احبائى
اعتذر للغياب عنكم لظروف قهرية اكبر من طاقتى ولكن فى اى وقت انا احاول ان اقدم لكم فنى يعنى خلال الظروف القهرية لازم اختلس اى وقت لكى امارس فنى والا اموت
اليوم اقدم لكم عمل من اروع اعمال فريد الاطرش
لحن الخلود او بنادى عليك
هنا فيه شىء جديد ان عملته احب يعجبكم
اننتم سمعتم اللحن المقدمة فيها جزء كبير ادليب , وانا لما بقدم اللحن هنا مش بقدمه للأسرة الصغيرة فى المنتدى فقط ولكن بقدمه كوثيقة للذكرى والتاريخ يعنى شىء احب الناس تفتكرنى بيه بعدين يعنى اتمنى اى وقت فرقة ف اى دولة تعزف النوت دى , ولما بقدم ابتكارى او عصارة افكارى بفكر فى اشياء ممكن الناس ماتحسش بيها دلوقت , لأن عملى مع العمالقة علمنى انك تفكر لقدام وقت طويل , من اخطر المشكال اللى بتواجه تقديم اعمال زمن الفن الجميل هى الفزلكة وان اللى بيقدم العمل بيتدخل فيه مع ان المفروض انه يقدمه زى ماهو الاصلى , والخطورة ان الادليب بيبقى قابل للشد والجذب يعنى ممكن نطول فى جزء ونقصر فى جزء عشان مافيش ميزان محدد وده شىء خطير يعنى ممكن واحد يتدخل فى الأدليب بذوقه يدمر احساس فريد وهنا اللحن كله بيتدمر
ان الشىء اللى عملته هنا عملت الادليب على ميزان اولا تسهيلا فى العزف وثانيا عشان احدد اللى بيعزف النوتة بقدر الامكان لأن اللحن ده غالى عليا اوى غير العشرة والعيش والملح اللى بينى وبين فريد الله يرحمه , كمان عملت الآهات فى المذهب على ميزان
وموسيقى الكوبليهات
اتمنى ان تعجبكم طريقتى لأن الجمل دى تعبتنى جدا ازاى اخلى الادليب على ميزان , يعنى كتابة الادليب اسهل , انا كنت ممكن افكر فى الجملة يومين احسبها تيجى كده ولا كده وميزان كان عملللية معقدة لكن افتخر باللى عملته وتمنى يعجبكم
انا آسف تانى للغياب واشكر كل من سأل عنى ( نثراً وشعراً ) وطبعا حتى انتم حسيتم ان فى اضيق ظروفى مش بنساكم وباجى معايا حاجة حلوة
وانتظروا منى الهدية القادمة وحخليها مفاجأة ( حاتعجب وائل ) مع اطيب تحياتى
شكرا لك اخي صالحي على ضم صوتك الى صوتي واليك نوتة عودت عيني وانا اعلم ان نوتة الاطلال موجودة لكنها مستحيلة العزف بهذه الطريقة المكتوبة بها وانا بصراحة عزفتها كلها لكن الطباعة كانت سيئة جدا-- والعديد من النوتات التي ينوتها اخونا عادل موجودة لاخرين لكننا نطلبها منه شخصيا لسهولة طريقته المبدعة في التنويت حتى يستطيع الكل عزفها ولكي تعم الفائدة على الكل اشكرك عزيزى وائل على تعبك والنوتة حلوة ومش صعبة اوى او على الأصح ما تتبسط اكتر من كده عشان اللحن ما يفقد شىء انا رديت على سؤالك عن كامل الاوصاف وعملت نموذج ممكن ترجع لرسالتك السابقة وتشوف وعلى فكرة لو نوتة الاطلال موجودة ممكن ورينى المقدمة على الأقل اشوفها لأن المقدمة نفسها صعبة جدا وجايز صعب تتبسط اكتر من كده يعنى لو شفتها حاقول لك رأيى وانتظر المفاجاة القادمة عادل صموئيل
اخي واستاذي العزيز عادل اشكرك على ردك واهتمامك وعلى كل مجهوداتك وانا اطلعت على ملف كامل الاوصاف والف مليون شكر وتفضل نوتة الاطلال وانا نفسي اعزفها من شغلك وعارف ومتاكد انها تحدي كبير وانت تخصص كل الاعمال الصعبة وبالذات الاطلال دي هتكسر الدنيا بجدعارف ليه؟؟؟؟؟؟ مش لانها للعملاق السنباطي بس لا - لكن لانها صنفت في فرنسا في احد الجمعيات الفنية من افضل عشرة اغاني والاكثر مبيعات في القرن العشرين-- بس احنا العرب بنحب الاطلال مش عشان فازت في التوب تن لا بل لانها جزء اساسي من تاريخنا وثقافتنا الشرقية -- فارجووووووووووووووووك كل الرجا تفكر فيها بجد وتعمل المستحيل في تنويتها لكي تقدمها كاملة لجميع محبيك والف شكر ومنتظر مفاجاتك على نار ملاحظة: استاذ عادل وغلاوتك انا عزفت النوتة دي زي ماهي كده وعزفتها كلها وبصراحة هي كاملة ومكتوبة حلو اوووووي ومش ناقصة ولا نغمة بس طبعا طريقتك في التنويت اسهل والصعوبة التي واجهتني فقط هي الطباعة السيئة جدا وبعض النغمات لا ترى بسهولة --وانا لا انكر انها صعبة وبالاخص المقدمة الرائعة والاطلال من غير المقدمة متبقاش الاطلال --بس برضو واثق تماما ان اللي كتبها مش احسن منك صحيح هو لم يترك ولا لازمة ولا ربع نغمة الا وكتبها بس انت ستتفوق عليه بالسهل الممتنع واكيد هتحط كل اللزم فيها وهتحط كل خبرتك واحساسك العالي عشان كده انا طلبتها منك وتحياتي لك واهنيك مقدما لانني عارف ومتاكد انك ستنوتها دي مش توريطة بس والله بحبك وبحب اعمالك العملاقة بالذات
اخى العزيز وائل
انا شفت النوتة وهى مكتوبة معقدة جدا يعنى اللى كاتبها كاتب الحليات بطريقة صعبة جدا جدا على المبتدئين وانا اعتقد انه مش من مصر لأننا ف مصر معظمنا بيكتب اسهل من كده واقول لك على سر فى الأطلال بالذات انا ماعزفتش مع ام كلثوم الاطلال لما غنتها اول مرة لكن بخبرتى بعد كده وتعاملى مع السنباطى اكتر من عشرين سنة حقول حاجتين لو ان السنباطى كان طلب منى ادون له الاطلال كان حايملينى بالعود اللحن سادة وبدون حليات بتاتاً إلى الحروف التى تمثل صلب اللحن لأن لو ملانى بالحليات حاتطلع شىء مقارب للنوتة اللى انت ارفقتها واى فرقة كانت حاتلخبط فيها للصبح , ثانيا طريقة السنباطى وبالذات مع فرقة ام كلثوم انه كان بيحفظ بالعود سماعى مش بالنوتة ( لأن ام كلثوم عمرها ما اشتغلت بالنوتة ) اولا كان حايحفظنا اللحن على العود وسادة واكرر سادة يعنى من غير الحليات كلها بعدين لما يحس ان كل عازف حفظ اللحن 100% يمسك العود تانى ويقول احساسه وهنا الحليات بتطلع تلقائية وبتعتبر تجويد جميل وممتع للشىء اللى انا حفظته لكن لو ابتدأ التحفيظ بالحليات كان حايبقى اللحن معقرب ومكعبل ومش ممكن حايطلع زى ما انت بتسمعه وللعلم دى من مدارس العمالقة زى ما تبنى عمارة الاول بتبنيها عشر ادوار وتتشطب بعدين نبيضها ونزوقها يعنى مش بتبنى اول حائط وتبيضه وتركب عليه ورق الحائط , عموما انا حضع اللحن ده م ان تبسيطه صعب جدا فى خطتى وان شاء الله ربنا يكرمنى ويفتح ذهنى واقدر اعمله زى ما انتم متخيلين
مع اطيب تحياتى عادل صموئيل
احيائى
والآن جاءت اللحظة التاريخية الحاسمة
والمفاجأة المنتظرة
اليكم رائعة عبد الوهاب
الجندول
طبعا انا حاولت تبسيطها لأقصى درجة ممكنة ولكن لابد من يحاول عزفها يكون حافظ التسجيل عشان الجودة
اتمنى ان تسعدكم
Re : رد: طلبات نوتة
رد: طلبات نوتة
العرض المتطور
