مقاطع ابداعية - الصفحة 3

**حسن كشك** · #21 16/04/2008, 22h34

اقتباس:

المشاركة الأصلية كتبت بواسطة لولى76

السلام عليكم ورحمه الله
هتعبك معايا يااستاذ حسن
لانى مش باعرف اقطع الاغانى
لكن انا عندى مقطع من دويتو انا بحبه جدا بين ليلى مراد ومحمد فوزى وهو اخر دويتو فى فيلم ورد الغرام اسمه" ياللى شغلتى القلب"
والكوبليه اللى اقصده هو الكوبيليه الوحيد اللى غنته ليلى مراد فى الدويتو ياريت حضرتك تقدر تجيبه
بالاضافه لكوبليه لمحمد فوزى فى اغنيه طير بينا ياقلبى وهو اللى بيقول فيه الورد من يوم وحدتى خاصم حبايبه كلهم سابنى لنصيبى وقسمتى ليكون نصيبى زيهم لاخر الكوبليه ده

حاضر يااستاذه لولو
بس اسمعى معانا المقطع البديع ده لاسمهان - ونشوف الاعجاز فى طبقات صوتها العليا - شوفوا بتوصل لاى مستوى
ياترى صوتها احلى ولا صوت الطيور

**حسن كشك** · #22 16/04/2008, 23h10

اما العظيمه ام كلثوم
فاسمعوا المقطع ده من اغنية
قصة الامس
يسهر المصباح والاقداح والذكرى معى
ولماذا هذا المقطع
لان ام كلثوم تؤديه - تماما كما يجود كبار القراء القرآن الكريم
نفس الطريقة تماما - كأنى ارى ام كلثوم تلبس عمامة المقرئ
وتضع يدها على اذنها ولا تغنى ولكن تقرأ القران - مع الفارق فى الكلمات
اسمعوا - كيفية استعارة رياض السنباطى طريقة ألاداء من قرآءة القران

**غواص النغم** · #23 24/04/2008, 00h38

اقتباس:

المشاركة الأصلية كتبت بواسطة نورا نجم

استاذ حسن ممكن طلب
في صوره غنائيه بتغنيها طفله ومش عارفه اسمها
قديم ابيض واسود
واحد عن رمضان عن المسحراتي والتاني بتوزع فيه البريد تقريبا
عارفها؟؟؟؟؟؟

الطفلة هي المطربة نزهة يونس ولها صفحة خاصة بها في القسم اللبناني
وكان معها في الفيلم عملاق التمثيل زكي رستم
الموضوع اول مرة ادخله
جميل جدا شكرا لك يابوعلي
ومعقول ياراجل ماتعرفش مين غنت ياطيور دي ام كلثوم نفسها قالت ان اللحن ده لايؤديه سوى إثنين صوتي وصوت اسمهان
واكيد عاتبت القصبجي لأنه اعطى اللحن لأسمهان
بالنسبة لي انا وام كلثوم احب لها مقطع جميل لقصيدة قصة الامس موسيقاه تحفة والكلمات رائعة يأتي في نهاية الوجه الاول من الشريط وبداية الثاني
بيقول ايه..نسيت
المهم اكيد عرفتوه لأنه جميل وبيشرح القلب
في اغنية ليلي ونهاري مقطع :الحب هو الود والحنية ....من اجمل المقاطع فعلا انطرب له
وكذلك انطرب لأغنية ليلى مراد ياما ان اناجي وخاصة المقطع الاول
وفوزي لما يغني ياللي انت بعيد وخاصة كان الميعاد شهرين اثنين حلفت ترجع بعديهم ..دلوقتي فاتوا كم شهرين ..الي نهاية الكوبليه
كتبت بسرعة

**حسن كشك** · #24 17/05/2008, 06h49

تعالوا نستمع الى هذا المقطع الابداعى الصوتى
للفنان محمد عبد الوهاب
فى الاغنية الشيك اوى
مشغول بغيرى
استمعوا الى عبد الوهاب فى كلمتين من الاغنية
مسكين .....ياقلبى
حيران .....فى حبى
وشوفوا نفس عبد الوهاب كان طول ايه
قال مسكين ممدوده لمدة 11 ثانيه
وقال حيران ممدوده لمدة 19 ثانية
بدون ارتعاش صوت وعلى مستوى واحد
ولا حسينا انه استلف نفس ولا اتشنجت حنجرته
دى بقى الهبات الالهيه
استمعوا وجربوا تقولوها معاه واختبروا نفسكم
ياترى هاتقدروا ؟ ......جربوا ؟
( المدخنون لا يشاركون )

**حسن كشك** · #25 17/05/2008, 07h50

ودرس اخر من الفنان محمد عبد الوهاب
فى اغنية فلسطين
تعالوا نستمع الى الشطرات دى
اخى ايها العربى الابى ........ ارى اليوم موعدنا لا الغدا
اخى اقبل الشرق فى امة ... ....ترد الضلال وتحيى الهدى
صبرنا على غدرهم صاغرين....... وكنا لهم قدرا مرصدا
طلعنا عليهم طلوع المنون .... فصاروا هباء وصاروا سدى

كل شطر مما سبق قاله عبد الوهاب فى نفس واحد
وكل شطر كان زمنه 10 ثوانى بالظبط - رغم التكرار ورغم تلاعب عبد الوهاب
بطبقات صوته داخل المقطع واطاله كلمه وتقصير الاخرى لكنه نفس الزمن
قيسوا الزمن على صوت عبد الوهاب وليس على الايقاع - تزامن رائع منسق مبدع

وقد كررها عبد الوهاب بالظبط فى المقاطع التاليه
اخى ان جرى فى ثراها دمى .... واطبقت فوق حصاها اليدا
ففتش على مهجة حرة .... ابت ان يمر عليها العدا

وكمان فيه واحد تانى ... كان بيمارس الابداع والنفس والتزامن
انه عازف اله النفخ الخشبية ومش عاوز اقول ناى ولا كوله ولا ارغول ولا ايه عشان الناس
المتخصصين هما اللى يقولوا اسمها
كان يؤدى بنفس التناغم الرائع وبنفس الزمن
يالجمال صوت عبد الوهاب فى تلك المقاطع منتهى الاناقة - وايضا جمال صوت الناى ولا الارغول ولا الكوله دى
اله شعبية ذات صوت رائع وحزين لكن بشياكه تسمع صوتها فتتذكر على الفور النيل - يمكن عشان شربت ونمت من ميته
حاولوا تدربوا نفسكم مع عبد الوهاب ..... واملوا رئتيكم بالهواء قبل التجربه ونظموا خروج النفس - عشان يكفى الشطر

اسمعوا وتمتعوا

**د.حسن** · #26 17/05/2008, 12h00

أخى وتوأمى الغالى الأستاذ حسن
أسمعك وأسمع الأخوة جميعاً الست لما رق الحبيب
وسهرت تستناه 9 "سهرات" مختلفة
مع تحياتى

**حسن كشك** · #27 17/05/2008, 15h45

اقتباس:

المشاركة الأصلية كتبت بواسطة د.حسن

أخى وتوأمى الغالى الأستاذ حسن
أسمعك وأسمع الأخوة جميعاً الست لما رق الحبيب
وسهرت تستناه 9 "سهرات" مختلفة
مع تحياتى

دكتور حسن الكبير العظيم
التوام الغالى
ياسلام على الجمال - عبقرية عالية فى الاداء واحساس رائع بالكلمات - وحنجره مرنه سهلة التحكم بتقول كل حاجه وكل المقامات وطبعا يادكتور الابداع ده كان وليد اللحظه يعنى ام كلثوم عملته بدون تفكير
انت خلتنا ناخد بالنا من السهرات - ( سهرت استناه )
واكيد خدت بالك من الابداع فى - ( واشوف خياله قاعد )
وابداع اخر فى كلمة ( جنبى )
اسمع تانى وتمتع

**حسن كشك** · #28 06/02/2009, 04h04

مع ابداعية جديدة
لكنها من نوع مختلف .... ليست الموسيقى .....لكنها الكلمات
تعالوا نقرأ ماكتبه المؤلف ( ايمن بهجت قمر ) لمقدمة مسلسل سلطان الغرام
وكيف غناها ( مدحت صالح )

مقدمه

بحر الغرام غدار وماله قرار

والحب قالوا اعمى ونعمه ونار
ولا له ميعاد يبتدى ولا له ميعاد مرواح

ولا شرط كله فرح ولاشرط كله جراح
ولا حد كان بأيديه فى يوم يختار

انا جيت لقاضى الغرام ينصفنى على شوقى
سمع كلامى ارتبك ماهو انشبك قبلى

زى القضا المستعجل الهم زاد فوقى
يظهر ياقلبى السهر كل اللى مكتوبلى

قولوله حكمه وجب تنفيذه راضى انا بيه
هايحكم عليا والا انا اللى ها احكم عليه

ولا له ميعاد يبتدى ولا له ميعاد مرواح
ولا شرط كله فرح ولاشرط كله جراح
ولا حد كان بأيديه فى يوم يختار

نهاية

قالوا الحريم اعتاب أقدام وقرفه.
ويكون فى عون اللى داب ملهش صرفه
وياحظه اللى تخلى دنيته منوره

وياعينى على هاتيجى رجله فى اللى هاتجيبه ورا
ورا كل عظيم عظيمه وكترهم اوى قلة قيمه
يجيئوا قصادهم* فى كيدهم ودمعهم حرفه

اكم رجال قد الجبال اتقلبوا هبل
انسخطوا قدام الجمال وكعوا دوبل
ونقول ايه بس دا كأنه مس
ولا عمره هايطلع ولا بالطبل

وياحظه اللى تخلى دنيته منوره
وياعينى على هاتيجى رجله فى اللى هاتجيبه ورا

كلام محترف اوى وكله حكم .... وكيف تأتى لايمن ان يجمع كل تلك الامثال والكلام الذى نسيناه .... ويجمعه بهذا الشكل الجميل الرائع الذى يخدم المسلسل تمام ويجارى احداثه بشكل دقيق جدا ..... ابداع والله
طيب حد يعرف يعنى ايه ( القضا المستعجل ) و(الحريم اقدام وقرفه ) و (اتسخطوا )و( وكعوا دوبل ) و( كأنه مس ) و(ولا عمره هايطلع ولا بالطبل - اسطورة الخفاش) كلام مصرى صميم قديم نكاد نكون نسيناه ويذكرنا به ايمن بهجت قمر - ابن الوز عوام - ورغم عدم مساواه الشطرات لبعضها ... لكن تشعر ان الشطرات موزونه جدا
وارجوا من الاخوه - سمعجى - بشير عياد - سيد ابوزهده ... يفسرولى موضوع عدم مساواه الشطرات لبعضها لكن لا تشعر بأى عدم اتزان

وزاد الابداع طريقة اداء الفنان المبدع المتمكن ( مدحت صالح ) الذى لون صوته وتلاعب بمستوياته ...بصوره رائعة .....رائعة ومن ابداعياته المتكرره فى المقدمة والنهاية ... طريقته فى اداء المقاطع( ولا له ميعاد يبتدى ) و( سمع كلامى ارتبك ) و ( يظهر ياقلبى السهر )و( ونقول ايه بس دا كأنه مس ) كان رائع ... وكان بيغنى بمزاج عالى اوى ومصنعية جباره... لا والله فنان
على الحان المبدع ياسر عبد الرحمن ( وإن كان اللحن عادى ... هذه المره )

استمعوا اليها على هذا الرابط
http://www.sama3y.net/forum/showpost...3&postcount=91

*ملحوظة : فيه كلمه فى اول المقطع انا مش عارف اسمعها كويس ومش عارف افسرها - ياريت حد يسمعها ويقول ايه الكلمه بالظبط ... انا كتبتها زى ماسمعتها ومتأكد انى كتبتها غلط
يجيئوا قصادهم فى كيدهم ودمعهم حرفه

**بشير عياد** · #29 06/02/2009, 11h38

باختصار شديد
أيمن بهجت قمر يتمتع بجرأة غير عادية في الإتيان بمفردات كنا نتصوّر أنها من الصعب أن تجيء في أغنية ، هو قفز في الجانب الآخر من الفراغ الذي تركه صلاح جاهين ، فقد كان العم صلاح جاهين مغامرًا وجريئًا في تعامله مع المفردات الشعبية داخل الأغنية " الشيك " ، فالجميع استعملوا المفردات الأرضية كلها في المونولوجات والفكاهيات والمسرح الساخر ، أمّا الأغنية فأكبر مغامر فيها كان صلاح جاهين ، وجاء أيمن ـ والقياس مع الفارق ، أيمن فين من صلاح جاهين ، ولكنه على الطريق ـ ليضحّي بالوزن من أجل الموضوع ، فتلاحظ أن هناك شطرات موزونة ( تتأرجح بين الكامل والرّجز والبسيط ) ، وشطرات أخرى كلام مرصوص يشبه بعضه من الآخر ، ولكن الملحن ، بقدرة عجيبة ، يملأ فراغات الموسيقى الشعرية بذكاء ، ويجعلنا لا نشعر بكسور الوزن أو خروج النص عن البحر الشعري إلى بحر آخر أو إلى الكلام العادي .
أيمن موهوب ، وفهم اللعبة " صح " ولولا بعض سقطات تنتاب كتاباته لصعد أكثر ، وقد تحدّثت عنه في برنامج تليفزيوني وقلت إنه لا يشبه أحدًا ، ويملك جرأة صلاح جاهين ( لكنه لا يملك عمق أفكاره وثقافته ، بحكم حداثة تجربته ، ولكونه دخل المجال بالصدفة ، يعني " كان بيشخبط ويهزّر فقلبت بجد " ) ، ويكفينا من أيمن ـ فوق ما يقدّم من إمتاع ـ أنه أراحنا من أسماء نصّابين كبار يكتبون مقدّمات المسلسلات بنظام " المقاولة " حتى أوشكنا أن نفقد الأمل ، فجاء أيمن لـ " يربّيهم " ويربك حساباتاهم ويثير أحقادهم التي لم تنضب طوال نصف قرن من الزمان !!!

**abuzahda** · #30 06/02/2009, 14h04

اقتباس:

وارجوا من الاخوه - سمعجى - بشير عياد - سيد ابوزهده ... يفسرولى موضوع عدم مساواه الشطرات لبعضها لكن لا تشعر بأى عدم اتزان

عمي حسن
هتبطّل تورطني ، إمتى ؟
قُلت : الأستاذ بشير عيَّاد
خلاص ، عايز إيه تاني ؟

الحمد لله إنه وصل قبلي

شوف يا عمي حسن
كان عندنا في مصر، لاعب كرة شراب مُعْجِز ، إسمه سعيد الحافي . عجزت أكبر النوادي المصرية في إقناعه بلبس حذاء.
لكنه كان يصر على "موقفه" من الحذاء ، فلا ينضم إلى فريق النادي لكرة القدم.
ليعود إلينا فنرى سحره العجيب بالكرة الشراب.
و الآن ، كثيرٌ من نجوم الكرة العظام نسيناهم.
لكن سعيد الحافي ، رافقه عادل إمام أسبوعاً قبل تجسيده في فلم يحكي قصة حياته "الحريف".

فبحور الشعر هي "حذاء" الشاعر ، لا "حِداءه". الحذاء يطفي على خطواته الوقار و يقيه من العثرات ، كما "المقامات في الموسيقى".
هل علمت يوماً أن سيدنا الشيخ مصطفى إسماعيل ، قد درس علم النغم -سماعي ؟

هل "الموسيقى" لم تكن موجودة ، قبل "تسمية المقامات" ؟

هل كان أصحاب "المعلقات" يعرفون "الخليل بن أحمد الفراهيدي" ؟

الأستاذ أيمن بهجت قمر ، ريحة الحبايب ، الأصيل الموهبة ، السليم الفطرة و النفس ، سمعته في اتصالٍ هاتفي على الهواء مع الجميلة شريهان . كانت تشكره على أغانيه الخاصة لابنتها في كل عيد ميلاد. بينما هو يشكرها على "جدعنتها" عندما تكفلت بصيانة "شقة" قمر الكلام سيدي بهجت قمر.

ترك أيمن نفسه لغواية "الموضوع" في القصيدة ، فتقاذفته موجات القصيد بين ثلاث ارتكازات ، أحسن مناوءتها ، في موضعين.

أما عن "الموضوع" ، فيخبرنا أرباب "صنعة" الشعر: أن استخدام "المأثورات" وما يشبهها من "جُمَلٍ" ، لتزيين القصيدة . هو "إزميل" حاد يجب حُسن التعامل معه.

و أما عن "التدوير" فإنه يمنح القصيدة "موسيقى" داخلية ، تخاطب "باطن" القارئ ، كما عقله.

(كفاية كده يا عم حسن ، كتر خيرك)