من اجلكم رشحت نفسى(هريدى)
اعداد\سعد الشرقاوى
]
سنــين ظلام مّرت عــلينا
والشمس غابت عــــنـّــنا
والظلم جانا وعــاش معانا
والفتـنه سكــــنت أرضنا
ناس من بعيد بيتاجروا بينا
وبيوقــّـعـونا ف بعــضنا
وتوهنا على إيدهم زمان
وحاربنا خـــالنا وعــّمنا
وشقــّوا فى الوحده صفوف
وشتـّـتوا من شـــــــملنا
وزرعـــوا بإديهم خـراب
عــــلشان نقـتـّـل بعــــضنا
وكــتموا صوتـنا في الصّد ور
وعشنا غربا ف أرضنا
وسمّعونا أحـــلى الكــــــلام
وحـــــــيّرونا ف أمرنا
شيخ العرب لمّا هرب
كلمتـنا ماهش منـّـنا
واللىّ هرب لمّا اغتصب
ونهب تراثـنا ومجدنا
وبلاش نقول كل العرب
خلينا فى العزبه هنا
دا مرض سريع الإنتشار
أعراضه بانت عندنا
وتاريخـنا واضح من زمان
فى الإعتماد على نفسنا
حتى العلام الليّ احـــنا فيه
شاريـيـنه بفلوس أهـــلنا
وهدينا للصحــّــــه المكان
والمبنى شامخ عـــــندنا
مرضيــــتـش تدّينا العلاج
ولا بالدكاتـــــــره تمـّدنا
ولا شوفنا يوم احتاجنا فيه
لدخـــــيل يوحّـــد صفـّـنا
بجــــــميل يعلـّم بيه عــلينا
ونقــــــبلوه عـلى دّمـنا
أهل البلد متجمّعــين
والقاعده كات عندى هنا
فى التوته كانوا ملمومين
والإتفاق كان عندنا
قالوا الهريدى نرشـّحوه
اهو يبقى واحد منـّـنا
بلسان فصيح للمسؤلين
يقوم ويطلب حقــّـنا
كتـبنا إسمه ع الغيطان
وصورته على لحف القـنا
فى يافطه عاليه ع الحيطان
رافعينها فوق المأذنه
أبو الشهامه ومش غريب
وأبوه أبونا وعّمنا
كان يوم نجاحه أحلى عيد
والفرحه ماليه قـلبنا
وانزاحت الغـمّه خـــلاص
والنور ح يملى أرضنا
والميّه تطلع فى العــلالى
وآلـو . وآلى ف حيّـنا
وطريق يوصّـل للغـيطان
كـل الامان بقى عــندنا
عـشان صحـينا وبعـنيـنا
اخــترنا واحــــد مـنـّـنا
وبيه نكـــيد كل الأعادى
ونرفـــعوه عـلى كـــتفنا
ونأيـــّــدوه وننجّـحــوه
لو حتى ف محــافظة قنا
ونكــــسّروا كل القـــيود
وبـيه ح نهجــــر سجـننا
ونعوّضوا كل اللىّ راح
ونبنى جــامعه ف أرضنا
والهريدى ياناس حبيـبنا
ونعــرفــوه من صغــرنا
شارك معانا فى الكــفاح
وداق مرارة صــبرنا
طول عمره عايش فى الظروف
طول عمره شايف هــمنا
وبيواســـــينا فى الهموم
وبيــشاركــنا ف فــرحنا
وبينسى نايبه عشان حبايبه
وان غبنا يسأل عنـّـنا
ولــو بروحـــنا نأيـّـدوه
يبقى افتخار وشــرف لنا
وبعد منها بشهر واحد
ترك بلدنا وحيـّـنا
تلفونه دايما مش متاح
و العدّه ضاعت من سنه
لو فيه وظيفه واللا ميزه
واخدها يوم على حسّـنا
يروح يبـيعها للغريب
ويسيـبنا نهرى ف بعضنا
فى البرلمان عمّال يسقــّـف
وسقـفه واجع قلبنا
فاكرينه بيسقــّف معانا
أتاريه بيهتـف ضّدنا
والصحرا لما يقسّموها
نقول ح ناخد حقــّـنا
أتارى كومه ماكفــّاهوش
جىّ يزاحمنا ف أرضنا
وروحنا يوم نسأل عليه
نشوفوا إيه عمل لنا
قابلونا بسيادة الغـفـير
قال الهريدى مش هنا
رجعنا وف وسط الطريق
ماشيـين بنـندب حظـّـنا
وبقالنا كام دوره ياناس
عايشين نجـّرب بختـنا
وكل مره نقولوا بكره
ح نعيشوا يوم من نفسنا
وييجى بكره يجر بكره
كأنه بايت من سنه
أنا رأيى آخد حد منكم
يقدر يشيل يوم همنا
على الإيميل يبعت بطاقته
ويبقى نائب عنـّـنا
من اجلكم رشحت نفسى(هريدى)
العرض الشجري