الشاعر الشعبي عادل الغزالي

[عادل الغزالي]

نا فموح وتغونين .. والناس سهرانين .. فرح وزها ياعين

شين شين أنواحك شين .. وما يردش ناس مراهين

انســــي غلاه الــــزين


نا فموح فمناجاته ... زولا تباعد قسمتي هلبــــاته

والناس طربانه الليل قضاته وانتي دموعك حادره سيلين

انســــي غلاه الــــــــــــزين

دمع الندم يا عيني ماجاب غير نواح بتغونيني
روفي عليه تربحي هنيني واشقي بغلا للي صوبنا شاريين

انســي غلاه الـــــــــزين

جور حديثك يانه عامين مقدرتي علي نسيانه
الناس فزهافي ليلها طربانه وانتي عليك اتقول دمعك دين
انســـي غلاه الـــــــــــــــزين

[عادل الغزالي]

رانــا بلاكــــم

رانا بلاكم فالزمـان أغـــراب


سوال النبـي ما طوّلوالغيـــــاب


تعالوا تعالوا .... شوقنا ابناديكـــــم


تجري اسنين العمر متراجيكــــــم


فدنيا غروره وصبرها كذّاب ورانا بلاكم


*******


خايفين منكم. خايفين عليكــم


اليالي الغربه وطولهــا أتنسيكـــم


واللي بعـــــاد عالعيـــن


م القلـــــــب منسييــــن


قالوا عربنا وقولهم ماخــــــاب


ورانـــــــــا بلاكــــم


********


تعالوا غوالي اطاولت مرجانه


وعالله فيكم ما يخيـــب رجانــه


لريــــــاف دوم ايزيـــد


والشــوق قايــــد قيـــــد


سوال النبي لاتغيبــوا ياحبــــاب


ورانــــــــا بلاكــــــم


عادل محمود / كمبالا2002 ف

[عادل الغزالي]

وليالـي .... وليالـي عدن
للجمعه ليام ايردن

وليالي زينا ...... فيهن رينا ....... بــو سالـف مكحـوله عينــــه


نحسا بو ليّام اتجينا ...... تالي ردن ....... متعشيهن بيــه تغــــدن


وليالي سوده ..... شينا نوده ...... بارقهـن يشكـع برعــــــوده


وليالي فالصوب ودوره ..... لو ينعدن ...... دوب أصباع ايديك ايبــدن


وليالي مـرن ...... روحي سـرن ..... قمــره والنجمـات تعـــّرن


منني ياناس وغرن ..... لاماعـدن .... قلبـي وعيونـي ينهــــدن


وليالـي حلوه ...... فيهن سلـوه ..... حـال المـدردح من علـــوه


في غفلة يمشن في سهوة ..... ما ينشدن ...... ليام ايبيدن ويجــدن

وليالي كســــرا ....... وليالي يا طيبك نومــه


متفيد الحســـرا ....... لاتجيب الدمعة واللومـه


المكتوب وبصــرا ....... وموالف طوع المقسومه


مادامش كســرا ....... لادامت ليام الرومـــه


المتوضي عصـرا ....... ياناري ماكمّل يومــه


ليام انتعطي باليسرا ...... لاماودن ........ تأخذ باليمنه لاسبــدن


عدن وليالي ..... زاهي بالي ......... فالدنيا ما كيفــي والـــي


وليالي يا سات اقبالي ...... دوني سدن ...... بيبا ناً نحساب ايصدن

[عادل الغزالي]

صبرك وعز النفس ( بورجيله )
)مقتطفات من كتابي ... كحاوي غناوي .. الاصدار قريب انشاء الله )

يتداول هذا المطلع الجميل بين ألسن الناس مـنـذ مـده طـويله والذي يقال ان كاتبه الشاعر الشعبي المرحوم حسن الفاخري ( الاقطع ) , لأنه يتطرق الي موضوع الحث علي الصبر والاعتداد بالنفس من زاويه غريبه , وهي زاوية ( أحتساب العدو ) وكأني به يكون من اشعار المقاومه بصفه عامه , بما يعني حرمان العدو من التمتع بطعم الانتصار , وخاصة اولائك الذين يستمتعون بأذلال الناس بإ ستغلال حاجاتهم . ولكن إن صبر الانسان فإنه حتما سيجني ثمار صبره ولكن شاعرنا اشترط اقتران الصبر بعزة النفس لتتكامل الحلقه , مع ان الصبر وعزة النفس وجهان لعمله واحده .
ولكن لم تصل الينا أي سارحه تكمل هذا العمل الرائع ويقال ان الفنان الشاعر علي الجهاني له محاوله جميله في استكمال هذا العمل وهوا من الشعراء المخضرمين في كتابة اشعار قول لجواد ولكني لم اطلع عليها وكذلك كانت لبعض الشعراء محاولات اطلعت عليها في استكمال هذا العمل وكانت رائعه ولكن مطلب صديقي الفنان المتنوع (علي سالم ) كان يريد نص شعري غنائي ليتمكن من توليفه مع اللحن الرائع الذي الفه خصيصا لهذا المطلع لذلك طلب مني المحاوله لاشارك في كتابة نص من تاليف اعجوبة الشعر الشعبي الليبي ( الاقطع) والذي اعتبره شاعر الاغنيه ألشعبيه ( الفطري ) وذلك لسلاسة مفرداته . فكانت لي هذه المحاوله والتي اعرضها عليكم واتمني ان اكون قد ( انسترت مع سي حسن لقطع) واترك لكم الحكم.






صّبرك وعز النفـس ماتنساهــن
مليحات ويموت العدو من داهــن
( يقال ان هذا المطع للشاعر حسن لقطع )
عـــــزام أيــــريـــدن
صّبــرك وعز النفـس رآه ايفيـــدن
و"أول ثمـا يرهـن عــدوك ايكــيدن
نيـران حسـدا أتبـان لو وراهــــن
صّبــرك وعــزة روحــــــك
فيهـن دواء يشفى جميع أجروحـــك
هـن عزوتـك راهـن وكل طموحــك
مليحـات ما يزهـي اللي شواهــــن
للنـاس مـــــاتواطيهـــــا
نفسـك عزيـزة وما ادلل بيهـــــــــــــا
وصبـرك حوايـج واجده يقظيهــــا
وسبحان مــن فيـنا اللـي سواهــن

عــــز روحــك ديمـــــا
خلـك شديـد العـزم وان الضيمـــا
بنـادم بـلا لقــدار مــالا قيمـــــــــــــــــا
لو نموت مانرضـي انعيـش بلاهــن
عادل محمود/2004

[عادل الغزالي]

أنضر ياقلب ايش دايرلك
حتي في نومك خاطرلك

ناويلك راهو بالذله ساعليك
ياويلك منه ياويلك
ياقلب أنضني ساحرلك

قلب أعويل شارد لا تغفي لا تقيل
متحير فامرك متويل
ماعندي كيف اندبرلك

ويش موضوعك شارد فسجودك وركوعك
ياقلبي هدي من روعك
واحكيلي بلّي صايرلك

[عادل الغزالي]

اول برول تغنا تغنا به الفنان عبد الجليل كتبنه العام 1984
في بالي مازلتــــو
مسع هنتـو
حتي كان غنايا كنتــو.. والله
حتي كان غنايــــا
في بالـــي انتو دوم معايــه
موهيــن يا ناس غلايــــه
كيف ننســـا عشره قدرتــو
من وان لــــوان
تهفو وترجــــو الميــزان
الخاطــر يجيد صوب زمــان
أيام الخاطر فيه حكمتــــــو
بقسمة لقــــدار
أرضي قلبــــي وان كانت نـــار
اللـــي يشوفا يحلف صبــــار
وهو جاشا نصين قسمتــــــو
راضي لقســـام
وراضي بالدمعـــة والـــلام
وانتو مامـــــرا بســــلام
مرسولاً شوري حملتـــــــو

[عادل الغزالي]

اوقف عندّك وألزم حدّك كيف لوّل ما عاد انعدّك
خطوه ما عاد تخطيهـــا كلمه زياده ما تحكيهــا
حاجه منك مــــا نبيهــــــا ربي يغنيني عــن ودك


ابعد عنــــــــــــي يكفي جرحـــك يكفي عيبك
لا تكـــــــلمنـــي غشاش اكثار مـــــــلاعيبك
ما ترفع عينك في عيني لا تسلم وين تــــــلاقيني
امرك ما عادش يعنيني كنت معاك وتوه ضــــــدك


اوقف عنـــــدك في حالك وآنا في حــــالي
وألزم حــــــدك جافيـتك لا تــــــداعــالي
يكفيني ما ريته منك لا تجيني لا ننشـــد عنــك
وبكره الايام ايورنك كيف ودي ما والي ودّك

[محمد بوشيبه]

المشاركة الأصلية كتبت بواسطة عادل الغزالي

اول برول تغنا تغنا به الفنان عبد الجليل كتبنه العام 1984
في بالي مازلتــــو
مسع هنتـو
حتي كان غنايا كنتــو.. والله
حتي كان غنايــــا
في بالـــي انتو دوم معايــه
موهيــن يا ناس غلايــــه
كيف ننســـا عشره قدرتــو
من وان لــــوان
تهفو وترجــــو الميــزان
الخاطــر يجيد صوب زمــان
أيام الخاطر فيه حكمتــــــو
بقسمة لقــــدار
أرضي قلبــــي وان كانت نـــار
اللـــي يشوفا يحلف صبــــار
وهو جاشا نصين قسمتــــــو
راضي لقســـام
وراضي بالدمعـــة والـــلام
وانتو مامـــــرا بســــلام
مرسولاً شوري حملتـــــــو

الله ... ياسلام لنا زمان ماسمعنا كلام يحركنا .. مبدع استاذى والله فنان .. اكمل والله انتابعوك وبشوق وبلهفه ربى يباركلنا فى عمرك

[خالد خليفه]

السلام عليكم

مشاالله عليك خونا عادل ربي يحفظك وطول عمرك .......
ويا ريت ماتحرمنا من جديدك ياغالي والحق يقال ديما تتحف فين باشعارك القمه فالروعه ...
وصح لسانك ....
الله الله في بالي مازلتوا مسع هنتو....
الله الله ياريت تتحفنا بالشعر الجميل ايام الزمن الجميل زمن القندوز ونتا مش غريب عليك هالمشوار لنك كنت تمثل جزء
من ذلك المشوار الشعبي الكبير ....
ولك مني خالص تحياتي

[عادل الغزالي]

مابــــا ايوالــف غيركــــم

ومابــا ايوالــف غيركــم
يلــي انسيتــو طيركــم

تهـــدم عشـــا
بعدكــم مالقـــط قشــا
جزاتــه يــاولاف الغـشا
اللـه ايكثـر خيــركـــم
*******
مابــا يالـــف
ولاعــاد فسربـا رفـــرف
مسيكيـن فحـال ايصخـــف
أشقـوبا الله ايجيــركـــم