طلبات نوتة أ / عادل صموئيل الجزء الثانى - الصفحة 482

**عبد الإله** · #**4811** 03/03/2016, 09h01

الجمال والجلال و السناء والبهاء.
حفظك الله ورعاك!
والله بت أستحيي أن أطلب مخافة أن أرهقك ،و أنت لا ترد سائلا.لولا أنك أوجبت ذلك على نفسك . وليس لنا إلاك.
وأقدر رعايتك لمثل هذه الأنشطة التي توليها اهتمامك.ولم نجد للأسف في بلدنا الحبيب من يعِيرنا اهتماما.فالكل منشغل بنفسه..
وآخر نشيدين أختم بهماهما : " من نار خرجت" وأظنها على وزن موشح "يا غصن نقا" على هذا الرابط:

https://m.youtube.com/watch?v=GdIo6grtfFI

ونشيد :"الأرض " على هذا الرابط :

https://m.youtube.com/watch?v=U9yCwV9nTRE

**المنير** · #**4812** 03/03/2016, 09h47

الله عليك يا أستاذي العزيز. أحلى هدية في صباح يوم مشمس.لقد كانت مدونة "وعود من العاصفة" كرسالة من اخ و صديق عزيز بعد غياب طويل. والله لن أنسى جميلك هذا ماحييت.
هل استعملت الملف الصوتي بعود مارسيل خليفة أم بالاوركيسترا؟
أرجو من حضرتك الملف midi للاستعانة به في العزف و شكرا جزيلا
تحياتي.

اخى العزيز
انا اشكر ذوقك وكلامك الجميل .. لكن انت خيرك سابق يعنى كذا مرة ارسلت لى برامج مهمة جدا بستعملها فى شغلى اللى بقدمه لكم ..
بالنسبة للتدوين من ملف صوتى عزف للمطرب على العود ما اقدرش اكتب منه حتى لو اغنية لعبد الوهاب نفسه .. لسببين ... اول حاجة المطرب لما يكون بيعزف على العود انا مش بحس بالوحدة .. يعنى بيبقى ناقص الايقاع اللى بيحدد الدوم واول الجملة منين فى المازورة .. يعنى بقعد طول ما انا بكتب كانى واحد ماشى على حبل معلق .. يعنى مش بكتب اللى بسمعه ولكن عمال ادقق اوى اوى عشان الايقاع ما يقلبش معايا ودى طبعا حاجة عيب اوى بالنسبة للمدون .. كمان اخطر حاجة المطرب مع نفسه ع العود من غير ايقاع يحكمه ممكن يكسر الوحدة او يتسلطن ويسخن ويسرع هو حلو ف السمع لكن فى التدوين لازم اكتب والمطرب قدامى عشان اسأله لو انا مافهمتش حتة .. انا طبعا كتبت من المف اللى مع الاوركسترا هو فقط الحاجة اللى بتخلينى حذر جدا فى اللحن ده بالذات انه موزع والجملة اللى انت بتسمعها بتكون مش من آلة واحدة .. بمعنى انت مثلا تبقى سامع صول لا سى .. هى مش صول لا سى اصلا .. هى مجموعة من خطوط لحنيه بتعمل اشعاع بيديك انطباع اول انها صول لا سى وممكن يكون اللحن الاساسى حروف تانية لكن التوزيع بيديد الاحساس انها صول لا سى .. وهنا بتحتاج تركيز عالى اوى اوى دقة متناهية وتكرار سمع كل مازورة ... يعنى بستخلص اللحن الاساسى من بين على الاقل 8 خطوط لحنية متداخلة مع بعض ... الاخطر فى الموضوع انا طبعا عامل حسابى بعد كتابة النوتة مين حايعزفها .. بالتأكيد آلة واحدة وهنا لو انا ما دققتش فى اللحن الاساسى انت لما تعزف او اى حد يسمعك حايحس انك بقول حاجة غلط لأنها تخالف اللى هو سامعه اصلا .. ودى مشكلة الالحان الموزعة .. انها لازم تتعزف من النوت الاصلية بتاعة الموزع نفسه .. وللعلم دى كانت مشكلة ايام الفرقة الماسية .. يعنى عبد الحليم كان فى الحفلات مايقدرش يغنى اغنية من اغانيه القديمة الموزعة زى حبيبها مثلا .. لأن الموزع على اسماعيل اخد النوتات معاه .. انا اول امس كنت بتفرج على فيلم ابى فوق الشجرة حسيت بعبقرية عبد الوهاب .. انو خلا الاغانى بتاعته فى الفيلم مش موزعة .. عشان للزمن لو حليم حب يغنيها تانى يقدر يغنيها وفعلا فى حفلة من حفلات حليم الاخيرة عزفنا ياخلى القلب
مرفق ملف ميدى بس طبعا حاتسمعه زى ماهو متكوب ف النوتة مش بيرجع السنيو
مع اطيب تحياتى عادل صموئيل

**المنير** · #**4813** 03/03/2016, 15h31

السلام عليكم
أستاذي العزيز عادل صموئيل لك مني جزيل الشكر كلامك كله حكم و أنا شخصيا استمتع و أقرأ كل ما تكتبه في صفحات المنتدى. لدي بعض الأسئلة لحضرتك:
- لماذا لا نسمع صولوهات للقانون في الفرقة الماسية في حفلات عبد الحليم؟
-لماذا لم يعزف الأستاذ محمد عبده صالح مع مطربين و مطربات غير ام كلثوم؟
-لمذا لا تستعمل الفرقة الماسية الة العود؟
-ما سر عازف الكمان الذي يؤدي صولوهات الغيتار مع ام كلثوم في "هذه ليلتي" و "امل حياتي"؟ و الله انه يؤدي بعض الجمل الموسيقية افضل من خورشيد.
-من الذين لا زالوا على قيد الحياة من الفرقة التي تعزف مع أم
كلثوم؟

تحياتي.

لا تفوتني هذه الفرصة لتقديم أحر التعازي لأسرة الفنان المقتدر عازف العود المغربي سعيد شرايبي.

**عادل صموئيل** · #**4814** 04/03/2016, 00h53

احبائى
اقدم لكم

نشيد الارض

مع اطيب تحياتى

**منذر44** · #**4815** 04/03/2016, 08h48

وعود من العاصفة
نوتة احترافية متقنة
شكرا للاستاذ عادل

**عبد الإله** · #**4816** 04/03/2016, 09h24

أسأل الله أن يطيل في عمرك ،وأن يمتعك بالصحة و العافية وأن يحفظك من كل سوء .قولوا آمين.

**عادل صموئيل** · #**4817** 04/03/2016, 18h44

[QUOTE=المنير;701501]السلام عليكم
أستاذي العزيز عادل صموئيل لك مني جزيل الشكر كلامك كله حكم و أنا شخصيا استمتع و أقرأ كل ما تكتبه في صفحات المنتدى. لدي بعض الأسئلة لحضرتك:
- لماذا لا نسمع صولوهات للقانون في الفرقة الماسية في حفلات عبد الحليم؟
-لماذا لم يعزف الأستاذ محمد عبده صالح مع مطربين و مطربات غير ام كلثوم؟
-لمذا لا تستعمل الفرقة الماسية الة العود؟
-ما سر عازف الكمان الذي يؤدي صولوهات الغيتار مع ام كلثوم في "هذه ليلتي" و "امل حياتي"؟ و الله انه يؤدي بعض الجمل الموسيقية افضل من خورشيد.
-من الذين لا زالوا على قيد الحياة من الفرقة التي تعزف مع أم
كلثوم؟

تحياتي.

اخى العزيز
طبعا اسئلة مهمة جدا وبالطبع مش اى حد يقدر يعطى فيها الجواب الشافى لنه لازم يكون من جوا المطبخ لأن معظمها تقدر تقول اسرار شغل .. او بالذات هى سبب عبقرية الشغل بتاع العمالقة .. لأن كما انتم شايفين لو فيه 2000 اغنية فى الزمن الجميل لمختلف المحلحنين والمطربين عمرك ومش حاتحصل انك تلاقى اغنية شبه التانية وده مش بييجى من فراغ لو ضوابط احيانا بتكون صارمة
بالنسبة لموضوع الصولو لآلة ما ... الملحن بيختار للآلة دى جملة تبقى هى احلى آلة فى الدنيا تقولها .. يعنى مش يقول الجملة دى ناى وخلاص .. او كمنجة وخلاص .. ممكن تكون الجملة مبدعة 1000% مع الكمنجة لكن فى الناى مش براقة اوى والعكس .. ولما يكون صولو قانون لازم يكون الجملة نفسها بتقول انا معمولة للقانون .. وفى اغنية نبتدى منين الحكاية فى الكوبليه الاخير صولو قانون .. كذلك فى اغنية وقدرت تهجر صولو قانون .. ولو تلاحظ فى اغنية هذه ليلتى مافيش صولو كمنجة ولكن فى ودارت الايام كذا صولوكمان .. .. فهمتم المضمون ؟
اما الاستاذ عبده صالح .. هو كان هو والحفناوى والقصبجى ملازمين لأم كلثوم من اول ما ابتدت تغنى على فرقة وكان تخت شرقى بيتكون منهم وسيد سالم وابراهيم عفيفى على الرق ... اما انت ليه ماشفتوش مع حد تانى لن الموضوع مرتبط بالتصوير .. يعنى التليفزيون دخل مصر سنة 1958 ومن وقتها الناس شافته مع ام كلثوم اما قبل كده بعشرين سنة مثلا .. انا قلت من قبل ان مكانش فيه فرق موسيقية محددة يعنى عبد الوهاب لما كان بيسجل اغنية كان بيخلى واحد زى الحفناوى مثلا يكون لو فرقة بس مش منتظمة يعنى ممن بعد التسجيل او الحفلة الفرقة تتفركش والمرة الجاية يطلبوا العازفين تانى .. وبالطبع محمد عبده صالح كان عازف قانون مهم يعنى اكيد مشترك فى كذا اغنية من بتوع عبد الوهاب اوليلى مراد او اسمهان وخلافهم ..وفريد الاطرش طبعا
الفرقة الماسية لما نشأت مكانش فيها عود إلا لما الملحن بيحتاج عود اوى كانوا بيستعينوا بعازف عود من المشاهير وقتها اما العود كان منتظم محمد القصبجى مع ام كلثوم كعازف طول عمره .. ودى للعلم معجزة فى حد ذاتها لن اى ملحن مش ممكن يرضى يبقى عازف حتى لو مع مين .. وبوفاة القصبجى قدت فرقة ام كلثوم مافيهاش عود لعدة سنوات وبعدين ناس كتير الحوا عليها تجيب عود لن العود كآلة ابتدأ ينقرض من الفرق الموسيقية وعودته مع ام كلثوم تحييه من جديد .. ولذلك جابت الاستاذ عبد الفتاح صبرى ..وللعلم وجود اى عازف حلو فى فرقة بيفتح مجال للملحن انه يعمل لو صولو وكانت فى اسأل روحك .
انا زى ماقلت فيه جملة موسيقية او صولو الملحن العبقرى بيحس انها تبقى حلوة لو اتقالت على العود . فى قصيدة لاتقل لى ضاع حبى من يدى .. فيه جملة رياض السنباطى فى التسجيل هو عزف الصولو على العود لما جينا فى الحفلة جبنا عازف عود من فرقة الموسيقى العربية وعزف الصولو فى اول حفلة .. بس ماعجبش الفرقة ( نظرا لننا سمعناه من السنباطى بنفسه كذا مرة ) وكان فيه من ضمن عازفى الكمان الاستاذ حسين صابر بيعزف عود وجربوا سمعوه منه وعجبهم وخلوه يعزف الصولو فى باقى الحفلات .. وبقا يعزف عود بعد كده لما يكون اللحن مطلوب فيه عود .
اما عن عازف الكمان اللى عزف جيتار .. هو عزف من اول انت عمرى ولكن عند هذه ليلتى جابوا عمر خورشيد .. الموضوع مش مجرد اختيار عازف اى آلة وخلاص الموضوع فيهحاجات اعقد من كده بكتير لو تسمحوا اوضح لكم ... اولا عشان اى عازف ينضم الى الفرقة الماسية لازم يكون عزف شاطر 100% مش اقل ويجيد قراءة النوتة قراءة فورية اسرع من ما يقرأ الجريدة عشر مرات .. اما عشان عازف ينضم الى ام كلثوم ده موضوع تانى خالص .. غير انه طبعا لازم يكون عازف ماحصلش لكن لازم يكون كلثومى حتى النخاع .. يعنى قبل ما ييجى الفرقة يكون من قبلها بسنوات عازف مع نفسه وحافظ كل اغانى ام كلثوم حرفا حرفا .. وبالذات افتتاحيات الاغانى .. يعنى مثلا بعض الاغانى لما بتتذاع بيجيبوها من اول الايقاع وبيكون قبل كده كذا سطر من كتر عدم اذاعتهم الناس بتنساهم لكن العازف هنا بالذات لازم يكون حافظ الاجزاء دى .. لأن معظمها بدون ايقاع والعازف لو مش حافظ او غلط بتبقى مصيبة .. اللى ادخل الجيتار لفرقة ام كلثوم محمد عبد الوهاب ودى لها قصة وظروف .. اولا عبد الوهاب كان لازم يقدم لأم كلثوم لحن فيه حاجات جديدة عشان يثبت وجوده معاها بعد الروائع اللى هى غنتها من قبل .. بالطبع فكرة انهم يجيبوا عازف جيتار من خارج الفرقة .. وبالذات الجيتار لأنه مش مثلى انا كعازف كمان .. مش حيكون عازف اغانى ام كلثوم من قبل كلها مع نفسه لأن آلة الجيتار ادائها محدود فى الموسيقى الشرقية .. كان فيه عزف كمان فى الفرقة اسمه الاستاذ عبد الفتاح خيرى بيعزف جيتار .. بس مش محترف فى بيتهم يعنى .. واقصد بكلمة محترف يعنى بينزل شغل جيتار حفلات وتسجيلات .. عبد الواهب توسم فيه نقطة انه كلثومى اوى .. لما فاتح ام كلثوم فى الامر الاول رفضت بعدين هو قال لها هو حيقول الصولو فقط اسمعيه ماعجبكيش اهه موجود .. يعنى مش حانجيب حد غريب ومايعجبكيش ونمشيه ... وكان اخطر ما فى الموضوع ان الآلة الجديدة دى ماتغيرش لانكهة فرقة ام كلثوم او تعطيها هى نفسها طعم غريب للفرقة يخليها ماتعرفش تركز فى الغناء . لأن اخطر ما فى الموضوع انها تغنى وسامعة وراها حاجة هى متعودة عليها ... وكان عازف الجيتار حيقول الصولو بتاعه بعد كده يفضل ساكت طول الحفلة ما يقولش حرف .. عشان نبقى اعطينا الجمهور الحتة الجديدة لكن اداء ونكهة الفرقة زى ماهى .. وفلا عبد الفتاح خيرى ( وهو كان متجوز فايزة احمد وقتها على فكرة ) جاب الجيتار وام كلثوم سمعت الصولو واقتنعت .. بس كان فيه مشكلة خطيرة ( وانا طبعا بتكلم عن الشىء اللى ماحدش بياخد باله منه فى الصورة ) هو كعازف كمان متعود بياخد الكمنجة معاه وزنها خفيف جدا ويروح الحفلة .. اما عشان ياخد الكمنجدة والجيتار ... ده موضوع تانى .. كانت الآلات الكهربائية وقتها تقيلة جدا يعنى الجيتار وزنه 25 كيلو .. والامبليفاير وزنه بيعدى ال 50 كيلو .. ومش ممكن العازف بنفسه يشيلهم .. لازم يجيب معاه شيال او مساعد ومش اى مساعد يعنى لازم ياخد وصلة كهربا وهو يوصلهم بنفسه ولازم يبقى واقف جنب الوصلة طول الحفلة لاحد يدوس عليها او ياخدها السلك فى رجله وهو ماشى الكهربا تقطع .. وكان عبد الفتاح خيرى بيمسك الجيتار ويضع الكمنجة على الارض وبعد مايخلص الصولو والجمهور يصقف يعيد المقدمة بعدين يضع الجيتار على الارض ويمسك الكمنجة .. كمان كانت مشكلة اخطر فى السفر .. الامبليفاير بتاع الوقت ده كان لمبات مش ترانزستور .. وكان العازف فى الطيارة بيشحن الامبليفاير مع الشنط لكن قبلها بيخلع اللمبات ويحطها فى علبة معاه مخصوصة مبطنة بإسفنج بطريقة مغينة عشان اللمبة لو اتهزت اوى ممكن تتحرق .. طبعا ده عادى كان بالنسبة لعازفى الاورج والجيتار .. اما عازف الكمنجة مش متعود على كل المشاكل دى ... لما جه وقت اغنية هذه ليلتى .. عبد الوهاب فكر فى عمر خورشيد .. ده كان فلتة من فلتات الزمن فى الجيتار .. ووجودة خلا الملحنين يعملوا شغل تانى خالص للجيتار .. يعنى اسمع تانى انت عمرى وامل حياتى وبعدين اسمع هذه ليلتى .. حاتحس بالفرق الكبير .. يعنى فى المقدمة بعد الافتتاحية عمل كام مازورة حركة وكوردات مش مسبوقة وبعدين شغله طول المقدمة .. وفيه حرف خطير قاله فى المذهب مع ام كبلثوم وهى بتقول هدذ .. ليلتى مع الياء عمل اكور خطير .. وفى الكوبليه التانى بتاع ياحبيبى طاب الهوى عمل شوية شغل حدث ولا حرج .. المهم انه ما اخرجش ام كلثوم عن لونها .. لكن فيه نقطة طبيعة الصولو فى انت عمرى وامل حياتى تختلف عن طبيعة هذه ليلتى ومابعدها ..
اما عن الزملاء الباقين على الحياة من الفرقة الماسية وفرقة ام كلثوم .. طبعا السن يعنى من المؤكد ان 89% منهم رحلوا رحمهم الله .. والباقين طبعا اما اعتزلوا او تغيرت عناوينهم او تليفوناتهم .. لأن العازفين فى لافرق التانية متعودين يقعدوا فى قهاوى محددة يعنى ممكن الواحد ينزل يلاقى اللى بسه عايش منهم قاعد على القهوة بيتذكر ايام زمان .. لكن زملائى كانوا من البيت للشغل ومن الشغل للبيت كطبيعة الفنانين الكبار ... لذلك صعب جدا ان الواحد يعرف مين فيهم الباقى .. انا شخصيا اعرف واحد مازال على قيد الحياة بسبب انو ساكن قريب من بيتى .. عازف شيللو مع ام كلثوم اسمه عبد الفضيل محمد .. يعنى كان بيتصادف اننا نتقابل فى الشارع .. او نعيد على بعض فى المناسبات .. واحيانا لنا اصدقاء مشتركين سميعة اوى اوى بنروح نسهر عندهم سهرة ونعزف لهم .. بس بنقول روائع يعنى .. هو مثلى مش محب للأضواء .. لكن قصة التحاق عبد الفضيل بفرقة ام كلثوم قصدة جديرة بالذكر .. يعنى قصة عجيبةو ماحصلتش فى التاريخ .. واحب اقولها لكم ... ام كلثوم كان عندها 3 عازفين شيللو .. محمود الحفناوى وحسان كمال ومجدى بولس .. فى وقت معين قبل اقبل الليل بسنة تقريبا محمود الحفناوى ترك الفرقة .. طبعا صعب تجيب حد مطرحه بسهولة .. واشتغلت ام كلثوم فترة بدون الشيللو الثالث .. طبعا كان الزمن ساعتها بيتأرخ بعصور كل سنة يعنى يقولوا سنة انت عمرى وسنة امل حياتى .. لما جم فى سنة اقبل الليل عملوا خمسين بروفة .. بعدين ام كلثوم بالذات بيبقى آخر بروفة قبل التسجيل بتتعمل فى الاستديو .. بيكون طبعا السنباطى خلص كل التعديلات الممكنة واللحن استوى ع الآخر .. طبعا هو طول الوقت بيقعد اما لافرقة بيبقى قدامه الكمنجات والشيللو فى الخلف يعنى طبعا سامعهم منخفض شوية .. لكن فى البروفة اللى ف الاستديو بيقعد فى غرفة التحكم عند المهندس ويسمع الشغل من الميكروفونات .. هنا طبيعة لحن اقبل الليل لو نكهة معينة .. لما سمع حس ان الباص قليل .. يعنى حس بنقص الشيللو الثالث .. للعلم كان ممكن يتصلح العيب من الميكسر ان المهندس يزود الباص لحد مايحس انه مش 3 شيللو ممكن يبقوا عشرة شيللو .. لكن العبقرى السنباطى مسش بياخد بالتكنولوجيا .. بياخد بالطبيعة .. يعنى فى الحفلة او الحفلات اللى بعد كده حايبقى فيه جرعة تساوى شيللو ناقصة ( طبعا اللكام ده ولاحد يعرفه دلوقتى ولا حد بيتطرق لمواضيع زى كده اهو 100 شخص على المسرح نازلين هبد وخلاص ) طلع رياض السنباطى من الكيوبيك ووقف الفرقة وقال ناقصين شيللو .. الكل قال ازاى ده التسجيل بكره .. طبعا ماتنسوش ان ام كلثوم مافيش عندها نوتة يعنى العازفين حافظين .. الفرقة كلها يعنى مش عاجبهم الكلام .. وام كلثوم حست بإنزعاج يعنى آلة واحدة ممكن تخليها ماتعرفش تغنى .. السنباطى قال لها انا عندى واحد اسمه عبد الفضيل حاجيبه بكره لو ماعجبكيش نمشيه عادى .. طبعا كلمة السنباطى تمشى على ام كلثوم هى عارفة هو بيعمل ايه .. تانى يوم قبل التسجيل بساعتين جه عبد الفضيل .. ل الفرقة عارفينه من قبل يعنى عزفوا معاه فى حاجات تانية لكن كانوا متحفزين انهم بقالهم شهرين بيعملوا بروفات كل يوم وهو ييجى يسجل ع الجاهز وحيقول ايه ده مش حافظ الاغنية .. السنباطى قال لأم كلثوم خليهم يعزفوا اللحن المقدمة مرتين تلاتة وعبد الفضيل يسمعهم بعدين هو يعزف اللى سمعه لو ماعرفش نمشيه .. عارفين طبعا افلام الرعب والترقب .. وام كلثوم وكلهم واقفين متحفزين .. الوقت ده ربنا وقف مع عبد الفضيل يعنى هو عنده مهارة بيحفظ بسرعة سمع المقدمة مرتين ومسك الشيللوا عزفها صح طبعا ماحدش قدر يتكلم .. والعادة ان الفرقة بتعزف المقمة 3 مرات بعدين بيسجلوها والمذهب 3 مرات ويتسجل احسوا ان عبد الفضيل فى ال 3 مرات دول حافظ كأنه معاهم من شهرين .. انا من وجهة نظرى دى معجزة .. عبد الفضيل ده شخصيا يمكن اطيب راجل فى الوسط الموسيقى راجل بتاع ربنا يعنى بيصلى الخمس فروض ومش بيشرب اى حاجة ومؤدب جدا جدا فى الكلام واعتقد ان ده السبب اللى خلى ربنا عمل معاه المعجزة دى واكرر انها معجزة ... يعنى اى شخص مكانه وقدام ام كلثوم لأول مرة والفرقة كلها متحفزة له كان كل الموسيقى اللى فى مخه طارات .. وكان فى مصر اخطر شخصيتين ام كلثوم وجمال عبد الناصر .. يعنى لو حد منهم زغر زغرة للأسد ممكن يموت مع اطيب تحياتى

**عبد الإله** · #**4818** 04/03/2016, 20h58

ذا ، تاريخ ذهب ، وأسرار أول مرة نطلع عليها .
لكن صراحة أتمنى أن يطلع عليها ( فنانو ) هذا الزمن لعلهم يخجلون من أنفسهم ويعتزلون الفن.

**عبد الإله** · #**4819** 04/03/2016, 21h56

خالص عزائنا إلى أسرة الموسيقار المغربي ( سعيد الشرايبي ) وإلى كل فناني العالم العربي .
تغمده الله بواسع رحمته .

**عادل صموئيل** · #**4820** 04/03/2016, 23h23

احبائى
اقدم لكم انشودة

من نار خرجت

مع اطيب تحياتى