الغربة - الصفحة 4

**Tarek Elemary** · #31 10/05/2009, 11h20

يا عم سعد دا يوم السعد تشريفك
يروح الهَمّْ مهما يكون بتلطيفك
و واحد عنده من زوقك و من ظرفك
تشاور بس تلقى الصحبة على كيفك

**Tarek Elemary** · #32 28/05/2009, 14h13

اقتباس:

المشاركة الأصلية كتبت بواسطة محمد المراغى

جميل جدا يا استاذ طارق
الله عليك
ياريت تعمل مجموعه من الرباعيات وتعرضها هنا فى المنتدى
احنا فى الانتظار

إحنا عاوزين نشوف شغلك إنت يا مراغى
و ربنا يكرمن و يكرمك يا رب بصالح الأعمال

**علاء طه ياسين** · #33 28/05/2009, 14h52

عمي طارق ..
الصعايدة اللي زي حالاتي هم أكتر ناس بيتغربوا .. الحياة في الصعيد قاسية وصعبة شوية .. والحل إنهم يسافروا للبلاد العربية .. وبيصاحبهم في الغربة كميات كبيرة جدا من الحنين والمواويل اللي هي جزء من تكوينهم النفسي .. وف ليلة من ليالي سمر خارج حدود مصر كتير تسمع الموال الحزين ده ..
مالك يا طير بتنوّح .. وفكرتني ع الحبايب
ياتري ياطير هنروح .. ولا هنفضل غرايب (غرباء)
ولا الموال ده ..
البين (الفراق) جاب حنضل وقاللي كل
كل يا متعوس وفرق ع الغلابة الكل
من بعد ماكنت في لمة وزاين الكل
صبحت غلبان ومسكين ومستحمل كلام الكل
والغربة زي ما شعرك الحلو قال .. مش شرط تكون بعيد عن البلاد .. الغربة ممكن تكون وانت وسط أهلك وناسك وأصحابك .. ربنا يكفينا ويكفيك شر الغربة بره وجوه .. قول آمين ..
علاء

**Tarek Elemary** · #34 28/05/2009, 16h17

آمين

**Tarek Elemary** · #35 01/06/2009, 09h45

نعم سيدى ..... هذا ما لا يُحتَمَل
المثل الدارج يقول
((الدار دار أبونا و الغُرْب (الأغراب) بِيُكْرُشونا))
هذا هو المشهد العربى الذى يذكرنى بقول مظفر النواب
فالوطن المتدُ
من البحرِ إلى البحرِ
سجونٌ متلاصقةٌ
سجَّانٌ يُمسِك سجَّان

**Tarek Elemary** · #36 01/06/2009, 13h52

الناس تكون بالناس
و رقة الإحساس
و الجنة ضِلْ و خِلْ
تحت القمر ونَّاس

**Tarek Elemary** · #37 01/06/2009, 14h08

لو كان قليبى سكن
هايساعى كل الكون
شايل هموم الوطن
غير الهوى المكنون
و الذكريات و الشجن
و حلم ليل مسجون
بين الضلوع إندفن
يمكن يكون مجنون

**Tarek Elemary** · #38 01/06/2009, 21h59

يا فاتحين الأمل شباك
على بكرة اللى جيَّ هناك
و بكره فوق جناح شوقه
يقول للفجر فين مرساك

وخيط الشمس بيه نغزِل
ستاير دفء ع المنزِل
و منزلنا حيطانه طموح
و آه لما الطموح يرحل

لا يبقى بيت و لا ستاير
و لا شاطئ لموج حاير
و نبقى فى الطريق مساكين
نلف العمر فى دواير

**Tarek Elemary** · #39 01/06/2009, 22h25

و آه م البنت لما تميل
و يضحك فى عيونها الليل
و تسهر تحكى للنجمات
حكاية فارس المواويل

آه م البنت لمَّا تحِنّْ

تغنى كيف حمام البِنّْ
و بسمتها تكون أحلام
و صوتها بكل فرحة يرِّنْ

و آه م البنت لما تدوب
و تعشقها عيون و قلوب
و تفرد روحها شمسبة
تخاف من نسمة ع المحبوب

و آه م البنت لما تغير
و تصبح سجن قاسى كبير
و لا تقدر فى يوم تصفح
ولا تعرف حبيب و عشير

**Tarek Elemary** · #40 02/06/2009, 09h19

يا ناس يا خلق يا إنسان
شربنا من الألم ألوان
تعالوا نداوى أحزانَّا
نقابل بعض بالأحضان

نحب الخير لكل الناس
و يبقى الليل قمر ونَّاس
و نبقى فى القلوب جِيرة
و عِشْرَة و المَوَدَّة أساس

بالأمثال و بالأديان و بالخبرة
و لا يقدر على الأيام و ع القدرة
إلا خالق الإنسان و رب الكون
و لا نضمن نفس يطلع
و لا نضمن نعيش بكرة