انا عندى نوتة فكرونى كاملة ان شاء الله . حد عاوزها ؟ بدل ما الاستاذ عادل يكتبها من اول وجديد ؟
الأخ العزيز
ممكن تنزل النوتة دى بأقصى سرعة عشان نشوفها , لو تعجب الأخوة الأعضاء
مع اطيب تحياتى عادل صموئيل
احتمال تكون النوتة التي يقصدها الاخ سامي هي هذه
لكنها ليست كاملة يبقى بها اجزاء ناقصة
اخوتى الأحباء
انا بحب آخد بكلام اخى العزيز وائل لسبب مهم انه اولا بيقرأ نوتة كويس وثانيا انه بعزف سماعى يعنى كتير بكون ناسى جملة وهو بيفكرنى بيها وانا اضيفها
يعنى الأخ وائل لو قال ان النوتة دى تكفى خلاص ولكن لو قال انى لازم اكتبها للمصلحة العامة حاكتبها
بس انا شفت اول 3 اسطر حسيت ان الجزء اللى انا كتبته احسن كتير يعنى انا كتبت صولو القانون وهو مش تقاسيم ده صولو ولازم للأمانة التاريخية يتكتب , بمعنى كلمة تقاسبم يعنى انت ممكن تعزف حاجة تانية من عندك لكن صولو يبقى لازم تلتزم انك تقوله زى ما قاله محمد عبده صالح حرفيا وإلا ضاعت قيمة الأغنية كمان ام كلثوم كل الأدليب كان متلحن كده يعنى مش موال ولازم يتكتب
مع اطيب تحياتى عادل صموئيل
احبائى
اقدم لكم نوتة
حلاوة شمسنا
انا اللحن ده فيه عندى تحفظ عليه يعنى انا بحس ان على اسماعيل ألف االلحن فى سنة وفى سنة تانية عمل المقدمة , يعنى كل ما اسمعه احس ان البنات اللى بيقولوا حلاوة شمسنا بيدخلوا من سكة بعيدة جدا عن السلطنة والتحضير اللى بتعمله المقدمة الموسيقية بعدين قبل الغنا بمازورتين عمل تحويلة غريبة استغرقت منى وقت عشان انا افهمها واكتبها
ومن الملحوظات فى هذا اللحن انك بتسمع المطرب الأساى فيه 3 بنات بيرد عليهم الكورال , وال 3 بنات دول كان اسمهم الثلاثى المرح , كان 3 آنسات بيغنوا فقرة لوحدهم فى كل حفلات اضواء المدينة فى وقت كانت اضواء المدينة الحفلة بتضم جميع النجوم يعنى تلاقى فقرة لوردة وفقرة لفايزة وفقرة لنجاة وفقرة لبد الحليم وفقرة ل لبلبة كمنولوجست وفقرة للثلاثى المرح هذا , وهى ظاهرة لم تتكرر انك تلاقى 3 بنات مع بعض صوتهم منسجم ومتوافق للدرجة المذهلة دى وبيعطوك انطباعين عكس بعض , يعنى دائما لما 3 يغنوا مع بعض تلاقى المسموع صوت واحد لكن ال 3 بنات دول كان كل واحدة فيهم لها نكهة او نبرة فى صوتها مختلفة عن التانية وسبحان اللاه تسمع بينهم هارمونى او تجانس غريب , وتحسه هنا فى الاغنية دى الفرق بينهم وبين صوت الكورال اللى بيرد عليهم , ووجودهم وانتشارهم الكبير فى ايام الزمن الجميل خلق نوع جديد من الغناء غير المطرب الفردى والدويتو , نوع ثلاثى , جعل المؤلفين يستغلوهم ويعملوا لهم اغانى مخصوص الموضوع انه بتغنيه 3 بنات منها مثلا اغنية ل 3 بنات عايزين مواصفات فى العرسان وغيره , وكان اسمهم صفاء وسناء وسهام , والجدير بالذكر ان حمد فؤاد حسن تزوج نجوى فؤاد لمدة قصيرة بعدين اتطلقوا وهو تزوج سهام دى وعاشت معاه طول عمره وانجب منها اولاده خالد وعبير , واحمد فؤاد حسن له مقطوعة موسيقية اسمها عبير كان عملها هدية لعبير بنته , واعتقد انه سمى ابنه خالد إما تبركا بعدب الناصر الذى كان يسمى ابو خالد , او عشان يبقى الأسم خالد احمد فؤاد حسن ( يعنى ان احمد فؤاد حسن خالد للأبد ) مش عارف
مع اطيب تحياتى
احبائى
اقدم لكم اول نشيد من المجموعة الجميلة التى اختارها الأخ العزيز حجازى
انا النيل مقبرة للغزاة
والنشيد ده اتعمل فى مرحلة الحروب فى مصر يعنى تقريباً فترة العدوان الثلاثى , والغناء للوطن ينقسم الى عدة مصنفات , ( طبعا دلوقتى ماحدش بيعرف الكلام ده ) اول حاجة الأناشيد الحماسية ودى كانت لإشعال الروح الوطنية ساعة الحروب , وساعة الحروب بيبقى البلد فيها جيشين الجيش الأول اللى على الجبهة والجيش الثانى الشعب فى الداخل اللى بيؤازر الجيش ويدفعه للنصر , كانت الأناشيد الحماسية دى زى النار اللى بتشعل الحماس يعنى كانت بتتذاع للجنود تلاقى العسكرى لو قدامه طابور دبابات , المعروف من خبرتى العسكرية عايز تعطل طابور دبابات عطل اول واحدة , لأن باقى الدبابات عشان تعمل طابور تانى وتستأنف السير حاتاخد وقت , كان العسكرى المصرى اول ما يسمع الأناشيد دى كان بيلغم نفسه ويرمى نفسه على اول دبابة يفجرها باللى فيها بعدين على ما باقى الدبابات تفوق من الهرج والمرج وتستأنف تكوين طابور جديد يكون زملاء العسكرى الشهيدده وضبوهم يعنى عملوا فيهم اكبر خسائر ممكنة , النشيد ده بيفكرنى بأيام انا عشتها بنفسى ( ما شافوهاش الشباب بتاع الأيام دى بتاع تمورة , اللى بياكلوا حلاوة ياكلوا جاتوه ياكلوا كل اللى يحبوه ونسيوا حاجات كتير اهمها حب الوطن , يمكن هم مظلومين عشان مفيش مطرب محترم بيفكرهم بحب الوطن ) , انا كنت ساكن فى عين شمس كان عندى 6 سنوات ايام العدوان الثلاثى فجأة تسمع صفارات الإنذار وكله يطى النور .... وتبتدى الضلمة ... بعدين تسمع اصوات المدافع واصوات الطائرات تعدى قريب منك واحيانا فوق راسك وانت مش عارف الطيارات دى معادية ولا بتاعتنا , لأن الحرب زمان كانت بدائية مكانش فيه زى دلوقتى قواعد صواريخ وخطوط دفاعات جوية متعددة وانذار مبكر يعنى الطيارة المعدية اول ما تطلع من حظيرتها بتكون مرصودة وفيه صاروخ اسمه سام 6 ( ربنا يبارك فيه وفى اولاده اللى بعده ) ده بيطلع يجيب الطيارة من ديلها يعنى اى طيارة معادية نضربها ولما تقع نفرمها ونعملها خواتم ( بجد ) كان زمان فيه ييجى 700 مدفع بدائى اول ما الطيارة تيجى المدافع كلها تبتدى تضرب عليها وطبعا احتمال انها ممكن تعدى اكتر من 90 % لأن الضرب كان على فوق يعنى مش مركز على حاجة محددة بإختصار نحاول نخوفها ويا صابت يا خابت , وتدخل الطيارات المعادية فوق القاهرة والمدن كلها ممكن يضرب يكسر الدنيا وممكن عايز يهزر بسلامته او يخوفنا بس يعنى يقعد رايح جاى بصوت مفزع او يخترق حاجز الصوت , وانوع الثانى من الأناشيد الوطنية الأناشيد اللى تتغنى فى المدارس فى وقت السلم والنوع الثالث الأغانى الوطنية زى مثلا طوف وشوف , والمؤلم والمؤسف ان من اكتر من 20 سنة ما سمعتش نشيد جديد من هذه الانواع , يعنى حتى لو مش حانحارب تانى المطلوب اغانى وطنية ذات قيمة تحسس الشباب يعنى ايه وطن
مع اطيب تحياتى
احبائى
اقدم لكم اولا اطيب التهانى بمناسبة عيد الأضحى المبارك اعاده اللاه على الجميع باليمن والبركات
اقدم لكم نوتة اغنية
ولا بنخاف
بناء على طلب الأخ العزيز عزت شحاته
يمكن النوعية دى من الأغانى مش بسمعها اصلا وبالطبع مش بكتبها و وهى بتخرج عن سياسة المنتدى وممكن يرفدونى بعدين حعمل عرية سندويتشات كبدة بس تيجوا برضه لأن اكيد الكبدة اللى حاعملها حتكون حلوة زى النوت بتاعتى
انا اللى خلانى اكتبها حاجتين
الحاجة الأولى ان من اكتر من اسبوعين كل ما انزل اشارع حوالين بيتنا الاقى خرفان , طوفان من الخرفان او ماسورة خرفان ضربت ف الشارع ومش بسمع غير مامأة لدرجة انى خفت على اللغة العربية لا تتنسى بعد العيد , بس لاحظت شجاعة الخرفان يعنى مش خايفين من الجزار وانا اقدم هذه الاغنية ولا بنخاف تحية للخرفان الشجعان الصناديد الأشاوس
والسبب التانى هو انى عايز اتكلم عن الغناء الحديث , يعنى اهم شىء فى الغناء انك بتحتاج تسمع حروف موسيقية سليمة والكلام ده للجميع يعنى خبراء الموسيقى وللمستمعين العاديين والشىء ده بقى مش موجود حديثاً , يعنى انا اول ما المطرب الفقيد ده ابتدى يغنى قال ولا بنحاف اول حرفين دول مش موجودين فى الحروف الموسيقية يعنى مش عارف جابهم منين يعنى ممكن يكون اشتراهم مستعملين من سوق الخميس او لقاهم قى صفيحة قمامة , اضطريت انتظر لحد ما الكورال ردد كلامه وعرفت ان الحرفين دول دو و رى , طبعا كارثة بكل المقاييس يعنى المطرب عشان يبقى مطرب لازم يكون اولا عنده مساحة صوتية من نغمة كذا لنغمة كذا ولازم تكون اكتر من اوكتاف و3 نغمات على الأقل
ولازم تكون النغمات داخل نطاق هذه المساحة الصوتية تكون سليمة 150 % النغمات العادية والبيمول والدييز والأرباع الشرقية بتاعتهم , وهذا شرط محظور التنازل عنه للمطرب اولاً زى ماقلت الموسيقى الخبير لما بيسمع بيحس هنا انه بيغنى نغمات كذا وكذا صراحة , وثانيا للمستمع العادى النغمات الصحيحة بتعمل عنده طرب , والأهم والأخطر ان المطرب الناس بتقلده , والمطرب الفقيد ايضاً الناس بتقلده , لكن المطرب المحترم بيتسبب فى تربية اذن موسيقية عند الناس وبالذات الأطفال , والمطرب الفقيد بيتسبب فى تربية اذن لا تفقه شىء فى الموسيقى او اتلاف آذان كان ممكن تبقى آذان موسيقية , انا لو ليا حكم على البلد دى اعمل قسم جديد فى الشرطة زى ما فيه شرطة كهربا وشرطة آداب اعمل شرطة وجدان وتقبض على كل اللى مش مطرب وبيتطفل على الغناء وياخدوا 45 يوم استمرار اعدام , حاتقول لى الاغنية من فيلم ومعلش عيل وغلط وتعدى وخلاص حقول لك كان زمان فى زمن الفن الجميل حاجة خطيرة اسمها الفرق بين المخرج وبين بتاع البطاطا , يعنى المخرج ده حتى لو درس إخراج فى امريكا لازم يكون متودك فى كل الأعمال المتصلة بالفيلم السينمائى من أدناها الى اقصاها واشتغل فيها بإيده من اول نوع الكاميرا وانواع العدسات اللى بتتغير عليها والحوامل المختلفة اللى بتتحط عليها الكاميرا يعنى فيه قضيب زى قضيب القطار بيتعمل على الأرض وحامل مخصوص ببتتحط عليه الكاميرا عشان تتحرج بإنسياب حركة افقية فى حدود عشر امتار من اليمين الى اليسار , لازم المخرج ده قبل ما يقول آكشن واستوب يكون بيعرب بإيده يركب القضيب ده ازاى , والتسجيل للصوت لازم يكون بيعرف كل حاجة عنه , بإختصار انت لما تشوف اى فيلم وتقرأ التتر كل الوظائف اللى عليه لازم المخرج يكون بيعرفها وبيعملها بنفسه يعنى الطبع والتحميض والمونتاج كل الكلام الكتير اللى بقوله ده الفرق بين المخرج وبين بتاع البطاطا ونأتى لوظيفة خطيرة لازم المخرج ده يكون بيفهم جدا فى الموسيقى والغناء يعنى مش شرط بيعزف ولكن يكون سميع جامد جدا عشان يفرق بين واحد بيغنى وواحد فقيد يعنى , يعنى مثلا اسماعيل ياسين مطرب ومطرب جداً لكن شكله مش عاطفى يعنى ما يقنعكش لما يغنى اسيرالحبايب ياقلبى ياديب , كانوا بيستغلوه ازاى اما فى منولوج او كلام يضحك او كلام يضحك وآخره لست ادرى , او يبتدى ب جئت لا اعلم من اين وبعدين يقول كلام يضحك وعبد الوهاب كان بيحبه وبيموت فيه لأنه بيقدم الاغنية بشكل جميل ومش بيأثر على احترام الأغنية الأصلية , ( بعكس العار اللى بيعملوه فى الاغانى المحترمة دلوقتى ) كمان فيه شىء خطير يعنى واحدة مثلاً زى الفنانة القديرة جدا فاتن حمامة هى فى التمثيل محتاج كتب عشان اوصفها لكن فى الغناء محدودة يعنى مثلا زى اغنية آلو آلو احنا هنا اجادت جدا لأنها فى حدود امكانياتها ولاحظوا هنا شىء خطير جداً اكيد المخرج طلب من الملحن انه يعمل اجزاء شادية بسيطة تبقى زى اجزاء فاتن حمامة بحيث ان المطربة القديرة شادية ما تفتريشعلى فاتن حمامة فى الغنا وتطلع جنبها نملة وده يقلل من فاتن فى الأغنية يعنى تلاحظ العبقرية ان الملحن عمل لهم اللحن متساويين فى القوة , لكن لو فيه فيلم عايزين فى الدور اغنية صعبة لفاتن حمامة ( وى فيلم انا بنت ناس لحسن الإمام ) الحل الصحيح كانوا بيجيبوا مطربة مغمورة وقديرة وتسجل اللحن وفاتن تحرك شفايفها عليه ( تعمل بلاى باك يعنى ) وده شى عادى ومتفق عليه عالمياً لعدم إهانة الفن
مش كده ولا ايه ؟
احبائى
اقدم لكم اغنية
آه ياعينى ع اللى بيدارى الغرام
اهديها لأخى العزيز نور الصباح
واصبر على باقى الطلبات يعنى باالكتير 7 سنين مش اكتر
وهنا اتكلم عن المطرب ماهر العطار , يعنى هو طلع فى عز زمن الفن الجميل كانت ساعتها المطربين درجات يعنى الدرجة الاولى كانت ام كلثوم وعبد الوهاب ولو حسبتها تلاقى ماهر العطار يأتى فى الدرجة السادسة او السابعة بعدهم ( لأن المقارنة زمنها كانت بتبتدى من عندهم دايما لأنهم كانوا موجودين ) وانا لما بسمع الكائنات اللى عاملين نجوم دلوقتى والله ما فيهم واحد ييجى واحد من 100 فى ماهر العطار هذا
انتظروا غدا مفاجأة من العيار التقيل التقيل جدا 14 صفحة كاملة من الفن
أحبائى
والآن مع اللقاء المنتظر
فكرونى
كاملة فى 14 صفحة راعيت فيها كل حرف قالته ام كلثوم
والاغنية دى كانت بعد ماعبد الوهاب اقتحم صرح ام كلثوم عدة مرات ولازم يقدم كل مرة شىء جديد عشان مايبقاش متكرر , من اهم الاشياء صولو الطبلة اللى فى وسط موسيقى الكوبيليه الثانى , والغريب انه عمل صولة طبلة مع ان الطبيعى يعمل 4 موازير ايقاع فى اول الموسيقى , والصولو غريب يعنى تحس فى اوله انه بيحضر لشىء يعنى يديل الاحساس بالترقب بعدين يديك واحدة ونص يعنى لون غريب جدا على ام كلثوم الناس قالت ساعتها ده رقصها , وكانت ام كلثوم محتاجة ده عشان تبقى متجددة , وعشان جذب الشباب اللى كان بيسمع عبد الحليم وشادية
فى الكوبليه الثانى عمل جزء كبير جدا ادليب وهنا اكرر انه ادليب مش ارتجال كما قال احد الاخوة الأعضاء , لأنك لو سمعت عشر حفلات تلاقى الادليب هو هو بالحرف , ونأتى للقفلة خرج عن المعتاد وهو ان تقفل بالمذهب لكن قفل الاغنية بقفلة مسرحية خاصة ولم يغفل طريقته العبقرية بأنه فى اى مقام من المقامات الغربية ان يضع نغمة شرقية قبل القفلة وده شىء بيخلة القفلة تبقى مذهلة
اتمنى ان تسعدوا بها مع اطيب تحياتى
احبائى
اقدم لكم الكوبليه الاول من فكرونى
وزى ماقلت انا دونتها من فترة بعدين كنت فاكر انى كتبت ااالكوبليه الاول وكملتها
وانا اعتذر عن تقديم الكوبليه منفرد بسما يجراش حاجة يعنى انتم ممكن ترتبوا الصفحات بطريقة تريحكم
المشكلة انى ما اقدرش ادمجها وسط الاغنية لن فيها ادليب كتير جدا والمفروض انى ادمجها فى صفحة رقم خمسة وفيه بعديها عشر صفحات كل الادليب اللى فيهم حايتلخبط بطريقة صعب تصليحه وعلاجها انى امسح كل الصفحات واعيد كتابتها تانى ودول عشر صفحات يعنى حياخدوا وقت كبير جدا اكون دونت فيه كذا حاجة
واساس المشكلة ان البرامج الموسيقية غربية اصلا يعنى فى الغربى ممكن تزود اى عدد من الموازير او الصفحات فى اى مكان لكن لما بنعمل ادليب هنا انا تحايلت على طبيعة البرنامج واى تعديل ممكن يحصل بعد الادليب لكن قبل الادليب انتم عارفين ان اى إضافة فى اى برنامج كمبيوتر زى الوورد اوفيس مثلا الإضافة بتعمل إزاحة , يعنى بتحرك اللى مكتوب بعدها لكن طالما المكتوب بعدها ده من طبيعة الرنامج اعمل تعديل زى ما انت عايز , لكن لو انت عامل حاجة مخالفة لطبيعة البرنامج , البرنامج مش حايستوعبها وحاتحصل لخبطة
وانا آسف مرة تانية , بس بينى وبينكم انا مش متضايق لن الأخطاء كلها مش موسيقية يعنى لو خطأ فى التدوين او كده انا اعنزل احسن
مع اطيب تحياتى
رد: طلبات نوتة
العرض المتطور
