مشاركات خارج موضوع طلبات النوتة

[علاء السيد]

الكلام ده بيبين فعلا ان الاستاذ عادل هو فعلا استاذ ..استاذ....اسلوب التعامل هو الذى يحدد هل نحب أم نكره

[منذر44]

استاذ عادل
لو تتكرم وتشرح لنا سبب انفراط عقد الفرقة الماسية وسبب توقفها
اظن لو انها استمرت لكانت اسهمت في منع انحدار مستوى الاغاني الحديثة

[عادل صموئيل]

احبائى

اسمحوا لى ان ارد على كلامكم كلو فى موضوع واحد لأنه كله مرتبط ببعضه
ايه الفرق بين طباخ مثلا بيعمل اكلة تتاكل فى يوم وخلصت على كده وبين واحد فنان عمل تمثال زى تمثال نهضة مصر مثلا من اول يوم تم افتتاحه يبقى على مدى الدهر شاهد على حضارة .. وثانيا نفس الفنان لو عمل عشر تماثيل عمره ما بيكرر اللى عمله يعنى العشر تماثيل كل تمثال منهم عمل فنى رائع معروف عالميا بإسم ما ؟؟
حاجة تانية ايه الفرق بين لما تنزل السوق تتفرج على المحلات وتشوف مثلا محل ادوات كهربائية حاطط 300 نجفة هم حلوين لكن المصنع اللى عملهم عامل من كل واحدة آلاف وبين لما تدخل متحف وتلاقى كل قطعة فيه مالهاش اخت لأن الفرق بين السلعة والتحفة ان دى بتتكرر ولها عمر افتراضى يعنى بيطلع احلى منها وبييجى يوم تبقى موضة قديمة او تستهلك وتترمى وبين التحفة اللى كل كل ما يمر عليها الزمن قيمتها بتزيد لن اللى عملها مش موجود يعمل منه تانى .. كمان حاجة فى التحف اذا لقيت تحفة من الذهب الخالص وزنها كيلو جرام مش بيقاس ثمنها بوزن الذهب زى المشغولات الذهبية المتداولة يعنى تقول كيلو الذهب مثلا بمليون جنيه تبقى القطعة دى بمليون جنيه ولكن بتقاس بقيمتها الفنية والاثرية وساعتها لاتقدر بثمن او ثمنها عشرات اضعاف قيمة الذهب فيها
ولما نيجى لعبد الوهاب ( وعمالقة عصره ) انو مش بيعمل لحن عشان يقبض ثمنهم وخلاص ولكن اولا لازم يعمل شىء رائع مالوش شبيه ولازم خبراء الموسيسقى لما يحللوه يلاقوا فى كل لحن كلام كتير يتقال ومش موجود فى لحن تانى وثانيا ان اللحن يعيش الى الابد .... دلوقتى اللى بيلحن بيلحن عشان الفلوس يعنى مثلا لوبياخد 1000 جنيه فى اللحن يتمنى لو يعمل كل يوم عشر الحان لكن اللى زى عبد الوهاب كان بيعمل اللحن فى سنة بحيث مايطلعش احلى من كده وفيه موضوع خطير تلاقى الملحنيناللى كانوا بيعملوا افلام كتير كانت الحانهم متباينة فى الجودة يعنى بيمعل 4 افلام فى السنة فى 7 اغانى كل فيلم يعنى 28 اغنية فى السنة بتلاقى منهم اغانى كتير متكلفتة او معمولة بطريقة حرفية بس اللى بيغطى على كده مهارتهم فى الغناء .. اما مشكلة الفرقة الماسية انها كانت بتشتغل اساسا على عمالقة الغناء والتلحين
ولما ابتدوا يرحلوا واحد ورا التانى كان كبار الفرقة الماسية بيرحلوا هم كمان لأنهم فى نفس السن تقريبا يعنى انا كنت استثناء لأنى عزفت معاهم وانا سنى عشرين سنة فى حين كام معظمهم فى حدود الخمسين .. وكانم مكن تستمر يعنى بتجديد اعضاء لكن المشكلة فى المناخ .. يعنى ماطلعش خلفاء للفنانين العظام زى ما العمالقة كانوا خلفاء لعمالقة قبلهم
وبعدين ظهرت فرق جديدة زى حمادة النادى وهانى مهنى وخالد فؤاد غيروا مفهوم التلحين والتقديم غيروا نكهة الاغنية المصرية .. بمعنى بقت كل الاغانى موزعة وتقريبا لغوا شغل الكمنجات بعد ماكانت زى ام كلثوم هى اللى بتعمل اللحن كله وبتصاحب المطرب .. النهاردة انحسر شغلها فى انها بترد على المطرب بلزمات سريعة جدا تكنيكية اوى مافيهاش طرب وبالطبع مش ممكن عامة الشعب تفهمها والمطرب بيغنى فى الهوا على الايقاع فقط مع ان اخطر شىء ان المطرب لازم تصاحبه الكمنجات ... يعنى انا واحد من الناس الشغل ده لا بحب اشتغل فيه ولا احب حتى اسمعه لأن غيرطبيعة الموسيقى الى احنا نعرفها كمان خطورة التوزيع من اول اللحن لآخره ضيع مفهوم ان الموسيقى المصرية او العربية بتعتمد اصلا على حلاوة الجملة .. يعنى زمان كانت انت عمرى مثلا 350 جملة لازم تكون كل جملة احلى من التانية لن الجملة بتسمعها بمفردها يعنى مكشوفة لكن الجملة لما تحط عليها خطوط كتير حلاوتها مش بتظهر وهنا ممكن تبقى الجملة اى كلام وايقاعت بتهبد واورجات بتصرخ مافيش حاجة باينة يعنى انا لما بينطلب منى اكتب اغانى من دى بقول اكتب ايه انا مش سامع حاجة وتلاقى 120 عازف ع المسرح امامهم 60 ميكروفون ومش سامع حاجة ام كلثوم كان عليها 3 ميكروفونات فقط وشوف .... انا واحد زميلى ساكن قريب من بيتى عازف شيللو اسمو عبد الفضيل محمد يعنى بنتقابل ونسهر ساعات مع اصدقاء نعزف .. هو اكبر منى بعشر سنين بس الحمد لله صحته كويسة لنو مشبيشرب اى حاجة ( كان اسمو الشيخ عبد الفضيل ) وهو اقدم منى يعنى كان بيعزف مع ام كلثوم من اول اقل الليل .. مرة كنت قاعد مع جماعة موسيقيية ومنهم طبال فاشل جت سيرة عبد الفضيل قلت لهم هو بطل يشتغل من زمان قال لى الطبال الفاشل اكيد عجز قلت لو لأ .... هو قرف ... وطبعا المفهوم واضح
مع اطيب تحياتى

[سليم العباس]

تحية طيبة أستاذ عادل :

هذه نوتة سهر الليالي من تدوين حضرتك ، أعدت كتابتها بعد حذف ذيول العلامات و الاستعاضة عنها بالألوان ، لا أعرف إن كانت هذه الطريقة مستخدمة سابقاً ، النوتة تبدو غريبة للوهلة الأولى لكن على ما أظن أنها تساعد المبتدئين على القراءة
فالقارئ لا يضطر إلى رؤية درجة النغمة و الاطلاع على نوعها ( نوار ..كروش ) بنفس الوقت كما يحصل بالتدوين العادي ، بل يمكنه معرفة النوع مباشرة حسب اللون بعد التعود على الألوان الموافقة لكل نوع من العلامات !
و هذه الطريقة تخفف من ازدحام العلامات الموسيقية في المدرج فتبدو أكثر سهولة !

يرجى التفضل بالاطلاع و ابداء الرأي وشكراً.

اخى العزيز
انا ماعجبتنيش لأن اللى بيقرأ النوتة بيقراها بعينه واتعلمنا او اتعودنا اننا بنقرا النغمة بالعلامة لايقاعية
تخيل مثلا فى السيارة فيه 3 دواسات اسفل او بدالات الاوسط هو الفرامل وكل من بيسوق سيارة فى الكرة الارضية متعود ان الفرامل فى المنتصف بحيث انو وهو ماشى لو فجاة ظهر لو شىء طارىء بدون تفكير رجله بتضغط على البدال الاوسط وكل صناع السيارات فى العالم ملتزمين بهذا يعنى تغير فى جميع مواصفات السيارة إلا هذه الدواسات
لما نيجى لهذه الطريقة مش حاتنفع مع المتعلمين نوتة من قبل ولكن انا اتخيل اننا لو جبنا ناس جدد وحانبدا نعلمهم النوتة من الصفر الاول طبعا بنحفظهم اماكن النغمات وثانيا بنعرفهم العلامات الايقاعية يعنى العلامات الايقاعية دى انت لما بتشوفها عاملة زى الفرق بين اوراق العملات المختلفة يعنى ممكن اى واحد جاهل ما يعرف القراءة لكن بالتعود بيميز بين الليرة والخمس ليرات وهكذا ... يبقى انا عشان اعلمه العلامات الايقاعية لازم اعلمه الروند والبلانش والنوار وكسورهم وبعد كده استعيض عنهم بالالوان اعتقد العلامات طبعا اسهل دى وجهة نظرى ومشكلة ازدحام المازورة بتتحل بالخبرة يعنى بكتر التمرين يعنى مفيش جملة موسيقية بتخلو من جميع العلامات وسكتاتها ولو فيه جملة كلها بلانشات فقط مثلا بتبقى جملة بطيئة وسطط جمل سريعة ولو اللحن كلو علامة ايقاعية واحدة حايبقى رتيب مالوش طعم مافيهوش حركة يعنى انا بنصح المبتدئين اختار الاول المقطوعة اللى سهلة الايقاع ثم بالتدريج اختار مقطوعة اصعب وهكذا ومش معقولاطلب من المبتدى انو يبتدى بالاطلال مثلا
مع اطيب تحياتى عادل صموئيل

[سليم العباس]

شكرأ أستاذ عادل على تفضلك بالرد ، و موضوع قراءة النوتة بالعلامات الإيقاعية ( كما وضحته مشكورا )هام جداً و يتعارض مع فكرة تلوين أقسام النوتة .

تحياتي لحضرتك.

[muhamadibra]

المشاركة الأصلية كتبت بواسطة sfakhri

شكرأ أستاذ عادل على تفضلك بالرد ، و موضوع قراءة النوتة بالعلامات الإيقاعية ( كما وضحته مشكورا )هام جداً و يتعارض مع فكرة تلوين أقسام النوتة .

تحياتي لحضرتك.

طيب ما المانع لجمع الطريقتين نرسم العلامة كما هي وبلون محدد يعني نخللي البلانش احمر مثلا والروند اسود ويظل الشكل كما هو

د محمد ابراهيم

اخى العزيز
الموضوع مصطلحات عالمية وانا بعد ماكتبت الرد الظهر فكرت تانى فيه
عن بداية التدوين كان اصلا فى اروبا فى بداية عصر الباروك الاول كان بدايات كثيرة منها حاجات زى اللى انتم بتتكلموا فيها وان النغمات كان المشكلة الزمن ...بمعنى انت حتى ممكن تكتبها بلغة ما لكن الزمن هو المشكلة .. ازاى تقنين محدد للعلاقة الرياضية بين النغمات وده اللى بيعمل اللحن الصحيح وبعد ييجى 300 سنة كفاح واختراعات وصلوا للطريقة اللى احنا بنقرأ بيها دلوقتى ... وىخر تعديل كان من 300 سنة ... وبعدين فيه حاجة مهمة جدا انا طبعا درست كل الطريق البدائية اللى ابتدوا بيها وفعلا الطريقة الاخيرة هى اسهل واوضح طريقة وانها بعد ما اكتملت خلص الموضوع واستمروا على من 300 سنة ولو كانت تحتاج اى تعديل من اى نوع اكيد كانوا عدلوها ... يعنى فيه علماء فى اى مادة شغلتهم الاساسية تعديل او تبسيط النظريات العلمية يعنى مثلا ازاى نظريات انشتاين توصل للتلاميذ اصغار ويدرسوها ف المدارس ؟؟؟ دى مش شغلة انشتاين ولكن شغلة عالم درس نظريات انشتاين اوى بعدين قام بتبسيطها بحيث خامسة ابتدائى ممكن يستوعبوا منها ايه وسادسة وهكذا الى ان توصل للجامعة نفس الشىء لفيثاغورث وكل العلماء فيه عدننا فى الموسيقيى علماء عملوا نفس الموضوع منهم اهم واحد اسمو ايمى بارى ... هو اللى اخترع طريقة تا وتاى وتا فا تى فى وده قدم خدمة جليلة بالذات تخلى الاطفال يتعلموا اداء العلامات الايقاعية اسرع عشر مرات م اللى مادرسوش الطريقة دى وانا اتعلمتها فى اكلية ولما بقيت مدرس كانت برضو اسرع طريقة اعلم بيها تلاميذى
والموضوع الاخطر هو المدرس اللى بيلقن المعلومة ( وده فى اى مادة ) يعنى مدرس لو طريقة تخليك تستوعب الدرس فى لحظة ومدرس ماتفهمش منو ولا بعد سنة ومدرس هو ممكن شاطر لكن مش بيعرف يوصل المعلومة
مع اطيب تحياتى عادل صموئيل

[سليم العباس]

تحية طيبة أستاذ عادل :

هل هناك إمكانية لتشرح لنا طريقة قراءة النوتة بالعلامات الإيقاعية ، وأيضاً طريقة كتابتها ، مع مثال توضيحي من إحدى نوتاتك الجميلة ، و هل يوجد قواعد عامة لبدء التدوين بطريقة صحيحة .

و هل هذه الصورة توضح بشكل صحيح كل العلامات الإيقاعية .

بالطبع لو سمح وقتك بذلك .

تحياتي لحضرتك .

اخى العزيز
هى طريقة قراءة النوتة بالعلامات الايقاعية هى الطريقة الشائعة فى كل الدنيا لن اى موسيقى انت بتسمعها بتكون عبارة عن نغمة مركب عليها علامة ايقاعية بتديها طول معين محدد حسب اللحن
انا فى النموذج المرفق عملت علامات فيها علامات صعبة
لكن لما نيجى لأسهل علامات
الروند تساوى 4 تقرأ تا آ آ آ
البلانش تساوى 2 تقرأ تا آ
النوار تساوى واحد وتقرأ تا
وتلاحظ ان حرف التاء بيأتى للرأس المستديرة او اول الخبطة
ثم الكسور يعنى النوار عندما تنقسم نصفين يبقوا كرشين كل كروش يساوى نصف يبقى خبطتين او نغمتين متساويتين فى زمن النوار الواحدة
وتقرأ تا تى
ونلاحظ ان التا بالفتحة هى الخبطة الاولى وبالكسرة فى الخبطة الثانية وهكذا
وعندما نقرأ النوتة بالعلامات الايقاعية احنا قلنا ان العلامة الايقاعية بيبقى راكبة على نغمة
بنشيل حرف ال ت ونقرراها بالحرف الموسيقى
يعنى مثلا روند فا تقرأ ف آآآ وبلانش مى مثلا تقرأ مى ي
ولو كروشين مى وفا نقرأ مى فا
وهكذا
مع اطيب تحياتى

[muhamadibra]

انا مقتنع تماما برد المايسترو و ان افضل طريقة هي الموجودة حاليا وان المشكلة في توصيل المعلومة - واثني علي ا عادل من حيث معلوماته التربوية وليس غريبا عليه لانه في النهاية رجل التربية والتعليم - انا كان تعليقي للاستزادة في الشرح لتصل المعلومة للمتابعين - فشكرا علي الاهتمام وشكرا للتوضيح
د محمد ابراهيم

[سليم العباس]

شكراً أستاذ عادل للرد السريع ( يعني لو كنت سألت حضرتك وجهاً لوجه مش ح يكون الرد أسرع من كدة )

على فكرة أنا أسأل لأن لدي بعض المحاولات المتواضعة في التدوين ، و لكن أدون على السمع من دون اتباع قواعد ثابتة ، أرجو كما تفضل الصديق محمد ابراهيم أن تغني معارفنا الموسيقية بدروس بين الحين و الآخر .

أكرر شكري لك يا صديق النوتة وبيت أسرارها .

اخى العزيز
بالطبع ياريت لو كنا نتقابل وجها لوجه وكنت اعمل برنامج اقول فيه كل اللى عندى لكن واحنا هنا انا مش عارف ابتدى منين
الافضل انك تسألنى وانا اجاوب وكل ما حد منكم بيسأل سؤال اكيد ناس كتير بتستفيد من المعلومة وانا تحت امركم فى اى سؤال واى وقت
مع اطيب تحياتى عادل صموئيل

[فؤاد العلمي]

شكرأ أستاذ عادل على تفضلك بالرد ، و موضوع قراءة النوتة بالعلامات الإيقاعية ( كما وضحته مشكورا )هام جداً و يتعارض مع فكرة تلوين أقسام النوتة .تحياتي لحضرتك.

أخي العزيز سليم.
لقد أعجبتني فيك روح البحث والاجتهاد من حيث تبسيط النوتة وذلك باستعمال الألوان لتحديد مدة الزمن.
في بداية تحديد كل قاعدة، يجتمع المختصون ويدرسون جميع السبل المتاحة لتحديد هذه القاعدة، ولطالما لا تتعارض مع الإستعمال فهي تظل سارية المفعول، والجميع يطبقها وليس له الحق في تغييرها، إلا إذا وصلت إلى حدودها ولم تعد تساير التطور.
هناك عاهة تصيب البشر بنسبة 4 في المائة (8 للرجال و 0.5 للنساء)، وهذه العاهة كما يعرفها الجميع تسمى الدالطونيزم Daltonisme، ومعناها أن المصاب لا يُفرّق بين الألوان، خصوصا الأحمر والأخضر، وهو أشكال ودرجات. وهذا سبب كافي جدا كي لا نستعمل الألوان في الموسيقى.
والنقطة الثانية هي أن كل لون له طول موجة معينة، وتتثر تأثرا كبيرا مع الإضاءة، بحيث إذا كانت الإضاءة صفراء، فاللون الأزرق يظهر وكأنه أخضر، وكلما ضعفت الإنارة، تقاربت الألوان إلى الرمادي.
ثالثا، المطبوعات تفقد ألوانها مع مرور الوقت، وبهذا، النوت ستفقد معناها في المدى الطويل (أو المتوسط حسب جودة الألوان).
نقطة أخيرة، المدون لا يمكنه أن يظل يغير في الأقلام من حرف إلى حرف. وكذلك المدون يمكنه أن يدون مقطعا عَبَرَ بخاطره وهو جالس على مقهى، والأقلام قد لا تكون بحوزته.
أخي سليم، بالنسبة لإشارات المرور، لابد وأن تكون ضوئية، لأن الضوء يجلب الأنظار خصوصا باليل، ولتفادي العاهة المذكورة، أقر المختصون أن يكون اللون الأحمر دائما في أقصى العمود (في الأعلى إذا كان العمود عموديا، وفي اليسار إذا العمود أفقيا). ومع كل هذا، وخصوصا في الظلام، الدالطونيان لا يمكنه أن يميز عن بعد إذا كان الضوء في الأعلى أو الأسفل، ولهذا السبب في كندا (بعض مناطق كيبيك)، بدأ الشروع في إضافة أشكال هندسية إلى الإشارات الضوئية، وهي الدائرة والمعين والمربع.
أخي العزيز سليم، أرجو أن أكون قد توفقت في التوضيح.
مع تحياتي- فؤاد