دنيا الفوازير
فوازير فوازير فوازير
هيصه وهوجة فوازير
لوكان هدفك تبقى سفير
واللا تكمّل تبقى وزير
خش وسجّل فى الفوازير
فوازير فوازير فوازير
,,,,,,
دى بلدنا الحلوه ماهش غابة
مليانة تعالب وديابه
بانيـين الثروة على غلابه
بيجاهدوا ف حب الفوازير
فوازير فوازير فوازير
,,,,,,
برسالة عليهم ح يردّوا
م الفقرساعتها ح يعدّوا
وديونهم لازم ينسدّوا
ساعة مايحلوا الفوازير
فوازير فوازير فوازير
,,,,,,
ع النايل سات الفضائية
بنات حلوين ميّه الميّه
وحركات بتعلـّم ع المايّه
عايزينـّا نحل الفوازير
فوازير فوازير فوازير
,,,,,,
قرية وفيها اتنين سكان
واحد لص معاه غلبان
جاوب تكسب باكو لبان
واحجز دورك فى الفوازير
فوازير فوازير فوازير
,,,,,,
كفايه تحل الفزورة
وعنيك بتـبصّ ف سنيورة
ح تعرف مين صاحب الصورة
وتحصل على دبلوم فوازير
فوازير فوازير فوازير
,,,,,,
فوازير ياسلام سهله وحلوه
ح ترنّ علينا ساعة خلوة
وتعيش لك ساعة مع الغنوة
وتكرر تانى مع الفوازير
فوازير فوازير فوازير
,,,,,,
لو قلت لواحد سلامات
تضيف له عليها الخيارات
وتخللىّ كلامك علامات
وحياتك تصبح فوازير
فوازير فوازير فوازير
,,,,,,
وعلى الموبايل ياعنيّه
ح تلاقى رسايل يوميّه
فى السّحب ح تكسب عربيّه
ورصيدك راح ع الفوازير
فوازير فوازير فوازير
,,,,,,
عاوز تسأل فى الموضوع
بند قانونى ومش ممنوع
(كرونبو)يغيّر ع الاسبوع
وكل الدنيا تروح فوازير
فوازير فوازير فوازير
,,,,,,
فوازيرنا مهمّة وثقافيّة
وبتـبنى النهضة الفكريّة
ح تعرف لون الملوخيّة
وتدخل سحب مع الفوازير
فوازير فوازير فوازير
,,,,,,,
شرط عميلنا يكون مجنون
ناصب شبكة فى التليفون
رقمنا ف شاشة التلفزيون
وجايزة بتكبر فى الفوازير
فوازير فوازير فوازير
,,,,,,
الرحمة ياسادة العقل احتار
رهنّا الارض وبيعنا الدّار
وما شوفنا قريب ابدا ولا جار
بيكسب مرّه من الفوازير
فوازير فوازير فوازير
,,,,,,
الفرصة معاكوا يامحميّين
من دستورنا وم القوانين
ورزق الهبل على المجانين
تعملوا جامعة للفوازير
فوازير فوازير فوازير
,,,,,
|
العرض الشجري