طلبات نوتة

[piano_piano_d]

الأساتذة الكرام : أعضاء المنتدى
إليكم نوت الأغاني الوطنية مجمعة في مكان واحد
.. يلاحظ الجميع أن أغلب النوت من تدوين الأستاذ/ عادل صموئيل ، فأوجه له كل الشكر والإمتنان لما يعطيه لطلابه من عِلم بسخاء ..
وأود أن أطلب منه بعض النوت حتى يكون لدي أعضاء المنتدي الكثير والكثير من النوت التى تعيننا في عملنا ..
نوتة : عاشـت بــلادنـا عاشــت حرة لولادنـا

نوتة : يا حبايب مصر ، غناء علية التونسية
نوتة : بســم الله ، الله أكبر بسـم الله بســم الله
نوتة : تسلمـي يـا مصـر إنني الفدا وسلامــاً إن مــدت الدنــيـا غـــدا
نوتة : مبروك مبـروك مـبروك عليكم وعلينـا ، غناء ياسمـين الخيام
نوتة : مهما رحنا ومهما جينا مصر روحنا ونور عنينا ، غناء لطيفة

أشكر أستاذي أ/ عادل صموئيل .. كل الشكر والعرفان .
الأخت الفاضلة
اشكرك من كل قلبى على تعاونك معنا لأن الموضوع مش انا لوحدى لكن كلنا بنكمل بعض كل واحد بيقدم اللى يقدر يقدمه و يعنى انا شخصيا مرات كنت احتاج برامج تكمل شغلى منها برنامج بيقلب صفحة الانكور ل pdf تطوع احد الاخوة الاعزاء واداهولى , واشكرك على النوت اللى انتى قدمتيها وللعلم منها انطلب قبل كده وتحت امرك فى طلباتك ولكن المهم حد ينزل التسجيلات مع اطيب تحياتى عادل صموئيل

[عادل صموئيل]

احبائى
اقدم لكم نوتة اغنية
يا حبيب الروح
واهديها للأخ العزيز ارمندو بناء على طلبه
وانا بدون الاغنية دى اكتشفت انها تقريبا اصعب اغنية لليلى مراد , يعنى هى بتنقسم الى جزئين , جزء اوبرالى على اعلى درجة من السيمفونى وجزء شرقى على اعلى درجة من التطريب , واقصد به مقاطع غناء ليلى مراد , يعنى كانت بتغنى بأعلى درجة من التطريب , وكان من الصعب تدوين اللى بتغنيه لنها كانت بتجود وتصدر والحاجات دى صعب جدا تتكتب لأن الغنا بهذه الحرفية العالية بيعمل جاجات مش موجودة فى الصولفيج او على الأصح بيعمل حاجات ماوصلش لها علم الصولفيج الاوروبى الأصل , والمشكلة هنا طريقة التعامل معاها فى التدوين يعنى فيه طريقتين , طبعا انا بتكلم وبقول وجهة نظرى لأن هنا انا بتعامل مع جميع المستويات يعنى بتعامل مع مبتدئين ومحترفين ومدونين ومدرسين يعنى احب طبعا ان كلامى يفيد الجميع , والطريقة الاولى فى التدوين ان المدون يحاول يدون الالى بتقوله ليلى مراد حرفياً ودى مشكلة خطيرة لأنه اولا صعب جدا تدوين اللى بتقوله حرفياً لأن زى ماقلت بتقول تفعيلات ايقاعبة مش موجودة فى العلامات الإيقاعية ومحاولة تدوين الأقرب منها ممكن تطلع عندك كتابة صعبة جدا وشكلها مفزع للمبتدئين وثانيا فى الغناء بكل هذه الإحترافية العالية المطرب بيصدر كتير يعنى يخرج برة الوحدة ودى مشكلة فى حد ذاتها لن المازورة اما بتتكسر او انت بتدون شىء ممكن يغير طابع اللحن , لكن انا بطريقتى اللى اعتقد انها وجدت عندكم صدى جميل بعمل ايه فى الاجزاء الصعبة وده درس لجميع الفئات : بسمع الجملة اللى فيها المشكلة دى عشرات المرات لحد ما ادندنها مع نفسى واحفظها يعدين بحاول انى اركبها على الميزان ( زى ما تلبس شراب اول سايز او تلبس جوانتى وتظبطه على اصابعك واخطر شىء احاول اتخلص من الحليات اللى مش من صميم الجملة يعنى بجاول اخرج الفكرة الاساسية او الجملة الأساسية وهنا فيه سر احب تعرفوه : اثناء التلحين الجملة بتكون اسهل من ما انت بتسمعها فى الراديو يعنى الملحن بيحفظ المطرب الجملة الأصلية وبدون الحليات بعدين بيأتى دور المطرب الخطير ان بيعمل من الجملة شىء خرافى ( طبعاً تحت اشراف الملحن مش منه لنفسه ) المهم ان بعد كل كلمى ده ممكن ناس تخاف من النوتة لكن المفاجاة اللى افتخر بيها انك حتلاقى النوتة كالعادة مكتوبة فى منتهى السهولة والبساطة بعدين ييجى دور العازف يجود فيها حسب امكانياته , وجدير بالذكر هنا شىء مش مألوف للسنباطى المشهور بالشرقية الأصيلة انه يعمل جملة الموسيقى سيمفونية اوروبية وعليها كورال اوبرا , وده بيبن ان الناس العظماء دول كانت عبقريتهم مش بتقف عند حد يعنى اى واحد بيسمع موسيقى كلاسيك لو سمع الجمة دى اكيد حايتجنن لأنها تحتوى كمان على لحن جميل جدا مش تركيبة سيمفونية وخلاص , وهنا ناتى للكورال الخرافى وده مش موجود اعتباطاً يعنى فى فترة الاربعينات وما قبلها كان فيه مجموعة كبيرة من الأجانب مقيمين فى مصر , وغالبية كبيرة منهم يونانيين وطلاينة وكانوا طبعا بيشتغلوا فى مختلف المهن يعنى كان اليونانيين بيمتلكوا اهم محلات البقالة فى مصر وكانوا بيجيبوا بضاعتهم من اليونان رأساً وانا اذكر فى طفولتى محل الخواجة جورج كنا بنشترى منه الزيتون الاسود والبسطرمة وزيت الزيتون والجبنة الرومى وبعد الثورة معظمهم غادر مصر وبقت المأكولات دى ذكريات لن تعوض , وكان منهم اللى بيصلحوا الساعات والكاميرات والسيارات ( طبعا حتقولوا ايه اللى دخل الكلام ده فى موضوعنا حقول كان بينهم مجموعة كبيرة من امهر العازفين ومغنيين الاوبرا وراقصات الباليه وده تلاقيه فى الافلام القديمة والأغانى القديمة يعنى كان الحان فيها موسيقى غربية بحتة وشرقية بحتة , والعازف المتميز لازم يكون متخصص كان الملحنين واهمهم عبد الوهاب بيقعد معاه فرقتين واحدة تعزف الجملة الغربية وواحدة فى الجملة الشرقية وده السبب فى شىء خرافى فى اغانى زمان , وتامل فى صوت الكورال فى هذا اللحن شىء خرافى مش موجود النهاردة إلا فى اوبرا روما او برلين
آسف للإطالة واتمنى ان تسعدوا بالنوتة مع اطيب تحياتى

[عادل صموئيل]

احبائى
اقدم لكم نوتة من اروع واحلى الاغانى الوطنية
وطنى وصبايا واحلامى
وهى من تلحين محمد فوزى
واهديها للأخت العزيزة ( بيانو بيانو د ) واشكرها على مجهودها فى تجميع النوت فى موضوع واحد
وهنا اكرر ان الاغانى الوطنية بتاعة الزمن الجميل لما بيغنيها التلاميذ والطلبة فى المدارس اولا ببيحسوا انهم بيغنوا لحن جميل جدا وبيزيد حبهم لحصة ومادة الموسيقى وثانيا وهو الأهم لما مدرس الموسيقى بيعمل حفلة لو على مستوى المدرسة او مستوى الإدارة تعامله مع اناشيد واغانى الزمن الجميل بيكبر شكل المدرس لأن مدير المدرسة وهيئة التدرييس بيكونا كبار فى السن يعنى عاشوا ايام الاغانى الجميلة دى وتمثل بالنسبة لهم ذكريات يعنى بتعمل عندهم تأثير غير الاناشيد الحديثة اللى عاملة زى الفراخ البيضا او على الأصل زى مكعبات شوربة الفراخ ( واللى اعتقد اصلا انها مواد كيماوية ومش من الفراخ خالص ) والمعنى فى بطن الشاعر , ومن مميزات هذه الاغنية انها سهلة جدا عزفا وغناءاً والأهم انها مش متداولة كتير يعنى المدرس اللى يعملها بيبقى شكله حلو جدا طبعا مع الموجهين بتوعه , يعنى انا كموجه وموجه اول سنين طويلة كنت بروح مداارس كتير وفى محافظات كتير وكان الشىء اللى بيضايقنى ان معظم المدرسين بيكرروا نفس الاناشيد بمعنى ان مدرس حافظ خمس اناشيد يقعد يعيد ويزيد فيهم طول عمره وما يتعبش نفسه حتى انه يدور على حاجة جديدة , وده الشىء اللى انا وكلكم اكيد حسيتوا ان المدرسين اللى بحس انهم عايزين يطوروا نفسهم انا بحبهم جدا وبتمنى اساعدهم بكل طريقة , بحس ان ربنى ادانى علم وحقهم عليا انى اعطيه للى بعدى
مع اطيب تحياتى , وعلى فكرة الاغنية دى مش للمدرسين بس يعنى لحن جميل جدا للجميع , وممكن يستعمل خارج مصر لأنه من التراث

[عادل صموئيل]

أحبائى
اقدم لكم نوتة
اسلمى يامصر اننى الفدا
والنشيد ده من اعرق الاناشيد المصرية اطلاقا
واشكر الاخ العزيز عزت شحاتة على مجهوده
وارحب بعودة الأخ العزيز نور الصباح
مع اطيب تحياتى

[وسام اكرم]

المشاركة الأصلية كتبت بواسطة عاصم المنشاوى

يسلم ترابها الأسمرانى...يسلم شجرها الأخضرانى
تسلم لنا مصر الحبيبة...مالناش حبيبة غيرها تانى
لو عديت على ناس يقولولك مرحب مرحب ياأنسان
لو عديت على ناس فى قلوبهم طيبة وحب كبير وحنان
لو عديت على ناس تفتح لك دارها وتاخدك بالأحضان
تعرفهم ...تعرف بلادى ...تعرف انك فى بلادى

لو عديت على نخل مدور امله منور كل سماه....لو عديت على بر مزهر ابيض واخضر عالى هواه...لوعديت على ناى بينادى بنغم هادى حلو غناه....تعرف انك فى بلادى

لو عديت على مصنع داير ليل ونهار صاحى وسهران
لو عديت على ناس بتشيل بدراع شغيل وجبين عرقان
لو عديت على أهرام عالية وتماثيل غالية بقالها زمان
تعرف انك فى بلادى
عبد الرحيم منصور
بليغ حمدى
محمد رشدى.......ممكن ياأستاذ /عادل من فضلك ؟؟؟؟؟؟؟؟

-----------------------------------------
عزيزي و أخي أستاذ عاصم
مرفق مع المشاركة نوتة بسيطة و ملف صوتي لأغنية ( الشاب الامير) محمد رشدي, لو عديت, أرجوا أن تنال رضاك مع خالص حبي و تقديري لكل الاحبة و الاصدقاء
المخلص
وسام
--------------------------------------------------

حبيب

[عادل صموئيل]

احبائى
لا اجد ما اقوله اليوم
اقدم لكم من احلى ومن اغلى ما امتلك
من عزفى المتواضع كوكتيل من احلى الاغانى الوطنية معظمها دونته لكم نوت موسيقية لكن لا اجد فى هذه اللحظة التاريخية إلا ان اقدمها لكم من عزفى المتواضع لتذكرونى
حب الوطن فرض عليا
وطنى وصبا واحلامى
بلدى احببتك يا بلدى
يا بلادى
بالأحضان
يا حبنا الكبير والأول والخير
اسلمى يامصر
مصر التى فى خاطرى
قوم يا مصرى
اقسمت باسمك يابلادى
طوف وشوف
بلادى بلادى بلادى لكى حبى وفؤادى
مصر هى امى

[عادل صموئيل]

احبائى
اقدم لكم نوتة
يامصر غناء امال ماهر
واهديها الى الابنة العزيزة جدا انيتا وهى من شباب مصر شباب ثورة مصر جيل ثورة 25 يناير
وزى ما شباب ثورة يناير عملوا شىء جميل وجود انيتا بيننا بيثبت ان الشباب دول حاجة جامدة جدا يعنى من اول مادخلت انيتا المنتدى حسيت انها شاطرة جدا وبتحاول تثبت جدارتها ومع انها طالبة لكن اكيد انتم حسيتم انها شاطرة كانها مدرسة وبالطبع انا كنت طول الوقت بشجعها
وانا بقدم النشيد ده النهاردة حسيت انه نشيد الساعة يعنى ابن الثورة الجديدة ومطلوب ان المدرسين والشباب يجهزوه لنه اولا نشيد جميل جدا .
وجدير بالذكر انا بحب امال ماهر لكن ماكنتش مقتنع بيها لما كانت بتغنى ام كلثوم لن ام كلثوم سد عالى لا يطاله احد , لكن جمال امال ماهر انها تعمل اغانى لنفسها واكيد طول النهار بتتذاع اغانى جديدة اتعملت للثورة لكن الفرق بينهم وبين اغنية امال ماهر اعتقد كبير جدا جدا
مع اطيب تحياتى
وفى انتظار الجوهرة القادة انتظرونى قريبا

[عادل صموئيل]

احبائى
اقدم لكم نوتة نشيد من اروع الاناشيد التى قدمها عبد الحليم بعد ثورة يوليو
صورة
انا هنا دونت الكوبليه رقم 1و2 و3 فقط
وهى اروع ما فى الاغنية
والسبب انى لم اكملها له قصة
انى لم اجد تسجيلا كامل للجزء الصغير الباقى بسبب ان فيه اسم جمال عبد الناصر
والقصة ان بمجرد ان اعتلى الرئيس الراحل انور السادات الحكم حدثت كارثة خطيرة , مش عارف مين دخل الإذاعة المصرية وحذف اسم جمال عبد الناصر من الاناشيد والأغلنى الوطنية بل استبعدت بعض الاناشيد واختفت , لم يدرك من عمل تلك العملة السوداء انه ارتكب جريمة فى حق التراث والتأريخ الموسيقى لمرحلة من اهم مراحل مصر الموسيقية على مر التاريخ وهى من سنة 1950 وحتى 1970 , واقول انها اهم مرحلة فى تاريخ مصر الموسيقى لأنها كانت عصر نضج فن كل عمالقة الزمن الجميل , واليوم عندنا فى مصر قامت ثورة جديدة , ( ونحن منذ اكثر من ثلاثين يوماً مابنعملش حاجة غير متابعة كل القنوات الإخبارية 24 ساعة ومش ببنام لتلاحق الاحداث ) , وطبعاً كل انسان مننا لما بيشوف مواقف زى دى بيشوف بالذات الموضوع اللى بيخصه يعنى الطبيب مثلا بيركز على الإصابات واخبار المستشفيات و انا طبعاً مركز على الاناشيد الوطنية المصاحبة للصورة , وطبعاً لما بتسمع ام كلثوم او اى حد من جيل العمالقة يعنى حتى الدلوعة شادية لما تسمعها بتغنى يا حبيبتى يا مصر وانت شايف دبابات على الشاشة تحس ان صوت شادية بقوة الدبابات , وهنا ظهر ( من ضمن الاشياء اللى انا شخصيا بعتبرها من ظواهر الفساد خلال ال 30 سنة الماضية ) وهى جيل اللى بيغنوا ع الشعب يعنى المحسوبين مطربين وهم مش ..... لأن كلمة مطرب يعنى من عبد الحليم وانت نازل , من اخطر الظواهر ظهور جيل اللى بيغنوا من الشباب المخنثين او اللى تحس انهم بيغنوا بمياعة ويترقصوا بإبتذال ويتنططوا ع المسرح زى القرود وظهرت كارثته لما حاولوا يشتركوا آل ايه فى الثورة ويعملوا اغانى
ظهرت الفاجعة يعنى تسمع اغنية وطنية بصوت شاب صوته مايع مخنث والموسيقى التافهة وانت شايف شهداء على الشاشة انا حسيت بقرق وبقيت ابحث عن اى محطة اخرى اسمع فيها ام كلثوم بتقول وقف الخلق ولا عبد الحليم بيقول فدائى , واللى حضر منكم الحروب كانت الاناشيد دى اقوى من مدافع الهاون ودانات الدبابات , كان زمان فيه كلمة خطيرة احب اقولها لكم المطرب يعنى صوت راجل وشكل راجل وحركات راجل على المسرح , لأنه فنان زيه زى اى محامى او طبيب او أى شخصية محترمة واكتر كمان لأن تسجيل المطرب بيبقى ابد الدهر , وكلمة مطربة يعنى فنانة محترمة زى ليلى مراد او فايزة مثلا مش الحاجات اللى بنشوفها دلوقتى
فى الختام تحباتى الى ارواح الشهداء فى كل البلاد فى مصر وتونس وليبيا واليمن والبحرين , ولكن كل ما اتمناه ان بعد ماتستقر الأمور ( طبعاً انا بتكلم من ناحية شغلتى ) اتمنى يارب انى قبل ما اموت اشوف مطربين رجالة رجالة فعلا ومطربات بنات محترمات ينسوا اللى حصل فى ال 30 سنة الماضية ويكملوا امتداد العظماء اللى سبقوهم , وبينى وبينكم انا نفسى فى وسط حركة التطهير دى انهم يقبضوا على كل اللى كانوا بيغنوا خلال ال30 سنة الماضية ويدوهم 45 يوم استمرار اعدام , او كمان نفسى زى ماشبابنا الجميل اللى زى الورد نزل ينظف شوارع البلد , نفسى يحكموا على اللى بيغنوا دول انهم يمسكوا ادوات وينظفوا آذاننا من اللى عملوه فينا خلال 30 سنة

[تلميذ القصبجي]

المشاركة الأصلية كتبت بواسطة عبدالرحمن مهند

طب ممكن لو مفيش حد حيكتب نوتة مرمر زماني يقولي مقامها ايه ؟

اخي عبد الرحمن
السلام عليكم
اهديك يا اخي نوتة اغنية مرمر زماني على مقام هزام

[وسام اكرم]

المشاركة الأصلية كتبت بواسطة عادل صموئيل

احبائى
اقدم لكم نوتة نشيد من اروع الاناشيد التى قدمها عبد الحليم بعد ثورة يوليو
صورة
انا هنا دونت الكوبليه رقم 1و2 و3 فقط
وهى اروع ما فى الاغنية
والسبب انى لم اكملها له قصة
انى لم اجد تسجيلا كامل للجزء الصغير الباقى بسبب ان فيه اسم جمال عبد الناصر
والقصة ان بمجرد ان اعتلى الرئيس الراحل انور السادات الحكم حدثت كارثة خطيرة , مش عارف مين دخل الإذاعة المصرية وحذف اسم جمال عبد الناصر من الاناشيد والأغلنى الوطنية بل استبعدت بعض الاناشيد واختفت , لم يدرك من عمل تلك العملة السوداء انه ارتكب جريمة فى حق التراث والتأريخ الموسيقى لمرحلة من اهم مراحل مصر الموسيقية على مر التاريخ وهى من سنة 1950 وحتى 1970 , واقول انها اهم مرحلة فى تاريخ مصر الموسيقى لأنها كانت عصر نضج فن كل عمالقة الزمن الجميل , واليوم عندنا فى مصر قامت ثورة جديدة , ( ونحن منذ اكثر من ثلاثين يوماً مابنعملش حاجة غير متابعة كل القنوات الإخبارية 24 ساعة ومش ببنام لتلاحق الاحداث ) , وطبعاً كل انسان مننا لما بيشوف مواقف زى دى بيشوف بالذات الموضوع اللى بيخصه يعنى الطبيب مثلا بيركز على الإصابات واخبار المستشفيات و انا طبعاً مركز على الاناشيد الوطنية المصاحبة للصورة , وطبعاً لما بتسمع ام كلثوم او اى حد من جيل العمالقة يعنى حتى الدلوعة شادية لما تسمعها بتغنى يا حبيبتى يا مصر وانت شايف دبابات على الشاشة تحس ان صوت شادية بقوة الدبابات , وهنا ظهر ( من ضمن الاشياء اللى انا شخصيا بعتبرها من ظواهر الفساد خلال ال 30 سنة الماضية ) وهى جيل اللى بيغنوا ع الشعب يعنى المحسوبين مطربين وهم مش ..... لأن كلمة مطرب يعنى من عبد الحليم وانت نازل , من اخطر الظواهر ظهور جيل اللى بيغنوا من الشباب المخنثين او اللى تحس انهم بيغنوا بمياعة ويترقصوا بإبتذال ويتنططوا ع المسرح زى القرود وظهرت كارثته لما حاولوا يشتركوا آل ايه فى الثورة ويعملوا اغانى
ظهرت الفاجعة يعنى تسمع اغنية وطنية بصوت شاب صوته مايع مخنث والموسيقى التافهة وانت شايف شهداء على الشاشة انا حسيت بقرق وبقيت ابحث عن اى محطة اخرى اسمع فيها ام كلثوم بتقول وقف الخلق ولا عبد الحليم بيقول فدائى , واللى حضر منكم الحروب كانت الاناشيد دى اقوى من مدافع الهاون ودانات الدبابات , كان زمان فيه كلمة خطيرة احب اقولها لكم المطرب يعنى صوت راجل وشكل راجل وحركات راجل على المسرح , لأنه فنان زيه زى اى محامى او طبيب او أى شخصية محترمة واكتر كمان لأن تسجيل المطرب بيبقى ابد الدهر , وكلمة مطربة يعنى فنانة محترمة زى ليلى مراد او فايزة مثلا مش الحاجات اللى بنشوفها دلوقتى
فى الختام تحباتى الى ارواح الشهداء فى كل البلاد فى مصر وتونس وليبيا واليمن والبحرين , ولكن كل ما اتمناه ان بعد ماتستقر الأمور ( طبعاً انا بتكلم من ناحية شغلتى ) اتمنى يارب انى قبل ما اموت اشوف مطربين رجالة رجالة فعلا ومطربات بنات محترمات ينسوا اللى حصل فى ال 30 سنة الماضية ويكملوا امتداد العظماء اللى سبقوهم , وبينى وبينكم انا نفسى فى وسط حركة التطهير دى انهم يقبضوا على كل اللى كانوا بيغنوا خلال ال30 سنة الماضية ويدوهم 45 يوم استمرار اعدام , او كمان نفسى زى ماشبابنا الجميل اللى زى الورد نزل ينظف شوارع البلد , نفسى يحكموا على اللى بيغنوا دول انهم يمسكوا ادوات وينظفوا آذاننا من اللى عملوه فينا خلال 30 سنة
---------------------------

الاستاذ القدير و الكبير أستاذ عادل صموئيل المحترم
تحية طيبة , أرجول لك كل خير أنشاء الله. أولا أشكرك جدا على تدوينك لاغنية العندليب الاسمر ( صورة) و اللتي أعتقد ان كل واحد منا يحمل لها ذكرياته الخاصة معها. كما قرأت تفسيرك لحذف الكوبلية الرابع. انا من بعد أذنك طبعا, دونت الكوبلية الرابع بشكل مبسط و مرفق مع ملف صوتي. أرجوا ان ينال رضاك و رضا الاعزاء مع خاص أحترامي و تقديري
المخلص الى الابد
وسام