يوم عادى جدا

[سمعجى]

الأستاذ ايهاب ( المنور بصورته ) زى ما هو منور بكلامه ..

فعلا العيلة تخينة و محتاجة وقت ( تخين ).. آهو انت كده فهمتنى
و صدقنى و الله ما هو تقل و لا يحزنون ..

أصل أنا ( مزاجاتلى ) شوية .. و ما باعرفش أكتب كلمة و أنا
( فى الاستبحس ) .. و انت فاهم الباقى

[سمعجى]

عصفور طاير ..

ماذا فى جعبتى يا عصفور ، أرد به على كلماتك المتفردة ؟! ..

نفدت الكلمات .. و لكنها تحولت الى ما هو أرقى و أوهج ..

لقد ذهبت الى هناك .. معك .. الى ركن قصى قبالة البحر الممتد ..

حيث الخريف يتغلغل فى ذاتنا اليتيمة المنكسرة ..

حيث تصير ( الحكمة ) غبارا منسيا فى قاع الذاكرة ..

حيث نتباكى على زمن الحمق و الجنون الذى مضى .. راثين
محنتنا الآنية ..


حيث يعرف ( كلانا ) أن وهج الابداع هو وحده الذى يشكل فينا

عناصرنا الأزلية ..

ليست فقط كيمياءا واحدة تلك التى تتوءمنا .. بل أرى أطيافا قزحية

تنسرب الى روحينا كلما عز الحلم .. أطيافا قزحية تحاول تشكيل

انسان حقيقى .. يدرك .. يشعر .. يعى .. يحس .. يتبلور جوهرا

محكما و متجليا فى آن ..


فاخلق اللحظة الموحية .. من سواك غيرهم ؟!.. أأذكرك بهم ؟!

هل أبدأ بتشيكوف ؟! .. واثق أنك قرأته ..

هل تصادمت عقليا مع دوستويفسكى ؟! .. لا مناص !

هل عشت فى تلك الحارات الضيقة ، و تنسمت عبق البيوت الخشبية

القديمة مع نجيب محفوظ ؟! .. حتما عشت ..

هل راقصت ( أزميرالدا ) قبالة كنيسة نوتردام ؟! متيقن من ذلك !

هل تنفست البحر مع ( زوربا ) كازانتزاكس ، و ( شكيبة ) فى

ياطر حنا مينا ؟! .. يقينا نعم ..

هل انكسر قلبك و أنت تقرأ ( المنزل الثالث بعد المنحنى ) لأمل ..

فعلتها ؟! نعم فعلتها يا عصفور .. هناك .. قبالة البحر ..

هل اقتحمت فصول ( نزار ) بصيفها و خريفها ..

هل ( تحب الأغانى و تنسى المغنى و تغزل موجتك العائدة ) مثل

محمود درويش ؟! .. مؤكد ..

هل عشت ( مائة عام من العزلة ) و خرجت منسحرا منسحقا مفتونا

بفعل ( ماركيز ) ؟! .. لا جدال ..

هل انقسمت روحك نصفين مع ( كله فى الموانى يابا ) ؟!........

يا لقا الغريب .. على صدر الحبيب .. يا شوق المسافر ..للمرسى القريب ..

أم انقسمت روحك نصفين مع ( خلاص مسافر ) ؟!

و خايفة لما تسافر .. ع البلد الغريب ..
تنسى انك فايت .. فى بلدك حبيب
مستنى بأشواق ... تعبان .. تعبــان ..تعبان م الفراق
و مولع لك شمعة .. نورها مستنيك .. و ف عيونه دمعه
تمسحها بايديك .......

انها هناك ..

تنتظرنا يا عصفور .. فى خريف ما ..

ينطلق صوتها فى جنبات ( كاليثيا ) .. بينما(كلانا ) جالس على

المائدة الوحيد ، فوق رصيف يذكرنا بالكاد ، حيث قطرات ( الطل )

المنسالة فوق سطح الزجاجتين ، ترسم شروخا تشبهنا ..

ينطلق صوتها .. أتسمعه ..............

( ادش كان فى ناس .. ع المفرق تنطر ناس .. و تشتى الدنى ..

و يحملوا شمسية .. و أنا بأيام الصحو ما حدا نطرنى ........)

[سمعجى]

استيقظت من ( سرحانى ) الطويل ، على انفجار صوتى مفزع

لجهاز ال ( دى جى ) و الذى بدأ للتو فى احداث صخب له أبعاد

( زلزالية ) مؤكدة ، و قد جذب انتباهى ذلك الشاب الذى

( يولف ) أغانى الدى جى بخلاعته المفتعلة و تمايله الممسوخ مع

ايقاعات ( الراب ) .. و انتابنى قلق غير مبرر من سقوط

( سرواله ) الجينز الواسع ، بعد أن بدا واضحا أن البنطلون

( متشعلق ) بأعلى مؤخرته وقد أوشك على السقوط ، و أن عناية

الهية خاصة تتدخل فى الأمر لمنع انكشاف عورته على الملأ ..

فكان كلما تمايع محركا خصره فى حركات دودية موحية ، كلما

ازددت توترا و قلقا ، فأجدنى أتحسس بشكل تلقائى حزامى الجلد

المحكم على وسطى !!


استطعت أن أميز وسط الصخب ، صوت أبواق سيارات كثيفة

وملحة تدنو من الشارع ، و قد التفتت الجموع المتناثرة منتبهة ،

و صاح البعض : العريس وصاااال!!

و سرى الخبر فى الغرف الداخلية للشقتين ، و التى حوت النساء

اللاتى انشغلن ( بالزواق ) .. فتدافعن كالطوفان تجاه الشرفة ،

حيث أقف ..


بقيت ( مسمرا ) فى مكانى ،اذ كان موقفى حرجا باعتبارى

( الذكر ) الوحيد الذى انطمر فجأة بين أجسام هلامية طرية

متدافعة ، لا تشعر بوجودى أصلا !!

و كانت ( ألصقهن ) بى ، الست علية السمبوخسى ، و التى

انتباتها موجة من الفرح الهيستيري و هى تشاهد سيارات الزفة

المزينة بالورود و الشرائط الملونة ، تتدفق قادمة من شارع

( البطالسة ) ، مما أنساها أن ثمة رجلا يكاد ( ينفعص ) بين

يديها ..

[سمعجى]

و الحق أن المشهد التلقائى الذى غمر الشارع يسلب الألباب

و يلهى عن أى شعور سواه .. فقد سيطرت حالة من البهجة

والتجلى على الجميع ، و خاصة مع ظهورعازفى فرقة ( المزمار

البلدى ) و النقرزان بزيهم الصعيدى ، و التى كانت تنتظر ظهور

موكب العروسين .. مختلطة بهدير السارينات و الأبواق

والصخب الجماعى للزفة التى يؤديها ( كورس ) الجموع البشرية

المحتشدة بتلقائية رفعت درجة حرارة المكان .. فكأنما أوركسترا

عشوائية و غير مدبرة ، تنتج من تلك المتناقضات الصوتية لحنا

متكاملا و انسانيا يصعب تفسيره !!

و سرى بداخلى شعور تلقائى متصاعد و مسيطر يدفعنى الى

التخلى عن وقارى الظاهرى ، و اطلاق) زغروتة( أفجر بها ما

انتبانى من حماس طاغ ، تسرب دون

ارادتى بفعل عدوى البهجة الجماعية ، وكدت أفعلها بعد أن

وضعت كفى فى موضع ( الشنب ) للتحليق على الزغروطة ، الا

أننى عدت الى رشدى فى اللحظة الأخيرة ، متذكرا

موقفى الذى لا أحسد عليه و أنا ( مدفوس ) وسط

عشرات السمبوخسيات ، و كانت الست علية قد تمركزت فى

موضعها ، و لم تتوقف زغاريدها الحادة الثاقبة عند أذنى تماما ..

فقررت التملص مهما كلفنى الأمر ،و جاهدت لشق ممر و لو

ضئيل بين عماليق النساء ، فتزحزحت محاولا ( الفلفصة ) من

جانب الست علية السمبوخسى ، دافعا اياها برفق و وجل ،محاولا

المرور ( كالسكين فى الزبد ) .. لكن حدث ما لا يحمد عقباه ، اذ

التفتت تجاهى و قد تفاجأت بوجودى محشورا ( فى محيطها )

فرنت نحوى بابتسامة خجول و عيون بدت ( مسبلة) من خلف

نظارتها كعب الكباية ، وقالت بصوت تعمدت ألا يسمعه سواى :

اخص عليك يا بو احمد .. ما يصحش كده ..

هو انا استحمل الكلام ده ..

.. يا شئى ؟!!

[سمعجى]

الأستاذ سويفى ..
الأستاذ ايهاب ..
و الله أبو احمد ما قال لها حاجة ..
و لكنه وقع فى مأزق لا يحسد عليه ..
كان كل همه ( يخلع ) م البلكونة بدال ما يتفعص ..
لكن علية السمبوخسى فهمت غلط
و زى ما تقول ( بتتسللق ) ..

دانتو سهرانين بقى .. هههههههههه
انتوا اجازة بكرة م الحكومة زييى ..
ليلتنا قل ان شاء الله ..
اتفضلوا عصير مانجة .....
و لا بلاش .. دا فاضل ( بؤين )

[سمعجى]

عصفور يا طاير ..

ايه دا يا جنتل ..دا انت (هارش ) اللون بالجامد ..و عارف عنوان السمبوخسى ، هما بالظبط عند شارع ( 84 ) تبع جناكليس ، و لو بس ت ستلا عليا شوية ، كنت عرفت ليه أنا باشوف الدنيا بلاك & هوايت ، أنا ساكن فى زوتس ، و انت طبعا
ساكى و تفهمها و هى طايرة ، و عارف طبعا ان جلاجل تكيلا
فى الوزن ..
سلم لى على حنا المشّاء ، و ماترحشى ماشى ، اركب بلاك هورس ..

نزّل بنورة للأستاذ
و هاتلى سفنجة و جوز مصنفر

[سمعجى]

مدام سامية الشهيرة ب ملاك المنتدى

انتى عايزة تعملى فتنة طائفية و تقولى لام احمد ؟! .. دا كان الفرح يتقلب جنازة ، و بعدين الراجل مظلوم و الله ، هو حظه ( المدوحس )بيوقعه فى مواقف صعبة ..

خلينا فى الجد ..
امتى حاتستقرى ف مصر علشان يبقى فيه تعارف عائلى ؟!

عموما ما تنسيش شوية هدايا معاكى من الكويت ..
و عشان تبقى عارفة ، الواد يوسف ابنى نفسه فى بلاى ستيشن ،
و البنت نفسها ف بيتش باجى ، أما المدام فغاوية عبايات من اللى
مطرزة بالحرير الهندى اللى شبه السيرما ..

مستنيينك فى المطار

هذا ما قدرت ارجعه يا جماعة
تعبت الحقيقة في ترتيب الرسائل بعد استخراجها من الباكاب
اهو فرصة قرأت كل الموضوع


اعذروني كان هذا عمل كل ليلة الأمس وهذا الصباح
سيبوني اروح انام حبتين وهذا موضوعكم وكملوه بمعرفتكم

[صلاح السويفي]

:yucky::yucky:

لولي لولي لولي لوليييييييييييييي

(دي زغروتة مش لولي أختنا ودا اللي علموني في التزغريت)

ياجماعة أنا في حلم وللا في علم

أقرصوني علشان أصدق

واللي يعرف يعض يعضني ( بس بشويش)


أهلا وسهلا بحبيبنا سمعجي

وتسلم لينا ياسماعي . . واللي في الإدارة كلهم عشان خاطر عيونك

وأهلا بالسمبوخســية ..اللي أصبحوا أشهر من الحاتي والعاجاتي

نوّرت ياأســتاذ سمعجي ..

دلوقت نقعد على المصطبة (ونتجعص)

قول ياحكـــاواتي قول..واحشنا صوتك..

وحياة دموع عيني اللي ماينزلهم إلا الغالي ..

قول ياحكاواتي.........

[صلاح السويفي]

المشاركة الأصلية كتبت بواسطة سماعي

هذا ما قدرت ارجعه يا جماعة
تعبت الحقيقة في ترتيب الرسائل بعد استخراجها من الباكاب
اهو فرصة قرأت كل الموضوع


اعذروني كان هذا عمل كل ليلة الأمس وهذا الصباح
سيبوني اروح انام حبتين وهذا موضوعكم وكملوه بمعرفتكم

بس إيه رأي حضرتك ؟؟

حلو مش كده..

يستأهل...تعب حضرتك ؟؟

وزعـــلنـــا عليه ؟؟؟

واللا إيــه

(يعـيـّـشك ربي)