الليلة الكبيرة

[oldisgold]

إلى الأستاذ جابر اقول والله أنا من أشد المعجبين بعلمك الغزير وبقوة ردودك الجادة الصارمة، وأتمنى صداقتك والله على المستوى العام بالمنتدى والمستوى الشخصى أيضاً، ولك أقول أنا مسن مثلك لكن بـ 54 عام فقط وعشت أيام الزمن الجميل الثرى بكل مافيه، ويعجب أبنائى بما يعجبنى لأننى أعتقد أن القديم ذهب لا أقصد ذهب بمعنى راح وولى ولكن ذهب شقيق الفضة ، وهاهو التصحيح الأخير بعد تعديلك الرائع وأنا أشكرك لردك الجميل رغم تخوفى من شدتك وصراحة ردودك فهذا إكليل على رأسى أعتز به منك:

قبة سيدنا الولي دول نوّروها
ما أحلى البيارق والناس بيزروها
قبة سيدنا الولي في الجو عاليا
ما احلى البيارق لما دوّروها
بتاع الحمص يقول: حمص حمص دا اللي ما ينقص ع النار يرقص (4)
يرقص يرقص ويقول .. اللي شاف حمّص ولا كلش حب وأتلوع ولا ولا طلشي

تضحك الفتاة وتقول: يسترك هات حبة بقرش
يضحك الشباب هأ .. هأ .. هأ .. هو
حمّص .. حمّص .. حمّص
حمّص .. حمّص .. حمّص
اسعى .. اسعى .. اسعى
حمّص .. حمّص .. حمّص
حمّص .. حمّص .. حمّص
اسعى .. اسعى .. اسعى .. اسعى

مصوّراتي يقول: خدلك صورة ستة في تسعة
اسعى .. اسعى .. اسعى .. اسعى
خدلك صورة ستة في تسعة
اسعى .. اسعى .. اسعى .. اسعى
يا سي عجورة النار خسعة

رجال وبائعين في المولد يقولون :
الله .. الله .. الله عجمية ... باللوز
الله .. الله .. الله طعمية ... أراجوز
الله .. الله .. الله .. الله .. الله .. الله

الأراجوز يقول ومعه الأطفال :
الليلة الكبيرة يا عمي والعالم كتيرة
ماليين الشوادر يابا من الريف والبنادر
الليلة الكبيرة يا عمي والعالم كتيرة
ماليين الشوادر يابا من الريف والبنادر
دول فلاحين ودول صعادية
دول من القنال ودول رشايدة
الليلة الكبيرة يا عمي والعالم كتيرة
مالين الشوادر يابا من الريف والبنادر

حوار بين الأراجوز والعمدة
العمدة : يا حضرة الأراجوز قولي
الأراجوز : نعم يا عمدة عاوز إيه
العمدة : منين يروحو المتولي ؟
الأراجوز : امدح نبينا وصلي عليه
العمدة : طب اللهم صلي عليه
الأراجوز : تمشي كده على طول على طول لحد ما تلاقي عمارة
العمدة : لحد ما ألاجي عمارة
الأراجوز : تكسر يمين تلقى بتاع فول دكانته على ناصية حارة
العمدة : دكانته على ناصية حارة
الأراجوز : تدخل يمينك وشمالك شارعين وفي التالت تكسر
العمدة : شارعين وفي التالت أكسر
الأراجوز : على اليمين واخد بالك .. وتمشي على طول تتمخطر
العمدة : وأمشي على طول واتمخطر
الأراجوز : تفضل كده تمشي وتلف .. وتخش من مطرح ما طلعت
العمدة : واخش من مطرح ما طلعت
الأراجوز : ولما تلقى مقلة لب
العمدة : ولما ألجى مجلة لب
الأراجوز : تعرف بأنك تهت وضعت
العمدة : ااهاا دي وصفة سهلة ..
الأراجوز : سهلة أوي
العمدة : ودي وصفة هايلة
الأراجوز : مع السلامة .. مع السلامة .. مع السلامة يا ابو عمة مايلة
الاطفال : مع السلامة يا ابو عمة مايلة .. مع السلامة يا ابو عمة مايلة

رجل يدعو الشباب للتصويب ببندقية في المولد يقول :
فتّح عينك تاكل ملبن فينك فينك .. تاكل ملبن
فتّح عينك تاكل ملبن فينك فينك .. تاكل ملبن
أوعى لجيبك ده العيب عيبك
قرّب .. جرّب .. نشّن وسطن ايدك .. وسطن اضرب ..
ضرب أحد الشباب بالبندقية .. وأصاب الهدف .. فقال له صاحب البندقية :
يحميك يا ابني تبقى غالبني
قرّب خدلك حتة ملبن
قرّب خدلك حتة ملبن
قرّب خدلك حتة ملبن

رجل يبيع العاب للأطفال يقول :
فوريرة للعيل يا ابو العيال ميّل
خدلك سبع فرارير
زمّارة شخليلة
عصفورة يا حليلة
طراطير يا واد طراطير
طراطير يا واد طراطير
طراطير طراطير طراطير
طراطير طراطير طراطير

في السيرك رجل يقول :
الليلة .. الليلة السيرك تعالو دي فرجة تساوي جنيه قولو هيه
هيه .. هيه .. هيه
بمناسبة هذا المولد يا ولاد بورنامج سواريه قولوا هيه
هيه .. هيه .. هيه
في السيرك شجيع يهجم على السبع ويركب دوغري عليه قولو هيه
هيه .. هيه .. هيه
وبنات قمرات زي الشربات حلوين مش عارف ليه قولو هيه
هيه .. هيه .. هيه
وكمان بلياتشو تعالو اسمعو ناتشو وشوفو حيعمل ايه قولو هيه
هيه .. هيه .. هيه
هيه .. هيه .. هيه
هيه .. هيه .. هيه

رجل يستعرض عضلاته في السيرك .. أو ربما في ركن آخر على أرض المولد يقول :
أنا شجيع السيما أبو شنب بريمة
أنا شجيع السيما أبو شنب بريمة
أول ما اقول علي هب
واصرخ لي صرخة
ها .. ها .. ها
السبع يتكهرب ويبقى فرخة
حالاً بالاً سأصارع أسد أنما إيه متوحش
وحخلي وجهه شوارع
تصقيفة يا ناس ميصحش
تصقيفة يا ناس ميصحش
الاسد وصل .. ويقول الرجل :
أهو جه أهو جه .. تصقيفة بقى
أهو جه أهو جه .. تصقيفة بقى
تصقيفة أومال .. تشجيعة أومال
تصقيفة أومال .. تشجيعة أومال
تعالى لالي اللاي اللالي يا حبيبي تعالى لالي
تصقيفة أومال .. تشجيعة أومال
تصقيفة أومال .. تشجيعة أومال
تعالى لالي اللاي اللالي يا حبيبي تعالى لالي

فرقة موسيقية عابرة .. يقول رجل فيها :
دقي يا مزيكا

واحد واقف بشوية أكل .. سمك .. منبار .. فشة في المولد يقول :
السمك مقلي .. كل وبرقلي
صنف زي الفل
استخار واختار
فشة أو منبار
يلا يلا سمي وكل
يلا يلا سمي وكل
يلا يلا سمي وكل
يلا يلا سمي وكل

فتاة تغني وتدعو الأمهات ليباركن أولادهن وتقول :
يا أم المتطهار رشي الملح سبع مرات
يا أم المتطاهر رشي الملح سبع مرات
في مقامه الطاهر خشي وقيدي سبع شمعات
يا عريس يا صغير علقة تفوت ولا لحد يموت
لابس ومغير وحتشرب مرقة كتكوت
يا عريس يا صغير علقة تفوت ولا لحد يموت
لابس ومغير وحتشرب مرقة كتكوت
يا أم المتطهار رشي الملح سبع مرات
يا أم المتطاهر رشي الملح سبع مرات
في مقامه الطاهر خشي وقيدي سبع شمعات

بالذمة ده سابع عيّل مزفوف من وقت قليل
مولد شيلاه يا معلم .. عقبال أولادك
كلم

عالقهوة رجل القهوة يقول :
واحد مظبوط واتنين مصري عالنار حاضر جايلك دغري

فنان يغني على القهوة ويقول :
مسا التماسي .. مسا التماسي يا ورد قاعد على الكراسي
مسا التماسي .. مسا التماسي يا ورد قاعد على الكراسي

رجل جالس على القهوة يقول : هات شاي يا دقدق
دقدق رجل القهوة يقول : عيني وراسي
سمعنا يا ريس حنتيرة
للصبح معاك السهيرة
الجالسون على القهوة يقولون : سمعنا .. سمعنا .. سمعنا .. سمعنا

الريس حنتيرة يغني ويقول :
يا غزال .. يا غزال العشق حلال دوبتني دوب خلتني خيال خيال
يا غزال .. يا غزال العشق حلال دوبتني دوب خلتني خيال خيال
يااااااه .. يا شفتك فص فراولة .. وانا لا قوة ولا حولا
دوبتني قلبي على لولاه .. آه يا غزال
يا غزال العشق حلال
يـــــــــــــــــــــا ليل
يـــــــــــــــــــــا ليل
يارب يا عالم بالحال .. تهدي حبيبي ويصبح عال
يارب يا عالم بالحال .. تهدي حبيبي ويصبح عال
وأغني وأرجع بالموال .. وأجول يا غزال يا غزال
يـــــــــــــــــا ليل

صاحب القهوة يقول: بغضب
وقّف يا ريس حنتيرة فيه ناس هنا قاعدة كتيرة
ولا حد قال هات تعميرة ولا واحد شاي
آه .. اللي حيطلب راح يقعد ولا ما يطلبش يبعد
رجل جالس على القهوة يخرج بسبب ما قاله صاحب القهوة ويقول :
يلا بنا نخرج يا مسعد شارع التورماي
يكمل الريس حنتيرة غنائه ويقول :
يــــــــــــا ليل .. كمان .. يـــــــــــــــــا ليل
يا غزال يا غزال العشق حلال دوبتني دوب خلتني خيال خيال
يا غزال يا غزال العشق حلال دوبتني دوب خلتني خيال خيال

صاحب لعبة لأظهار القوة يقول :
ورينا القوة .. يا ابني انت وهو
مين عنده مروّه وعاملي فتوة
يقدر بقدارة على زق الطارة .. ويفرقع بومة
رجل وقع في الفخ وأعلن عن دخوله للعبة وقال :
وسع .. وسع .. وسع
أنا أزق الطارة وأضرب مية بومة
ده أنا الأسطة عمارة من ضرب شاكمبا
صيتي من القلعة .. للقلعة لسويقة اللالا .. لالالا
صيته من القلعة . ها ها هأ لسويقة اللالا ها ها هأ
صيتي من القلعة لسويقة اللالا أنا واخد السمعة
صاحب اللعبة يقول : طيب يلا تعالى
الرجل : لا يا عم سعيدة دي البدلة جديدة
صاحب اللعبة بتهكم : هأ هأ هأ سعيدة يا ابو بدلة جديدة
الأطفال يقولون أيضا بتهكم : هأ هأ هأ سعيدة يا ابو بدلة جديدة

الرجل الذي ترك القهوة السابقة فاراً من كلام صاحبها يقول وقد وجد قهوة أخرى ومعه صديقه مسعد :
إوعد يارب إوعد .. إوعد يارب إوعد .. إوعد يارب إوعد .. إوعد يارب إوعد ..
آدي كمان قهوة .. يلا بينا يا مسعد .. ندخل على سهوة .. آيوة على سهوة

ودخلو القهوة .. وكانت هناك من تغني وتقول :
طار في الهوى شاشي وانت متدراشي
يا جدع
طار في الهوى شاشي وانت متدراشي
يا جدع
طرفه شاورلي شاورلي عليك .. حكم الهوى ماشي
حكم الهوى ماشي

الرجال في القهوة يرددون :
يا حلاوة .. يا حلاوة .. يا حلاوة .. يا حلولو
هوا العصاري .. يا هوا
على سطح جاري .. يا هوا
خدني ورماني رماني عليك ولا انت داري
طار في الهوى شاشي وانت متدراشي
يا جدع
طار في الهوى شاشي وانت متدراشي
يا جدع
طرفه شاورلي شاورلي عليك .. حكم الهوى ماشي
حكم الهوى ماشي
يا حلاوة .. يا حلاوة .. يا حلاوة .. يا حلولو
آآهين يا ناري .. يا ناري
منك يا جاري
آآهين يا ناري .. يا ناري
منك يا جاري
خني ورماني .. رماني عليك هوى العصاري
طار في الهوى شاشي وانت متدراشي
يا جدع
طار في الهوى شاشي وانت متدراشي
يا جدع
طرفه شاورلي شاورلي عليك .. حكم الهوى ماشي
حكم الهوى ماشي

صاحب القهوة الجديدة .. يؤكد على الموجودين .. ويقول كصاحب القهوة السابقة :
ماشي .. ماشي .. ماشي كلامك آه
اللي حيطلب راح يقعد واللي ميطلبش يبعد

الرجل يقول لصاحبه مسعد :
يلا بينا نخرج يا مسعد شارع التورماي
طرفه شاورلي شاورلي عليك .. حكم الهوى ماشي
حكم الهوى ماشي

إتنين في المولد اكتشفوا وجود اقارب لهم من نفس بلدتهم يقول احدهم :
ناس من بلدنا هناك أهم
روح يا إبراهيم إندهلهم
سلامات .. سلامات .. سلامات على البلديات

منشدين دينيين يقول واحد منهم :
ليلتكم أنس وجلجلة .. جلجلة .. جلجلة ..
أنشد ولعلع يا وله .. يا وله .. يا وله
شفت في منام صاحب المقام .. ده أوبها .. أوبها .. أوبها
ويمامة حايمة عليه تسبح ربها
يا نور النبي .. يا نور النبي .. يا نور النبي
ميّلت فوق يده وقلت أحبها .. حبها .. حبها
صحوني من النوم .. خدت بعضي ودني جاي
وبعودة .. وبعودة

إمراة تبحث عن طفلتها التي تاهت في المولد وتقول :
يا ولاد الحلال .. بنتي تايهة طول كدة
رجلها الشمال فيها خلال زي ده

رجل يقول :
زحمة يا ولداه .. كام عيّل تاه
ونردد في النهاية ونقول أن المولد هو
الليلة الكبيرة يا عمي والعالم كتيرة
مالين الشوادر يابا من الريف والبنادر
الليلة الكبيرة يا عمي والعالم كتيرة
مالين الشوادر يابا من الريف والبنادر

والنهاية آذان الفجر والصلاة ويقول المؤذن

الله أكبر الله أكبر .. الله أكبر الله أكبر

[khogaahmed]

الليلة الكبيره
رؤيه.

Drums / شريف خضر.

Keyboards , Bass , Vocal , Ac Guitar / يحيى غنام .

Trombone / تامر وحيد .

عود / إسلام فاروق .

Accordion / احمد نصر .

كمان / يوسف نديم .

قانون / شريف كامل .

ناى / محمد فتحى .

إيقاع شرقى / مدحت .

غناء / سلمى صباحى ، سارة مجدى ، إسلام فاروق ، حازم رشيد .

غناء منفرد / نهال ، دعاء ، محمد ، معتز ، محمد .

Mix / محمد فوزى@Empire Studios

[عمر التهامى]

المشاركة الأصلية كتبت بواسطة عاشقة النيل

بجد بشكركم جدا ، أوبريت الليله الكبيره من أروع الأعمال الفنيه اللى اتقدمت فى زمن الفن الجميل فالرائعان صلاح جاهين وسيد مكاوى رحمهما الله أبدعوا فى هذا العمل ، وما اعتقدش أبدا ان فى حد مبيحبش يسمع الأوبريت ده ، لأنه يمثل ذكرى خاصه لكل شخص ، بجد شئ رائع ، بس كان عندى سؤال ، وهو معنى كلمة( البيارق ) ايه معناها وايه المقصود بيها فى الأوبريت ؟؟؟

البيارق على ما اعتقد هى الاعلام، و المقصود هو الاعلام الملونة التى يحملها الناس فى الموالد والله اعلم

[عادل صموئيل]

احبائى
اشكركم على هذا العمل الجميل مع تجميع عدة تسجيلات
انا اخ عزيز طلب منى تدوين هذا العمل ومع انه طويل جدا جدا وكله وقفات ومشكال تدوينية
إلا ان حبى لهذا العمل يجعلنى اتجاهل التعب وابدأ فى تدوينه
واسعدنى جدا ان ادونه من التسجيلات الموجودة فى هذا الموضوع مع اطيب تحياتى

[monyma7moud]

ياجماعة.بعد اذنكوا عايزه اعرف مين اللى بيغنى انا شجيع السيما. فريرة للعيل. الليلة الليلة السيرك تعالوا. فتح عينك تاكل ملبن. ارجو الرد ضرورى

[monyma7moud]

طيب انا عايزه اطلب مطربين انا شجيع السيما و فريرةللعيل و فتح عينك والليلة الليلة السيرك تعالوا. فى اوبريت الليلة الكبيرة ارجو الرد ضرورى

[عامر الدليمي]

المشاركة الأصلية كتبت بواسطة monyma7moud

ياجماعة.بعد اذنكوا عايزه اعرف مين اللى بيغنى انا شجيع السيما. فريرة للعيل. الليلة الليلة السيرك تعالوا. فتح عينك تاكل ملبن. ارجو الرد ضرورى

الاخوة الاعزاء :تعقيبا على سؤال الاخ الكريم هل بامكان الاخوة في منتدى سماعي اعداد تقرير بتفاصيل الاوبريت مع دور كل من المشاركين ...حمص حمص مثلا بصوت محمد رشدي وهكذا ورينا القوة بصوت شفيق جلال وهكذا ... اعتقد ان سعاد مكاوي شاركت في هذا العمل ايضا

[Yasser AlSebaee]

تسجيل للشيخ سيد وعوده لليلة الكبيرة, لا اظنه موجود بالمنتدى.

[el.3ndlib]

السلام عليكم ورحمة الله وبركاته


تحية لجميع الاخوة الافاضل بمنتدى سماعي

حقيقي ذكريات جميلة واتذكر وانا طفل كانوا يعرضوها على القناة الاولى في المناسبات اول التسعينات "في سيناء هذه الفترة كان لا يوجد لدينا ارسال الا للقناة الاولى والثانية فقط" والدنيا كانت حلوة ولا كان ظهر دش ولا عك ايااااااااام حلوة والله

وجيل مواليد الثمنينات آخر جيل تربى "فنياً"على التراث الجميل

هل احد يعرف ما المقصود بـ "البيارق" في الاوبريت ؟؟

[د.حسن]

المشاركة الأصلية كتبت بواسطة el.3ndlib

السلام عليكم ورحمة الله وبركاته
هل احد يعرف ما المقصود بـ "البيارق" في الاوبريت ؟؟

وعليكم السلام ورحمة الله وبركاته
البيارق جمع لكلمة "بيرق"
وهى كلمة تركية بمعنى
العَلم أو الراية
مع تحياتى