طلبات نوتة - الصفحة 22

**عادل صموئيل** · #**211** 01/02/2010, 15h06

احبائى
اقدم لكم بناء على طلبكم كلكم تقريبا نوتة
ساكن ف حى السيدة
طبعا انا حاولت ابسطها لأن عبد المطلب لما بيغنى اللى بيقوله فوق مستوى الكتابة وفوق مستوى التقليد
اتمنى ان يستفيد منها الجميع وانا اشكر اخى العزيز وائل واتمنى من كل المهتمين بالنوتة ان يحذو حذوه يعنى اى شىء قيم عموما على الكمبيوتر ( مش شرص النوت بتاعتى ولكن عموما ) يستحسن الاحتفاظ به فى اكتر من مكان وللعلم من أأمن الامكنة الاسطوانات فهى طاملا محفوظة فى علبتها بعيد عن العبث هى امان اكتر من اى شىء
مع اطيب تحياتى

**عاصم المنشاوى** · #**212** 01/02/2010, 18h41

اقتباس:

المشاركة الأصلية كتبت بواسطة ياسمين الشام

استاذ عادل لي طلب صغير عندك
المقدمة الموسيقية لاسأل روحك خصوصا تقاسيم العود
ومقدمة هذه ليلتي
من تدوينك وشكرا لك
في نوتات ولكن ليست جيدة

لو جلالة الملك عادل بك صمويل قال نذيع ح نذيع لو قال لأ يبقى مانذيعشى

انا عدلت صورة نوتة هذه ليلتى
عادل صموئيل

**عادل صموئيل** · #**213** 02/02/2010, 02h01

احبائى
كانت الاخت العضوة الجديدة ياسمين الشام طلبت نوتة مقدمة
اسأل روحك
والأح عاصم المنشاوى قدمها مشكورا
بس انا كنت ابتديت اكتبها
واقدمها لكم لأن حسيت ان النوتة المقدمة صعبة اوى
مع اطيب تحياتى

**عادل صموئيل** · #**214** 03/02/2010, 10h54

ااحبائى
فى يوم ذكرى ام كلثوم اقدم لكم من احلى روائعها
اروح لمين
كاملة
مع اطيب تحياتى

**عادل صموئيل** · #**215** 04/02/2010, 10h08

احبائى
اقدم لكم بناء على طلب الاخت العزيزة ياسمين الشام
مقدمة ومذهب
هذه ليلتى
هنا انا عملت شىء اعتقد انه شىء فى تحدى صعوبة كتابة الموسيقى العربية
المقدمة الاولى هى ادليب انا كتبتها على ميزان ( طبعا مع عدم الاخلال بسلامة اللحن ) وهنا درس مهم احب اقوله ان اى انسان بيكتب نوتة لازم يلاحظ الامكانيات التى فى اللحن وهنا فى هذه الافتتاحية انا لما دققت فيها حسيت انها ادليب لكن ممكن تتكتب على ميزان طبعا للتسهيل على القارئين
اضاً الإضافة انا دونت صولو الجيتار وملحوظ ان النوتة التى ارفقتوها لم يكتب الصولو واكتفى بكلمة تقاسيم جيتار ولكنها صولو وليست تقاسيم ولابد من كتابتها
ايضا فى الجملة الاخيرة من المقدمة والتى بها صولو الجيتار هى جملة تتكرر مرتين مختلفتين وانا الحمد لله كتبت الجملتين لحرصى على تدوين كل حرف فى الاغنية
الأخت ياسمين طلبت المقدمة ولكن انا كمان كتبت لكم المذهب
مع اطيب تحياتى

**ابوكارم** · #**216** 04/02/2010, 16h57

عدى النهار

**عاصم المنشاوى** · #**217** 05/02/2010, 05h50

الاصدقاء / وائل و حسام
آدى نوتة "الحب اللى كان"
كالعادة ناقلهالكم من كتاب تدوين الأستاذ محمد رجب
طبعا استاذنا العظيم عادل صمويل هو برضو الاصل واذا قال ذيع حنذيع
حبيت بس اخف الضغط عليه...لأن احنا مابنشبعشى
وزى ماهو قال التدوين عايز روقان بال ومعايشة اللحن
بالتالى خدوا دى تصبيرة الى ان : اما سيادته يجيز النوتة مع التعليق على اخطائها او الانتظار.
طبغا الاغنية تلحين المدهش دائما بليغ حمدى...ليه بقول مدهش لانه الملحن الوحيد فى تاريخ مصر اللى كتب كلمات اغانبه ....بتلاقى الظاهرة دى فى الشام ودول كتير لكن مش فى مصر...الحب اللى كان كلمات والحان ابن النيل بليغ حمدى
عزيزى عاصم
اشكرك لأنك قدمت النوتة دى بالذات
عليها الحاح كبير من كل الاعضاء انا من كذا شهر ابتديت اكتب فيها لكن جيت عند الجزء بتاع ( حبيبى كان هنا مالى الدنيا عليا ) ميادة الحنوى بتكسر الايقاع مش عارف ليه وكل ماتعيد الكوبليهات كلها بتغلط نفس الغلطة الظاهر هى حافظاها كده ( وانا بالذات عشان اهم شىء عندى الدقة الفوق المتناهية ما ريحنيش اللحن ) واعتقد والله اعلم انها سجلت الاغنية دى ايام ماكان بليغ متواجد فى فرنسا يعنى حد غيره تولى انتاج اللحن بس الحد ده ما كانش عنده الامانة الفنية مع الاسف انه ينفذ اللحن فى عدم تواجد بليغ يعنى انا اللحن تنفيذه مش عاجبنى يعنى انا طبعا تعاملت مع صديقى العزيز بليغ سنوات طويلة واول شىء ( مع انى ماعزفتش اللحن ده لأنه اتعمل على فرقة غير الفرقة الماسية ) اول شىء حسيته لما سمعت اللحن ان بليغ ماكانش موجود فى انتاج واخراج اللحن لأن انا طبعاً ليا نظرة غيركم بحكم التجارب العملية انا حسيت اللحن لحن بليغ بس مش متنفذ بروح بليغ
والكلمة دى ( روح بليغ أو روح الملحن معناها كبير يعنى كل لحن انا اول مرة بشوفه بيبقى شكل لكن فى البروفات الملحن بيغير ويحذف اجزاء ويضيف يعنى اللحن بيبقى شكل تانى هنا حسيت اللحن خام يعنى زى مابليغ طلعه اول مرة ) وحسيت الاورج واكل الجو اكتر من اللازم , المهم انا كنت بتردد كتير اكتب اللحن ده واشكرك الف شكر انك ريحتنى منه
وذيع ياعم على ضمانتى وليك عندى دستة جاتوه
وماتنساش انا قلت اى نوتة لو مش حاتضيف مش حاتخسر يعنى مثلا اسألأ روحك وهذه ليلتى انا حسيت ان لازم اكتبهم تانى لكن فيه نوت ممكن تمشى يعنى
مع اطيب تحياتى عادل صموئيل

**عادل صموئيل** · #**218** 05/02/2010, 07h17

احبائى
نظراً للإجماع منكم على طلب اغنية عدى النهار
اقدمها لكم
يعنى حظكم حلو كان مزاجى (صدفة معتدل ) خلال الاربع ساعات الماضية ( مش عارف ليه مش عوايدى اليومين دول ) لأن الاغنية دى اولاعزيزة عليا ثانيا كلها ادليب , والأدليب محتاج هدوء اعصاب وتركيز يعنى تمهيد للإبتكار والابداع
لأنه غير الجملة لما تكون على ايقاع بتبقى محتاجة افهمها واستوعبها واكتبها لكن الادليب بتبقى محتاجة ازاى افهمها واستوعبها 100% بعدين اخلق لها اسلوب اكتبها لأن هنا تفرق ممكن واحد يكتب الجملة الادليب يدمرها
هنا ملحوظة مهمة : قبل ماتحاول تعزف الاغنية دى بالذات عشان كلها ادليب لازم تكون حافظها 100% يعنى بتغنيها فى الحمام لحد ما الجيران يسمعوها ويتوجسوا منك خيفة يحسوا انك عايز تحارب ويعملوا حسابك يعنى لأن الادليب الكتير وانت بتقراه لازم انت تتحكم فيه ما تسيبش الحروف هى اللى تجرك لأن مهما كان اللى بيكتب وكمان ده مين عبد الحليم يعنى مش ممكن يتكتب زى ما بتسمعه ولكنه بيبقى تقريبى .
هنا انا ربنا وفقنى وعملت المقدمة على ميزان مع انها ادليب طبعا دى مدرسة من مدارس الكتابة وهى الجملة اللى ممكن تحتمل تتكتب على ميزان المفضل تتكتب على ميزان لسبب ان بدل لما تكون الاغنية 30 سطر ادليب ننقص عدد اسطر الادليب بقدر الامكان لأن الجملة اللى على ميزان اسهل كتير جدا فى القراءة
مع اطيب تحياتى

**عاصم المنشاوى** · #**219** 05/02/2010, 15h53

الاصدقاء
باعتذر عن ان نوتة الحب اللى كان ناقصة صفحة 3
وجل من لا يسهو
اما استاذنا الجميل عادل بك فأنا طبعت التعليق الجميل
بتاع سيادته لانه كان دمه كان زى العسل واحتفظت بيه فى دوسيه مخصوص
حاكم اصل الجماعة الفنانين دول ياسلام بقى لما الغزالة تبقى رايقة
تديك احلى ابداع
ربنا يخليك لنا ياستاذ.

**عادل صموئيل** · #**220** 07/02/2010, 18h21

احبائى
بمناسبة عيد ميلاد الفنانة الحبيبة شادية
اقدم لكم نوتة
ليالى العمر معدودة
اتمنى ان تحوز رضاكم مع اطيب تحياتى