ا االسلام عليكم ورحمه الله وبركاته استاذى الفاضل عادل اشكرك اولا على ردك الجميل لى ثانيا اوفقك الراى فى كليات التربيه الموسيقيه فى عدم اهتمامهابتنميه مواهب الدارسين لديها فكل المهم فقط حفظ الناهج العمليه او النجاح فى النظرى فقط لايوجد تنميه مها رات الا ان كان هو بالفعل موهوب ننجد الكل حوله وخصوصا لو كان قريب لحد ثانيا لااتفق مع حضرتك فى رفع القبعه لى لايجوز يااستاذى الفاضل هذا القول لى من حضرتك اساسا فكلنا لاسوف اتكلم عن نفسى ارفع لحضرتك القبعه واحب ان اشكرك على وصفك لى وكل يوم اتمنى ان اكون ممن ترعاهم فى ادارتك التعليميه وتشملهم برعايتك لهم وا شكرك كثيرا
الإخت الفاضلة جوليانا
اشكرك على كلامك الجميل وانا هنا لما بتكلم معاكم بفضفض فى امور تحزننى كثيراً , يعنى لما بتعامل مع الكليات الموسيقية اى موهوب ( وانا واحد منهم ) بيبقى يساوى شىء باجتهاده الشخصى والكلية مش بتقدم له حاجة سوى قشور موسيقية وده ان لم يجد من بعض اساتذتها من يحاول تحطيمة ( وانا واحد منهم برضه وانا طالب ) يعنى تحسرت لما اشوف المعاهد الموسيقية فى اوروبا كل معهد فيه قسم على جنب اسمه قسم تخريج العباقرة والقسم ده بيدخلوا اللى عندهم نبوغ او موهبة فذة فى الموسيقى بيتبنوهم لأن كل واحد منهم يساوى مليون شخص عادى وتلاقى الاساتذة بتوعهم صنف تانى مخصوص يعنى مثلا تلاقى قسم لبيتهوفن بيكون فيه استاذ عجوز خبير فى بيتهوفن يعنى بيتهوفن بيمشى فى دمه حتى النخاع وده بيعلم الطلبة بتوعه بمنتهى المحبة كل اللى بيعرفه بحيث ان كل سنة بيخرج من تحت ايده خمس طلبه متخصصين عباقرة فى بيتهوفن ونفس الحكاية بالنسبة لموتسارت او هايدن او تشايكوفسكى
لدرجة انك تلاقى مثلاً طالب موهوب كده وبيعشق هايدن مثلا والمدرس الخبير فى هايدن مش موجود فى بلده وموجود فى بلد تانية على طول المعهد يعمل له بعثة خاصة على نفقة الدولة ويعطوه مصروف مجزى عشان يتفرغ للدراسة مش يدوه ملاليم ويضطر يروح المعهد الصبح ويغسل اطباق بعد الظهر عشان يلاقى يسكن وياكل والمهم ان النتيجة ان كل اساتذ عبقرى بيبقى له امتدادات لم تنتهى تلاقى الفن الجميل بتاعهم سيمتد غلى الأبد , واللى بيحزننى فى مصر عندنا فن وعمالقة هم خلاصة الفن العربى لكن الفن بيندثر لأن مفيش حد يهمه انه يستمر يعنى انا مثلا لو عرضت على اى كلية انى ادرس اطلبة اللى ممكن يكونوا موهوبين وممكن يطلع منهم عباقرة حايحاربونى
ولا املك سوى ان اقول كلمة واحدة : ياخسارة يامصر
مرفق نوتة امى احد طلباتك والباقى فى القريب ان شاء الله مع اطيب تحياتى
احبائى
اقدم لكم بعض طلبات من النوت
1 ـ سحب رمشه وقد قدمت جزء منها وهنا قد اكلمتها
2 ـ يافايتنى فى حيرة
اتمنى ان يستفيد منه اكبر قدر من الأعضاء الأعزاء وطبعا الطلبات لايستفيد منها طالبها فقط ولكن فائدة للجميع
مع اطيب تحياتى والباقى قادم ان شاء الله
اخوتى الأحباء
اقدم لكم من طلباتكم اغنيتين بس نفسى اتكلم معاكم شوية واتمنى كل رواد الصفحة دى يقروها بمنتهى التمعن
انا عارف ان لما تلبية الطلبات بتتأخر فيه ناس بتتضايق بس المشكلة اولا حسب وقت فراغى وثانيا ان تدوين النوتة مش حاجة سهلة يعنى فيه اغانى مثلا زى ياحلو ناديلى انا حافظها صم والكوبليهات زى بعض مش بتاخد منى وقت
لكن لما يكون الطلب اغنية انا مش حافظها والكوبليهات تلاتة مختلفين يعنى بتحتاج منى وقت طويل عشان استوعبها
لكن ماتقارنوش ده لما اكتب لحن جديد لأى ملحن ما انا مش حافظه برضه لكن هناك الملحنبيعزف لى على اعود وانا بكتب منه مازورة مازورة , لكن هنا الاغنية اللى مش حافظها بفتح برنامجين مع بعض برنامج بيغنى الاغنية مع برنامج الكتابة واقفق ده وافتح ده والمشكلة الأكبر واللى بتسبب تضييع اكبر كمية من الوقت وممكن الاغنية اكتب فيها سطر وازهق واتركها فترة لما يكون التون مختلف عن التون اللى بكتب منه ودى بتحصل كتير يعنى مثلا اغنية انا حاسس انها بياتى الدوكاه ( رى ) بسمعها من التسجيل نازلة تونونص وممكن مش بالضبط يعنى تون وربع مثلا ودى بتعمل عندى مشكلة جسيمة انى بسمع نغمات وبكتبها نغمات تانية يعنى ممكن بعد خمس دقائق تكون دماغى اتخربطت والسبب االاساسى فى المشكلة الخطيرة دى هى اجهزة التسجيل اللى عند الناس فى البيوت احيانا بتبقى سرعتها مختلفة يعنى جهاز اسرع او ابطأ شعرة ممكن انت ماتحسش بيها لكن لو شريط متسجل على جهاز واتذاع على جهاز تانى ممكن السرعة تخليه ينقص نص او ربع تون ولو اتنقل كده كذا مرة تلاقى التون نزل او طلع كتير ودى مرة سألنى احد الأخوة الاحباء عن اغنية لأم كلثوم سمعها مرة من رى ومرة من دو وسألنى هل ام كلثوم تكون غيرت الطبقة ولكن اكدت له ان دى بتحصل فى نقل الشريط من جهاز لجهاز لأن ام كلثوم عمرها ما تغنى لحن من طبقتين مختلفتين وفيه حاجات تانية احب الفت نظركم ليها
زمان لما كنا بنكتب بالقلم الرصاص , كنت بدون طبعا مازورة مازورة بعدين بعمل علامات اللزم الصغيرة والكتابة العربى فوق النوتة ( مثل غناء او كورس او غناء ك1 ) مثلا كنت بكتبها وانا بدون يعنى بمجردما تخلص النوتة بتكون خالصة من كله يعنى براجعها مراجعة سريعة وامضى عليها يعنى خلصت كده
لكن هنا فى الكمبيوتر طبعا الكتابة اجمل 1000 مرة لكن ليها مشاكل كتير وبتحتاج وقت اطول يعنى الأول بكتب النوتة نفسها وممكن اكتب المرجعات وانا بدون عشان ما اتوهش فيها بعد كده وبعد ماتخلص التدوين تيجى عدة مراحل وبتاخد وقت طويل لأن طبعا بمنتهى الدقة يعنى بكتب عليها الكتابة العربى واخلصها الأول بعدين ارجع واحط عليها علامات اللزم وبالذات الصغيرة , بعدين ارجع تانى واحط علامات الربع تون على النغمات لو موجودة فى اللحن ولازم كل ده يتراجع كذا مرة عشان ما انساش حاجة وتبقى عيب فى وشى , المهم يعنى العملية مش سهلة زى ما ممكن يتخيل البعض ان مثلا عشرين اغنية يخلصوا فى اسبوع وللعلم انا مطلوب منى اغنية صعبة جدا جدا هى حياتى انت لعبد الوهاب تعرفوا استغرقت منى تدوين ومراجعة حوالى شهر ( وللعلم الاغنية دى بالذات اعتقد ان من الصعب اصلا حد يحاول يكتبها لأن ايامها ماكانش فيه تدوين نوتة وكانوا بيغنوا براحتهم ولو جيت تكتبها تلاقى فيها عشرات المطبات هى متدارية فى العزف لكن فى النوتة طبعا ما تتفوتش او تتكلفت ولذلك لازم اخترع لها طرق بحيث ان تتكتب من غير اللحن الأصلى المسموع والمحفوظ ينقص حرف وانا الاغنية دى خلصتها بس برضه محتاج اراجعها تانى وصدقونى انا بعمل عمل صعب جدا لكن وقتى صعب جدا , وانا اوعدكم بتنفيذ اللى اقدر عليه من الطلبات بس اهم شىء الصبر .
فيه موضوع اثاره الاخ العزيز نور الصباح وهو نقل النوت من هنا وتصنيفها مع نوت المطربين فى الاقسام التانية بس انا مش احبذ الرأى ده لسبب ان النوت هناط كلها تقريبا مكتوبة بخط اليد وبالطريقة الصعبة يعنى اى هاوى او مبتدىء لو حاول هناك ممكن يعطل ومايعرفش يكمل عزفها ولو النوتة بتاعتى كان ترتيبها هناك رقم 7 مثلا اعتقد ان العضو ممكن يزهق لما يلاقى نفسه مش ماشى فى النوت ومايشوفهاش اصلا وبكده يكون تعبى راح على الفاضى يعنى كانه اتحط فى المخزن لأن انا همى الاول الهواة والمبتدئين لكن النوت هناك مكتوبة اصلا للمحترفين
لكن هنا انت لو ابتديت تقرا كل النوت اللى انا مدونها يعنى مذاكرة وتمرين مش شرط تكون بتحب الاغنية او طالبها اعقد ان بمرور الوقت النوت السهلة بتزود الكفائة فى القراءة والعزف وساعتها ممكن تروح هناك تقرا النوت الصعبة وانا متأكد ان ممكن تجيب نتيجة وانت نفسك حاتحس انك وصلت لنتيجة اعتقد حاتسعدك وهنا انا اقول انى عملت شىء مع اطيب تحياتى وآسف للإطالة
عزيزى الأستاذ عادل
مرفق مع هذة المشاركة اغنيتين واحدة للسيدة امكلثوم وهى نورك يا ست الكل والثانية للمطربة اسمهان وهىامتى هاتعرف امتى واشكرك على اهتمامك.
مع جزيل الشكر
ارمندو
احبائى
انا غبت عن المنتدى يومين لقيتكم كاتبين كلام محتاج رد طوييييييييييييييييل
واقدم لكم نوتة حبيب العمر بناء على طلب الأخ العزيز نور الصباح ودى اخدت منى وقت طويل جدا فى تدوبنها لنه من الزمن القديم قبل استعمال النوتة وكانوا بيغنوا براحتهم وكمان الاغنية مملوءة بالأدليب والتوقف وتغيير الميزان والفرامل الفجائية المهم انا اكون سعيد لما اتعب عشانكم بس ماتنسوش ان التدوين بيحتاج وقت وحالة نفسية
بالنسبة للكادر انت عارف ياصديقى ان البعدا اللى اخترعوا مهزلة الكادر من ضمن ما عملوه هو محاولة اذلال المدرسين وتكديرهم يعنى كل يوم واحد يقول على تاريخ لظهور النتيجة ويطلع غلط والحكاية مدام فيها فلوس كل تأخير ده بيوفر للحكومة ملايين الجنيهات اما بالنسبة للحليات اللى سألت عليها حدد لى بالضبط انت عايز تعرف ايه وانا تحت امرك
بالنسبة للأخت العزيزة جوليانا مش احنا اتفقنا ان اى لحن عايزاه ارفعيه هنا وانا تحت امرك عشان الألحان دى مش عندى وانا تحت امرك .
بالنسبة ل آمال ماهر انا احب صوتها جدا بس الخسارة انها جت فى وقت ماحدش يعرف قيمتها يعنى صوتها زى صوت فايزة ووردة ودى المفروض اولا تغنى على فرقة وتريات زى الماسية وثانيا الملحن لما كان بيلحن لفرقة وتريات كان بيعمل لحن اهم شىء فيه انه يبقى رائع لأن اللحن على الوتريات بيبقى مكشوف لكن اليوم وعلى الآلات الكهربائية اللحن اولا بيبقى مش باين وسط التوزيعات ( المتكررة فى كل الألحان ) والإيقاعات والدوشة يعنى زمان الملحن عشان يعمل لحن كان على الأقل يتفنن فيه كذا شهر لكن النهاردة بيحط الكلام قدامه ويدبه زى مايطلع والناس اى حاجة مش بتقول لأ حتى لو الجمل دى سمعوها 100 مرة يعنى فيه خليك كوكتيل بين محمد سعد على شعبان عبد الرحيم تلاقيه موجود زى الملح فى معظم الأغانى
بالنسبة لأخى ملحن مصرى : انا الصفحة دى ما احبش احتكرها لنفسى يعنى ممكن اى حد يحب ينزل فيها نوت طبعاً مكسب للمنتدى بس نوت عبد الحليم اللى عندك انت مدونها ولا من المتداولة فى السوق ؟ لأن هنا فى الصفحة دى انا بقدم مدرسة جديدة فى الكتابة وهى تدوين اللحن اولا بأقصى دقة وثانيا بأقصى سهولة لأن بعمل حساب المبتدئين والهواة اولاً لأن المحترفين بيعزفوا سماعى مش بيحتاجوا النوتة إلا لما يكون اغنية محددة مش حافظها فى ودنه .
بالنسبة للأخ سلطان حماده : انا مش بسمع جورج وسوف لسبب مهم جدا بس الأول لازم نتفهم اساس السبب
الاول عايزك تسمع كذا اغنية لكل من عبد الوهاب وعبد الحليم وفريد ومحرم فؤاد كذا اغنية من بدايتهم وكذا اغنية من آخر ايامهم حاتلاقى ان صوتهم فى الأواخر بقى احلى وانضج وده لسبب مهم جداً من اهم اسباب نجاح واستمرار المطرب وبالذات لما بعد وفاته بوقت طويل حتلاقى المطربين دول كانوا بيحافظوا على صوتهم بكل وسيلة لأنه اغلى ما يمتلكون , وانتم فتحتم الكلام وانا انسان صريح ومحايد وممكن صراحتى تزعل ناس منى ومنن يرفدونى من المنتدى لكن لازم اقول انت لو سمعت جورج وسوف من بداياته كان صوته مش بطال ( بس طبعا مش زى الأسماء اللى انا قلتها يعنى كان فى درجة اقل ) بعدين بعد ما ابتداً يشتهر اتجه لتعاطى المخدرات وهنا ممكن نقف وقفة يعنى ناخد حصة ممكن كتير ما يعرفوهاش عن المخدرات وتأثيرها على المطرب . المخدرات بدات بالحشيش والحشيش بيتم تعاطيه عن طريق التدخين ( وخلوا بالكم اناالحمد لله مش بتعاطى الحاجات دى لكن اعرفها كويس جدا من باب العلم بكل شىء ) ولما نتكلم عن تدخين الحشيش الضرر للمطرب بييجى من السيجارة نفسها مش من الحشيش يعنى السيجارة خطورتها انها لها تأثير ضار شوية على الأحبال الصوتية لكن ضرر خطير جداً على الجهاز التنفسى وبالذات الرئتين يعنى الرئتين ربنا خلقهم بيستوعبوا كمية من الهواء والتدخين لما بيتلف جزء كبير من الرئتين يبقى احتوائهم للهواء اقل من ربع الكمية وهنا الضرر الخطير للمطرب لأ من اهم مواصفات المطرب تخزين كمية كبيرة من الهواء تم اخراجها بالتدريج عشان اولاً يغنى النغمات الطويلة وثانياً تحس انه مستريح وهو بيغنى يعنى مش بينهج لأن نهجانه ده بيدى تأثير يضايق المستمع يحس انه هو كمان حايتخنق يعنى التأثر من السيجارة نفسها لكن تأثير الحشيش على الأجزاء الأخرى للجسم ده موضوع تانى . بعد كده تطورت المخدرات وظهر الهيروين والكواكين وهنا مكن الخطورة القصوى والضرر القاتل للمطرب , لأن المطرب اولاً لازم يكون انفه سليم ( انفه الخارجى والداخلى ) يعنى مجرى الهواء والبلعوم ثم الحنجرة والاحبال الصوتية والقصبة الهوائية وكل نقطة فى الرئتين يعنى مخارج ومداخل الهواء وثانى اكسيد الكربون والدم ولا تنسى الشفتين وحتى الاسنان وكل اللى قلته بيوجد فصوص فى المخ بتنظم العملية دى بمنتهى الدقة , والانسان لما يشم هيروين كانه ادخل فى انفه ماء نار او سيل مدمر من النار طبعاً بيدمر كل الاجزاء اللى قلت عليها وبالذات فصوص المخ ومشكلة جورج وسوف انه ادمن الهيروين والكوكايين والبرشام والماريجوان وكل القائمة وصار انسان مدمر وده الشىء اللى افسد صوته يعنى انا لما بسمعه بحس انى بسمع منشار بينشر خشب طبعاً فيه ناس حتزعل منى لكن ده الحق وكله كوم لما بيغنى اغنية لعبد الحليم مش عايز اقول صوته بيؤذينى اد ايه , وهنا فى شىء مهم الألقاب اللى بتطللق على اللى بيغنوا هل الألقاب دى بيستاهلوها فعلاً ولا الألقاب بقت ببلاش يعنى زمان اطلقوا على فايزة مثلاًكروان الشرق وطبعاً لآخر لحظة هى اعتقد تستاهل اللقب
لكن النهاردة لما يطلقوا على واحد لقب سوبر ستار العصر يعنى لو حسبتها !!!! مش عارف
يعنى لو لواء فى الجيش حب يغنى مثلاً هو فى الجيش على عينى وعلى راسى لكن لو غنى بياخد لقي على قد غناه مش على قد رتبته فى الجيش يعنى هناك لواء لكن فى الغناء ما يحصلش عسكرى صغير
مش كده ولا ايه ؟ طبعا؟ً فيه ناس حاتزعل لكن كلامى لو عبد الوهاب او السنباطى وسمعوا حيقولوا نفس الرأى لأنى انا امثل امتدادهم يعنى مازلت وسأبقى متمسك بكلامهم ونظرياتهم وهى اللى خلتهم عمالقة
الأستاذ الكبير والفنان القدير والموسيقار المبدع وقبل ذلك الأخ العزيز والصديق الوفى / عـــــــــــــــــــــــادل بــــــــــــــــــاشـــــــــــــــــــا صموئيــــــــــــــــــــــــــــــــــل تحية إعزاز وإكبار وإجلال وتقديـر وبعــــد : سلام الله عليكم ورحمته وبركاته ندعو الله - العلى القدير - أن تكونوا فى أتم صحة وأسعد حال وأهنأ بال 1 - أنا أسف أسفا شديدا لتأخيرى فى الرد على حضرتكم ولكن الجهاز طهقنى وأتعبنى ( أكتب المشاركة وبعد الانتهاء منها وعمل الرتوش النهائية والمعاينة وقبل الاعتماد مباشرة تغلق الصفحة دون سبب مما يطرنى للإعادة وبعد الإعادة والتدقيق والتمحيص يحدث ما حدث فى المرات السابقة ) وهكذا مما أصابنى بحالة من اليأس -وهذا ما أخرنى - فأرجو قبول أسفى واعتذارى 2 - النوتة الموسيقية للحن " حبيب العمر " والحمد لله وأقسم أنك لا تتحدى نفسك فقط ولكنك تتحدى نفسك وتتحدى المستحيل 3 - بالنسبة لسؤالى عن الزخارف اللحنية ( هناك علامات موسيقية فى بعض النوتات بلانشات ونوارات أساسية فى اللحن وبجانب كل منها علامات صغيرة كروشات ودوبل كروشات مرتبطة بالعلامات الأساسية بأقواس مع ثبات الميزان ) فكيف تعزف هذه العلامات 4 - مثال أخر _ فى أغنية " كامل الأوصاف لعبد الحليم حافظ اللازمة التى تسبق ( قالوا الصبر بحوره بعيدة ) هذه اللازمة تعزف بأكثر من طريقة دون إخلال باللحن ـ كيف تعزف 5 - متى تظهر النتيجة علشان نفرح معاك ونفرح لك ونشرب الشربات ولا فيها عزومة - ولا عزومة مراكبية 6 - على نار الشوق أنا هاأستنى وأصبر قلبى وأتمنى 7 -أوعاك تطول غيابك عننا - أنا عايز كل ما أدخل المنتدى ألاقيك بابتسامتك المنورة 8 - خللينى على بالك على طول 9 - شكرررررررررررررررررررررررررررررررررررررررررررررررر رررررررررررا أخــــــــــوكم نـور الصبـــــــاح الثلاثاء الموافق 7 / 7 / 2009
اخى العزيز نور الصباح
اى عضو محترم منكم لما بيسأل اسئلة انا بكون سعيد جدا لأن ممكن نطلع معلومات مفيدة لكل الأعضاء لأن بيسعدنى لما احس ان فيه ناس ممتازين وانا بحبهم جداً وبيحبوا يقروا وبيستفيدوا من كل اللى بكتبه وارد على كل نقطة سألت فيها
اولا بالنسبة لما بعد ماتكتب وتنسق الكتابة تيجى تبعت الموضوع تقفل الصفحة ويضيع تعبك انا بتحصل معايا وقد تكون مشكلة فى النت نفسه او مشكلة فى المنتدى يعنى كذا عضو بيحملوا حاجات اكتر من الازم فى وقت واحد ممكن المنتدى كفاءة التعامل فيه بتقل وحلها سهل جدا بعد ما تكتب الصفحة وتنسقها قبل ماترفعها ظلل اللى كتبته وانسخه وحطه على صفحة وورد اوفيس بعدين ارسل الموضوع ولو ما قبلش اقفل الصفحة وانسخة من الوورد اوفيس تانى يعنى ممكن العيب الموجود يكون خلص وتترسل الرسالة انا بعمل كده لن الكلام اللى بكتبه لكم لما بيكون كتير ويحصل لى اللى بتقول عليه عمرى ما حفتكر كل اللى كتبته تانى .
ثانياً : انا طبعاً سعيد جدا لكلامك على تدوينى لنوتة حبيب العمر لأنى تعبت فيها جداً واكيد اكون فى منتهى السعادة لما احس ان فيه ناس بتفهم وتقدر تعبى واقول لكم على سر الاغانى اللى زى حبيب العمر بالنسبة لى سهلة جدا فى الكتابة ولكن الصعب جدا إخراج وتنسيق النوتة لأن زى ما قلت اللحن اتسجل بدون نوتة يعنى الملحن والفرقة كانوا بيعزفوا براحتهم ممكن تلاقى موازير كتير فيها مشكلة والمشكلة الاكبر بالنسبة لى انى اكتبها بحيث تتعزف زى ما بتسمع بالضبط ولو انا حليت المشكلة اللى موجودة فى المازورة بالطريقة العلمية الصحيحة يبقى لازم اضيف حروف قد تخل بالجملة او تغير شكلها والناس تحس انى كاتب غلط عشان كده اللحن اللى زى ده بيحتاج منى اسبوع ادندنه مع نفسى واستكشف المشاكل اللى فيه واحاول احلها بأسهل طريقة ممكنة وطبعاً ممكن حد منكم يسأل المشاكل دى زى ايه ممكن مازورة ناقصة نوار وفريد بيمدها بصوته ومعاه عازف ايقاع ما جابتوش ولادة يخترع له حركة يعنى يعمل دومين ورا بعض يعدل الكسر ( حاجة فى الكورة زى كده اسمها كتف قانونى او افتعال ضرة جزاء ودى ما يعملهاش طبعاً غير اللاعب المحترف اوى اوى لأنه لو ماعملهاش بإحتراف شديد ممكن ياخد انذار او ينطرد )
بالنسبة لموضوع الحليات : اولا انا سعيد جداً انى بقول الكلام ده هنا لأن كتير من طلبة المعاهد الموسيقية ما بيعرفوش الكلام ده وحتى لو اتشرح لهم بيتشرح بطريقة روتينية وسخيفة يعنى الطالب ممكن يبقى عارف 10% وبعد الشرح ممكن كمان يضيهال 10 % اللى بيعرفهم , المهم عشان نتكلم عن الحليات دى حاجة تكميلية لتجميل اللحن ( زى الاكسسوار اللى بتحطه الستات الشيك من باب زيادة الاناقة وطبعاً ده سلاح ذو حدين لما تستعمله صح بتبقى جميلة اكتر ولو غلط بتبقى مبهرجة اكتر من اللازم وممكن تبقى مزعجة الشكل ) وانا هنا بسرعة عملت لكم نموذج سهل جدا اشرح عليه لو نظرت الى الشكل الاول نجد مازورة بها 4 نوارات يعنى عدد المازورة سليم
فى الشكل التانى اضفت كروش على الضلع الثانى تمهيداً لعمل الحلية عليه طبعا لاحظوا ان المازورة هنا زمنها اختل لأنها زادت نصف يقى مجموعها اربعة ونصف , فى الشكل الثالث عملت الحلية يعنى صغرت حجمها وفيها خط قاطع مائل معناه ان هذه الحلية خارج الميزان يعنى اصل النوتة رى فا لا صول لكن على نغمة فا وصعت حلية حرف مى تعزف سريعة جدا بحيث لاتخل بالميزان يعنى نسرق زم هذه الحلية من زمن النوار التى تسبقها يعنى وانت بتشاور اشارات 4/4 انت ماشى عادى والحلية دى تحصل من غير ما تؤثر على الميزان وإلا يتكسر الميزان وتبقى عملت غلطة مش إضافة وتحلية . ده اول شكل للحلية انها تكون حرف واحد
ملحوظة مهمة : الحلية ممكن تكون صاعدة كما فى الشكل الثالث او هابطة كما فى الشكل الرابع
بانسبة للحليات الأصعب ممكن تكون الحلية حرفين مثل كما فى الشكل الخامس والسادس او تكون ثلاث حروف كما فى الشكل السابع والثامن , المهم كما قلت انها تعزف بسرعة جدا ولا تخل بالميزان اهم حاجة
نيجى للسؤال المهم تتعزف ازاى ؟ طبعا الكلام ده موجه للمحترفين والمتمكنين شوية مش للمبتدئين لأن المبتدىء يادوب بيبقى مركز فى عزف الحروف الاساسية وضبط الميزان
وللتوضيح : احكى لكم قصة تضحك مرة واحد شافنى بعزف وبحلق فى حركات اصابعى كتير بعدين قال لى يا استاذ انا بشوف اللى بيعزفوا عندهم فى ايدهم الشمال 4 اصابع لكن انا حسيت ان عندك 44 اصبع , من الجملة دى نستنتج ان العازف المبتدىء يادوب اصابعه بتحصل الحروف الاساسية لكن الماهر اصابعه بتتحرك وتعمل الحليلا بأنواعها وزر ماقلت الحلية اللى فى الشكل الأول بتتعزف بسرعة ( يعنى بالمصرى بتتخطف ) ولاحظوا انى قلت اكتر من مرة عدم الإخلال بالميزان وبالتدريب ممكن تعزف الحلية لما تكون حرفين او تلاثة بس برضه اكرر الحليات سلاح ذو حدين لها فائدة ولها ضرر يعنى عارف مثلاً انبوبة البوتاجاز لو احسنت استعمالها شىء مفيد جداً لكن لو اسأت استعمالها ؟انتم عارفين نفس الحكاية الحليات ممكن تخل بالجملة او تفسدها وممكن تجملها لو بالأصول واهم شىء الذوق
سألتنى عن كامل الاوصاف ودى طبعاً قمة الإحتراف انا دايما بحب اتكلم بأمثلة فورية يعنى لو عندك طباخ استاذ ممكن يعمل لك من البطاطس مثلاً عشر اصناف تجنن والعازف الشاطر ممكن من جملة موسيقية معينة ( يعنى مش اى جملة لو جملة سريعة جدا وفيها زحمة موسيقية ماتنفعش لأن ممكن تتدمر ) لكن جملة كامل الاوصاف فيها حروف قصيرة وحروف طويلة ممكن تتحشى حاجات حلوة وهنا ييجى دور العازف الشاطر يعنى انت شوف سمعت منها ييجى ستة اشكال عارف لو فاضى للصبح ممكن العازف الشاطر يسمعك منها عشرين شكل وكلهم حلوين وهنا نرجه لحلاوة زمان ومزيكة زمان يعنى الجملة ممكن تسمعها بعشرين شكل حلو لأنها هى نفسها حلوة عاملة زى بنت زى القمر كلها حلوة ممكن تشوفها بعشرين شكل جميل , لكن الالحان الخايبة بتاعة النهاردة بيحطوا عليها كمية من التوزيع عشان تسنمع شبورة من النغمات وعمر ما حد حايفهمها فى الزحمة والسرعة الهبد بتاع الإيقاع .
اتمنى تكون المعلومات وصلت وانا تحت امر الجميع فى اى معلومات
رد: طلبات نوتة
رد: طلبات نوتة
العرض المتطور
