى متخيل انك سامى رى بيمول مثلا مع ان مفيش رى بيمول خالص فى الجملة هنا ... ده اللى بيعمل اللخبطة ... وزى ما قلت كان كل موزع بيحرص على انه ياخد الورق بتاعه بعد التسجيل او بعد الحفلة ويمشى عشان ماحدش ياخد فرصة يبص فيه وخلى بالك اوى اوى من كلمة يبص فيه دى ... يعنى يذاكر فيه هارمونى ... يعنى انت لو سمعت 3 موسيقات واحدة لأندريه رايدر وواحدة ل على اسماعيل وواحدة لفؤاد الظاهرى ... ماقلتش معاهم عمر خيرت ليه .. شان ده من مرحلة بعدهم بعشرين سنة .. انا بقارن ب 3 كانوا عايشين مع بعض وكانت نفس الفرقة الماسية هى اللى بتسجل كل شغلهم ... طبعا وانت مغمض من اول حرف حاتعرف تفرق بينهم لأن كل منهم نكهة مختلفة او زنة صوت مختلفة ... زى ما تشم ريحة الكبابا لما يتشوى من ريحة السمك لما يتقلى .. او نكهة بارفانات .. بتيجى منين ... اسمها سر الخلطة ... يعنى هو الاول بيكتب جملة بعد كده بيكتب تحتها جمل تانية بس بيعمل حساب الهارمونى يعنى فوق فيه رى يبقى لازم يحط معاها ايه وايه ومايحطش ايه ... من هنا بتيجى النكهة دى ... ومن هنا برضه كان بيخطف الورق بعد الحفلة ويجرى عشان ماحدش يعرف السر .. يعنى وانا بسجل فى الاستديو قدامى بارت واحد هو الكمنجة ... اللى انا بعزفه معرفش كاتب ايه للباقيين ... عشان لو موزع تانى شاف النوت دى وذاكر فيها حايسرق الاسلوب .. بعكس الغرب خالص .. يعنى منذ بداية التدوين فى عصر الباروك كان كل الورق موجود ومتاح يعنى علم الهارمونى اخترعوه ازاى ؟ ايام بيتهوفن وباخ وغيرهم مكانش فيه علم هارمونى ... كان عبقرية وذوق مفزع ... بعد كده من ااااالعبقريات دى اخترعوا علم الهارمونى ... زى جسم الانسان... فيه كل الاعضاء واخترعوا علم الطب بعدها من الاعضاء الموجودة ذاكروا الاعضاء وشرحوها وعملوا العلم ... يعنى احنا فى الكلية كنا بناخد مادة الهارمونى بس بناخد فى كتب اجنبية يعنى بنحلل قطعة لباخ او موتسارت ... فيه مادة فى كونسرفاتوار اسمها تأليف وتوزيع موسيقى بيدرسوا برضه على كتب الغرب الكلاسيكية عمرهم طبعا ما درسوا التوزيع بتاع حد مصرى لذلك سر المصريين بيدهب معهم الى القبور مع الاسف

[عادل صموئيل]

احبائى
انا جالى صداع م الشرح ناخد حاجة حلوة تضحك
اغنية سيد درويش

عشان مانعلا ونعلا ونعلا لازم نطاطى

حد طلبها على وجه السرعة


مع اطيب تحياتى

[qusay.qq]

[QUOTE=عادل صموئيل;730116]

احبائى
انا جالى صداع م الشرح ناخد حاجة حلوة تضحك
اغنية سيد درويش

عشان مانعلا ونعلا ونعلا لازم نطاطى

حد طلبها على وجه السرعة


مع اطيب تحياتى

[/QOTE]