أحلام رمضانيّه
بعد صلاة العصر بساعه
وتحت التوته بيحلى الصّوم
يومها لقيت الجوّ طراوه
وجه فى دماغى شويّة نوم
,,
فجأه سرحت ف حلم جميل
عوزت الليل يدخل وانا صايم
ولا فكـّرت ساعتها ف مغرب
واتمنـّيت انىّ افضل نايم
,,
شوفت اللهمّ اجعله خير
إنىّ مروّح ومانيش دارى
كأنىّ فتحت الموقع يعنى
وكل الناس داخلين على دارى
,,
رحت منادى ..ياعمّ أمين
يا حاج سلومه ..ياواد ياسباعى
قولوا لكلّ حبايب التوته
عندى ضيوف من أهل سماعى
,,
شفت ساعتها الاستاذ غازى
وعمّ سمعجى مع الدكتور
كانوا واقفين بيقابلوا ضيوفى
وخلوّا حياتى فرح وسرور
,,
وانا فى سعاده وكلّ شويّه
ب ابصّ بعينى على الزراعيّه
شفت كأن مراكب جايّه
وخلق كتير راكبين عربيّه
,,
سامع صوت فى الجوّ احلوّ
لاهو كلاكس ولاهو صفـّاره
وألمح مدحت إبنى بيجرى
عليّه يقول لى شوف الطيّاره
,,
نازل عمّى زمنطر منها
معاه أبو زهده ويوسف سالم
وم الشبّاك بلقيس بتشاور
مين ويّاها ؟ ياربّ ياعالم
,,
وانا فى الفرحه ومبسوط خالص
عايش أجمل يوم من عمرى
شفت علاء قدرى مع رائد
جاىّ معاهم طارق العمرى
,,
فاضل وقت بسيط ع المغرب
والقرآن كان لسّه بيقرا
وكلّ الناس من أهل سماعى
اللىّ بيسمع واللىّ بيقرا
,,
وجت ملاّكى نمرها بحيره
فيها إسلام مع أبو مندور
واللى سايقها ناصر دويدار
لمّا قابلهم فى دمنهور
,,
وفاتت خالتى رغد على منـّه
بنت عطيّه جابتها معاها
وزاد السّعد بعمّى ريحانى
ويسرى عطيّه وعلاء طه
,,
قلت يا مدحت روح قول لامّك
عندك وجبه تكفىّ ضيوفى؟
قالت الصّايم رزقه على الله
وحط ف قلبك بطيخه صيفى
,,
قلت اتطرّف يمّ المطبخ
قصدى أطـّمّن يعنى عليها
لقيت عمّتهاناهد ويّاها
وخير الدنيا ياناس حواليها
,,
والمبلول مصبوب فى كاساته
وفيه أصناف ماتجيش فى البال
وعندها ثومه وعمّتى هامو
وأختى عفاف والحاجّه منال
,,
ومحمود سعد باعت لها دينا
تساعد وتصبّ الشربات
ورايا بتعمل أجمل سلطه
وأم حسام جايبه البوهارات
,,
وعمّو فؤاد يسمع فايزه احمد
ع التليفون لو حدّ ينادى
عامل نغمه تقول (ومعايا)
تردّ على احمد عبدالهادى
,,
ولقيت أبو يحيى وعادل سيّد
خدوا بالحضن عمر زهران
وحيّوا معايا سويفى وكشك
وشيخ الليله أبو شعبان
,,
رحت أقول لسيادة الريّس
أهلا بيك نوّرت الدّار
ومعاه شاكر والسلامونى
ويحيى ابو زكى وسامى نوّار
,,
وفجأه لقيت القرآن خلـّص
والحرباوى يطلّ علينا
وأحمد عزمى مع عماد جمعه
والعقاد بقوا تحت عنينا
,,
وأنا ما زعلتش م اللى اتأخـّر
أو كان بينّا جبال وبحور
واللىّ ما جاش فى فطارنا الليله
ح يشرّفنا ف أىّ سحور
,,
واتقلـّبت يمين وشمال
على صوت مدفع عامل غاره
أتارينى كنت ف حلم جميل
وصحيت منـّه يا ألف خساره
,,
أحلام رمضانيه
العرض الشجري