طلبات نوتة - الصفحة 5

**عمرو الهنداوي** · #41 27/06/2009, 12h31

نوتات تانية

**عمرو الهنداوي** · #42 27/06/2009, 18h32

نوتات تانية

**عمرو الهنداوي** · #43 27/06/2009, 20h09

نوتات تانية

**emanmusictaymou** · #44 28/06/2009, 11h52

اعزائى اعضاء المنتدى الكرام
السلام عليكم ورحمته وبركاته
انا سعيدة جدا بمشاركات الاعضاء الكرام فى اعادة النوت المحذوفة واخص بالشكر الاستاذ عمرو هنداوى واتمنى من الجميع المساهمة.
وهذه بعض النوت:
مع ارق تحياتى

على فكرة لو اى حد عايز نوت أغانى باللغة الانجليزية للأطفال او اغانى شهيرة انجليزية انا اكيد فى الخدمة دائما.

**عادل صموئيل** · #45 29/06/2009, 19h03

احبائى
انا اكون سعيد جدا لما تعبى يكون بفائدة
اقدم لكم اليوم عمل انا افتخر ان اقدمه ( والتعب اللى بصحيح ) بناء على طلب اخى نور الصباح اقدم نوتة حياتى انت
واللحن ده اخد منى شغل شهر تقريباً لأنه لحن غير عادى واقول لكم على سر كل العمالقة ومنهم عبد الوهاب كانوا بيعملوا الحان تتداول وكلمة تتداول يعنى ممكن الناس او المطربين يغنوها يعنى زى مثلا اغنية لامش انا اللى ابكى او كل ده كان ليه يعنى تلاقى مطربين كتير ممكن يغنوا الألحان دى لكن كان كل فترة يعمل اغنية صعبة جدا وتعتبر قلعة حصينة ماحدش يجرؤ يغنيها غير واحد زى عبد الوهاب وطالما مفيش حد زى عبد الوهاب كمطرب فمن المتسحيل حد ينتحر ويغنيها , وتكمن الصعوبة هنا ان عبد الوهاب يوم التسجيل طلع كل اللى عنده يعنى مثلا جملة حياتى انت مغنيها اكتر من 26 مرة وكل مرة شكل يعنى حاطط فى كل تكرار عقدة او حاجز مش اى حد يقدر يجتازه او مثلا 6 سدود من اللى موجودين فى سبق الحواجز بتاع الخيل اى حصان عادى لو نط واحد حايقع اكيد فى التانى بإستثناء حصان ولحد فقط ينط الحواجز وهو مغمض , وانا الجبل اللى لقيته قصادى ساعة ما انطلب منى كتابة النوتة او مشكلة ان اللحن ( زى معظم طلباتكم اللى مش عارف بتفكروا فيها ازاى ) اتعزف قبل التدوين الموسيقى يعنى الملحن والفرقة بيحفظهم بالعود وهنا ممكن يخرج ويدخل ويصدر ويقدم ويأخرويعمل ليالى براحته وطبعاً كان معاه خلاصة عازفين مصر اللى بيساعدوه على الإبداع يعنى بإختصار اللحن ده مش ممكن يتكتب , انا الأول كنت حاتجاهل الطلب بس بعدين تحديت نفسى ( وانا ساعات ببقى متهور ) ودى عادة فيا يعنى تلاقوا نصف معزوفاتى الحان صعبة جدا جدا ما اعتقدش حد يتهور ويفكر يعزفها اصلاً , وهنا انا اقدم لكم للذكرى والتاريخ ولأى حد يحب يبقى تلميذى الفكرة اللى خلتنى اتخطى هذا اللحن المنيع , اولأً بحالة اللحن واهم شىء اى حد عايز يعزفه يسمعه من الشريط كويس جداً لأن نصه تقريبا ادليب والنوتة فى الأدليب بتبقى استرشادية يعنى انت حافظ بتمشى مع الحروف مع اللى انت حافظه او مطرب بيغنى والعازف بيقرأ النوتة وودنه ماشية مع المطرب , بمعنى الاجزاء اللى على الإيقاع ممكن تقراها عادى لكن الأدليب من غير اللى بقول عليه مالوش معنى محدد ودى على فكرة فى كل الأغانى العربية , المهم هنا انا شغلت كل خبرتى ازاى اكتبه ؟ وكان الحل الرجوع للحن الأساسى , ودى حاجة مهمة جدا اتعلمتها من العمالقة واتمنى كل تلاميذى يفهموها , يعنى فى البروفات كنا بنعزف اللحن الأساسى اللى ملحنه الملحن اصلا بعدين بييجى الملحن والمطرب بيشتركوا مع بعض فى البروفات ( اللى كانت كتيرة جدا وكانوا بيقطعوا قلبنا بس كنا مستمتعين لأن كل ساعة تعب بتجيب حاجة حلوة للذكرى والتاريخ ) المهم انهم بيشتركوا فى تلوين وتحسين وتجويد وتطوير الجملة يعنى بحيث ما تبقاش احلى من كده , انا تقريباً شفيت اللحن زى الجزار ما بيشفى اللحمة وهنا افتخر انى قدمت هذه النوتة القيمة جدا وانا هنا كسرت الحاجز اللى عامله عبد الوهاب بإنى بعثت الاغنية دى من جديد يعنى من النوتة دى ممكن اى حد يعزفها واى مطرب قدير ممكن يغنيها على فرقة بعد ما زى ماقلت ان كان من المستحيل حد يفكر اصلاً فى اى شىء اكتر من انه يسمعها فقط
انا اقدم اليكم احبائى هذه النوتة واتمنى ان تستفيدوا منها , ويارب حد يستفيد منها حتى بعدين لو انا مش موجود وافتكروا كويس ان كل عمالقة زمان كانوا بيقدموا ابداعهم للذكرى والتاريخ والنهارده بعد رحيلهم بعشرات السنين التاريخ بيذكرهم يعنى لما تسمع الإذاعة تلاقى احتفالية كل سنة بيوم ميلاد فلان ويوم وفاته ممكن حد من اللى بيغنوا دلوقت حد يفتكره لومات حتى تانى يوم ؟؟؟؟؟
مع اطيب تحياتى

**عادل صموئيل** · #46 30/06/2009, 23h18

ردا على الأحباء الأعزاء الأخ العزيز نور الصباح والأخت العزيزة جوليانا
الأول اهديكم نوتتين من الطلبات ونتكلم على ماتحملوهم لو تحبوا تسمعوا
اول شىء يعنى ايه كلمة موهوب : يعنى واحد كل عشره مليون شخص ربنا بيديه موهبة خارقة مش متوفرة لأى حد وربنا سبحانه وتعالى له حكمة فى الموهبة يعنى مش بيكررها تانى واتمنى تتأملوا كلامى جيداً , يعنى قوة الخلق والإعجاز عند ربنا سبحانه وتعالى خلق موهبة عبد الوهاب مثلاً , وخلق موهبة السنباطى تلاقى ربنا خلق هنا حاجة مهنا حاجة مختلفة يعنى مكررش التميز اللى فى واحد منهم مرة تانية وده يعتبر آية فى الإعجاز لأن لو كرر عبد الوهاب مرة تانية لكانت قيمة عبد الوهاب راحت لأن ممكن ييجى زيه تانى وتالت , يعنى من معجزات الخلق مثلا الموسيقى رأس ماله ودنه تخيلوا لما خلق بيتهوفن والذى اصيب بالصمم التام فى منتصف عمره , يعنى عايزكم تتأملوا فى المعجزة دى وتقولوا سبحانك يارب , يعنى الأعمال اللى عملها بيتهوفن بعد الصمم يمكن اروع بكتير علما بأن السيمفونية تتكون من ( 11) خط لحن ولازم يكونوا متوافقين والأهم ان يكون الحان جميلة فوق بعض , واقول سبحانك يارب انا لما بحط صوت تانى على جملة بسمعها عدة مرات وعادة بصلح فيها ( وربنا اكرمنى بالكمبيوتر لأنى بسمع الشغل فى البيت غير زمان كنا بنوزع وربنا يستر على الأوركسترا حايطلع شكله ايه ) وطبعا اهم شىء فى الموضوع ودنى اللى لولاها ما اعرفش الصح من الغلط وتخيلوا لما بيتهوفن كان بيعمل سيمفوفية طولها ساعة ونص بدون استعامل ودنه , ولا موتزارت اللى عمل سيمفونيات وهو فى سن اقل من 9 سنين وده الوقت اللى اى طفل بيكون لسه مقضيها سلالم وغيره وغيره , وانا بيصعب عليا لما اشوف اللى بيغنوا النهارده اى حد يطلع ف دماغه يغنى يروح مغنى مابقاش فرق بين المطرب وبين كمسارى الأتوبيس اى حد زى التانى يعنى انا النهارده لو عملت استفتاء وعايز اكرر واحد من اللى بيغنوا اليومين دول زى المطرب ( ت . ح ) او ( م . ق ) انا متأكد انى لو رحت اى مدرسة ثانوى فيها 2000 طالب ممكن اجيب منها 1500 طالب يعملوا اللى بيعمله المطربين دول ولو قلت تيجوا نبحث فى جمهورية مصر العربية كلها عن مطربة زى فايزة احمد يمكن احتمال واحد فى المليون اننا نلاقيها , والخيبة اللى بنسمعها نابعة من نشوء شور بعدم التذوق بمعنى زمان كان فيه محلين بيعملوا كشرى مثلا واحد حلو وواحد وحش كنا بناكل من الحلو والوحش بيقفل النهارده الوحش زى الحلو ماحدش بيستطعم ودى ظاهرة خطيرة يعنى اى محل اكل بيعمل اى حاجة وبتتباع , واى واحد بيعمل اى لحن اى حاجة بتجيب فلوس كان زمان الردىء بيترفض لكن النهارده انا شفت فضيحة من الفضايح واحد بيبع شرائط كاسيت عنده اغنية لوردة وشريط عليه صوت سباك بيغنى نفس الأغنية بس تحس انه بينزح مجارى مش بيغنى والمصيبة الناس بتشرى شريطةه وتترك شريط وردة علما بأن الشريطين بنفس الثمن نفسى حد يسمى لى ده ايه بالضبط
كفاية كده مع اطيب تحياتى

**عادل صموئيل** · #47 02/07/2009, 17h54

احبائى
اقدم لكم نوتتين من طلباتكم ربنا سهل واتخلق شوية وقت ادونهم والباقى فى القريب ان شاء الله
وعلى ما تحملوهم اسمحولى ادوشكم شوية بالكلام اللى بيخنقنى بس اشكركم لأنى وجدت من يشاطرنى الرأى
اول الكلام العمالقة بقوا ازاى وليه عمالقة ؟ العملية مش موهبة فقط يعنى كان ايامهم موهوبين كتير ولكن بقوا فى الظل , وانا ربنا لما اكرمنى وتعايشت معاهم فترة طويلة اكتشفت ان العملية مش موهبة ولكن ذكاء خارق وعبقرية وتفهم لكل ما يجرى حولهم فى اى مجال , ويمكن انا اخدت منهم الشوية دول لما انتم تتكلموا فى موضوع انا بوافق معاكم لكن لى رؤية تانية خالص من واقع تعاملى مع العمالقة , وارجع الى مثل حامل المسك ونافخ الكير , يعنى حامل المسك شايل عطور ولو احتك بيك ملابسك بتاخد رائحة العطور وتفضل فيها الرائحة الجميلة لفترة طويلة اما نافخ الكير فمجرد انك تقف بجواره حايطلع شرار يحرق ملابسك واكيد روائح سامة تضر الصحة بالإضافة الى الهباب والصماد اللى حايشوه شكل كل اللى حايقف جنبه , واليوم فى الفن المشكلة اكتر من كده كتير يعنى نافخ الكير لو فى شبرا اكيد مش حايروح اذاه للعباسية او مصر الجديدة يعنى اذى محدود ومش عايز تتأذى ماتروحش عنده , لكن انا بتكلم عن مشكلة عامة وهى نشر السموم فى كل مكان على الخريطة , كان زمان فى تقسيم للأصوات الغنائية يعنى صوت راجل وصوت ست , وصوت الست لازم من اهم مواصفاته الوقار والأدب والإحتشام يعنى عدم اثارة اى شىء تانى غير الإستماع عند المستمعين على القل عشان فنهم يوصل والنهاردة بقى العكس بقت العملية استعمال اقصى وسائل الإثارة والإغراء المبتذل إما بالملابس او الحركات او نوعية الكلمات لدرجة ان النتيجة العكسية اللى حصلت ان لو ظهرت اى مطربة كويسة جدا بس محترمة ومحتشمة ما حدش يسمعها ولا يطلبها ف حفلات واكبر دليل المطربة امال ماهر , وانا البنت دى بحب صوتها ولو كانت جت ايامنا اكيد كانت حاتبقى فى مصاف وردة وفايزة شوفوا مصيرها ايه لأنها محترمة يعنى نسمع لها حاجة كل سنة , اما المصيبة السودة والكارثة هى اصوات الرجال يعنى مميزات صوت الراجل انك تسمع صوت راجل النهاردة الاصوات بقت إما صوت زى الفتلة او صوت عامل زى عود الجرجير المنفرد او صوت عامل زى اللى بيقفوا ينادوا فى السوق ( كل حاجة بأتنين ونص ) او اللى بينادى على الميكروباص واهم تميز فى اللى بيغنوا الرقاعة والخلاعة والتخنث والمياصة والكارثة القومية ان دول هم اللى الشباب بيتعلم منهم ويقلدهم يعنى ممكن يطلع منهم جيل خايب مخنث مافيهوش رجالة ويبقوا كلهم سوسو وميمى وأوسة يعنى لو دققت فى صوت اى مطرب زمان تلاقى صوته عبارة عن حزمة يعنى عشر حاجات على بعض بتكون خامة الصوت وفيها الباص والتريبل يعنى صوته مش بيحتاج مؤثرات لأنه كده كامل والاهم لما تسمعهم تحس انك بتسمع صوت راجل مش حاجة بين البينين
مع اطيب تحياتى

**نور الصباح** · #48 02/07/2009, 21h25

أستـــــــــــــــاذى عــــــــــــــــــــادل بــــــــــــــــاشـــــــــــــــــــــا صموئيـــــــــــــــــــــل
الأخوة الزمــــــــــــــــــــــــــــــــــــلاء أعضـــــــــــــــــــــــــاء منتدانا الجميــــــــــــــــــل
سلام الله عليكم جميعا ورحمته وبركاته وبعـــــــــــــــــــد :
هـــــذه نوتة من المحذوفات للأستاذ المبدع ( دائما ) وجدتها فى منتدى أخر دون استئذان من
الأستاذ وكده عيب وهى نوتة " عجبا لغزال للراحل /فؤاد عبد المجيد
اسمحوا لى بعرضها
وشكررررررررررررررررررررررررررررررررررررررا

**عادل صموئيل** · #49 05/07/2009, 17h46

احبائى
انا غبت عن المنتدى يومين لقيتكم كاتبين كلام محتاج رد طوييييييييييييييييل
واقدم لكم نوتة حبيب العمر بناء على طلب الأخ العزيز نور الصباح ودى اخدت منى وقت طويل جدا فى تدوبنها لنه من الزمن القديم قبل استعمال النوتة وكانوا بيغنوا براحتهم وكمان الاغنية مملوءة بالأدليب والتوقف وتغيير الميزان والفرامل الفجائية المهم انا اكون سعيد لما اتعب عشانكم بس ماتنسوش ان التدوين بيحتاج وقت وحالة نفسية
بالنسبة للكادر انت عارف ياصديقى ان البعدا اللى اخترعوا مهزلة الكادر من ضمن ما عملوه هو محاولة اذلال المدرسين وتكديرهم يعنى كل يوم واحد يقول على تاريخ لظهور النتيجة ويطلع غلط والحكاية مدام فيها فلوس كل تأخير ده بيوفر للحكومة ملايين الجنيهات اما بالنسبة للحليات اللى سألت عليها حدد لى بالضبط انت عايز تعرف ايه وانا تحت امرك
بالنسبة للأخت العزيزة جوليانا مش احنا اتفقنا ان اى لحن عايزاه ارفعيه هنا وانا تحت امرك عشان الألحان دى مش عندى وانا تحت امرك .
بالنسبة ل آمال ماهر انا احب صوتها جدا بس الخسارة انها جت فى وقت ماحدش يعرف قيمتها يعنى صوتها زى صوت فايزة ووردة ودى المفروض اولا تغنى على فرقة وتريات زى الماسية وثانيا الملحن لما كان بيلحن لفرقة وتريات كان بيعمل لحن اهم شىء فيه انه يبقى رائع لأن اللحن على الوتريات بيبقى مكشوف لكن اليوم وعلى الآلات الكهربائية اللحن اولا بيبقى مش باين وسط التوزيعات ( المتكررة فى كل الألحان ) والإيقاعات والدوشة يعنى زمان الملحن عشان يعمل لحن كان على الأقل يتفنن فيه كذا شهر لكن النهاردة بيحط الكلام قدامه ويدبه زى مايطلع والناس اى حاجة مش بتقول لأ حتى لو الجمل دى سمعوها 100 مرة يعنى فيه خليك كوكتيل بين محمد سعد على شعبان عبد الرحيم تلاقيه موجود زى الملح فى معظم الأغانى
بالنسبة لأخى ملحن مصرى : انا الصفحة دى ما احبش احتكرها لنفسى يعنى ممكن اى حد يحب ينزل فيها نوت طبعاً مكسب للمنتدى بس نوت عبد الحليم اللى عندك انت مدونها ولا من المتداولة فى السوق ؟ لأن هنا فى الصفحة دى انا بقدم مدرسة جديدة فى الكتابة وهى تدوين اللحن اولا بأقصى دقة وثانيا بأقصى سهولة لأن بعمل حساب المبتدئين والهواة اولاً لأن المحترفين بيعزفوا سماعى مش بيحتاجوا النوتة إلا لما يكون اغنية محددة مش حافظها فى ودنه .
بالنسبة للأخ سلطان حماده : انا مش بسمع جورج وسوف لسبب مهم جدا بس الأول لازم نتفهم اساس السبب
الاول عايزك تسمع كذا اغنية لكل من عبد الوهاب وعبد الحليم وفريد ومحرم فؤاد كذا اغنية من بدايتهم وكذا اغنية من آخر ايامهم حاتلاقى ان صوتهم فى الأواخر بقى احلى وانضج وده لسبب مهم جداً من اهم اسباب نجاح واستمرار المطرب وبالذات لما بعد وفاته بوقت طويل حتلاقى المطربين دول كانوا بيحافظوا على صوتهم بكل وسيلة لأنه اغلى ما يمتلكون , وانتم فتحتم الكلام وانا انسان صريح ومحايد وممكن صراحتى تزعل ناس منى ومنن يرفدونى من المنتدى لكن لازم اقول انت لو سمعت جورج وسوف من بداياته كان صوته مش بطال ( بس طبعا مش زى الأسماء اللى انا قلتها يعنى كان فى درجة اقل ) بعدين بعد ما ابتداً يشتهر اتجه لتعاطى المخدرات وهنا ممكن نقف وقفة يعنى ناخد حصة ممكن كتير ما يعرفوهاش عن المخدرات وتأثيرها على المطرب . المخدرات بدات بالحشيش والحشيش بيتم تعاطيه عن طريق التدخين ( وخلوا بالكم اناالحمد لله مش بتعاطى الحاجات دى لكن اعرفها كويس جدا من باب العلم بكل شىء ) ولما نتكلم عن تدخين الحشيش الضرر للمطرب بييجى من السيجارة نفسها مش من الحشيش يعنى السيجارة خطورتها انها لها تأثير ضار شوية على الأحبال الصوتية لكن ضرر خطير جداً على الجهاز التنفسى وبالذات الرئتين يعنى الرئتين ربنا خلقهم بيستوعبوا كمية من الهواء والتدخين لما بيتلف جزء كبير من الرئتين يبقى احتوائهم للهواء اقل من ربع الكمية وهنا الضرر الخطير للمطرب لأ من اهم مواصفات المطرب تخزين كمية كبيرة من الهواء تم اخراجها بالتدريج عشان اولاً يغنى النغمات الطويلة وثانياً تحس انه مستريح وهو بيغنى يعنى مش بينهج لأن نهجانه ده بيدى تأثير يضايق المستمع يحس انه هو كمان حايتخنق يعنى التأثر من السيجارة نفسها لكن تأثير الحشيش على الأجزاء الأخرى للجسم ده موضوع تانى . بعد كده تطورت المخدرات وظهر الهيروين والكواكين وهنا مكن الخطورة القصوى والضرر القاتل للمطرب , لأن المطرب اولاً لازم يكون انفه سليم ( انفه الخارجى والداخلى ) يعنى مجرى الهواء والبلعوم ثم الحنجرة والاحبال الصوتية والقصبة الهوائية وكل نقطة فى الرئتين يعنى مخارج ومداخل الهواء وثانى اكسيد الكربون والدم ولا تنسى الشفتين وحتى الاسنان وكل اللى قلته بيوجد فصوص فى المخ بتنظم العملية دى بمنتهى الدقة , والانسان لما يشم هيروين كانه ادخل فى انفه ماء نار او سيل مدمر من النار طبعاً بيدمر كل الاجزاء اللى قلت عليها وبالذات فصوص المخ ومشكلة جورج وسوف انه ادمن الهيروين والكوكايين والبرشام والماريجوان وكل القائمة وصار انسان مدمر وده الشىء اللى افسد صوته يعنى انا لما بسمعه بحس انى بسمع منشار بينشر خشب طبعاً فيه ناس حتزعل منى لكن ده الحق وكله كوم لما بيغنى اغنية لعبد الحليم مش عايز اقول صوته بيؤذينى اد ايه , وهنا فى شىء مهم الألقاب اللى بتطللق على اللى بيغنوا هل الألقاب دى بيستاهلوها فعلاً ولا الألقاب بقت ببلاش يعنى زمان اطلقوا على فايزة مثلاًكروان الشرق وطبعاً لآخر لحظة هى اعتقد تستاهل اللقب
لكن النهاردة لما يطلقوا على واحد لقب سوبر ستار العصر يعنى لو حسبتها !!!! مش عارف
يعنى لو لواء فى الجيش حب يغنى مثلاً هو فى الجيش على عينى وعلى راسى لكن لو غنى بياخد لقي على قد غناه مش على قد رتبته فى الجيش يعنى هناك لواء لكن فى الغناء ما يحصلش عسكرى صغير
مش كده ولا ايه ؟ طبعا؟ً فيه ناس حاتزعل لكن كلامى لو عبد الوهاب او السنباطى وسمعوا حيقولوا نفس الرأى لأنى انا امثل امتدادهم يعنى مازلت وسأبقى متمسك بكلامهم ونظرياتهم وهى اللى خلتهم عمالقة

**عادل صموئيل** · #50 07/07/2009, 19h48

اقتباس:

المشاركة الأصلية كتبت بواسطة وائل

استاذنا الفاضل الاخ عادل
الف شكر على اخلاقك وذوقك الراقي انك رديت عليا
رغم مشاغلك الكتيرة الا انك مبتبخلش علينا بوقتك الغالي وبترد علينا كلنا وبتلبي لنا جميع طلباتنا--- وده شي الشكر قليل جدا في حقك يا غالي
ولا نملك الا ان ندعي لك بالصحة والعافية لانك بتسعدنا ربنا يخليك لينا يا كبيرنا

الأخ العزيز وائل
اقدم لك نوتة حكاية العمر كله واشكرك على كلامك الجميل وان شاء الله الباقى فى القريب وانا آسف للتأخير لأنى مشغول 48 ساعة فى اليوم